ដោយ វ៉ែន សុមេធ
2018-10-25
rfa
សមាជិកក្រុមប្រឹក្សាឃុំជាប់ឆ្នោតនៅស្រុកសាលាក្រៅ ខេត្តប៉ៃលិនលោក ឈុន សិទ្ធី (រូបកណ្ដាលពាក់អាវក្រហម) លើកដៃជាមួយអ្នកគាំទ្រ មុខពន្ធនាគារខេត្តនេះ ក្រោយបានចេញពីពន្ធនាគារ កាលពីថ្ងៃទី២៤ ខែតុលា ឆ្នាំ២០១៨។
Photo Provided
សមាជិកក្រុមប្រឹក្សាឃុំជាប់ឆ្នោតនៅស្រុកសាលាក្រៅ ខេត្តប៉ៃលិនលោក ឈុន សិទ្ធី ដែលទើបដោះលែងពីពន្ធនាគារទាមទារឲ្យលោកហ៊ុន សែនបោះឆ្នោតឡើងវិញ ដោយបើកឲ្យគណបក្សសង្គ្រោះជាតិចូលរួមប្រកួតប្រជែងផង ប្រសិនបើលោកអួតថា កម្ពុជាមានប្រជាធិបតេយ្យពេញលេញនោះ។
សមាជិកក្រុមប្រឹក្សាឃុំស្ទឹងកាច់ជាប់ឆ្នោតគណបក្សសង្គ្រោះជាតិ ដែលរបបលោក ហ៊ុន សែន រំលាយលោក ឈុន សិទ្ធី ឲ្យដឹងថា នៅថ្ងៃទី២៥ តុលា ថា លោកបាត់បង់សេរីភាពអស់មួយឆ្នាំនៅក្នុងពន្ធនាគារមក មិនបានធ្វើឲ្យលោកខ្លបខ្លាច មិនហ៊ានរិះគន់រដ្ឋអំណាចរបស់លោក ហ៊ុន សែន ធ្វើខុសច្បាប់នោះឡើយ ផ្ទុយទៅវិញលោកកាន់តែរឹងមាំជាងមុន ក្នុងការរិះគន់ដើម្បីចូលរួមលើកស្ទួយប្រជាធិបតេយ្យនៅកម្ពុជា។
អតីតក្រុមប្រឹក្សាឃុំស្ទឹងកាច់ រូបនេះអះអាងទៀតថា ប្រជាធិបតេយ្យនៅកម្ពុជា ស្លាប់ដោយសារលោក ហ៊ុន សែន ព្រោះរបបលោក ហ៊ុន សែន បានរំលាយគណបក្សសង្គ្រោះជាតិចោល ហើយបង្កើតការបោះឆ្នោតក្លែងក្លាយដើម្បីបន្លំភ្នែកអន្តរជាតិ។
លោក ឈុន សិទ្ធី បន្តថា ប្រសិនបើលោក ហ៊ុន សែន អួតថា កម្ពុជាមានប្រជាធិបតេយ្យពេញលេញដោយសារគណបក្សខ្លួនឈ្នះឆ្នោតភ្ល្លូកទឹកភ្លូកដីនោះ បុរសខ្លាំងខាងគំរាមកំហែងរូបនេះ កុំខ្លាចចាញ់ឆ្នោតហើយត្រូវក្លាហានរៀបចំការបោះឆ្នោតឡើងវិញ ដោយបើកឲ្យគណបក្សសង្គ្រោះជាតិចូលរួមប្រកួតប្រជែងស្មើភាពគ្នា៖ «ព្រោះថាបើសិនជាសហគមន៍អឺរ៉ុបកាត់កូតាអនុគ្រោះពន្ធនាំចូល គឺធ្វើឲ្យប៉ះពាល់ដល់ប្រជាពលរដ្ឋដល់ទៅជាង ២លាន់នាក់ឯណោះ ដូច្នេះបើសិនជាលោក ហ៊ុន សែន ស្រលាញ់ប្រជាពលរដ្ឋពិតប្រាកដ ហើយលោកថា ខ្លួនជាអ្នកខ្លាំងនៅកម្ពុជា សូមលោកឲ្យមានការបោះឆ្នោតមក ព្រោះគង់តែលោកឈ្នះឆ្នោតទេ ព្រោះលោកគិតថា ប្រជាពលរដ្ឋស្រលាញ់លោកដូច្នេះខ្លាចអីការបោះឆ្នោតនោះ»។
សាលាដំបូងខេត្តប៉ៃលិន បានដោះលែងលោក ឈុន សិទ្ធី ឲ្យមានសេរីភាពឡើងវិញ កាលពីរសៀលថ្ងៃទី២៤ តុលា ដោយសារគ្រប់កំណត់ការជាប់ពន្ធនាគាររយៈពេលមួយឆ្នាំ។
