ដោយ ទីន ហ្សាការីយ៉ា
2018-05-30
ព្រះអង្គម្ចាស់ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច (ឆ្វេង) និងប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ (ស្ដាំ)។
RFA
លោកនាយករដ្ឋមន្ត្រី ហ៊ុន សែន បានចាប់ផ្ដើមរិះគន់គោលនយោបាយរបស់គណបក្សតូចៗមួយចំនួន ជាថ្មីឡើងវិញ ក្រោយពេលដែលគណបក្សហ៊្វុនស៊ិនប៉ិច សន្យាលុបចោលបំណុលធនាគារ ដែលពលរដ្ឋជំពាក់ និងគណបក្សប្រជាធិបតេយ្យមូលដ្ឋាន សន្យាផ្ដល់ថវិកាជាតិជូនចាស់ជរា។ អ្នកវិភាគយល់ថា នេះគ្រាន់តែជាល្បិចសម្ដែងឱ្យពលរដ្ឋមើល តែប៉ុណ្ណោះ ខណៈដែលនរណា ក៏អាចដឹងពីលទ្ធផលឆ្នោតរួចហើយ។
លោកនាយករដ្ឋមន្ត្រី ហ៊ុន សែន ក្រៅពីបានរិះគន់ គណបក្សសង្គ្រោះជាតិ ដែលរបបរបស់លោកបានរំលាយទៅហើយនោះ ឥឡូវនេះ លោកបានប្រតិកម្មទៅនឹងការដាក់ចេញគោលនយោបាយរបស់គណបក្សមួយចំនួនដែលត្រៀមនឹងប្រកួតប្រជែងការបោះឆ្នោតនៅពេលខាងមុខ ជាមួយគណបក្សរបស់លោកនោះ។
លោក ហ៊ុន សែន បានបញ្ចេញប្រតិកម្មជាលើកដំបូងទៅប្រធានគណបក្សហ៊្វុនស៊ិនប៉ិច គឺព្រះអង្គម្ចាស់នរោត្តម រណឫទ្ធិ ដែលជាមនុស្សចូលដៃចូលជើងជាមួយលោក ក្នុងការរំលាយគណបក្សប្រឆាំង ដែលបានសន្យាសងបំណុលធនាគារឱ្យពលរដ្ឋដើម្បីទាក់ទាញប្រជាប្រិយភាពរបស់ព្រះអង្គឡើងវិញនោះ។ លោក ហ៊ុន សែន លើកឡើងដោយមិនបញ្ចេញឈ្មោះថា ព្រះអង្គម្ចាស់ នរោត្ដម រណឫទ្ធិ បានលួចសរសេរសំបុត្រទៅខ្ចីលុយលោក ១លានដុល្លារ។ លោក ហ៊ុន សែន គំរាមនឹងយកសំបុត្រនោះទៅបង្ហាញនៅលើទំព័រហ្វេសប៊ុក (Facebook) ជាសាធារណៈទៀតផង។ «»
លើសពីនេះទៀត លោកនាយករដ្ឋមន្ត្រី ហ៊ុន សែន ក៏ព្រមានទ្រង់នរោត្តម រណឫទ្ធិ កុំឱ្យយកស្ថាប័នព្រះមហាក្សត្រទៅឃោសនាផ្សាភ្ជាប់នឹងបក្ស ព្រោះខ្លាចគ្មានអ្នកគាំទ្របក្សហ៊្វុនស៊ិនប៉ិច នាំឱ្យធ្លាក់ចុះតម្លៃនៃស្ថាប័នព្រះមហាក្សត្រ។
ក្រៅពីនេះទៀត លោក ហ៊ុន សែន ក៏បញ្ចេញប្រតិកម្មនឹងគណបក្សប្រជាធិបតេយ្យមូលដ្ឋាន ដែលបានសន្យាដែរថា នឹងផ្ដល់ថវិកាប្រចាំខែឱ្យចាស់ជរា ១៥ម៉ឺនរៀល ក្នុងមួយខែ។ លោក ហ៊ុន សែន ប្រាប់កម្មករនៅស្រុកស្អាង ខេត្តកណ្ដាល ថា អ្នកដាក់ចេញគោលនយោបាយទាំងនោះ ថាជាជនបោកប្រាស់ និងជាមនុស្សមិនដឹងពីថវិកាជាតិ។ «»
