ដោយ អាស៊ីសេរី
2019-09-18
លោក ស៊ីន សំអាត ចៅសង្កាត់ជាប់ឆ្នោតគណបក្សសង្គ្រោះជាតិ នៅសង្កាត់ផ្សារអូរឬស្សីទី៣ ខណ្ឌ៧មករា រាជធានីភ្នំពេញ ត្រូវជនមិនស្គាល់មុខពីរនាក់ពាក់មួកសុវត្ថិភាពបិទមុខជិះម៉ូតូ លួចវាយពីក្រោយឱ្យបែកក្បាល កាលពីថ្ងៃទី១៥ ខែកញ្ញា ឆ្នាំ២០១៩។
រូប៖ ផ្ដល់ឱ្យ
ចៅសង្កាត់គណបក្សប្រឆាំង លោក ស៊ីន សំអាត នៅរាជធានីភ្នំពេញ ដែលត្រូវជនមិនស្គាល់មុខលួចវាយពីក្រោយ បានពឹងអង្គការសិទ្ធិមនុស្ស លីកាដូ (Licadho) ឱ្យជួយតាមដាននិងឃ្លាំមើលសុវត្ថិភាពរបស់លោក។ អង្គការលីកាដូ អះអាងថា នឹងតាមដានឃ្លាំមើលសុវត្ថិភាពសកម្មជនបក្សប្រឆាំងរូបនេះ និងចំណាត់ការរបស់សមត្ថកិច្ចក្នុងការស្រាវជ្រាវករណីហិង្សានេះ។
មន្ត្រីសង្គមស៊ីវិល និងមន្ត្រីជាន់ខ្ពស់គណបក្សសង្គ្រោះជាតិ ចាត់ទុកករណីបង្កហិង្សាលើមន្ត្រីគណបក្សសង្គ្រោះជាតិនេះ ជាការគំរាមកំហែង និងបំភិតបំភ័យលើសកម្មជនគណបក្សប្រឆាំងនៅតាមមូលដ្ឋាន។
ចៅសង្កាត់ជាប់ឆ្នោតគណបក្សសង្គ្រោះជាតិនៅសង្កាត់ផ្សារអូរឬស្សីទី៣ ខណ្ឌ៧មករា រាជធានីភ្នំពេញ លោក ស៊ីន សំអាត ឱ្យអាស៊ីសេរីដឹងថា លោកបានដាក់ពាក្យប្តឹងទៅអង្គការសិទ្ធិមនុស្ស លីកាដូរួចហើយ កាលពីថ្ងៃទី១៦ កញ្ញាកន្លងទៅ ដើម្បីឱ្យអង្គការនេះជួយតាមដានករណីរបស់លោក។ លោកឱ្យដឹងទៀតថា លោកក៏គ្រោងទៅដាក់បណ្ដឹងនៅសមត្ថកិច្ចមូលដ្ឋានដែរ បើទោះជាលោកមិនសូវមានជំនឿថា អាចស្រាវជ្រាវរកឃើញជនសង្ស័យក្ដី៖ «គាត់យកចិត្តទុកដាក់សួរនាំមូលហេតុអីច្រើន ខ្ញុំធូរអារម្មណ៍ក្នុងចិត្តដែរ ដូចថា រឿងកើតឡើងចំពោះយើងស្មានមិនដល់យើងអត់មានបញ្ហាអីប្រជាពលរដ្ឋមួយរូបដែលធ្លាប់តែរកស៊ីតាមសម្មាអាជីវោ ខ្ញុំធ្វើការកន្លែងហូបណឹងខ្ញុំមិនដែលទំនាស់អីជាមួយភ្ញៀវទេ ខ្ញុំនៅខាងផ្នែកចម្អិន»។
លោក ស៊ីន សំអាត ត្រូវជនមិនស្គាល់មុខពីរនាក់ពាក់មួកសុវត្ថិភាពបិទមុខជិះម៉ូតូ លួចវាយលោកពីក្រោយចំក្បាលចំនួនបីដំបង បណ្ដាលឱ្យបែកក្បាល រួចជិះម៉ូតូគេចខ្លួនបាត់។ ហេតុការណ៍នេះបានកើតឡើង កាលពីថ្ងៃទី១៥ ខែកញ្ញា ក្នុងពេលលោកកំពុងអង្គុយលើម៉ូតូចាំយកប្រហិតឱ្យភ្ញៀវនៅលើផ្លូវ១១៨ នៅម្តុំសង្កាត់ទឹកល្អក់ទី១ ក្រុងភ្នំពេញ។
