ដោយ មួង ណារ៉េត
2018-02-13
អ្នកវិភាគឯករាជ្យ បណ្ឌិត ឡៅ ម៉ុងហៃ ចូលរួមវេទិកាអ្នកស្ដាប់អាស៊ីសេរី នៅយប់ថ្ងៃទី២៩ ខែសីហា ឆ្នាំ២០១៧។
Photo: RFA
អ្នកវិភាគលើកឡើងថា លោកនាយករដ្ឋមន្ត្រី ហ៊ុន សែន តែងតែក្រេវក្រោធ និងប្រើសម្ដីអសុរោះខ្លាំង រាល់ពេលដែលគេឆ្កឹះចំចំណុចខ្សោយគាត់។ លោកយល់ថា ប្រមុខរដ្ឋាភិបាល ល្មមឈប់ប្រើសម្ដីអាមឹង ខ្វះសីលធម៌ និងសុជីវធម៌ នៅចំពោះមុខហ្វូងមហាជន ជាពិសេសនៅចំពោះមុខសិស្ស-និស្សិតបែបនេះតទៅទៀត។
ចំណុចខ្សោយរបស់លោកនាយករដ្ឋមន្ត្រី ហ៊ុន សែន ដែលអ្នកវិភាគ និងជាចាស់ទុំមួយរូបក្នុងសង្គមខ្មែរ កត់សម្គាល់ឃើញនោះ គឺការភ័យខ្លាចមិនបានក្រាញអំណាចយូរតទៅទៀត របស់លោក ដែលកាន់អំណាចជាង ៣៣ឆ្នាំទៅហើយនេះ។
លោកបណ្ឌិត ឡៅ ម៉ុងហៃ មិនភ្ញាក់ផ្អើលនឹងភាពក្រេវក្រោធ ច្រឡោតខឹងឡាំប៉ារបស់លោក ហ៊ុន សែន រាល់ពេលដែលលោក សម រង្ស៊ី ឬអ្នកណាម្នាក់ ដែលហ៊ាននិយាយប៉ះចំណុចរសើបរបស់លោកនេះទេ។ លោកថា សូម្បីតែខ្លួនលោកផ្ទាល់ដែលជាអ្នកវិភាគឯករាជ្យសោះ ក៏រងសម្ដីធ្ងន់ៗ ព្រមានពីលោក ហ៊ុន សែន ដែរ៖ «ពីមុនៗមក និយាយប៉ះចំណុចខ្សោយរបស់គាត់ហ្នឹង គាត់តែងតែប្រតិកម្មខ្លាំងៗ ហើយពេលខ្លះគាត់ប្រើពាក្យអសុរោះ ហើយខ្ញុំផ្ទាល់ខ្លួនខ្ញុំក៏គាត់មានប្រើសម្ដីមិនជាអសុរោះណាស់ណាទេ ប៉ុន្តែគឺវាអសុរោះណាស់ គឺនៅពេលដែលខ្ញុំមានអត្ថាធិប្បាយ ប៉ះដល់ចំណុចរសើបរបស់គាត់»។
ដោយសារតែចំណុចរសើបនេះហើយ ទើបលោក ហ៊ុន សែន តែងតែបង្ហាញចរិតពិតរបស់ លោក នៅកណ្ដាលចំណោមមហាជន ទោះជានៅចំពោះមុខសិស្ស-និស្សិត ដែលអាយុស្ទើរស្មើចៅៗរបស់លោកដែលជាទំពាំងស្នងឫស្សី ហើយលោក ហ៊ុន សែន ហាក់មិនខ្វល់អំពីការផ្ដល់គំរូល្អ ឬអាក្រក់ដល់ទំពាំងទាំងនោះទេ។ ថ្លែងក្នុងពិធីចែកសញ្ញាប័ត្រ ដល់និស្សិតសកលវិទ្យាល័យវេស្ទើន ប្រមាណ ជាង បួនពាន់នាក់ នៅមជ្ឈមណ្ឌលកោះពេជ្រ នាព្រឹកថ្ងៃទី១៣ ខែកុម្ភៈ នេះ លោក ហ៊ុន សែន ខឹងលោក សម រង្ស៊ី យ៉ាងខ្លាំងរឿងបបួល ឲ្យឈប់ធ្វើនាយករដ្ឋមន្ត្រី ត្រឹមអាយុ៦៥ឆ្នាំ ព្រោះលោក សម រង្ស៊ី ថាល្មមដល់ពេលឈប់រៀងៗខ្លួនហើយ ដោយសារវ័យ ក៏កាន់តែជរាណាស់ដែរ ទុកឲ្យក្មេងជំនាន់ក្រោយកាន់កិច្ចការដឹកនាំប្រទេសនេះម្ដង៖ «កុំមកឡប់ៗមកបបួលអាយុ ៦៥ឆ្នាំឈប់ទាំងអស់គ្នា។ ចុះ អ្ហែងអ្នកជាប់គុកសោះ រត់ចោលស្រុកសោះ មកបបួលអញជានាយករដ្ឋមន្ត្រីក្នុងតំណែងឈប់ជាមួយអ្ហែងដូចគ្នា! យីអានេះខូចវ៉ី! មិនខូចទេ អានេះវាឆ្កួតតែម្ដង ហ្សែនរបស់វាឆ្កួតតែម្ដង។ ឯងទៅណាងាប់ទៅណាងាប់ទៅ ប្រាត់ប្រាស់ទៅណាព្រាត់ប្រាស់ទៅ កុំមកបបួលអញទៅជាមួយ អញមិនទៅជាមួយអ្ហែងទេ។ ហើយដាក់ទៅ ចាំមើលអ្នកណាងាប់មុនអាណា អ្ហែងអាយុច្រើនជាងអញ អ្ហែងងាប់មុនអញ! អញនឹងបានឃើញមុខគ្នាទេ វាខូចពេក»។
