ដោយ អាស៊ីសេរី
2019-12-13
rfa
តំណាងស្ថានទូតប្រចាំកម្ពុជា ម្ចាស់ជំនួយ តំណាងអង្គការជាតិ និងអន្តរជាតិ និអ្នកសារព័ត៌មានប្រមាណ ២០០នាក់ ចូលរួមក្នុងពិធីសម្ពោធ សម្ព័ន្ធអ្នកសារព័ត៌មានកម្ពុជា ហៅកាត់ថា CamboJa «ខេមបូចា» នៅថ្ងៃទី១៣ ខែធ្នូ ឆ្នាំ២០១៩។
រូប៖ ផ្ដល់ដោយអ្នកសារព័ត៌មាន
ក្រុមអ្នកសារព័ត៌មានកម្ពុជាជាច្រើននាក់នៅក្នុងប្រទេសកម្ពុជា នាំគ្នាសម្ពោធសម្ព័ន្ធអ្នកសារព័ត៌មានកម្ពុជាថ្មីមួយ ហៅកាត់ថា CamboJa «ខេមបូចា» នៅព្រឹកថ្ងៃទី១៣ ខែធ្នូ ដែលរៀបចំនៅសណ្ឋាគារ ហ៊ីម៉ាវារី ក្នុងរាជធានីភ្នំពេញ។ សម្ព័ន្ធអ្នកសារព័ត៌មានកម្ពុជា ប្ដេជ្ញាការពារ និងលើក ស្ទួយវិស័យសារព័ត៌មានឯករាជ្យនៅកម្ពុជា ខណៈស្ថាប័នមួយនេះ មើលឃើញថា សេរីភាពសារ ព័ត៌មាននៅកម្ពុជា កំពុងធ្លាក់ចុះយ៉ាងខ្លាំង។
ស្ថាបនិកសម្ព័ន្ធអ្នកសារព័ត៌មានកម្ពុជា ប្រកាសថា ខេមបូចា គឺជាស្ថាប័នឯករាជ្យ គ្មាននិន្នាការ នយោបាយទៅរកគណបក្សណាមួយឡើយ ហើយបេសកកម្មរបស់ ខេមបូចា គឺពង្រឹងវិជ្ជាជីវៈសារ ព័ត៌មាន ពង្រឹងសេរីភាពអ្នកសារព័ត៌មាន ពង្រឹងឯករាជភាពរបស់ប្រព័ន្ធផ្សព្វផ្សាយ និងអំណាច សារព័ត៌មាន និងដើម្បីការពារអ្នកសារព័ត៌មាន។
ប្រធានក្រុមប្រឹក្សាភិបាលនៃសម្ព័ន្ធអ្នកសារព័ត៌មានកម្ពុជា លោក ណុប វី មានប្រសាសន៍ថា "សម្ព័ន្ធ អ្នកសារព័ត៌មានកម្ពុជា" ថ្មីមួយនេះ ចង់ឃើញអ្នកសារព័ត៌មានដែលមានវិជ្ជាជីវៈ អាចរាយការណ៍ព័ត៌មានបានដោយសេរី ប្រកបដោយសុវត្ថិភាព និងសន្តិសុខពេញលេញ មិនទទួលរងការបង្គាប់បញ្ជាពីភាគីណាមួយ។ លោកមានជំនឿថា សម្ព័ន្ធអ្នកសារព័ត៌មានកម្ពុជា (ខេមបូចា) នឹងចូលរួមប្រកបដោយប្រសិទ្ធភាព ក្នុងការពង្រឹងសេរីភាពសារព័ត៌មាន សេរីភាពបញ្ចេញមតិ ដែលជាសសរស្ដម្ភយ៉ាងរឹងមាំនៃសង្គមប្រជាធិបតេយ្យតាមរយៈការពង្រឹងវិជ្ជាជីវៈ និងដើរតួនាទីជាអ្នកសារព័ត៌មានគំរូ៖ «អ្នកសារព័ត៌មានមិនមែនជាសត្រូវរបស់បក្សនយោបាយ ឬក្រុមណា មួយឬរដ្ឋាភិបាល ឬមន្ត្រីរដ្ឋាភិបាលនោះទេ។អ្នកសារព័ត៌មាន ដើរតួនាទីផ្ដល់ព័ត៌មានពិតនិងគ្រប់ជ្រុងជ្រោយ ដូច្នេះពួកគេគួរតែមានសេរីភាពពេញលេញប្រមូលព័ត៌មាន សរសេរ និងផ្សព្វ ផ្សាយព័ត៌មាន ជាពិសេសការសម្រេចចិត្តរបស់ពួកគេទៅលើប្រភេទរឿង ដែលត្រូវសរសេរដោយ មិនមានការគំរាមកំហែង បំភិតបំភ័យ និងការដាក់គំនាបលើខ្លួនឯង។ ការផ្សាយព័ត៌មានពិតស៊ី ជម្រៅ និងរឿងរ៉ាវរសើបៗ គឺជាការចូលរួមចំណែកជំរុញឲ្យមានដំណោះស្រាយសង្គម»។
