ដោយ ហេង រស្មី
2019-12-13
អតីតប្រធានគណបក្សសង្គ្រោះជាតិ លោក សម រង្ស៊ី ថ្លែងសារនៅថ្ងៃទី២៧ ខែសីហា ឆ្នាំ២០១៧។ Photo courtesy of Sam Rainsy's Facebook Page
Photo courtesy of Sam Rainsy's Facebook Page
មេដឹកនាំគណបក្សប្រឆាំងមានជំនឿថា ដើមឆ្នាំ២០២០នេះ កម្ពុជានឹងមានការផ្លាស់ប្តូរដោយសារតែកម្ពុជារកនូវសម្ពាធធំៗមួយចំនួនទាក់ទិននឹងការប្រឈមមុខផ្តាច់ប្រព័ន្ធអនុគ្រោះពន្ធពីសហភាពអឺរ៉ុប EBA និង GSP របស់សហរដ្ឋអាមេរិក និង ច្បាប់ គ្លូបល មែគនីតស្គី អ៊ែកថ៍ (Global Magnitsky Act) ដើម្បីបង្កទ្រព្យសម្បត្តិមន្ត្រីជាន់ខ្ពស់របបក្រុមភ្នំពេញ។ អ្នកនាំពាក្យរដ្ឋាភិបាលបានច្រានចោលចំពោះការលើកឡើងនេះ ដោយចាត់ទុកថា លោក សម រង្ស៊ី កំពុងភូតកុហកប្រជាពលរដ្ឋ។
លោក សម រង្ស៊ី ប្រធានស្តីទីគណបក្សសង្គ្រោះជាតិមានប្រសាសន៍ថា លោកនឹងថ្នាក់ដឹកនាំគណបក្សសង្គ្រោះជាតិ នឹងវិលចូលមាតុប្រទេសវិញ នៅពេលដែលមានការផ្លាស់ប្ដូរនយោបាយដ៏ធំក្នុងប្រទេសកម្ពុជា នៅក្នុងពេលឆាប់ឆាប់ខាងមុខនេះ ទោះបីលោកត្រូវពន្យារពេល កាលពីថ្ងៃទី៩ វិច្ឆិកា កន្លងទៅក៏ដោយ។
លោក សម រង្ស៊ី ប្រាប់ប្រជាពលរដ្ឋខ្មែរអាមេរិកាំង ក្នុងពិធីទទួលទានអាហារពេលល្ងាចនៅរដ្ឋវីជីនៀ សហរដ្ឋអាមេរិក កាលពីយប់ថ្ងៃទី១២ ធ្នូ ថា ដោយសារតែមានការជំរុញពីប្រជាពលរដ្ឋទាំងក្នុងប្រទេសនឹងក្រៅប្រទេសហើយលោកសង្កេតឃើញថា ប្រជារាស្ត្រខ្មែរក៏ចង់ឱ្យមានការប្ដូរអំណាចផ្ដាច់ការនៅកម្ពុជាផងដែរ ដើម្បីទាមទារសេរីភាពនិងលទ្ធិប្រជាធិបតេយ្យ ជូនកម្ពុជាវិញ។
លោកបញ្ជាក់ថា ស្ថានភាពអន្តរជាតិក៏មានការគាបសង្កត់របបហ៊ុន សែន កាន់តែខ្លាំងដើម្បីឱ្យលោក ហ៊ុន សែន ត្រូវកែខ្លួនហើយវិលត្រឡប់ដើរមកតាមផ្លូវប្រជាធិបតេយ្យវិញ ហេតុដូច្នេះហើយសម្ពាធនិងចរន្តទាំងពីរនេះគឺច្បាស់ជានាំឱ្យមានការផ្លាស់ប្ដូរនៅកម្ពុជា៖ «ទាំងសហភាពអឺរ៉ុប ទាំងសហរដ្ឋអាមេរិកអនុវត្តច្បាប់ថ្មី គេមាននីតិវិធីដែលគេបានកំណត់ដើម្បីធ្វើឱ្យ ហ៊ុន សែន នឹងយល់ថាគេមិនបណ្ដោយឱ្យ ហ៊ុន សែន ធ្វើអីបានតាមចិត្ត សម្លាប់ប្រជាធិបតេយ្យបានតាមចិត្តផ្ទុយទៅវិញគេតម្រូវឱ្យ ហ៊ុន សែន បើកផ្លូវឱ្យគណបក្សសង្គ្រោះជាតិបានដំណើរការឡើងវិញហើយឱ្យប្រជាធិបតេយ្យរស់ឡើងវិញ»។
