ដោយ ទីន ហ្សាការីយ៉ា
2018-12-06
អតីតប្រធានគណបក្សសង្គ្រោះជាតិ លោក សម រង្ស៊ី (ស្ដាំ) ផ្ដល់បទសម្ភាសន៍ដល់អាស៊ីសេរី ក្នុងអំឡុងខែមករា ឆ្នាំ២០១៨។
Photo: RFA
លោក សម រង្ស៊ី ប្រធានស្ដីទីបណ្ដោះអាសន្ន នៃគណបក្សសង្គ្រោះជាតិ ឲ្យអាស៊ីសេរី កាលពីថ្ងៃទី៥ ធ្នូថា វិសោធនកម្មច្បាប់ស្ដីពីគណបក្សនយោបាយ ដែលបើកឲ្យមន្ត្រីបក្សប្រឆាំង អាចធ្វើនយោបាយឡើងវិញបាននោះ ជាជំហ៊ានវិជ្ជមានមួយ តែលោកទាមទារឲ្យដោះលែងលោក កឹម សុខា ជាមុនសិន ដើម្បីបើកផ្លូវឲ្យមន្ត្រីគណបក្សសង្គ្រោះជាតិ បានចូលរួមធ្វើនយោបាយឡើងវិញ។
ប៉ុន្តែលោកទាមទារឲ្យរបបឯកបក្សនេះ ដោះលែង លោក កឹម សុខា ឲ្យមានសេរីភាពជាមុនវិញសិន។
លោក សម រង្ស៊ី ថ្លែងថា របបលោក ហ៊ុន សែន វិសោធនកម្មច្បាប់ស្ដីពីគណបក្សនយោបាយ យ៉ាងប្រញាប់ប្រញាល់បែបនេះ គឺជាយុទ្ធសាស្ត្រ ដើម្បីបំបែកបំបាក់សម្ព័ន្ធរវាងលោក និងលោក កឹម សុខា តែប៉ុណ្ណោះ។
លោក សម រង្ស៊ី មានប្រសាសន៍នៅក្នុងនាទីវេទិកាអ្នកស្ដាប់អាស៊ីសេរី កាលពីរាត្រីថ្ងៃទី៥ ធ្នូថា សភាឯកបក្សនឹងធ្វើវិសោធនកម្មមាត្រា៤៥ ថ្មី (ស្ទួន) នៃច្បាប់ស្ដីពីគណបក្សនយោបាយនោះ គឺជាការវិវឌ្ឍនយោបាយជាវិជ្ជមានមួយ ក៏ប៉ុន្តែដើម្បីបង្ហាញឲ្យកាន់តែច្បាស់ថា របបរបស់លោក ហ៊ុន សែន ចង់លើកស្ទួយសិទ្ធិសេរីភាព និងប្រជាធិបតេយ្យមែននោះ លោកទាមទារឲ្យរបបឯកបក្សនេះ ដោះលែងលោក សុខា ឲ្យមានសេរីភាពជាមុនសិន មុនពេលតំណាងរាស្ត្របក្សប្រជាជនកម្ពុជា អនុម័តលើវិសោធនកម្មច្បាប់នេះ៖ «»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានសរសេរនៅក្នុងប្រព័ន្ធតេឡេហ្គ្រាម (Telegram) ថា របបក្រុងភ្នំពេញចង់ដោះស្រាយរាល់បញ្ហានានា ដែលបានកើតឡើងនៅក្នុងសង្គមកម្ពុជា ដើម្បីពង្រឹងលទ្ធិប្រជាធិបតេយ្យ នីតិរដ្ឋ និងអនុវត្តនយោបាយបង្រួបបង្រួមជាតិ។
