ដោយ មួង ណារ៉េត
2019-09-19
លោក ប៉ាទ្រីក ម័រហ្វី (Patrick Murphy) ជាឯកអគ្គរដ្ឋទូតសហរដ្ឋអាមេរិកប្រចាំកម្ពុជា។
Photo courtesy of US Embassy in Phnom Penh
ឯកអគ្គរដ្ឋទូតថ្មីរបស់សហរដ្ឋអាមេរិកប្រចាំនៅកម្ពុជា ធ្វើដំណើរទៅដល់ប្រទេសកម្ពុជាហើយ កាលពីយប់មិញ ដោយលោកប្ដេជ្ញាថា នឹងពង្រឹងទំនាក់ទំនងរវាងប្រទេសទាំងពីរ រួមទាំងផ្នែកពាណិជ្ជកម្ម សិទ្ធិមនុស្ស និងប្រជាធិបតេយ្យផង។
ឯកអគ្គរដ្ឋទូតថ្មីរបស់សហរដ្ឋអាមេរិកប្រចាំនៅកម្ពុជាលោក ប៉ាទ្រីក ម័រហ្វី (W. Patrick Murphy) បានធ្វើដំណើរទៅដល់ប្រទេសកម្ពុជាហើយកាលពីយប់ថ្ងៃទី១៨ ខែកញ្ញា។ តាមរយៈសារនៅលើគណនីធ្វីតទ័រ (Twitter) របស់លោក កាលពីម៉ោង ១២ និង ៣១នាទី យប់ម្សិលមិញនេះ លោកថ្លែងភ្លាមៗ នៅព្រលានយន្តហោះថា លោកមានអារម្មណ៍ថា លោកត្រូវបានទទួលស្វាគមន៍យ៉ាងកក់ក្ដៅ ហើយទន្ទឹងរង់ចាំពង្រឹងទំនាក់ទំនងរវាងសហរដ្ឋអាមេរិក និងប្រទេសកម្ពុជា។
ទំនាក់ទំនងរវាងសហរដ្ឋអាមេរិក និងប្រទេសកម្ពុជា មានភាពល្អក់កករ និងរកាំរកូសខ្លាំងក្រោយរបបលោក ហ៊ុន សែន ចាប់ខ្លួនប្រធានគណបក្សសង្គ្រោះជាតិលោក កឹម សុខា ដាក់ពន្ធនាគារ បណ្ដេញអង្គការសង្គមស៊ីវិល រួមមានអង្គការអាមេរិក គឺវិទ្យាស្ថានជាតិប្រជាធិបតេយ្យ (NDI) រម្លាយគណបក្សសង្គ្រោះជាតិ បិទប្រព័ន្ធផ្សព្វផ្សាយឯករាជ្យ និងរៀបចំការបោះឆ្នោតដោយផាត់ចោលគណបក្សប្រឆាំងជាដើម។
ផ្ដើមពីបញ្ហារំលោភសិទ្ធិមនុស្ស និងបំផ្លាញប្រជាធិបតេយ្យធ្ងន់ធ្ងរនេះ សហរដ្ឋអាមេរិក បានកាត់ផ្តាច់ជំនួយ ដែលធ្លាប់ផ្ដល់ឱ្យគណៈកម្មាធិការជាតិរៀបចំការបោះឆ្នោត (គ.ជ.ប) និងជំនួយទាំងអស់ ទៅរដ្ឋាភិបាលកម្ពុជា លើកលែងតែជំនួយមនុស្សធម៌។ មិនតែប៉ុណ្ណោះ រដ្ឋាភិបាលសហរដ្ឋអាមេរិកបិទទិដ្ឋាការ ចំពោះមន្ត្រីជាន់ខ្ពស់នៃរបបលោក ហ៊ុន សែន ដែលចូលដៃក្នុងការរំលោភសិទ្ធិមនុស្ស និងប្រជាធិបតេយ្យ និងដាក់មេកងអង្គរក្សលោក ហ៊ុន សែន គឺលោក ហ៊ីង ប៊ុនហៀង នៅក្នុងបញ្ជីខ្មៅ ដែលត្រូវបង្កកទ្រព្យសម្បត្តិមុនគេ។
សហរដ្ឋអាមេរិកបានចេញសេចក្តីថ្លែងការណ៍ជាបន្តបន្ទាប់ ក្នុងរយៈពេលពីរឆ្នាំចុងក្រោយនេះ ដោយស្នើឱ្យរបបលោក ហ៊ុន សែន ស្ដារសិទ្ធិមនុស្ស និងប្រជាធិបតេយ្យឡើងវិញ។ សេចក្តីថ្លែងការណ៍ថ្មី និងចុងក្រោយមួយ ទើបតែធ្វើនៅថ្ងៃទី១០ ខែកញ្ញា ដែលក្រសួងការបរទេសអាមេរិក អំពាវនាវឱ្យរបបលោក ហ៊ុន សែន ដោះលែងលោក កឹម សុខា ជាបន្ទាន់។
កាលពីចុងឆ្នាំ២០១៧ ពោលគឺក្រោយការរម្លាយគណបក្សសង្គ្រោះជាតិភ្លាម លោក ប៉ាទ្រីក ម័រហ្វី គឺជាមន្ត្រីជាន់ខ្ពស់អាមេរិកដំបូងគេ ដែលបានបំពេញទស្សនកិច្ចទៅកម្ពុជា ដែលកាលណោះ លោកបានបញ្ជាក់ជំហរសហរដ្ឋអាមេរិក ដែលទាមទារឱ្យរបបក្រុងភ្នំពេញស្ដារសិទ្ធិមនុស្ស និងប្រជាធិបតេយ្យឡើងវិញ។
អ្នកនាំពាក្យបក្សប្រជាជនកម្ពុជា លោក សុខ ឥសាន ធ្លាប់អះអាងថា ឯកអគ្គរដ្ឋទូតថ្មីនៃសហរដ្ឋអាមេរិកនេះ នឹងធ្វើឱ្យទំនាក់ទំនងរវាងកម្ពុជានិងអាមេរិកមានលក្ខណៈល្អប្រសើរឡើងវិញ ដោយសារតែលោក ប៉ាទ្រីក ម័រហ្វី ជាបុគ្គលមានបទពិសោធន៍ និងចំណេះដឹងការងារការទូតច្រើនឆ្នាំ។
ប៉ុន្តែ អ្នកវិភាគនយោបាយលោកបណ្ឌិត ឡៅ ម៉ុងហៃ ធ្លាប់រម្លឹកថាទំនាក់ទំនងល្អ ឬល្អក់កកររវាងសហរដ្ឋអាមេរិក និងកម្ពុជា គឺស្ថិតនៅលើរបបក្រុងភ្នំពេញ ថា តើព្រមស្ដារសិទ្ធិមនុស្ស និង ប្រជាធិបតេយ្យឡើងវិញ យូរ ឬឆាប់ប៉ុនណាតែប៉ុណ្ណោះ៕
No comments:
Post a Comment