ដោយ អាស៊ីសេរី
2019-09-13
rfa
លោក សម រង្ស៊ី ប្រធានស្ដីទីគណបក្សសង្គ្រោះជាតិ
Screenshot
អ្នកវិភាគនយោបាយ យល់ថា ចំណាត់ការរបស់តុលាការរបបក្រុងភ្នំពេញ មិនមែនជាព្រះរាជ បំណងព្រះមហាក្សត្រនោះទេ ហើយអ្នកដែលប្រមាថព្រះមហាក្សត្រពិតប្រាកដ គឺរបបក្រុងភ្នំពេញ។
ព្រះរាជអាជ្ញាអមសាលាដំបូងរាជធានីភ្នំពេញ លោក កែវ សុធា សម្រេចចោទប្រកាន់ លោក សម រង្ស៊ី ប្រធានស្តីទីគណបក្សសង្គ្រោះជាតិ ពីបទប្រមាថព្រះមហាក្សត្រមួយករណីទៀត នៅថ្ងៃទី១៣ ខែកញ្ញា ។ ក្នុងដីកាសន្និដ្ឋានបញ្ជូនរឿងឱ្យស៊ើបសួរនោះ លោក កែវ សុធា ក៏ស្នើសុំឱ្យមានការតាមចាប់ឃុំខ្លួន លោក សម រង្ស៊ី ជាបណ្ដោះអាសន្នផងដែរ។
ចំណាត់ការនេះ បន្ទាប់ពីរដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ចេញលិខិតបញ្ជាឱ្យព្រះ រាជអាជ្ញា ចាត់វិធានការផ្លូវច្បាប់ជាបន្ទាន់ និងតឹងរ៉ឹងបំផុតចំពោះលោក សម រង្ស៊ី។ រីឯក្រសួងព្រះបរមរាជវាំង ក៏ប្រកាសថ្កោលទោស លោក សម រង្ស៊ី ដោយបានចោទប្រកាន់ថា មេបក្សប្រឆាំង រូបនេះ បានប្រើពាក្យសម្តីអសុរោះធ្ងន់ៗប្រមាថព្រះកិត្តិនាមព្រះមហាក្សត្រព្រះបាទ នរោត្តម សីហមុនី។
លោក សម រង្ស៊ី បាន សរសេរឆ្លើយតបក្នុងប្រអប់បញ្ចេញមតិ(comment)ក្នុងទំព័រហ្វេសប៊ុករបស់ លោកថា ព្រះបរមរាជវាំងសព្វថ្ងៃ ស្ថិតក្រោមការគ្រប់គ្រងរបស់ លោក ហ៊ុន សែន ដែលជាជន ក្បត់ជាតិយ៉ាងពិតប្រាកដ ពូកែតែតាមធ្វើបាបអ្នកស្នេហាជាតិ ដែលប្រឆាំងរបបគ្រប់គ្រងរបស់គាត់។ លោក សម រង្ស៊ី បន្តថា អតីតព្រះមហាក្សត្រ ព្រះបាទនរោត្តម សីហនុ កាលមានព្រះជន្មនៅឡើយ តែងតែប្រទានតម្លៃដល់សកម្មភាពស្នេហាជាតិរបស់លោក ដែលធ្វើនយោបាយប្រឆាំងដាច់ខាតអំណាច ផ្ដាច់ការ និងអំពើពុករលួយរបស់លោក ហ៊ុន សែន។
ចំណាត់ការជាថ្មីរបស់ក្រុងភ្នំពេញនេះ បន្ទាប់ពី លោក សម រង្ស៊ី បានថ្លែងក្នុងវេទិកាអ្នកស្តាប់វិទ្យុអាស៊ីសេរី កាលពីរាត្រីថ្ងៃទី១២ ខែកញ្ញា ថា ប្រជារាស្ត្រខ្មែរ មិនអាចពឹងព្រះមហាក្សត្រឱ្យជួយអន្តរាគមន៍ដោះស្រាយវិបត្តិនយោបាយបានទេ ព្រោះ របប លោក ហ៊ុន សែន បានយកព្រះ មហាក្សត្រ ធ្វើជាចំណាប់ខ្មាំងបម្រើផលប្រយោជន៍នយោបាយរបស់ខ្លួន។
កាលពីខែមិថុនា ឆ្នាំ២០១៨ រដ្ឋមន្ត្រីក្រសួងយុត្តិធម៌ លោក អង្ស វង្សវឌ្ឍានា ក៏បានបញ្ជាឱ្យអយ្យការអមសាលាដំបូងរាជធានីភ្នំពេញចាត់វិធានការច្បាប់លើលោក សម រង្ស៊ី ដែរ បន្ទាប់ពីលោកសរសេរលើហ្វសប៊ុក ដោយចាត់ទុកព្រះរាជសាររបស់ព្រះមហាក្សត្រអំពាវនាវឱ្យពលរដ្ឋទៅបោះឆ្នោតថា ជាលិខិតក្លែងក្លាយ ឬក៏ជាលិខិតមួយដែលបានធ្វើឡើងក្រោមការគំរាមកំហែងពីសំណាក់លោក ហ៊ុន សែន។