លោក សុខ ឥសាន សម្ដែងការសោកស្ដាយ ដែលជនមួយចំនួនមើលមិនឃើញពីបំណងល្អរបស់របបលោក ហើយថា ការលើកឡើងរបស់របបក្រុងភ្នំពេញ អំពីការពង្រឹងលទ្ធិប្រជាធិបតេយ្យ មកពីគំនាបពីការផ្ដាច់ប្រព័ន្ធអនុគ្រោះពន្ធEBA ចេញពីកម្ពុជា របបក្រុងភ្នំពេញមិនមានឆន្ទៈពិតប្រាកដ ហើយថា ការកែប្រែឥរិយាបថនេះ ជាការពន្យារពេលទៅវិញ។ លោក សុខ ឥសាន អះអាងថា លោក សម រង្ស៊ី គ្មានឆន្ទៈប្រកួតប្រជែងតាមលទ្ធិគោលការណ៍ប្រជាធិបតេយ្យទេ គឺលោកចង់ដណ្ដើមអំណាច ដោយកម្លាំងបាយតែប៉ុណ្ណោះ។
ក្រសួងការបរទេសកម្ពុជា និងរដ្ឋសភា បានចេញសេចក្ដីថ្លែងការណ៍ព្រមគ្នា ដោយបញ្ជាក់ពីគោលបំណងនៃការធ្វើវិសោធនកម្មច្បាប់ស្ដីពីគណបក្សនយោបាយជាថ្មីម្ដងទៀតនេះ គឺដើម្បីបើកផ្លូវឲ្យមន្ត្រីគណបក្សសង្គ្រោះជាតិ ដែលជាប់បម្រាមរបស់តុលាការកំពូលមិនឲ្យធ្វើនយោបាយនោះ ឲ្យមានសិទ្ធិធ្វើនយោបាយឡើងវិញបាន។ អគ្គលេខាធិការរដ្ឋសភា លោក ឡេង ប៉េងឡុង មានប្រសាសន៍ថា សេចក្ដីស្នើវិសោធនកម្ម បានដាក់ឲ្យគណៈកម្មការជំនាញនៃរដ្ឋសភា ពិនិត្យជាការប្រញាប់រួចហើយ រួចបញ្ជូនមកគណៈកម្មាធិការអចិន្ត្រៃយ៍នៃរដ្ឋសភាវិញ មុននឹងដាក់ឲ្យអង្គសភាអនុម័តក្នុងពេលឆាប់ៗ នេះ។ លោកបន្ថែមថា ទោះបីជាច្បាប់នេះ មានបំណងចង់ឲ្យមន្ត្រីបក្សប្រឆាំងមានសិទ្ធិធ្វើនយោបាយវិញក្ដី តែពុំមែនមានន័យថា មន្ត្រីទាំង ១១៨នាក់នោះ មានសិទ្ធិវិលមកធ្វើនយោបាយវិញទាំអស់គ្នា គឺមានតែមន្ត្រីណា ដែលរបបក្រុងភ្នំពេញ ចាត់ទុកថា ជាមនុស្សមិនបានបំផ្លិចបំផ្លាញជាតិតែប៉ុណ្ណោះ៖ «»។
លោក សម រង្ស៊ី ឆ្លើយតបថា នេះជាយុទ្ធសាស្ត្របំបែកបំបាក់របស់លោក ហ៊ុន សែន ដែលលោកអំពាវនាវឲ្យសមាជិករបស់គណបក្សសង្គ្រោះជាតិទាំងអស់ កុំលេងល្បែងជាមួយលោក ហ៊ុន សែន ដែលនៅពីក្រោយនៃការប្រកាសថា ចង់លើកស្ទួយលទ្ធិប្រជាធិបតេយ្យ នីតីរដ្ឋ និងបង្រួបបង្រួមជាតិនៅពេលនេះ គឺជាចេតនានយោបាយយ៉ាងពិតប្រាកដរបស់លោក ហ៊ុន សែន ដែលចង់បំបែកលោក ចេញពីលោក កឹម សុខា ដើម្បីឲ្យសង្គ្រោះជាតិទន់ខ្សោយ។ លោក សម រង្ស៊ី អះអាងថា យុទ្ធសាស្ត្រទាំងអស់នេះ លោក បានដឹងអស់ទៅហើយ។ លោក សម រង្ស៊ី ព្យាករណ៍ថា លោក ហ៊ុន សែន នឹងបើកឲ្យមន្ត្រីបក្សសង្គ្រោះជាតិមួយចំនួនមុនគេ ដែលបង្កប់ខ្លួននៅក្នុងគណបក្សសង្គ្រោះជាតិកន្លងមកនោះ។ ទាក់ទងនឹងការចោទប្រកាន់មន្ត្រីគណបក្សសង្គ្រោះជាតិថាបំផ្លិចបំផ្លាញជាតិ និងក្បត់ជាតិនោះ លោក សម រង្ស៊ី អះអាងថា មានតែមេដឹកនាំរបបក្រុងភ្នំពេញទេ ដែលបំផ្លាញជាតិនោះ៖ «»។
