ដោយ ម៉ៅ សុធានី
2018-10-26
ប្រធានគណបក្សសង្គ្រោះជាតិ លោក កឹម សុខា ថ្លែងទៅកាន់សមាជិកក្រុមប្រឹក្សាឃុំ-សង្កាត់ និងក្រុមអ្នកឃោសនា នាទីស្នាក់ការសង្កាត់ចាក់អង្រែលើ កាលពីព្រឹកថ្ងៃទី១៤ ខែមីនា ឆ្នាំ២០១៧។ RFA
Photo: RFA
លោក កឹម សុខា ប្រធានគណបក្សសង្គ្រោះជាតិ បានផ្សព្វផ្សាយលិខិតជាសាធារណៈលើកដំបូងនៅថ្ងៃទី២៦ តុលា នេះ ក្នុងពេលដែលលោកកំពុងជាប់ឃុំក្នុងផ្ទះ ដោយចាត់ទុកមរណភាពរបស់លោក ជាម ច័ន្ទនី ថា ជាការបាត់បង់អ្នកតស៊ូដ៏ស្មោះត្រង់ ដើម្បីបុព្វហេតុប្រជាធិបតេយ្យ សិទ្ធិមនុស្ស និងសេរីភាព។
លោក កឹម សុខា ថា លោក ជាម ច័ន្ទនី ជាអ្នកស្នេហាជាតិដ៏ក្លាហាន និងស្មោះត្រង់ម្នាក់ ដែលលោកកោតសរសើរ និងថាលោក ជាម ច័ន្ទនី មានគុណូបការៈដែលមិនអាចបំភ្លេចបាន ដោយបានលះបង់កម្លាំងកាយ ចិត្ត និងពេលវេលា ក្នុងបុព្វហេតុលទ្ធិប្រជាធិបតេយ្យ សិទ្ធិមនុស្ស សេរីភាព និងផលប្រយោជន៍របស់ពលរដ្ឋខ្មែរ។
លោក ជាម ច័ន្ទនី ជាអ្នកតំណាងរាស្ត្រ ៤អាណត្តិ គិតត្រឹមអាណត្តិទី៥ ដែលលោកជាប់ជាតំណាងរាស្ត្រនៃគណបក្សសង្គ្រោះជាតិ បានអនិច្ចកម្មកាលពីថ្ងៃទី២៥ ខែតុលា នៅផ្ទះរបស់លោក ក្នុងខណ្ឌសែនសុខ រាជធានីភ្នំពេញ ក្នុងវ័យ ៥៧ឆ្នាំ ដោយជំងឺមហារីក។
ជាមួយគ្នានេះ លោក កឹម សុខា ឧទ្ទិសដល់ដួងវិញ្ញាណក្ខន្ធ លោក ជាម ច័ន្ទនី ឲ្យបានដល់សុគតិភព។
លោក កឹម សុខា កំពុងជាប់ក្នុងផ្ទះរបស់លោក ក្នុងខណ្ឌទួលគោក ចាប់តាំងពីលោកត្រូវបានផ្ទេរមកពីពន្ធនាគារត្រពាំងផ្លុងកាលពីម៉ោង ៣ទៀបភ្លឺ ថ្ងៃទី១០ ខែកញ្ញា គឺបន្ទាប់ពីលោកបានជាប់ឃុំនៅទីនោះអស់រយៈពេល ១ឆ្នាំ ១សប្ដាហ៍។ ក្រោមការឃុំខ្លួនថ្មីនេះ លោក កឹម សុខា ត្រូវតុលាការវាស់ដីអោយដើរ និងបានព្រមានមិនឲ្យជួបនិយាយជាមួយអ្នកនយោបាយ ឬជនបរទេស៕
No comments:
Post a Comment