ដោយ ជាតិ ចំណាន
2018-08-03
តំណាងរាស្ត្រខ្មែរ-អូស្ត្រាលី ប្រចាំរដ្ឋវ៉ិកតូរីយ៉ា (Victoria) លោក ហុង លីម
RFA/Chun Chanboth
តំណាងរាស្ត្រអូស្ត្រាលីដើមកំណើតខ្មែរ លោក ហុង លីម ដែលមានឈ្មោះល្បីក្រោយពេលលោកប្រកាសចាត់ទុករបបលោក ហ៊ុន សែន ជារបបតិរច្ឆាន បានប្រកាសចូលនិវត្តន៍ ក្រោយពេលបានក្លាយជាតំណាងរាស្ត្រអស់រយៈពេល ២២ឆ្នាំ។ លោកបញ្ជាក់ថា ថវិកាដែលបានពីពិធីជួបជុំនៃការចូលនិវត្តរបស់លោកមួយផ្នែកធំនឹងយកទៅជួយដល់អ្នកតស៊ូមតិនៅកម្ពុជា។
ការរៀបចំពិធីជប់លៀងសប្បុរសធម៌ពលរដ្ឋខ្មែរនៅអូស្ត្រាលីធ្វើនៅថ្ងៃ សុក្រ ទី ០៣ ខែ សីហានេះដើម្បីបង្ហាញពីការគោរពស្រលាញ់របស់ពលរដ្ឋខ្មែរនៅអូស្ត្រាលី ចំពោះលោក ហុង លីម ដែលបានជួយលើកស្ទួយកិត្តិយសខ្មែរ តាមរយៈការងាររបស់ខ្លួននៅលើទឹកដីប្រទេសអូស្ត្រាលី។ កម្មវិធីជួបជុំមានឈ្មោះថា ពិធីជប់លៀងអបអរសាទរ៖ «គ្មានថ្ងៃលាគ្នាទេ»។ កម្មវិធីនេះឲ្យដឹងថា ពិធីនេះមានអ្នកចូលរួមជាង ៤០០នាក់។
លោក ហុង លីម សមាជិកសភាអូស្ត្រាលី ប្រចាំរដ្ឋវ៉ិកតូរីយ៉ា និយាយថា នេះជាមហាកិត្តិយសណាស់ពលរដ្ឋខ្មែរនៅអូស្ត្រាលីគោរពស្រលាញ់រូបលោក។ លោក ហុង លីម បន្តទៀតថា ដោយមើលឃើញពីការលំបាករបស់ពលរដ្ឋខ្មែរជាអ្នកតស៊ូមតិកំពុងជួបការលំបាកដែលអ្នកខ្លះត្រូវរត់ចោលស្រុក អ្នកខ្លះកំពុងជាប់ពន្ធនាគារ ដូច្នេះលោកនឹងយកថវិកាមួយភាគធំប្រមូលបានពីពិធីនេះផ្តល់ជូនដល់អ្នកតស៊ូមតិទាំងអស់នេះ។ «»
លោក ហុង លីម ឲ្យដឹងទៀតថា ការចូលនិវត្តន៍គឺជាការសម្រេចចិត្តរបស់លោកផ្ទាល់ព្រោះចង់ទុកឱកាសឲ្យក្មេងជំនាន់ក្រោយធ្វើកិច្ចការងារនេះម្តង។ ម្យ៉ាងវិញទៀតលោកគិតថា ការលាឈប់ពីកិច្ចការនយោបាយនៅប្រទេសអូស្ត្រាលីនៅពេលនេះ គឺលោកចង់មាន ពេលវេលាគ្រប់គ្រាន់ ដើម្បីធ្វើការងារជួយពលរដ្ឋខ្មែរនៅប្រទេសកម្ពុជាដែលកំពុងស្រេកឃ្លានប្រជាធិបតេយ្យពិតប្រាកដ។ «»
ពិធីជប់លៀងសប្បុរសធម៌ដើម្បីអបអរការបំពេញការងារ២២ឆ្នាំ របស់លោក ហុង លីម និងការចូលនិវត្តន៍ពីសភារដ្ឋវ៉ិកតូរីយ៉ា នៅពេលនេះ ត្រូវបានផ្សព្វផ្សាយតាមប្រព័ន្ធអ៊ីនធឺណិត និងបណ្ដាញសង្គមហ្វេសប៊ុក អ្នកចូលរួមត្រូវបរិច្ចាគថវិកាម្នាក់ ៧០ដុល្លារ។ ពិធីនេះនឹងរៀបចំធ្វើជាលើកទី០២ នៅថ្ងៃទី០៥ ខែសីហា។
កម្មវិធីនេះក៏មានការចូលរួមពីមន្ត្រីអ្នកមុខអ្នកការនៅប្រទេសអូស្ត្រាលី អនុប្រធានគណបក្សសង្គ្រោះជាតិ ដែលត្រូវរបបលោក ហ៊ុន សែន រំលាយចោល អ្នកស្រី មូរ សុខហួរ និងកូនស្រីលោក កឹម សុខា កញ្ញា កឹម មនោវិទ្យា។
ពលរដ្ឋខ្មែររស់នៅប្រទេសអូស្ត្រាលីម្នាក់ លោកស្រី វ៉ា ម៉ាលីណា ដែលចូលរួមក្នុងពិធីនេះនិយាយថា លោកស្រី មានមោទនភាពចំពោះលោក ហុង លីម ដែលមានដើមកំណើតខ្មែរ បានកាន់តួនាទីសំខាន់នៅប្រទេសអូស្ត្រាលី។ លោកស្រី វ៉ា ម៉ាលីណា បន្តទៀតថា លោក ហុង លីម ក៏បានចូលរួមចំណែកយ៉ាងសំខាន់ជួយដល់ប្រទេសកម្ពុជា តាមរយៈការតស៊ូមតិជាមួយរដ្ឋសភា និងរដ្ឋាភិបាលអូស្ត្រាលីពីបញ្ហាប្រទេសកម្ពុជា។ «»
លោក ហុង លីម តែងចេញតស៊ូមតិ តាមរយៈរដ្ឋសភា និងរដ្ឋាភិបាលអូស្ត្រាលី ជំរុញទៅរបបក្រុងភ្នំពេញឲ្យគោរពសិទ្ធិមនុស្ស និងប្រជាធិបតេយ្យ។ លោកតែងតែមានមុខដឹកនាំបាតុកម្មទាមទារប្រឆាំងរំលោភសិទ្ធិមនុស្សនៅកម្ពុជា និងប្រឆាំងនឹងវត្តមានរបស់លោក ហ៊ុន សែន មកប្រទេសអូស្ត្រាលីជាដើម រហូត បានហៅរបបកម្ពុជា ក្រោមការដឹកនាំរបស់លោក ហ៊ុន សែន ថាជារបបតិរច្ឆាន។ កាលពីឆ្នាំ២០១៦ របបក្រុងភ្នំពេញ បានចេញបម្រាមហាមមិនឲ្យលោកចូលទឹកដីកម្ពុជា។ លោក ហុង លីម សព្វថ្ងៃមានអាយុ៧០ឆ្នាំ តាមច្បាប់អូស្ត្រាលីលោក ហុង លីម អាចបន្តធ្វើនយោបាយនឹងឈរឈ្មោះជាតំណាងរាស្ត្រអស់មួយជីវិត៕
No comments:
Post a Comment