ដោយ ហេង រស្មី
2020-01-26
មន្ត្រីនាយកដ្ឋានប្រយុទ្ធនឹងជំងឺឆ្លង ក្រសួងសុខាភិបាល ដាក់ម៉ាស៊ីនត្រួតពិនិត្យអ្នកដំណើរនៅវាលយន្តហោះ និងច្រកចេញចូលអន្តរជាតិ។
រូប៖ ហ្វេសប៊ុកនាយកដ្ឋានប្រយុទ្ធនឹងជំងឺឆ្លង នៅថ្ងៃទី១៤ ខែមករា ឆ្នាំ២០២០
ក្រសួងសុខាភិបាល ព្រមានចាត់វិធានការចំពោះអ្នកប្រើប្រាស់បណ្តាញសង្គមហ្វេសប៊ុកដែល ប្រឌិតព័ត៌មានថា ជំងឺរលាកសួតបង្កឡើងដោយវីរុសកូរ៉ូណា (Corona Virus) មានប្រភពពីប្រទេសចិនឆ្លងចូលដល់ប្រទេសកម្ពុជា។ សង្គមស៊ីវិលយល់ថា ក្រសួងសុខាភិបាលគួរតែយកចិត្តទុកដាក់ផ្សព្វផ្សាយ និងទប់ស្កាត់មេរោគឆ្លងប្រភេទ ថ្មីនេះឲ្យមានប្រសិទ្ធភាព ជាពិសេសរកវិធីសាស្ត្រ ជួយដល់និស្សិតកម្ពុជាដែលកំពុងស្ថិតក្នុងប្រទេសចិន។
អ្នកនាំពាក្យក្រសួងសុខាភិបាល និងជាប្រធាននាយកដ្ឋានប្រយុទ្ធនឹងជំងឺឆ្លង លោក លី សូវ៉ាន់ ប្រកាសថា គិតត្រឹមម៉ោង ៤ល្ងាចថ្ងៃទី២៦ ខែមករា កម្ពុជាមិនទាន់រកឃើញ មានករណីជំងឺឆ្លងប្រភេទរលាកសួតបង្កដោយវីរុសកូរ៉ូណា (Coronavirus) នៅឡើយទេ។ លោកអះអាងថា ក្រសួងរកឃើញមានករណីសង្ស័យជាបន្តបន្ទាប់ ប៉ុន្តែក្រោយពិនិត្យនិងវិភាគមើល គឺលទ្ធផលសុទ្ធតែអវិជ្ជមានទាំងអស់៖ «យើងនៅតែខិតខំប្រឹងប្រែងបង្ការ និងទប់ស្កាត់ឲ្យទាន់ពេលវេលា ហើយករណីសង្ស័យយើងត្រូវតែ ជាពិសេស បើមានជាវិជ្ជមាន គឺយើងមានមន្ត្រីរបស់យើងទប់ស្កាត់ទាន់ពេលវេលា។ក្នុងឱកាសនេះដែរ យើងសូមអំពាវនាវដល់ពលរដ្ឋទាំងអស់ ប្រសិនបើព័ត៌មានមិនច្បាស់លាស់សុំកុំមានការផុស សូមតាមដានព័ត៌មានពីក្រសួងសុខាភិបាល និងអ្នកនាំពាក្យក្រសួងសុខាភិបាល។ ដើម្បីរាយការណ៍ករណីសង្ស័យ សូមទាក់ទងមកលេខ 115»។
ក្រសួងសុខាភិបាល កាលពីព្រឹកថ្ងៃទី២៦ ខែមករា បានចេញសេចក្តីប្រកាសព័ត៌មាន ដោយព្រមាន ថា នឹងចាត់វិធានការតឹងរ៉ឹងតាមផ្លូវច្បាប់ចំពោះម្ចាស់គណនីហ្វេសប៊ុកណាដែលនៅតែបន្តផ្សព្វផ្សាយព័ត៌មានមិនពិតថា មេរោគកូរ៉ូណា បានឆ្លងចូលដល់កម្ពុជា។ ក្រសួងចាត់ទុកថា ការផ្សាយព័ត៌មានមិនពិត គឺជា «ទង្វើមិនអាចអត់ឱនឲ្យបាន» និងជា «ទង្វើប្រាសចាកសីលធម៌ សច្ចធម៌» ដែលបង្កឲ្យ ប្រជាជនបាត់បង់ជំនឿទៅលើក្រសួងសុខាភិបាល ក្នុងការប្រឹងប្រែងទប់ស្កាត់កុំឲ្យកូរ៉ូណាវីរុសចូលដល់កម្ពុជា។