មន្ត្រីបក្សប្រឆាំងរូបនេះឱ្យដឹងទៀតថា ក្រោយគណបក្សសង្គ្រោះជាតិត្រូវបានរំលាយ លោកមិនបានធ្វើសកម្មភាពទាក់ទងនឹងនយោបាយទេ ហើយបានប្រកបមុខរបរជាអ្នកធ្វើការនៅកន្លែងលក់ប្រហិតខាងផ្នែកចម្អិន និងដឹកប្រហិតឱ្យភ្ញៀវ។
ទាក់ទងការលួចវាយធ្វើបាបលើសកម្មជនគណបក្សសង្គ្រោះជាតិនេះ អាស៊ីសេរីបានព្យាយាមសុំការបំភ្លឺពីអ្នកនាំពាក្យអគ្គស្នងការនគរបាលជាតិលោក ឆាយ គឹមខឿន នៅថ្ងៃទី១៨ ខែកញ្ញា ប៉ុន្តែមិនទទួលបានការឆ្លើយតបនោះទេ ដោយទូរស័ព្ទចូលគ្មានអ្នកទទួល។
ទោះបែបនេះក្តី នៅពេលនេះករណីបង្កហិង្សាលើមន្ត្រីសកម្មជនគណបក្សសង្គ្រោះជាតិម្តងៗ មេប៉ូលិសរូបនេះតែងអះអាងថា សមត្ថកិច្ចនឹងស្វែងរកជនប្រព្រឹត្តមកផ្ដន្ទាទោសឱ្យទាល់តែបាន ប៉ុន្តែ មកដល់ពេលនេះ មិនទាន់ឃើញសមត្ថកិច្ចចាប់បានជនប្រព្រឹត្តយកមកផ្ដន្ទាទោសនៅឡើយទេ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត ឱ្យអាស៊ីសេរីដឹងថា ក្រោយពេលអង្គការលីកាដូទទួលបានបណ្ដឹងពីលោក ស៊ីន អំអាត អង្គការលីកាដូនឹងតាមឃ្លាំមើលសុវត្ថិភាព និងការស្រាវជ្រាវរបស់សមត្ថកិច្ចទៅតាមលទ្ធភាព។ មន្ត្រីសិទ្ធិមនុស្សរូបនេះ ជំរុញទៅសមត្ថកិច្ចធ្វើការស្រាវជ្រាវដើម្បីចាប់ជនប្រព្រឹត្តមកផ្ដន្ទាទោសដើម្បីបង្ហាញថា សមត្ថកិច្ចអនុវត្តច្បាប់គ្មានការរើសអើងផ្នែកនយោបាយ៖ «បើសិនជារកមិនឃើញជនដៃដល់ទេ អាចនឹងគេរិះគន់ថា ជាការរើសអើងនិន្នាការនយោបាយ អ៊ីចឹងយើងជាអង្គការសិទ្ធិមនុស្សក្រោយទទួលពាក្យបណ្ដឹងទី១ យើងតាមមើលសុវត្ថិភាពរបស់គាត់ (លោក ស៊ីន សំអាត) ទី២យើងនាំឃ្លាំមើលចំណាត់ការរបស់អាជ្ញាធរថា តើមានការវិវឌ្ឍយ៉ាងទៅជាម៉េចដែរ»។
ប្រធានគណៈកម្មាធិការប្រតិបត្តិគណបក្សសង្គ្រោះជាតិ រាជធានីភ្នំពេញ លោក ម៉ន ផល្លា ឱ្យដឹងថា នៅរយៈពេលចុងក្រោយនេះ សកម្មជនគណបក្សសង្គ្រោះជាតិ ជាង ១០រូបហើយ នៅរាជធានីភ្នំពេញ ត្រូវជនមិនស្គាល់តាមលួចវាយធ្វើបាបឱ្យរងរបួស។ លោកបញ្ជាក់ថា ជនរងគ្រោះទាំងនោះ មិនមានអ្នកទទួលបានយុត្តិធម៌ទេ ព្រោះសមត្ថកិច្ចចាប់មិនបានជនប្រព្រឹត្តយកមកផ្ដន្ទាទោសតាមច្បាប់ឡើយ។ លោកចាត់ទុកករណីហិង្សានេះ គឺជាការគំរាមកំហែងផ្នែកនយោបាយលើមន្ត្រីគណបក្សសង្គ្រោះជាតិ ក្នុងបំណងរារាំងមិនឱ្យពួកគេហ៊ានចេញមុខទៅទទួលលោក សម រង្ស៊ី វិលចូលស្រុកវិញ នៅថ្ងៃទី៩ វិច្ឆិកា ខាងមុខ៕
No comments:
Post a Comment