ព្រះអង្គម្ចាស់ នរោត្តម រណឫទ្ធិ ធ្លាប់ដឹកនាំគណបក្សហ៊្វុនស៊ិនប៉ិច ទទួលបានជ័យជំនះលើការបោះឆ្នោតកាលពីអាណត្តិទី១ ឆ្នាំ១៩៩៣ ក៏ប៉ុន្តែគណបក្សរបស់ព្រះអង្គបានធ្លាក់ប្រជាប្រិយភាពជាបន្តបន្ទាប់រហូតមិនទទួលបានអាសនៈកាលពីអាណត្តិទី៥ កន្លងទៅ ដែលគេមើលឃើញថា ព្រះអង្គធ្លាក់ប្រជាប្រិយភាពស្ទើរតែមិនអាចវិលចូលឆាកនយោបាយវិញបាន ដោយសារតែនយោបាយរបស់ព្រះអង្គ ជានយោបាយកណ្ដាលនិយមមិនប្រឆាំង ហើយតែងតែចងសម្ព័ន្ធមិត្តជាមួយលោក ហ៊ុន សែន។ ក្រោយពីព្រះអង្គបានបាត់មុខពីឆាកនយោបាយមួយរយៈ ដោយសារតែគ្មានសំឡេងនៅក្នុងសភានោះ ទ្រង់ រណឫទ្ធិ ត្រូវបានអណ្ដែតឡើងវិញនៅលើឆាកនយោបាយ នៅក្រោយពីបានចេញមុខជាដើមបណ្ដឹង ប្ដឹងរំលាយគណបក្សសង្គ្រោះជាតិ ដែលសហគមន៍ជាតិ និងអន្តរជាតិបានថ្កោលទោសនោះ។
ប្រធានក្រុមអ្នកវិភាគវ័យក្មេង លោក ហង្ស វិទូ មើលឃើញថា ការស្រែកកំហកខ្លាំងៗរបស់លោក ហ៊ុន សែន រិះគន់គោលនយោបាយរបស់ទ្រង់ រណឫទ្ធិ ឬគណបក្សមួយចំនួនទៀត គ្រាន់តែជាការសម្ដែង នឹងគ្មានប្រសិទ្ធភាពទេ។ «»
អាស៊ីសេរីមិនអាចទាក់ទង អ្នកនាំពាក្យគណបក្សហ៊្វុនស៊ិនប៉ិច លោក ញ៉េប ប៊ុនជិន បានទេ នៅថ្ងៃទី៣០ ឧសភា ដើម្បីសុំការឆ្លើយតបចំពោះការព្រមានរបស់លោក ហ៊ុន សែន ដោយសារមិនលើកទូរស័ព្ទ។ ប៉ុន្តែ សារព័ត៌មានក្នុងស្រុកបានស្រង់សម្ដីរបស់លោក ញ៉េប ប៊ុនជិន ថា គណបក្សហ៊្វុនស៊ិនប៉ិច ពិតជាមានគោលនយោបាយលុបចោលបំណុលធនាគារដល់ពលរដ្ឋមែន ប្រសិនបើបក្សលោកឈ្នះឆ្នោត។ លោកថា ការដែលគណបក្សនេះ សន្យាដោះស្រាយបំណុលជូនពលរដ្ឋក្រីក្រ គឺដោយសារតែសង្កេតឃើញថា ការខ្ចីប្រាក់ពីស្ថាប័នមីក្រូហិរញ្ញវត្ថុសព្វថ្ងៃ មានអត្រាការប្រាក់ខ្ពស់ពេក ហើយការដោះស្រាយបំណុលនេះ គឺធ្វើទៅតាមផ្លូវច្បាប់។
ទាក់ទងនឹងបំណុលនេះ គឺជាចំណុចរសើបរបស់លោករបបលោក ហ៊ុន សែន។ លោកនាយករដ្ឋមន្ត្រី ហ៊ុន សែន ធ្លាប់ បានបញ្ជាឱ្យអាជ្ញាធរចាប់វាយខ្នោះភ្លាមៗ ចំពោះបុគ្គលនយោបាយណា ដែលដើរឃោសនាតាមមូលដ្ឋាន ដោយសន្យាថា ពួកគេនឹងលុបបំណុលជូនពលរដ្ឋ ដែលជំពាក់មីក្រូហិរញ្ញវត្ថុ និងធនាគារ នៅពេលដែលគណបក្សពួកគេជាប់ឆ្នោតនោះ។ លោក ហ៊ុន សែន ចាត់ទុកការឃោសនារបស់បុគ្គលទាំងនោះ គឺជាការសន្យាបោកប្រាស់ពលរដ្ឋ ដើម្បីកេងចំណេញនយោបាយ ដែលជារឿងមិនអាចទៅរួចឡើយ។ លោកហៅការឃោសនាបែបនេះ ជាការភូតកុហកខ្លាំង ដែលមិនអាចលើកលែងឱ្យបាន។