ក្នុងពិធីសម្ពោធនេះ មានការចូលរួមពីឯកអគ្គរាជទូតស៊ុយអែតប្រចាំកម្ពុជា លោក ប្យ៊ន ហេកម៉ាក (Bjorn Haggmark ) ដែលជាម្ចាស់ចំនួយរបស់ខេមបូចា និងមានតំណាងស្ថានទូតនានា ប្រចាំកម្ពុជា តំណាងអង្គការជាតិ និងអន្តរជាតិ ព្រមទាំងអ្នកសារព័ត៌មានច្រើនរូបផង។
ឯកអគ្គរាជទូតស៊ុយអែតប្រចាំកម្ពុជា លោក ប្យ៊ន ហេកម៉ាក (Bjorn Haggmark ) ថ្លែងក្នុងពិធីនោះថា ប្រទេសស៊ុយអែត គាំទ្រចំពោះបង្កើតសម្ព័ន្ធអ្នកសារព័ត៌មានកម្ពុជានេះឡើង ដោយសារតែ កន្លងមកលោកសង្កេតឃើញថា សេរីភាពបញ្ចេញមតិ និងសេរីភាពសារព័ត៌មាននៅកម្ពុជាធ្លាក់ចុះ គួរឲ្យកត់សម្គាល់។ លោកសង្ឃឹមថា ខេមបូចា នឹងដើរតួនាទីសំខាន់ក្នុងការរួមចំណែកធ្វើឲ្យសេរីភាពបញ្ចេញមតិ និងសេរីភាពសារព័ត៌មាននៅកម្ពុជាបានប្រសើរឡើង។
ជាមួយគ្នានេះ នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត មានប្រសាសន៍ថា សម្ព័ន្ធអ្នកសារព័ត៌មានកម្ពុជានេះ មានលក្ខណៈ ខុសប្លែកពីសមាគម និងក្លឹបសារព័ត៌មានដទៃទៀត ដោយលោកមើលឃើញថា ស្ថាប័នមួយនេះ មានជំហរឯករាជ្យ និងមានគោលដៅ និងឆន្ទៈពិតប្រាកដក្នុងការជួយជ្រោមជ្រែងអ្នកសារព័ត៌មានឯករាជ្យ៖ «គោលបំណង ខេមបូចា នេះ គឺចង់ការពារ និងគាំទ្រដល់អ្នកសារព័ត៌មានដែលមានបញ្ហានៅក្នុងការប្រកបវិជ្ជាជីវៈសារព័ត៌មាន ហើយនិងមានគោលបំណងបណ្ដុះបណ្ដាលដល់អ្នកសារព័ត៌មានដោយលើកកម្ពស់វិជ្ជាជីវៈសារព័ត៌មាន។នេះគឺជារឿងល្អ»។
សម្ព័ន្ធអ្នកសារព័ត៌មានកម្ពុជានេះ បង្កើតឡើងដោយក្រុមអ្នកកាសែតឯករាជ្យនៅក្នុងប្រទេសកម្ពុជា បន្ទាប់ពីគេមើលឃើញថា សមាគម និងក្លឹបអ្នកកាសែតកន្លងមក ជាប់ពាក់ព័ន្ធនឹងនិន្នាការនយោបាយ មិនបានបំពេញតួនាទីឲ្យបានសកម្ម និងត្រឹមត្រូវក្នុងការជួយអ្នកសារព័ត៌មាន ក្នុងពេលមានយុទ្ធនាការបង្ក្រាបលើប្រព័ន្ធផ្សព្វផ្សាយ និងអ្នកសារព័ត៌មានឯករាជ្យនៅកម្ពុជា។
ប្រធានសម្ព័ន្ធអ្នកសារព័ត៌មានកម្ពុជា លោក ម៉ៃ ទិត្យថារ៉ា មានប្រសាសន៍ថា មកទល់ពេលនេះ ខេមបូចា ទទួលបានអ្នកគាំទ្រជាសមាជិកជិត ១០០នាក់ហើយ។ លោកបញ្ជាក់ថា ខេមបូចា នឹងទទួលយកអ្នកសារព័ត៌មានទាំងអស់ ដោយគ្មានការរើសអើង។ ក្នុងនោះក៏មានអ្នកសារព័ត៌មានពលរដ្ឋផងដែរ ហើយលក្ខខណ្ឌដើម្បីចូលជាសមាជិក គឺត្រូវបំពេញព័ត៌មានចាំបាច់មួយចំនួន ក្នុងទម្រង់ពាក្យស្នើសុំ និងត្រូវបង់ថវិកាចំនួន ៨ពាន់រៀលក្នុងមួយខែ។ លោក មៃ ទិត្យថារ៉ា បន្ថែមថា អត្ថប្រយោជន៍នៃការចូលជាសមាជិក គឺទទួលបានការគាំទ្រ ការបណ្ដុះបណ្ដាលសមត្ថភាពប្រចាំឆ្នាំ និងអាហារូបករណ៍សិក្សាផ្សេងៗ ពីស្ថាប័នដៃគួរទាំងក្នុង និងក្រៅប្រទេស ព្រមទាំងទទួលបានការគាំពារ ការពិគ្រោះយោបល់ផ្លូវច្បាប់ និងការពឹងពាក់មេធាវី ដោយមិនគិតប្រាក់កម្រៃជាដើម៖ «ខេមបូចា ក្រៅពីផ្ដល់សេវាគាំពារគាំទ្រផ្លូវច្បាប់ និងជួយបណ្ដុះបណ្ដាលសម្រាប់អ្នកកាសែត គឺយើងក៏នឹងជួយផ្ដល់ការងារដល់អ្នកសារព័ត៌មាន ដូចជា ទទួលយកអត្ថបទ freelance ដើម្បីធ្វើម៉េចឲ្យពួកគាត់មានការងារធ្វើ ឬមួយពួកគាត់ចង់នៅផ្នែកឯករាជ្យអ៊ីចឹងទៅ»។
ប្រធានសម្ព័ន្ធអ្នកសារព័ត៌មានកម្ពុជា រូបនេះ អះអាងថា ស្ថាប័នអង្គការអ្នកសារព័ត៌មានមួយនេះ ប្រើប្រាស់ថវិកាខ្លួនឯង និងកំពុងរកជំនួយគាំទ្រទាំងផ្នែកធនធាន និងបច្ចេកទេសពីអង្គការដៃគួដែលធ្វើការលើកស្ទួយវិស័យសារព័ត៌មានឯករាជ្យ ប៉ុន្តែមិនទទួលលុយជំនួយពីរដ្ឋាភិបាល ឬគណបក្សនយោបាយនោះទេ។
ការបង្កើតសម្ព័ន្ធអ្នកសារព័ត៌មានកម្ពុជា ហៅកាត់ថា «ខេមបូចា» (CamboJA) ដោយក្រុមអ្នកកាសែត ឯករាជ្យនេះ គឺចំពេលដែលមានការរិះគន់ខ្លាំងៗ ថា សេរីភាពសារព័ត៌មាននៅកម្ពុជារយៈពេល ២ឆ្នាំ ចុងក្រោយនេះ អាក្រក់ខ្លាំង ដោយសារតែគណបក្សកាន់អំណាចរបស់លោក ហ៊ុន សែន ព្យាយាមកម្ចាត់ប្រព័ន្ធផ្សព្វផ្សាយដែលរិះគន់ខ្លួន។ សន្ទស្សន៍សេរីភាពសារព័ត៌មានពិភពលោកឆ្នាំ២០១៩ ដែលចេញផ្សាយដោយអង្គការអ្នករាយការណ៍គ្មានព្រំដែន (Reporters Without Border) បង្ហាញថា កម្ពុជាជាប់លេខ ១៤៣ ដែលមានន័យថា ចំណាត់ថ្នាក់នេះ កម្ពុជានៅតែស្ថិតក្នុងចំណោមប្រទេសដែលមានស្ថានភាពលំបាកផ្នែកសេរីភាពសារព័ត៌មាន។ រីឯអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) បានចេញសេចក្ដីថ្លែងការណ៍ កាលពីខែកក្កដាថា រដ្ឋាភិបាលរបស់លោក ហ៊ុន សែន នៅតែចាត់ទុកអ្នកសារព័ត៌មានជាចំណាប់ខ្មាំង ដើម្បីដាក់ទណ្ឌកម្មអ្នកដែលហ៊ានរិះគន់របបរបស់លោក។ អង្គការអន្តរជាតិនេះ អំពាវនាវដល់រដ្ឋាភិបាលបរទេស និងម្ចាស់ជំនួយ ឱ្យចាត់ទុកសេរីភាពសារព័ត៌មានរបស់កម្ពុជាថា បានស្លាប់ដូចគ្នានឹងលទ្ធិប្រជាធិបតេយ្យដែរ ហើយជំរុញរដ្ឋាភិបាលកម្ពុជា ឱ្យទម្លាក់ចោលការចោទ ប្រកាន់មិនសមទំនងនេះលើអ្នកសារព័ត៌មាន៕
No comments:
Post a Comment