អាស៊ីសេរី
2018-08-14
rfa
លោក ស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត
រូបពី គ.ជ.ប
ដូចការគ្រោងទុក គ.ជ.ប ប្រកាសលទ្ធផលបោះឆ្នោតផ្លូវការនៅថ្ងៃទី១៥ ខែសីហា។ ស្ថាប័នបោះឆ្នោតមួយនេះអះអាងថា មកដល់ល្ងាចថ្ងៃទី១៤ សីហា គ្មានគណបក្សនយោបាយណាមួយដាក់ប្តឹងប្រឆាំងនឹងលទ្ធផលបោះឆ្នោតបណ្ដោះអាសន្នមកគ.ជ.ប នោះទេ។
សេចក្ដីប្រកាសព័ត៌មានរបស់ គ.ជ.ប ឲ្យដឹងថា ការប្រកាសលទ្ធផលផ្លូវការនៃការបោះឆ្នោតនៃអាណត្តិទី៦ នេះ គឺផ្សព្វផ្សាយតាមប្រព័ន្ធឃោសនារបស់រដ្ឋរួមមាន វិទ្យុ និងទូរទស្សន៍ជាតិ និងទាំងវិទ្យុ និងទូរទស្សន៍ អនឡាញ (Online) របស់ គ.ជ.ប។ ការប្រកាសលទ្ធផលនេះ គឺជាការប្រកាសឈ្មោះបេក្ខជនជាប់ឆ្នោតតំណាងរាស្ត្រ និងការកំណត់នៃការបែងចែកអាសនៈសម្រាប់គណបក្សឈរឈ្មោះបោះឆ្នោតនៅតាមមណ្ឌលនីមួយៗ។
ប្រធានគណៈកម្មាធិការជាតិរៀបចំការបោះឆ្នោត លោ ស៊ិក ប៊ុនហុក បានផ្ញើលិខិតមួយច្បាប់ទៅប្រធានក្រុមប្រឹក្សាធម្មនុញ្ញនៅថ្ងៃទី១៤ ខែសីហាថា បន្ទាប់ពីការប្រកាសលទ្ធផលឆ្នោតបណ្តោះអាសន្នកាលពីថ្ងៃទី១១ ខែសីហា រហូតដល់ថ្ងៃទី១៤ ខែសីហា មានតែពាក្យបណ្ដឹងចំនួន១ប៉ុណ្ណោះដែលបានប្តឹងមក គ.ជ.ប ប៉ុន្តែម្ចាស់បណ្ដឹងបានដកពាក្យបណ្ដឹងវិញហើយ។
ចំណែកប្រធានក្រុមប្រឹក្សាធម្មនុញ្ញ នៅថ្ងៃដដែលនេះដែរ ក៏បានផ្ញើលិខិតមួយច្បាប់ ជូនប្រធានគណៈកម្មាធិការជាតិរៀបចំការបោះឆ្នោតដោយបញ្ជាក់ថា ក្នុងរយៈពេល ៧២ម៉ោងក្រោយការប្រកាសលទ្ធផលបោះឆ្នោតបណ្ដោះអាសន្នកាលពីថ្ងៃទី១១ ខែសីហា ក្រុមប្រឹក្សាធម្មនុញ្ញមិនបានទទួលពាក្យបណ្តឹងតវ៉ាដោយផ្ទាល់ជាលាយលក្ខណ៍អក្សររបស់គណបក្សនយោបាយដែលឈរឈ្មោះបោះឆ្នោតនោះទេ។ ដូច្នេះ គ.ជ.ប អាចចាត់ចែងអនុវត្តភារកិច្ចរបស់ខ្លួនបន្តដូចដែលបានកំណត់ក្នុងច្បាប់។
អាស៊ីសេរីបានព្យាយាមទូរសព្ទទៅសុំការបំភ្លឺពីប្រធាន និងអ្នកនាំពាក្យគណបក្សមួយចំនួន ដែលទទួលបានសំឡេងខ្លះៗ ដែលមិនពេញនឹងលទ្ធផលបោះឆ្នោតនេះ មានដូចជាគណបក្ស ហ៊្វុនស៊ិនប៉ិច និងគណបក្ស សម្ព័ន្ធដើម្បីប្រជាធិបតេយ្យ ជាដើមនោះ ប៉ុន្តែគ្មានអ្នកទទួលទូរស័ព្ទទេ។ ក្រោយព្រឹត្តិការណ៍ថ្ងៃទី២៩ ខែកក្កដា ដែលរកការរិះគន់ថា ជាការបោះឆ្នោតក្លែងក្លាយ មានគណបក្សនយោបាយចំនួនបង្ហាញការមិនពេញទៅនឹងលទ្ធផលបោះឆ្នោត រហូតដល់មានគណបក្សខ្លះព្រមានធ្វើបាតុកម្មទាមទារឲ្យមានការបោះឆ្នោតឡើងវិញ។ ប៉ុន្តែ គណបក្សទាំងនោះមិនបានដាក់ពាក្យប្តឹងទាស់ទៅនឹងលទ្ធផលបោះឆ្នោតនេះមក គ.ជ.ប ទេ។
