ដោយ
2018-05-14
ប្រធានគណបក្សប្រជាជនកម្ពុជា និងជានាយករដ្ឋមន្ត្រី លោក ហ៊ុន សែន ដឹកនាំយុទ្ធនាការឃោសនារកសំឡេងឆ្នោត កាលពីថ្ងៃទី២ ខែមិថុនា ឆ្នាំ២០១៧។
RFA
មេដឹកនាំរបបក្រុងភ្នំពេញ លោក ហ៊ុន សែន បានបង្កើនការឃោសនារកសំឡេងឆ្នោតពីក្រុមយុវជនឥតឈប់ឈរ ទាំងការចុះជួបផ្ទាល់ជាមួយកម្មករ និងនៅលើបណ្ដាញសង្គមហ្វេសប៊ុក (Facebook) របស់លោក។ នៅថ្ងៃអាទិត្យទី១៣ ឧសភា ដែលជាថ្ងៃឈប់សម្រាកចុងសប្ដាហ៍នេះ លោក ហ៊ុន សែន បានអំពាវនាវជាថ្មីទៀត ឱ្យពលរដ្ឋ ជាពិសេស យុវជន បោះឆ្នោតឱ្យគណបក្សប្រជាជនកម្ពុជា ដើម្បីឱ្យលោកក្ដោបក្ដាប់អំណាចបន្តទៀត។ អ្នកវិភាគយល់ថា គណបក្សប្រជាជនកម្ពុជាពិបាកនឹងទទួលបានការគាំទ្រពីយុវជន ដោយសារបក្សនេះដឹកនាំប្រទេសដើរខុសគន្លងប្រជាធិបតេយ្យ។
សារនយោបាយដែល លោក ហ៊ុន សែន យកមកប្រើប្រាស់ដើម្បីទាក់ទាញចិត្តយុវជនឱ្យបោះឆ្នោតឱ្យរូបលោកនៅពេលនេះ ក៏មិនខុសពីលើកមុនៗដែរ គឺការការពារសន្តិភាព។ លោក ហ៊ុន សែន និយាយភាសាអ្នកស្រុកដោយប្រើពាក្យ ពូ ដើម្បីហៅខ្លួនឯង និងអះអាងប្រាប់យុវជនថា បើលោកនៅកាន់អំណាច គ្មាននរណាម្នាក់អាចមកបំផ្លាញប្រទេសកម្ពុជាបាននោះទេ។
លោក ហ៊ុន សែន សរសេរក្នុងហ្វេសប៊ុករបស់លោកនៅថ្ងៃទី១៣ ឧសភា ដោយអន្ទងចិត្តយុវជនថា លោកខិតខំដល់សព្វថ្ងៃ គឺចង់ឃើញកម្ពុជារីកចម្រើន និងចង់ឃើញយុវជនមានឱកាសគ្រប់បែបយ៉ាង ដូចជា ការសិក្សាទាំងក្នុង និងក្រៅប្រទេស ឱកាសការងារ និងឱកាសបង្កើតអាជីវកម្មដោយខ្លួនឯង។ មេដឹកនាំក្រាញអំណាចរូបនេះ អះអាងទៀតថា លោកក៏ចង់ឃើញយុវជនមានសិទ្ធិសេរីភាពគ្រប់យ៉ាង ដូចជា សិទ្ធិបោះឆ្នោតជ្រើសរើសគណបក្សនយោបាយ និងតំណាងរាស្ត្រដែលខ្លួនពេញចិត្តជាដើម។
សាររបស់ លោក ហ៊ុន សែន នៅត្រង់ចំណុចនេះ ហាក់ដូចជា មិនឆ្លុះបញ្ចាំងការពិតឡើយ ដ្បិតលោកបានរំលាយគណបក្សសង្គ្រោះជាតិ ដែលជាបក្សទទួលបានការគាំទ្រច្រើនពីក្រុមយុវជន។ ម្យ៉ាងវិញទៀត របបក្រុងភ្នំពេញបច្ចុប្បន្ន មិនបានអនុគ្រោះ ឬលើកលែងឱ្យយុវជនណា ដែលហ៊ានរិះគន់ ឬនិយាយវាយប្រហារធ្ងន់ៗមកលើលោក ហ៊ុន សែន នោះឡើយ បើមានករណីនេះកើតឡើង ពួកគេនឹងប្រឈមការចាប់ខ្លួន ឬចោទប្រកាន់តាមផ្លូវច្បាប់ជាក់ជាមិនខាន។