អគ្គលេខាធិការសម្ព័ន្ធសមាគម និងសហជីពផ្ទះសាមគ្គី លោក ទឹម ម៉ាឡៃ មានប្រសាសន៍ថា លោក មិនគាំទ្រការផ្សព្វផ្សាយព័ត៌មានមិនពិតនោះទេ ប៉ុន្តែលោក ស្នើសុំឲ្យក្រសួងសុខាភិបាល គួរតែខិតខំទប់ស្កាត់ឲ្យមានប្រសិទ្ធិភាព ព្រោះកម្ពុជា មានភ្ញៀវទេសចរណ៍ចិនចេញចូលរាល់ថ្ងៃ ហើយប្រសិនបើជំងឺថ្មីនេះ មានវត្តមាននៅកម្ពុជា គឺពិតជាអាសន្នធំពិបាកទប់ស្កាត់មិនខានឡើយ ។ ទន្ទឹមគ្នានេះ លោក ស្នើសុំឲ្យរដ្ឋាភិបាល គួរតែយកចិត្តទុកដាក់ជួយដល់និស្សិតកម្ពុជាប្រមាណ ២០នាក់ ដែលកំពុងជាប់នៅក្នុងក្រុងវ៉ូហាន (Wuhan) នៃខេត្តហ៊ូបេ (Hubei) ប្រទេសចិន ដែលជាទីកន្លែងផ្ទុះមេរោគដ៏កាចសាហាវនេះ៖ «រដ្ឋាភិបាល គួរតែផ្ដល់ឧបទេស និងសម្ភារៈការពារដល់ពួកគាត់ជានិស្សិត ដែលទទួលបានអាហារូបករណ៍ទៅសិក្សាទីនោះ ដែលពួកគាត់មិនមានធនធានគ្រប់គ្រាន់ក្នុងការពារហានិភ័យ ដែលកើតមានឡើងពីជំងឺនេះ។ មួយទៀត នៅពេលមានការបង្ហោះថា មានជំងឺនេះ សូមឲ្យរដ្ឋាភិបាល ស្រាវជ្រាវរកសិន ហើយបើរកមិនឃើញមានទេ សូមឲ្យ រដ្ឋាភិបាលបកស្រាយមក»។
ជំងឺរលាកសួតដែលបង្កដោយវីរុសកូរ៉ូណាថ្មីនេះ បានផ្ទុះឡើងនៅខេត្ត ហ៊ូបេ (Hubei) ប្រទេសចិន ចាប់តាំងពីដើមខែមករា។ អាជ្ញាធរចិន បានចេញបម្រាមបិទទីក្រុង និងខេត្តនេះទាំងមូល ដោយមិនអនុញ្ញាតឲ្យធ្វើដំណើរចេញចូលដោយសេរីទៀតឡើយ។
មានក្រុមនិស្សិតកម្ពុជាប្រមាណ ២០នាក់ ដែលកំពុងសិក្សានៅក្នុងខេត្តខេត្តហ៊ូបេ (Hubei) ប្រទេសចិននោះ ហើយពួកគេ ព្រួយបារម្ភយ៉ាងខ្លាំងអំពីសុវត្ថិភាពដោយសារតែការចម្លងយ៉ាងលឿននៃវីរុស កូរ៉ូណាថ្មីនេះ និងបានអំពាវនាវឲ្យរដ្ឋាភិបាលកម្ពុជា សហការជាមួយរដ្ឋាភិបាលចិន ដើម្បីជម្លៀស ពួកគេចេញពីទីនោះទៅរកកន្លែងមានសុវត្ថិភាព។ ពួកគេប្រាប់បណ្តាញសារព័ត៌មាននៅកម្ពុជាថា ស្ថានភាពទីនោះស្ងាត់ជ្រងំ ម្នាក់ៗ រស់នៅតែក្នុងបន្ទប់ ហើយហាងនានាត្រូវបានបិទទ្វា ខ្វះម្ហូបអាហារ និងខ្វះម៉ាស់ការពារជាដើម។