សាលាដំបូងខេត្តប៉ៃលិនផ្ដន្ទាទោស លោក ឈុន សិទ្ធី ដាក់ពន្ធនាគារកាលពីថ្ងៃទី២៤ ខែតុលា ឆ្នាំ២០១៧ ដោយចោទប្រកាន់ពីបទញុះញង់ឲ្យប្រព្រឹត្តបទល្មើស និងបទប្រមាថដែលប្រព្រឹត្តនៅស្រុកសាលាក្រៅ។ មូលហេតុនៃបណ្ដឹងនេះកើតឡើងដោយសារ លោក ឈុន សិទ្ធី បានថតវីដេអូឃ្លីបរបស់ស្មៀន និងមន្ត្រីកិច្ចសន្យាឃុំស្ទឹងកាច់ម្នាក់ ឈ្លោះប្រកែកគ្នា ហើយបានបង្ហោះវីដេអូនោះ លើហ្វេសប៊ុក (Facebook) ក្រោយមកស្មៀន និងមន្ត្រីជាប់កិច្ចសន្យាឃុំស្ទឹងកាច់ ក៏បានប្ដឹងលោក ឈុន សិទ្ធី ទៅតុលាការ។ ប៉ុន្តែតុលាការមិនបានចាត់ការនោះទេ ហើយទើបតែពេលលោក ហ៊ុន សែន ប្រកាសឲ្យសមាជិកក្រុមប្រឹក្សាគណបក្សប្រឆាំងទាំងអស់ ចុះចូលជាមួយគណបក្សប្រជាជន ពេលនោះលោក ឈុន សិទ្ធី បានបង្ហោះវីដេអូឆ្លើយឆ្លងបែបចំអក ទៅលោក ហ៊ុន សែន វិញថា កុំថាឡើយប្រាក់ខែត្រឹម ៧៥ម៉ឺនរៀល បើទោះបីជា ៧៥ម៉ឺនដុល្លារអាមេរិក ក៏លោកមិនលក់ឧត្ដមគតិរបស់ខ្លួនដែរ។ មួយថ្ងៃក្រោយពីមន្ត្រីបក្សប្រឆាំងរូបនេះបង្ហោះវីដេអូឃ្លីប គឺត្រូវបានសមត្ថកិច្ចឃាត់ខ្លួនតែម្ដង។
អ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា គណបក្សប្រឆាំងមិនអាចរស់ឡើងវិញបានទេ ព្រោះគណបក្សនេះរំលាយចោតដោយសារមេដឹកនាំបានធ្វើខុសធ្ងន់ធ្ងរ។ចំណែកសមាជិកក្រុមប្រឹក្សាឃុំសង្កាត់ក៏មិនអាចត្រឡប់ថយក្រោយបានដែរ ព្រោះការបែងចែកកន្លងមក បានអនុវត្តទៅតាមខ្លឹមសារច្បាប់រួចរាល់ហើយ៖ «ការប្រកួតប្រជែងការបោះឆ្នោតនៅទីលានប្រជាធិបតេយ្យមិនដូចការប្រកួតកីឡាប្រដាល់ទេ កីឡាប្រដាល់គេគិតទម្ងន់ស្មើគ្នាឬប្រហាក់ប្រហែលគ្នាបានគេឲ្យប្រកួត តែចំពោះលើទីលានប្រជាធិបតេយ្យប្រកួតប្រជែងនយោបាយ គឺគណបក្សនយោបាយណាដែលបង្កើតត្រឹមត្រូវនៃគោលការណ៍ដែលចែងក្នុងច្បាប់ ហើយមានការទទួលស្គាល់ពីក្រសួងមហាផ្ទៃអាចបង្កើតបានហើយ»។
កន្លងមកអ្នកវិភាគ លើកឡើងថា គណបក្សដែលចូលរួមការបោះឆ្នោតកាលពីខែកក្កដាកន្លងទៅនោះ មិនមែនជាដៃគូប្រកួតជាមួយគណបក្សកាន់អំណាចនោះទេ ព្រោះគណបក្សមួយចំនួនទើបកើតថ្មី និងគណបក្សដែលគ្មានកៅអីនៅក្នុងរដ្ឋសភា។
ចំណែកប្រទេសនិយមប្រជាធិបតេយ្យ ដែលមានសេដ្ឋកិច្ច រឹងមាំ ដូចជា សហរដ្ឋអាមេរិក សហភាពអឺរ៉ុប និងអូស្ត្រាលី មិនទទួលស្គាល់ការបោះឆ្នោតបែបបង្គ្រប់កិច្ចដែលរៀបចំឡើងដោយរបបលោកហ៊ុន សែន នោះឡើយ។ មិនតែប៉ុណ្ណោះប្រទេសលោកសេរីទាំងនេះ កំពុងដំណើរការដាក់ទណ្ឌកម្មរបបលោក ហ៊ុន សែន ទៀតផង ដើម្បីឆ្លើយតបទៅលើការបំផ្លាញប្រជាធិបតេយ្យ ដោយសារប្រទេសទាំងនោះ ចាត់ទុកថា របបក្រុងភ្នំពេញបានរៀបចំការបោះឆ្នោតមិនសេរី មិនត្រឹមត្រូវ និងមិនយុត្តិធម៌៕
No comments:
Post a Comment