អ្នកវិភាគនយោបាយវ័យក្មេង លោក ហង្ស វិទូ យល់ឃើញថា យុវជនកម្ពុជាសព្វថ្ងៃមានទំនោរទៅរកការដឹកនាំបែបប្រជាធិបតេយ្យ និងមិនចូលចិត្តការដឹកនាំបែបកុម្មុយនិស្ត ឬផ្ដាច់ការនោះទេ ដូច្នេះពួកគេភាគច្រើនអាចនឹងមិនបោះឆ្នោតឱ្យគណបក្សកាន់អំណាចនោះឡើយ ដោយសារបក្សនេះកំពុងដឹកនាំប្រទេសដើរខុសពីគន្លងប្រជាធិបតេយ្យ។ លើសពីនេះ មន្ត្រីរដ្ឋាភិបាលដែលចេញពីបក្សកាន់ប្រជាជនកម្ពុជា មិនបានធ្វើកំណែទម្រង់លើរបៀបដឹកនាំរបស់ខ្លួនឡើយ ធ្វើឱ្យយុវជនដែលជាអ្នកមានការយល់ដឹងច្រើន និងតែងតាមដានរឿងនយោបាយជាប់ជាប្រចាំនោះ គ្មានទំនុកទុកចិត្តចំពោះការដឹកនាំជាតិរបស់បក្សនេះទៀតឡើយ។ សំខាន់ជាងនេះទៅទៀត យុវជនគឺជាក្រុមមនុស្សដែលត្រូវការសិទ្ធិសេរីភាពខ្លាំង ខណៈរបបលោក ហ៊ុន សែន បានបន្តយុទ្ធនាការបំបិទសិទ្ធសេរីភាពរបស់ពលរដ្ឋ។ លោកបន្តថា ការមិនអើពើដោះស្រាយបញ្ហារបស់ពលរដ្ឋ និងយុវជននៅក្រោយការបោះឆ្នោត ក៏សុទ្ធសឹងជាមូលហេតុដែលធ្វើឱ្យយុវជនមិនគាំទ្រការដឹកនាំរបស់បក្សកាន់អំណាចផងដែរ៖ «ការណ៍ដែលរដ្ឋាភិបាល ឬក៏តុលាការរំលាយចោលគណបក្សសង្គ្រោះជាតិចោលនេះ វាជាការរំលោភសិទ្ធិមួយរួចទៅហើយ អ៊ីចឹងបើលោកនាយករដ្ឋមន្ត្រី គាត់និយាយអំពីការចង់ឃើញ ការចង់លើកកម្ពស់សិទ្ធិមនុស្ស ឬក៏ជាពិសេស ចង់ឃើញឱ្យមានសិទ្ធិសេរីភាពក្នុងការបោះឆ្នោត លុះត្រាណាតែអនុវត្តលក្ខខណ្ឌពីរយ៉ាង។ ទីមួយគឺលុបបំបាត់ចោលឱ្យបាននូវការគាបសង្កត់ផ្នែកនយោបាយទៅលើបក្សប្រឆាំងតែម្ដង។ ប្រសិនបើបន្ធូរបន្ថយ ឬលុបបំបាត់បាន នោះទើបយុវជនមានសិទ្ធិពេញលេញ។ ទីពីរ ដើម្បីឱ្យមានប្រសិទ្ធភាពបានលុះត្រាតែរដ្ឋាភិបាលប្រឹងប្រែងធ្វើកំណែទម្រង់ស៊ីជម្រៅ មិនមែនលក្ខណៈចង់បាន ឬក៏នឹកឃើញចេះតែចេញបទបញ្ជា ដែលដូចយើងឃើញហើយ កន្លងមកមិនដែលមានប្រសិទ្ធភាពនោះទេ។ កំណែទម្រង់ស៊ីជម្រៅនេះលុះត្រាតែរដ្ឋាភិបាលចេញជាយន្តការច្បាស់លាស់ ហើយមានឆន្ទៈអនុវត្តឱ្យចេញជាសកម្មភាពជាក់ស្ដែង»។
ការស្រាវជ្រាវរបស់សម្ព័ន្ធយុវជនដើម្បីឯកភាព និងអភិវឌ្ឍន៍ បង្ហាញថា បញ្ហាប្រឈមសំខាន់របស់យុវជន មាន ៣យ៉ាង គឺទីមួយបញ្ហាអប់រំ ដោយយុវជនបារម្ភពីគុណភាពអប់រំនៅមានកម្រិត និងឱកាសទទួលបានការអប់រំនៅមិនទាន់មានភាពល្អប្រសើរនៅឡើយ។ ទីពីរ គឺភាពគ្មានការងារធ្វើ ដែលបណ្តាលមកពីប្រាក់ខែទាប ខ្វះជំនាញដែលស្របតាមតម្រូវការទីផ្សារ ខ្វះឱកាសការងារសមរម្យ និងបញ្ហាបក្សពួកនិយមក្នុងវិស័យការងារ និងទីបី គឺបញ្ហាសន្តិសុខ ដោយយុវជនលើកឡើងពីក្តីកង្វល់ថា ពួកគេព្រួយបារម្ភពីសកម្មភាពក្មេងទំនើង គ្រោះថ្នាក់ចរាចរណ៍ ការរំលោភសិទ្ធិមនុស្ស និងការប្រើប្រាស់គ្រឿងញៀន។