ឆ្លើយតបនឹងករណីនេះ ប្រធាននាយកដ្ឋានប្រយុទ្ធនឹងជំងឺឆ្លង លោក លី សូវ៉ាន់ ថ្លែងថា ក្រសួង សុខាភិបាល និងរដ្ឋាភិបាល មិនទាន់មានវិធានការជម្លៀសនិស្សិតខ្មែរចេញពីទីនោះនៅឡើយ ប៉ុន្តែ ក្រសួង បានទំនាក់ទំនង និងបានផ្ញើសារអប់រំអំពីរបៀបថែរក្សាសុខភាពជូនពួកគាត់រួចហើយ។ អ្នកនាំពាក្យក្រសួងសុខាភិបាលរូបនេះ អំពាវនាវឲ្យនិស្សិតកម្ពុជាទាំងនោះ មានការអត់ធ្មត់ និងថែរក្សាសុខភាពដោយខ្លួនឯង៖ «សូមបងប្អូនទ្រាំបន្តិចទៅ ដោយសារតែជំងឺនេះជាជំងឺមួយ ដែលយើងមិនដឹងថា ការចម្លងយ៉ាងម៉េចដែរ គួរតែគាត់ជួយសង្គ្រោះប្រជាពលរដ្ឋខ្មែរ ធ្វើយ៉ាងម៉េច ហាមកុំឲ្យជំងឺនេះឆ្លងមកប្រទេសយើង។ សូមឲ្យគាត់មានការអត់ធ្មត់ ហើយយើងខិតខំធ្វើយ៉ាងម៉េចផ្ញើសារអប់រំជូនដល់ពួកគាត់អស់ហើយ និងបានលេខទូរស័ព្ទទាក់ទងទៅពួកគាត់»។
លោកនាយករដ្ឋមន្ត្រី ហ៊ុន សែន ក៏បានបង្ហោះសារនៅលើទំព័រហ្វេសប៊ុករបស់លោក ដោយអំពាវនាវឱ្យពលរដ្ឋ និងនិស្សិតខ្មែរនៅប្រទេសចិន ថែរក្សាសុខភាព និងទំនាក់ទំនងជាមួយស្ថានទូតកម្ពុជាប្រចាំប្រទេសចិនក្នុងករណីមានអ្វីកើតឡើង។
គិតត្រឹមថ្ងៃទី២៦ ខែមករា ចំនួនមនុស្សស្លាប់ កើនដល់ ៥៦នាក់ហើយ និងជាង ២ពាន់នាក់ បានធ្លាក់ខ្លួនឈឺបណ្ដាលមកពីវីរុសកូរ៉ូណា។ ករណីវីរុសថ្មីនេះ កំពុងរីករាលដាលដល់ប្រទេសជាច្រើនក្នុងពិភព លោក រួមមាន កោះតៃវ៉ាន់ ថៃ វៀតណាម សិង្ហបុរី ម៉ាឡេស៊ី ជប៉ុន នេប៉ាល់ កូរ៉េខាងត្បូង បារាំង អូស្ត្រាលី កាណាដា អារ៉ាប់ប៊ីសាអូឌីត និងសហរដ្ឋអាមេរិក។ ប៉ុន្តែបច្ចុប្បន្នករណីស្លាប់ មានតែនៅប្រទេសចិនប៉ុណ្ណោះ។ ប្រទេសមួយចំនួន ដូចជា អាមេរិក កំពុងរៀបចំជម្លៀសប្រជាជនរបស់ខ្លួន ចេញពីទីក្រុងវ៉ូហាន (Wuhan) ជាទីកន្លែងផ្ទុះមេរោគថ្មីនេះ។
ក្រសួងសុខាភិបាលកម្ពុជាអំពាវនាវដល់ប្រជាពលរដ្ឋគ្រប់រូបឱ្យលាងដៃជាមួយសាប៊ូ ឬជាតិអាកុលឱ្យបានញឹកញាប់ ខ្ទប់មាត់និងច្រមុះ នៅពេលក្អកនិងផ្ដាសាយ ហើយចោលក្រដាសទាំងនោះក្នុងធុងសំរាមភ្លាមៗ។ ក្រសួងណែនាំឱ្យជៀសវាងការប្រាស្រ័យទាក់ទងជាមួយអ្នកដែលមានគ្រុនក្ដៅ និងក្អក ហើយបើក្នុងករណីមានអាការៈគ្រុនក្ដៅ ក្អក និងពិបាកដកដង្ហើម ត្រូវរួសរាន់រកការព្យាបាលនៅតាមមន្ទីរពេទ្យដែលនៅជិត។ ចំណុចមួយទៀត ក្រសួងហាមប៉ះពាល់សត្វរស់ បើមិនចាំបាច់ ហើយចម្អិនម្ហូបអាហារឲ្យមានអនាម័យ និងឆ្អិនល្អ និងហាមបរិភោគសត្វ ឬស៊ុតដែលនៅឆៅ។