ប្រធានគណបក្សយុវជនកម្ពុជា លោក ពេជ្រ ស្រស់ កាលពីថ្ងៃទី១៣ សីហា ដំបូងឡើងប្រកាសថា លោកដាក់ពាក្យលទ្ធផលបោះឆ្នោតបណ្ដោះអាសន្នទៅ គ.ជ.ប ប៉ុន្តែនៅថ្ងៃដដែលបានសម្រេចដកពាក្យបណ្តឹងរបស់ខ្លួនវិញ។ ជាងនេះទៅទៀត ប្រធានគណបក្សខ្មែរអភិវឌ្ឍន៍សេដ្ឋកិច្ច ដែលប្រកាសធ្វើបាតុកម្មប្រឆាំងលទ្ធផលឆ្នោត បាននៅថ្ងៃទី១៤ សីហា ថាលោកលុបចោលការធ្វើបាតុកម្មប្រឆាំងលទ្ធផលបោះឆ្នោតវិញហើយ។
ចំណែកប្រធានគណបក្សប្រជាធិបតេយ្យមូលដ្ឋានលោក យ៉េង វីរៈ ឲ្យដឹងអាស៊ីសេរីដឹងយ៉ាងខ្លីថា គណបក្សរបស់លោកមិនដាក់ពាក្យប្តឹងទៅ គ.ជ.ប ដោយផ្អែកតាមគោលជំហរនៃសេចក្ដីថ្លែងការណ៍របស់ខ្លួនកាលពីថ្ងៃទី៣១ ខែកក្កដា ដែលបានលើកឡើងថា គណបក្សប្រជាធិបតេយ្យមូលដ្ឋានមិនអាចបញ្ជាក់បានថា តើលទ្ធផលឆ្នោតនេះត្រឹមត្រូវ ឬមិនត្រឹមត្រូវនោះទេ។
អ្នកវិភាគនយោបាយវ័យក្មេង លោក ហង្ស វិទូ យល់ថា ចំពោះគណបក្សនយោបាយដែលមិនពេញចិត្តនឹងលទ្ធផលបោះឆ្នោត ប៉ុន្តែមិនបានដាក់ពាក្យបណ្ដឹងមានទាំងចំណុចវិជ្ជមាន និងអវិជ្ជមាន។ ប៉ុន្តែលោកថា មកដល់ពេលនេះហើយគឺគ្មានជម្រើសអ្វីក្រៅពីគណបក្សទាំងនោះយល់ព្រមទទួលយកលទ្ធផលនោះទាំងបង្ខំនោះទេ។ «»
ក្រោយព្រឹត្តិការណ៍បោះឆ្នោតដ៏ចម្រូងចម្រាសព្រោះរបបក្រុងភ្នំពេញបានបំផ្លាញគណបក្សសង្គ្រោះជាតិមុនការបោះឆ្នោតចូលមកដល់ កាលពីថ្ងៃទី២៩ កក្កដាកន្លងទៅ មេដឹកនាំរបបក្រុងភ្នំពេញ លោក ហ៊ុន សែន បានចូលគាល់ព្រះមហាក្សត្រនៅព្រះបរមរាជវាំង ទូលថ្វាយព្រះមហាក្សត្រយាងព្រះអង្គអោយទៅប្រថាប់ត្រាដើម្បីបង្កើតរបបថ្មីរបស់លោក។
លោក ហ៊ុន សែន ទាមទារកោះប្រជុំសភាអោយបានឆាប់ គឺយកថ្ងៃទី៥ ខែកញ្ញា ខាងមុខតែម្ដង ដោយយកលេសថា ប្រញាប់បំពេញបេសកកម្មនៅក្រៅប្រទេស។ លោក ហ៊ុន សែន អះអាងថា ព្រះមហាក្សត្របានយល់ព្រមតាមសំណើរបស់លោក។ លោក ហ៊ុន សែន និយាយថា ការបង្កើតរដ្ឋសភា និងរដ្ឋាភិបាលអោយបានលឿនជាងពេលមុននេះនេះ ព្រោះលោកនឹងត្រូវចូលរួមកិច្ចប្រជុំនៅសហគមន៍អឺរ៉ុប និងអង្គការសហប្រជាជាតិនៅចុងខែកញ្ញានេះ។ «»
ចំណែករដ្ឋមន្ត្រីក្រសួងមហាផ្ទៃ លោក ស ខេង បញ្ជាទៅគណៈបញ្ជាការសន្តិសុខអចិន្ត្រយ៍ និងខេត្តរាជធានី ឲ្យត្រៀមកម្លាំងការពារសន្តិសុខ នៅថ្ងៃប្រកាសលទ្ធផលបណ្ដោះអាសន្ន និងថ្ងៃប្រកាសលទ្ធផលផ្លូវការនៃការបោះឆ្នោត។ លោកលើកឡើងទៀតថា ហេតុដូចនេះសមត្ថកិច្ចគ្រប់ជាន់ថ្នាក់ ត្រូវយកចិត្តទុកដាក់ ចាត់ចែងការពារសន្តិសុខ សណ្ដាប់ធ្នាប់ ឲ្យបានល្អប្រសើរក្នុងព្រឹត្តិការណ៍នោះ៕
No comments:
Post a Comment