ហ៊ុន សែន
ដោយ មួង ណារ៉េត
2018-10-17
rfa
ការបោះឆ្នោតដោយគណៈកម្មាធិការសិទ្ធិមនុស្សតំណាងរាស្ត្រ របស់សហភាពអន្តរសភា (IPU) នៅនាទីក្រុង សេន ភេធ័រប៊ឺគ (Saint Petersburg) នៃសហព័ន្ធរុស្ស៊ី កាលពីថ្ងៃទី១៨ ខែតុលា ឆ្នាំ២០១៧។
Photo courtesy of IPU's website
សហភាពអន្តរសភា IPU នឹងចេញសេចក្ដីប្រកាសព័ត៌មាន អំពីការធ្វើទុក្ខបុកម្នេញ លើតំណាងរាស្ត្របក្សប្រឆាំង នៅថ្ងៃទី១៨ តុលានេះ។ មន្ត្រីផ្នែកសារព័ត៌មាន របស់សហភាពអន្តរសភា IPU ប្រាប់អាស៊ីសេរី កាលពីថ្ងៃទី១៧ ខែតុលាម្សិលមិញ ថាក្រោយបិទបញ្ចប់មហាសន្និបាតលើកទី១៣៩ នេះ នឹងមានសន្និសីទព័ត៌មាន ដែលសហភាពអន្តរសភា នឹងបញ្ជាក់អំពីជំហររបស់ខ្លួន ជុំវិញការរម្លាយគណបក្សសង្គ្រោះជាតិ និងការហាមឃាត់សិទ្ធិនយោបាយរបស់តំណាងរាស្ត្រគណបក្សសង្គ្រោះជាតិទាំង ៥៥រូប។
មន្ត្រីដដែលរូបនេះ ក៏បានច្រានចោល ការលើកឡើងរបស់ប្រព័ន្ធឃោសនារបស់លោក ហ៊ុន សែន ដែលអះអាង ថាប្រធានសហភាពអន្តរសភា អ្នកស្រី ហ្កាប្រ៊ីឡា គូអេវ៉ាស បារ៉ុន (Gabriela Cuevas Barron) គាំទ្រលទ្ធផលបោះឆ្នោតឆ្នាំ២០១៨។
ប្រព័ន្ធឃោសនារបស់លោក ហ៊ុន សែន គឺហ្វ្រេសញូវ (Fresh News) បានចុះផ្សាយអត្ថបទមួយ នៅថ្ងៃទី១៧ ខែតុលានេះ ដោយសរសេរថា អ្នកស្រី ហ្កាប្រ៊ីឡា គូអេវ៉ាស បារ៉ុន អបអរសាទរយ៉ាងពេញទំហឹង ក៏ដូចជាវាយតម្លៃខ្ពស់ ចំពោះសមិទ្ធផល ដែលកម្ពុជាសម្រេចបាន ជាពិសេសលទ្ធផលដ៏ជោគជ័យ នៃការបោះឆ្នោតឆ្នាំ២០១៨ នៅកម្ពុជា ដែលបានបង្ហាញអំពីលទ្ធិប្រជាធិបតេយ្យ យ៉ាងពិតប្រាកដ។
មន្ត្រីព័ត៌មានរបស់សហភាពអន្តរសភា ប្រាប់អាស៊ីសេរី បន្តថា មិនអាចទៅរួចទេ ដែលប្រធានសហភាពអន្តរសភា ថ្លែងសារដូច្នេះនោះ។ លោកបញ្ជាក់ថា លោកនឹងផ្តល់ព័ត៌មានលម្អិត ដល់អាស៊ីសេរី ជុំវិញរឿងនេះបន្ថែមទៀត។
សន្និបាតសហភាពអន្ដរសភា (IPU) លើកទី១៣៩ ធ្វើនៅទីក្រុងហ្ស៊ឺណែវ ប្រទេសស្វីស នឹងបិទបញ្ចប់នៅថ្ងៃទី១៨ ខែតុលាស្អែកនេះ។ តំណាងរដ្ឋសភា ជិត ២០០ប្រទេស នៅលើពិភពលោក បានចូលរួមក្នុងកិច្ចប្រជុំនេះ។
អនុប្រធានទី២ នៃរដ្ឋសភាឯកបក្សកម្ពុជា អ្នកស្រី ឃួន សុដារី និងគណៈប្រតិភូរបបលោក ហ៊ុន សែន ក៏បានទៅចូលរួមកិច្ចប្រជុំនេះដែរ ទោះបីឆ្នាំមុន ភាគីរបបលោក ហ៊ុន សែន មិនបានចូលរួមទេ ព្រោះអះអាងថា រវល់រៀបចំការបោះឆ្នោត និងថាការប្រជុំសហភាពអន្តរសភាមិនសំខាន់។
សហស្ថាបនិកគណបក្សសង្គ្រោះជាតិលោក សម រង្ស៊ី ក៏បានចូលរួមក្នុងការប្រជុំលើកនេះ។
ស្ថាប័នអន្តរសភានេះ បានថ្កោលទោសរបបលោក ហ៊ុន សែន យ៉ាងខ្លាំង កាលពីចុងឆ្នាំ២០១៧ ក្រោយការរម្លាយគណបក្សសង្គ្រោះជាតិ។ ជាបន្តបន្ទាប់មកទៀត ពោលគឺនៅខែកុម្ភៈ ឆ្នាំ២០១៨នេះ ស្ថាប័ននេះ បានសម្ដែងការមិនពេញចិត្ត និងបង្ហាញក្តីបារម្ភ ដែលរបបលោក ហ៊ុន សែន ហាមឃាត់សិទ្ធិនយោបាយតំណាងរាស្ត្រ ទាំងអស់របស់គណបក្សនេះ។ សហភាពអន្តរសភាពេលនោះ បានចេញសេចក្ដីសម្រេចមួយ ទាមទារឲ្យរបបលោក ហ៊ុន សែន ផ្ដល់នីតិសម្បទា ដល់តំណាងរាស្ត្រទាំងអស់នោះវិញ និងស្នើឲ្យបញ្ឈប់ការធ្វើទុក្ខបុកម្នេញ លើគណបក្សប្រឆាំង៕
No comments:
Post a Comment