ដោយ វ៉ែន សុមេធ
2018-02-07
លោក រ៉ុង ឈុន ទីប្រឹក្សាសមាគមគ្រូបង្រៀនកម្ពុជាឯករាជ្យ និងជាអតីតសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ផ្ដល់បទសម្ភាសន៍ដល់អ្នកកាសែតកាលអំឡុងខែមេសា ឆ្នាំ២០១៥។
Photo: RFA
សមាគមគ្រូបង្រៀនឯករាជ្យ បានដាក់លិខិតមួយ នៅព្រឹកថ្ងៃទី៧ កុម្ភៈ ដើម្បីស្នើសុំឲ្យរដ្ឋមន្ត្រីក្រសួងអប់រំ យុវជន និងកីឡា ពិនិត្យឡើងវិញ ចំពោះករណីលុបឈ្មោះ លោក រ៉ុង ឈុន ចេញពីមន្ត្រីអប់រំ។ សមាគមមួយនេះ ប្រកាសថ្កោលទោសរដ្ឋមន្ត្រីក្រសួងអប់រំ ចំពោះករណីលុបឈ្មោះមន្ត្រីអប់រំដែលហ៊ានតវ៉ាទាមទារផលប្រយោជន៍ឲ្យគ្រូបង្រៀន។
ប្រធានសមាគមគ្រូបង្រៀនឯករាជ្យ អ្នកស្រី អ៊ុក ឆាយាវី ហៅការលុបឈ្មោះ លោក រ៉ុង ឈុន អតីតសមាជិកគ.ជ.ប និងជាស្ថាបនិកសមាគម ចេញពីមន្ត្រីក្រសួងអប់រំថា ជាការគំរាមកំហែងដល់គ្រូបង្រៀន ជាសមាជិកសមាគមគ្រូបង្រៀនឯករាជ្យដទៃទៀត។ អ្នកស្រី អ៊ុក ឆាយាវី ហៅការលុបឈ្មោះ លោក រ៉ុង ឈុន ជារឿងអយុត្តិធម៌ និងជាការយាយី គំរាមកំហែងលើមន្ត្រីរាជការ ដែលហ៊ានចេញមុខតវ៉ា ផលប្រយោជន៍គ្រូបង្រៀន។ អ្នកស្រី អ៊ុក ឆាយាវី អះអាងថា មានមន្ត្រីធំៗជាច្រើន ជាបក្សពួករបស់អ្នកធំ ដែលអាចធ្វើការបានច្រើនកន្លែងក្នុងជួររាជការ ខណៈដែលមន្ត្រីខ្លះទៀត មិនដែលទៅធ្វើការសោះ នៅតែមានឈ្មោះ ទទួលបានប្រាក់ខែពីរដ្ឋ។ «»
លោក រ៉ុង ឈុន ត្រូវបានរដ្ឋមន្ត្រីក្រសួងអប់រំ លោក ហង់ ជួនណារ៉ុន លុបឈ្មោះចេញពីនាយកដ្ឋានស្រាវជ្រាវវិទ្យាសាស្ត្រ នៃក្រសួងអប់រំ ចាប់ពីថ្ងៃទី១ ខែកុម្ភៈ ឆ្នាំ២០១៨។ លោក ហង់ ជួនណារ៉ុន ក៏បានចេញលិខិតស្ដីបន្ទោស ដល់មន្ត្រីក្រោមឱវាទរបស់ខ្លួនចំនួន ២៤រូប ថា ខ្ជីខ្ជាមិនចេះតាមដានការងាររបស់លោក រ៉ុង ឈុន និងបុគ្គលិកដទៃទៀត។
អ្នកនាំពាក្យក្រសួងអប់រំ យុវជន និងកីឡា លោក រស់ សាលីន ប្រាប់សារព័ត៌មានក្នុងស្រុកថា ការសម្រេចលុបឈ្មោះ លោក រ៉ុង ឈុន ដោយសារ លោក រ៉ុង ឈុន បានដាក់ពាក្យចូលបម្រើការវិញ ហួសពេលកំណត់។ ប៉ុន្តែ លោក រ៉ុង ឈុន ចាត់ទុកការសម្រេចនេះ គឺជារឿងគួរឲ្យអស់សំណើច និងពាក់ព័ន្ធទៅនឹងរឿងនយោបាយ ព្រោះការលុបឈ្មោះលោកធ្វើឡើងបន្ទាប់ពីលោកលាឈប់ពីសមាជិកនៃគណៈកម្មាធិការជាតិរៀបចំការបោះឆ្នោត ព្រោះលោកយល់ថា ស្ថាប័ននេះបាត់បង់ឯករាជ្យរបស់ខ្លួនហើយ។ សមាគមគ្រូបង្រៀនឯករាជ្យ ព្រមានវិធានការតវ៉ាបន្ថែមទៀត ប្រសិនបើរដ្ឋមន្ត្រីក្រសួងអប់រំ មិនព្រមពន្យល់ហេតុផលត្រឹមត្រូវ ព្រោះការលុបឈ្មោះនេះ សមាគមគ្រូបង្រៀនអះអាងថា បានធ្វើខុសបែបបទរដ្ឋបាល ដោយមិនបានហៅសាមីខ្លួនទៅសួរនាំ ឬចេញលិខិតស្ដីបន្ទោស ដោយបញ្ឈប់យកតែម្ដង។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា ផ្អែកលើទិដ្ឋភាពរដ្ឋបាលសាធារណៈ ឬភាពអសកម្មខ្លះនៃការបំពេញការងារនៅក្នុងស្ថាប័នរដ្ឋ គឺជៀសមិនផុតពីភាពខ្វះចន្លោះ ក្នុងការបំពេញការងារ។ លោកថា ករណីមន្ត្រីមិនទៅធ្វើការ នៅមានច្រើនណាស់ ក្នុងស្ថាប័នរដ្ឋ។ ដូច្នេះលោកយល់ថា លោក រ៉ុង ឈុន និងលោក ហង់ ជួនណារ៉ុន គួររកពេលសមរម្យមួយជួបជជែកគ្នាដោយការយោគយល់ ដើម្បីដោះស្រាយបញ្ហា ព្រោះថា ទាំងលោក រ៉ុង ឈុន និងលោក ហង់ ជួនណារ៉ុន សុទ្ធតែតួអង្គជួយសង្គម៕
No comments:
Post a Comment