ចំណែកប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ អះអាងថា គណបក្សរបស់លោក មានតួលេខមនុស្សចាស់ និងតួលេខថវិកាជាតិត្រឹមត្រូវ ហើយជឿថា គោលនយោបាយដែលដាក់ចេញ អាចអនុវត្តបាន។ លោកថា ការសន្យាផ្ដល់ប្រាក់បៀវត្សរ៍ជូនមនុស្សចាស់ជរា ម្នាក់១៥ម៉ឺនរៀល ក្នុងមួយខែ និងត្រូវចំណាយអស់ថវិកាជាតិប្រមាណ១៥ភាគរយ នៃថវិកាជាតិសរុប ហើយនឹងត្រូវបើកជាជំហានៗ ជូនចាស់ជរា។ «»
អ្នកវិភាគនយោបាយវ័យក្មេង លោក ហង្ស វិទូ យល់ថា ការដាក់ចេញការប្រកួត ឬការវាយប្រហារគោលនយោបាយគ្នា ជារឿងធម្មតានៅក្នុងសង្គមប្រជាធិបតេយ្យ។ ប៉ុន្តែ សម្រាប់លោកនាយករដ្ឋមន្ត្រី ហ៊ុន សែន អ្នកវិភាគផ្ដល់អនុសាសន៍ថា គួរតែមើលគោលនយោបាយ ខ្លួនឯងឡើងវិញផង ព្រោះគោលនយោបាយ ដែលបានដាក់ចេញមួយចំនួន ក៏ជាគោលនយោបាយបោកប្រាស់ពលរដ្ឋដែរ ដោយសាររបបលោកមិនទាន់អនុវត្តតាមគោលនយោបាយដែលសន្យាបានត្រឹមត្រូវទេ។
នៅក្រោមការដឹកនាំរបស់លោក ហ៊ុន សែន ជាង២០ឆ្នាំកន្លងមកនេះ ធ្វើឱ្យមានវិបត្តិជាច្រើនកើតឡើងដែលរបបរបស់លោក មិនអាចដោះស្រាយបាននៅឡើយ ក្នុងនោះ មានវិបត្តិដីធ្លី វិបត្តិពលរដ្ឋអត់ការងារធ្វើ ហើយចំណាកស្រុក វិបត្តិពលរដ្ឋជំពាក់បំណុលមីក្រូហិរញ្ញវត្ថុកាន់តែច្រើន ដែលមានការប្រាក់ខ្ពស់ និងវិបត្តិផ្សេងៗទៀត។
ធនាគារពិភពលោកបានចេញរបាយការណ៍កាលពីពេលថ្មីៗនេះ ព្រមានរបបលោក ហ៊ុន សែន ពីបញ្ហាប្រឈមចំនួន៣ ដែលអាចធ្វើឱ្យមានហានិភ័យដល់កំណើនសេដ្ឋកិច្ចកម្ពុជា ក្នុងឆ្នាំ២០១៨នេះ។ របាយការណ៍ចុងក្រោយអំពីបច្ចុប្បន្នភាពសេដ្ឋកិច្ចតំបន់អាស៊ីបូព៌ា និងប៉ាស៊ីហ្វិក របស់ធនាគារពិភពលោក ដែលមានចំណងជើងថា «បង្កើនសក្ដានុពល» (Enhancing Potential) បង្ហាញថា បញ្ហាប្រឈមទាំង៣ របស់កម្ពុជារួមមាន ភាពមិនប្រាកដប្រជាពាក់ព័ន្ធនឹងការបោះឆ្នោតជាតិខែកក្កដា ឆ្នាំ២០១៨ ខាងមុខ ការធ្លាក់ចុះសមត្ថភាពប្រកួតប្រជែងនៅក្រៅប្រទេស និងការអូសបន្លាយការរីកលូតលាស់វិស័យសំណង់ជាដើម៕
No comments:
Post a Comment