និស្សិតផ្នែកច្បាប់មួយរូប គឺលោក ហេង គឹមហុង យល់ឃើញថា ការបោះឆ្នោតក្នុងសង្គមប្រជាធិបតេយ្យ គឺគេប្រកួតប្រជែងគ្នាឈរលើគោលនយោបាយ និងកម្មវិធីនយោបាយ មិនមែនជាការបំបិទគណបក្សមួយទៀតមិនឱ្យមានការគាំទ្រនោះទេ បើធ្វើបែបនេះ ពលរដ្ឋនឹងមិនបោះឆ្នោតឱ្យគណបក្សដែលរំលាយគេនោះទេ។ យុវជន ហេង គឹមហុង បញ្ជាក់ថា ក្នុងនាមជាយុវជន លោកនឹងបោះឆ្នោតជូនគណបក្សណាដែលមានកម្មវិធីនយោបាយច្បាស់លាស់ចំពោះការដោះស្រាយបញ្ហាប្រឈមរបស់យុវជន៖ «នៅពេលដែលគណបក្សនយោបាយមួយមានឥទ្ធិពលខ្លាំង ប្រើវិធីសាស្ត្របិទផ្លូវ មានន័យថា បំបិទគណបក្សនយោបាយមួយទៀតមិនឱ្យមានការគាំទ្រ ខ្ញុំជឿជាក់ថា បក្សនយោបាយទាំងនោះមិនអាចទទួលបានការគាំទ្រគ្រប់ជ្រុងជ្រោយនោះទេ គឺអាចទទួលបានតែអ្នកធ្លាប់គាំទ្រខ្លួនតែប៉ុណ្ណោះ ចំណែកអ្នកមិនធ្លាប់គាំទ្រនោះ គឺនៅតែបន្តមិនគាំទ្រដដែល។ គេមិនគាំទ្រគណបក្សណាមួយដោយសារបក្សនោះមិនមានគោលនយោបាយត្រឹមត្រូវ។ យើងមិនព្រមពង្រឹងគោលនយោបាយខ្លួនឯងឱ្យបានប្រសើរឡើង បែរជាយកវិធីសាស្ត្របំបិទគណបក្សនយោបាយមួយទៀត ដើម្បីកុំឱ្យមានការគាំទ្រ ដែលវិធីសាស្ត្រនេះ ត្រូវបានប្រជាពលរដ្ឋចាត់ទុកថា មិនត្រឹមត្រូវ ឬមិនមានតម្លាភាពក្នុងការប្រកួតប្រជែងនោះ គាត់មិនគាំទ្រទេ»។
ការបោះឆ្នោតជ្រើសតាំងតំណាងរាស្ត្រនីតិកាលទី ៦ នៃរដ្ឋសភា គ្រោងប្រព្រឹត្តទៅនៅថ្ងៃទី២៩ កក្កដា ខាងមុខ។ ដំណើរការរៀបចំការបោះឆ្នោតនេះ កំពុងរងការរិះគន់ពីគ្រប់មជ្ឈដ្ឋានថា ជាការបោះឆ្នោតបង្គ្រប់កិច្ចដើម្បីឱ្យគណបក្សប្រជាជនកម្ពុជារបស់លោក ហ៊ុន សែន បន្តកាន់អំណាចនៅកម្ពុជាតទៅទៀតតែប៉ុណ្ណោះ ដោយសារលោក ហ៊ុន សែន បានរំលាយបក្សសង្គ្រោះជាតិដែលជាបក្សប្រឆាំងធំជាងគេនៅកម្ពុជា និងបានហាមឃាត់ថ្នាក់ដឹកនាំគណបក្សនេះជាង ១០០ នាក់ មិនឱ្យធ្វើសកម្មភាពនយោបាយ។ បន្ថែមពីលើនេះ របបក្រុងភ្នំពេញបានបន្តយុទ្ធនាការបង្ក្រាបលើប្រព័ន្ធផ្សព្វផ្សាយឯករាជ្យឥតឈប់ឈរ ដែលធ្វើឱ្យបាត់បង់នូវធាតុផ្សំមួយដ៏សំខាន់នៃការបោះឆ្នោតដោយសេរី និងយុត្តិធម៌ ព្រោះប្រព័ន្ធផ្សព្វផ្សាយឯករាជ្យមានតួនាទីសំខាន់ក្នុងការរាយការណ៍ព័ត៌មានពិតឥតលម្អៀងអំពីដំណើរការបោះឆ្នោត ដើម្បីឱ្យពលរដ្ឋម្ចាស់ឆ្នោតអាចសម្រេចចិត្តបានត្រឹមត្រូវក្នុងការបោះឆ្នោតជូនគណបក្សដែលខ្លួនពេញចិត្ត៕
No comments:
Post a Comment