និស្សិតខ្មែរខ្លះមិនទាន់ហ៊ានត្រឡប់ទៅបន្តការសិក្សានៅប្រទេសចិនវិញ ខណៈវីរុសកូរ៉ូណា (Coronavirus) កំពុងឆ្លងរាតត្បាតខ្លាំង
និស្សិតខ្មែរមួយចំនួនមិនទាន់ហ៊ានត្រឡប់ទៅបន្តការសិក្សានៅប្រទេសចិនវិញនៅឡើយទេ ខណៈជំងឺរលាកសួតប្រភេទថ្មី កំពុងឆ្លងតែរាតត្បាតនៅក្នុងប្រទេសចិន និងប្រទេសមួយចំនួនទៀតនៅជុំវិញពិភពលោក។
និស្សិតផ្នែកវិស្វកម្មហិរញ្ញវត្ថុឆ្នាំទី២ លោក អ៊ុក អរ៉ៃ ឲ្យអាស៊ីសេរីដឹងកាលពីយប់ថ្ងៃទី២៦ មករាថា លោក និងនិស្សិតខ្មែរប្រមាណ ១០០នាក់ផ្សេងទៀត នៅរង់ចាំការជូនដំណឹងពីគណៈគ្រប់គ្រងសាលានៅប្រទេសចិន អំពីគម្រោងវិលត្រឡប់ទៅបន្តការសិក្សាវិញ ក្រោយពីបានមកលេងស្រុកកំណើតកាលពីដើមខែមករា ឆ្នាំ២០២០ នេះ ពីព្រោះថា មេរោគកូរ៉ូណាវីរូស (Coronavirus) កំពុងតែឆ្លងរីករាលដាលពីតំបន់មួយទៅតំបន់មួយនៅលើពិភពលោកនេះ ពិសេសនៅប្រទេសចិនតែម្ដង។ ពួកលោកថា មិនទាន់ហ៊ានវិលត្រឡប់ទៅប្រទេសចិនវិញទេ។ លោកបញ្ជាក់ថា សម្រាប់និស្សិតខ្មែរ ដែលមិនទាន់បានត្រឡប់មកស្រុកកំណើតវិញនោះ អាជ្ញាធរចិនមិនអនុញ្ញាតឲ្យចេញក្រៅបរិវេណសាលាទេ ដោយសារខ្លាចឆ្លងមេរោគកូរ៉ូណាវីរុសនេះ៖ «ឥឡូវនេះ មានឆ្លងដល់តំបន់សាលាខ្ញុំហើយ គឺឆ្លងបីនាក់ហើយ ចំពោះការវិលត្រឡប់ទៅវិញ បើសិនជាអាជ្ញាធរចិនទប់ស្កាត់បាន យើងខ្ញុំនឹងនៅទៅបន្តការសិក្សាវិញ តែបើសិនជាទប់ស្កាត់មិនបានទេ យើងខ្ញុំនឹងធ្វើការសម្រេចចិត្តនៅពេលក្រោយទៀត»។
លោក អ៊ុក អរ៉ៃ ក៏សម្ដែងការព្រួយបារម្ភពីមេរោគថ្មីនេះ ឆ្លងរាលដាលដល់កម្ពុជាដែរ នៅក្រោយពីចូលឆ្នាំប្រពៃណីចិន ពីព្រោះថា ជនជាតិចិននឹងធ្វើដំណើរមកកម្ពុជាវិញ ក្រោយពិធីចូលឆ្នាំថ្មីនេះបានបញ្ចប់ ពិសេសនៅខែត្រព្រះសីហនុ ដែលជាតំបន់មានជនជាតិចិនចូលមកវិនិយោគច្រើនជាងគេ។ លោកអំពាវនាវឲ្យអាជ្ញាធរ និងប្រជាពលរដ្ឋប្រុងប្រយ័ត្ន និងជួយទប់ស្កាត់ ការពារកុំឲ្យឆ្លងមេរោគកូរ៉ូណាវីរូសនេះ។
តាមគ្រោង លោក អ៊ុក រ៉ៃ និងនិស្សិតផ្សេងទៀត ប្រមាណ ១០០នាក់ ដែលសិក្សានៅសាលាជាមួយលោកនៅខែត្រស៊ីជាំង (Zhejiang) នឹងចាប់ផ្ដើមចូលវិស្សមកាលវិញ នៅចុងខែកុម្ភៈ ឆ្នាំ២០២០ នេះ៕
No comments:
Post a Comment