ពលរដ្ឋមួយរូបនៅខែត្របាត់ដំបង អ្នកស្រី សំបូរ លើកជាសំនួរសួរទៅលោក សម រង្ស៊ី ក្នុងនាទីអ្នកស្ដាប់អាស៊ីសេរី កាលពីយប់ថ្ងៃទី៥ ធ្នូ ថា បើសិនជាលោក សម រង្ស៊ី មានលក្ខខណ្ឌដោះដូរអ្វីមួយពីបក្សប្រឆាំងវិញ តើគណបក្សប្រឆាំងនឹងធ្វើដូចម្ដេច? «»
ឆ្លើយតបនឹងសំណួរនេះ លោកសម រង្ស៊ី បញ្ជាក់ថា លោកគ្មានអ្វីដោះដូរអ្វីក្រៅពីរបបលោក ហ៊ុន សែន ឡើយ តែលោកដាក់លក្ខខណ្ឌមួយចំនួនទៅរបបលោក ហ៊ុន សែន បើសិនជារបបនេះ ពិតជាមានឆន្ទៈពិតប្រាកដចង់ស្ដារលទ្ធិប្រជាធិបតេយ្យ និងធ្វើឲ្យពលរដ្ឋរស់នៅដោយសុខសាន្តមែននោះ៖ «»។
ក្រុមអ្នកវិភាគលើកឡើងថា របបលោក ហ៊ុន សែន មកទល់ពេលនេះ មិនទាន់បង្ហាញយន្តការច្បាស់លាស់នៅឡើយទេ អំពីការប្រកាសជំហរថា ចង់ស្ដារលទ្ធិប្រជាធិបតេយ្យ លើកស្ទួយសិទ្ធិមនុស្ស និងបង្រួបបង្រួមជាតិនោះ ផ្ទុយទៅវិញ អ្នកវិភាគ ក៏ឃើញមិនខុសពីលោក សម រង្ស៊ី ដែរ គឺរបបលោក ហ៊ុន សែន កំពុងប្រើយុទ្ធសាស្ត្របំបែកលោក កឹម សុខា ចេញពីលោក សម រង្ស៊ី ដែលរបបនេះ នឹងដោះលែងលោក កឹម សុខា នៅពេលឆាប់ៗនេះ ហើយនឹងបើកសិទ្ធិឲ្យធ្វើនយោបាយឡើងវិញ រួមទាំងមន្ត្រីជាជំនិតរបស់លោក កឹម សុខា មួយចំនួនទៀត។
ទោះជាយ៉ាងនេះក្ដី លោក សម រង្ស៊ី នៅតែមានជំនឿចិត្តយ៉ាងមុតមាំថា លោក កឹម សុខា និង លោក គឺជាមនុស្សតែមួយ ដែលរបបលោក ហ៊ុន សែន មិនអាចបំបែកបំបាក់បានឡើយ។ លោក សម រង្ស៊ី អះអាងថា សារដែលមេធាវីលោក កឹម សុខា និងមនុស្សមួយចំនួនទៀត បានបញ្ចេញថា លោក កឹម សុខា គាំទ្រសេចក្ដីថ្លែងការណ៍របស់របបលោក ហ៊ុន សែន កាលពីថ្ងៃទី៣ ធ្នូ ដែលនិយាយពីការលើកស្ទួយប្រជាធិបតេយ្យនោះ គឺលោកមិនជឿឡើយ លុះត្រាតែ លោក កឹម សុខា ត្រូវបានរបបលោក ហ៊ុន សែន ដោះលែងឲ្យមានសេរីភាពវិញ ទើបលោកជឿទៅលើការថ្លែងសារនយោបាយណាមួយរបស់លោក កឹម សុខា៕
No comments:
Post a Comment