ទោះជាលោកនាយករដ្ឋមន្ត្រី ហ៊ុន សែន មានវ័យប្អូនជាងលោក សម រង្ស៊ី តែលោកមិនញញើតមាត់នឹងហៅលោក សម រង្ស៊ី អាដាច់សាច់ និងជាញយដងសូម្បីតែឪពុកលោក សម រង្ស៊ី ក៏លោក ហ៊ុន សែន ហៅអាដែរ។ មិនតែប៉ុណ្ណោះ អ្នកណាក៏ដោយ ទោះមានវ័យចំណាស់ជាងគាត់ប៉ុនណា ក៏គាត់នៅតែហៅអាដែរ ឲ្យតែគាត់ខឹង និងមិនពេញចិត្ត ព្រោះនេះជាទម្លាប់របស់លោក ហ៊ុន សែន។
ក្រោយរំលាយគណបក្សសង្គ្រោះជាតិ និងហាមឃាត់សិទ្ធិនយោបាយមន្ត្រីគណបក្សប្រឆាំងចំនួន ១១៨ នាក់បានសម្រេចរួចមក។ លោក ហ៊ុន សែន បានតាំងចិត្តថា ឈប់ជ្រលក់មាត់រកមន្ត្រីគណបក្សប្រឆាំងតទៅទៀតហើយ ព្រោះលោកចាត់ទុកថា ក្រុមនេះ ជាក្រុមក្រៅច្បាប់ ឬឧទ្ទាមជាដើម។ ប៉ុន្តែ លោក ហ៊ុន សែន ផ្អាកបានតែមួយរយៈខ្លីប៉ុណ្ណោះ។ មិនយូរប៉ុន្មាន លោកនៅតែទ្រាំលែងបាន និងបន្តប្រើពាក្យភាសាអសុរោះ អាមឹង និង ពោរពេញទៅដោយកំហឹង និងហិង្សា បានឮកងរំពងតាមវិទ្យុ ទូរទស្សន៍ និងបណ្ដាញផ្សព្វផ្សាយរបស់លោក ហ៊ុន សែន។
លោកបណ្ឌិត ឡៅ ម៉ុងហៃ យល់ថាមេដឹកនាំ មិនគួរយកវេទិកា ជួបសិស្ស-និស្សិតមកឈ្លោះគ្នារឿងនយោបាយនោះទេ។ ផ្ទុយទៅវិញលោក ហ៊ុន សែន គប្បីយកវេទិកាបែបនេះ ដើម្បីផ្សព្វផ្សាយ និង បណ្ដុះគំនិតអប់រំ និងសីលធម៌ សុជីវភាពសង្គម៖ «វេទិកាអ៊ីចឹងៗ មិនសមនិយាយពីរឿងនយោបាយអីនេះទេ ខ្ញុំថាគួរតែយកវេទិកាហ្នឹងជួយអប់រំបន្ថែម ជួយណែនាំបន្ថែមទៅដល់យុវជន ដែលបានរៀនចប់បរិញ្ញាបត្រក្តី អនុបណ្ឌិតក្តី ឬថ្នាក់បណ្ឌិតក្ដី។ គួរចែករំលែកបទពិសោធន៍របស់មេដឹកនាំ ឬក៏ផ្ដាំផ្ញើ និងឲ្យដំបូន្មានជាអាទិ៍ ឈរលើមូលដ្ឋានរបស់មេដឹកនាំរាប់សិបឆ្នាំហើយ»។
គិតមកត្រឹមថ្ងៃនេះ លោកនាយករដ្ឋមន្ត្រី ហ៊ុន សែន បានកាន់អំណាចជានាយករដ្ឋមន្ត្រី អស់រយៈពេលជាង ៣៣ឆ្នាំហើយ។ ក្នុងរយៈពេលជាង ៣៣ឆ្នាំមកនេះ លោកបានបង្ហាញនូវហិង្សាខ្លាំង ទៅលើអ្នកដែលហ៊ានប្រឆាំងនឹងលោក។ យុទ្ធសាស្ត្របំបែកបំបាក់បក្សប្រឆាំង លោកបានធ្វើជោគជ័យ។ សម្ដីអសុរោះ និងទ្រគោះបោះបោក លាយឡំនឹងការប្រមាថរបស់លោកផង គឺលោក ហ៊ុន សែន មិនដែលចោលទេ បើទោះបីជាប្រជាប្រិយរបស់លោកត្រូវបានធ្លាក់ចុះ យ៉ាងខ្លាំង ដូចបង្ហាញច្បាស់នៅក្នុងការបោះឆ្នោតពីរលើកចុងក្រោយនេះ៕
No comments:
Post a Comment