អ្នកវិភាគនយោបាយដែលរបបក្រុងភ្នំពេញតាមចាប់ខ្លួន លោក គឹម សុខ មានប្រសាសន៍ថា ចំណាត់ការ និងការចេញសេចក្តីថ្លែងការណ៍ទាំងនេះ មិនមែនជាព្រះរាជបំណងរបស់ព្រះមហាក្សត្រឡើយ ប៉ុន្តែជាបំណង របស់គណបក្សប្រជាជនកម្ពុជា ដែលចង់យកព្រះនាមព្រះអង្គទៅប្រើប្រាស់សម្រាប់ផលប្រយោជន៍នយោបាយរបស់ខ្លួន។ ជាពិសេស របបក្រុងភ្នំពេញ ចង់យកព្រះនាមព្រះមហាក្សត្រប្ដឹងលោក សម រង្ស៊ី ទៅតុលាការ ដើម្បីបន្ថែមសម្ពាធកុំឱ្យលោក សម រង្ស៊ី វិលចូលកម្ពុជា តាមកាលកំណត់៖ «បំណងរបស់ព្រះមហាក្សត្រគឺការចង់បានការផ្សះផ្សាជាតិ ប៉ុន្តែសេចក្ដីថ្លែងការណ៍ទាំងនោះ ខ្ញុំមើលខ្លឹមសារគឺជាការចង់បាន ឬជាការរៀបចំរបស់ រដ្ឋាភិបាលនៃក្រុមលោក ហ៊ុន សែន ដែលយកព្រះនាមព្រះមហាក្សត្រទៅបិតបាំង។ បើនិយាយពី ក្រសួងយុត្តិធម៌យើងមិនបាច់និយាយទេ ហើយបើនិយាយពីក្រសួងព្រះបរមរាជវាំងវិញ សូម្បីតែ ព្រះបាទនរោត្តម សីហនុ កាលមានព្រះជន្មនៅឡើយ មានរាជបន្ទូលថា ក្រសួងនេះ គឺជាក្រសួងរបស់គណបក្សប្រជាជនកម្ពុជា ដែលគេតែងតាំងទៅឃ្លាំមើលវាំង កុំឱ្យព្រះមហាក្សត្រ អាចធ្វើអ្វីបានទៅតាមបំណងព្រះរាជហឫទ័យដើម្បីជាតិ និងប្រជារាស្ត្រ»។
លោក គឹម សុខ ថ្លែងបន្តថា អ្នកដែលប្រមាថព្រះមហាក្សត្រពិតប្រាកដ គឺក្រុមលោក ហ៊ុន សែន ទៅវិញទេ៖ «អ្នកនយោបាយនៅកម្ពុជា បើយើងនិយាយពីភាសា និយាយមិនសូវគោរពព្រះមហាក្សត្រគឺមានដូចគ្នា ។ ប៉ុន្តែបើយើងនិយាយអំពីលក្ខខណ្ឌនៃការប្រមាថព្រះមហាក្សត្រ ការមិនគោរពតួនាទីព្រះមហាក្សត្រ និងមិនគោរពខ្លឹមសារនៃរដ្ឋធម្មនុញ្ញ ដែលពេលមានបញ្ហាផ្សេងៗត្រូវយកព្រះមហាក្សត្រជានិមិត្តរូបហើយគោរពតាមព្រះរាជបំណងរបស់ព្រះអង្គដើម្បីជួយប្រទេសជាតិ និងប្រជារាស្ត្រ គឺខ្ញុំមើលឃើញថា មានតែរដ្ឋាភិបាលនៃក្រុម លោក ហ៊ុន សែនទេ គឺបង្ហាញសញ្ញាច្បាស់មិនត្រឹមតែពាក្យសម្តីទេ ថែមទាំងសកម្មភាពដល់ទៅ គំរាម ប្តូររាជបល្ល័ង្កប្ដូររបប ហើយនឹងសង្កត់ព្រះមហាក្សត្រតាមបំណងនៃមហិច្ឆតាអំណាច របស់គេ»។
កន្លងមក មេដឹកនាំរបបក្រុងភ្នំពេញ រងការចោទថា ប្រើភាសាប្រមាថព្រះមហាក្សត្រដែរ ប៉ុន្តែក្រសួង ព្រះបរមរាជវាំង និងក្រសួងយុត្តិធម៌ក្តី មិនដែលហ៊ានថ្កោលទោស ឬប្តឹងលោក ហ៊ុន សែន ឡើយ។ ផ្ទុយទៅវិញពួកគេ ថែមទាំងនាំគ្នាការពារលោក ហ៊ុន សែន ពីការរិះគន់នានាទៀតផង។
កាលពីចុងខែធ្នូ ឆ្នាំ២០១៨ លោក ហ៊ុន សែន បាននិយាយក្នុងពេលលូកដៃអន្តរាគមន៍ជម្លោះផ្ទៃក្នុងក្រុមហ៊ុនទូរទស្សន៍ស៊ី.អិន.ស៊ី (CNC) របស់ឧកញ៉ា គិត ម៉េង ថា លោក គិត ម៉េង ត្រូវតែធ្វើតាម បញ្ជារបស់ដាច់ខាត ព្រោះអំណាចរបស់លោកធំណាស់ សូម្បីតែស្ដេចផែនដីក៏ដោយក៏លោកមិនព្រឺឆ្អឹងខ្នងដែរ៖ «ជាមួយខ្ញុំកុំនិយាយឱ្យសោះ ឪស្ដេច ម៉ែស្ដេច ក៏ខ្ញុំដាក់ដែរ កុំនិយាយបញ្ហាកូនអ្នកធំក្មួយអ្នកធំ ការយោគយល់អត់ទេ»។
លោក សម រង្ស៊ី ក៏ធ្លាប់លើកឡើងថា គ្មាននរណាមើលងាយព្រះមហាក្សត្រ ជាង លោក ហ៊ុន សែន នោះទេ ដែលជេរប្រមាថ និងគំរាមកំហែងព្រះមហាក្សត្រ តាំងពីយូរឆ្នាំមកហើយ ព្រមទាំងយកព្រះមហាក្សត្រ ប្រើជាខែល ដើម្បីបន្តអំណាចផ្ដាច់ការរបស់លោក៕
No comments:
Post a Comment