ការលើកឡើងរបស់លោក សម រង្ស៊ី បានកើតមានឡើងក្រោយពេលក្រសួងរតនាគាររបស់សហរដ្ឋអាមេរិកបានរកឃើញថា លោក ទ្រី ភាព ព្រមទាំងក្រុមហ៊ុនដែលលោកគ្រប់គ្រងចំនួន ១១ ក្រុមហ៊ុន និងលោក គន់ គីម ព្រមទាំងសមាជិកក្រុមគ្រួសារបី (៣) រូបត្រូវបានសហរដ្ឋអាមេរិករកឃើញថា បានប្រព្រឹត្តអំពើពុករលួយដោយប្រយោល។
ប្រជាពលរដ្ឋនៅរដ្ឋវីជីនៀ លោក ម៉ា រុំ ដែលបានទៅចូលរួមកម្មវិធីលោក សម រង្ស៊ី ប្រាប់អាស៊ីសេរីថា លោកក៏មានជំនឿថា កម្ពុជានឹងមានការផ្លាស់ប្តូរក្នុងពេលឆាប់ៗខាងមុខ ដោយសារតែសម្ពាធពីអន្តរជាតិទាំងសហភាពអឺរ៉ុប និងសហរដ្ឋអាមេរិក៖ «ធ្វើអ្វីក៏ដោយត្រូវតែមានទស្សនៈលើសេចក្តីសង្ឃឹម បើយើងធ្វើអ្វីអត់មានសង្ឃឹមយើងអត់មានអ្វីនឹងធ្វើទេ ដូច្នេះឆ្នាំ២០២០ បើយើងមើលតាមស្ថានការណ៍នេះ កម្លាំងគាបសង្កត់ពីខាងក្នុង និងខាងក្រៅគឺថា អាចនាំឱ្យមានការផ្លាស់ប្ដូរមែន យើងមើលធ្វើការប្រៀបធៀបពីស្ថានការណ៍ខាងក្រៅក៏ដូចជាខាងក្នុងដែរ»។
អ្នកនាំពាក្យរដ្ឋាភិបាល លោក ផៃ ស៊ីផាន បញ្ជាក់ថា សម្ពាធជាអន្តរជាតិគ្មានឥទ្ធិពលមកលើរដ្ឋាភិបាលទេ។
លោក ផៃ ស៊ីផាន បញ្ជាក់ថា ការលើកឡើងរបស់មេបក្សប្រឆាំងគ្រាន់តែជាការភូតកុហក តែប៉ុន្តែពីព្រោះអ្វីដែលលោកបានលើកឡើងនេះមិនមែនលើកទីមួយទេ គឺបានកើតមានឡើងជាច្រើនដងរួចមកហើយ។ លោកអះអាងថា សម្ពាធអន្តរជាតិគ្មានឥទ្ធិពលមកលើរដ្ឋាភិបាលទេ៖ «អាភាសាផ្លាស់ប្ដូរហ្នឹងគឺជាពាក្យសម្រាប់គាត់ប្រើប្រាស់ដើម្បីបោកប្រាសមហាជន។ ជាក់ស្តែងរាប់អាណត្តិមកហើយ គ្មានអ្វីគួរឱ្យចម្លែកនោះទេ ពាក្យផ្លាស់ប្ដូរគេហៅថា ជាពាក្យមួយសម្រាប់អ្នកដឹកនាំគាត់គ្រាន់តែជាបុគ្គលម្នាក់ល្បីតាមបណ្ដាញសារព័ត៌មានទេ ម៉្លោះហើយគាត់ប្រើពាក្យផ្លាស់ប្ដូរហ្នឹងជាពាក្យបោកប្រាស់»។
លោក សម រង្ស៊ី កំពុងមានវត្តមាននៅអាមេរិក ដើម្បីជួបមន្ត្រីការបរទេស និងសមាជិកសភាអាមេរិក និងស្ថាប័នអាមេរិកមួយចំនួនដើម្បីពិភាក្សារកវិធីស្ដារលទ្ធិប្រជាធិបតេយ្យឡើងវិញនៅកម្ពុជា៕
No comments:
Post a Comment