ដោយ អាស៊ីសេរី
2020-01-27
មន្ទីរពេទ្យបង្អែកខេត្តព្រះសីហនុ។ រូបថតថ្ងៃទី២៥ ខែវិច្ឆិកា ឆ្នាំ២០១៤
RFA
កម្ពុជារកឃើញជំងឺរលាកសួតបង្កឡើងដោយមេរោគកូរ៉ូណាវីរុស (Coronavirus) ប្រភេទថ្មី មួយករណីដំបូង នៅខេត្តព្រះសីហនុ នៅថ្ងៃទី២៧ មករា។
ហ្វេសប៊ុករបស់នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល ផ្សាយនៅព្រលប់ថ្ងៃទី២៧ មករា បានសរសេរថា អ្នកផ្ទុកមេរោគវីរុសកូរ៉ូណាករណីដំបូងនៅកម្ពុជានេះ គឺជាជនជាតិចិនវ័យ ៦០ឆ្នាំ ដែលធ្វើដំណើរមកពីទីក្រុងវូហាន កាលពីថ្ងៃទី២៣ មករា។
បុរសរូបនេះ ធ្វើដំណើរមកប្រទេសកម្ពុជាជាមួយសមាជិកគ្រួសារ ៤នាក់ ប៉ុន្តែ មានវិជ្ជមានមេរោគតែគាត់ម្នាក់ទេ។
គាត់ចេញដំណើរពីក្រុង វូហាន មកក្រុងព្រះសីហនុ កាលពីថ្ងៃទី២៣ មករា។ នៅថ្ងៃទី២៥ មករា បុរសរូបនេះមានចេញរោគសញ្ញា គ្រុនក្ដៅ និងហៀរសំបោរ។ នៅថ្ងៃទី២៦ មករា អ្នកជំនាញយកវត្ថុវិភាគទៅមន្ទីរពិសោធន៍វិទ្យាស្ថាន ប៉ាស្ទ័រ ហើយរកឃើញលទ្ធផលវិជ្ជមានមេរោគ នៅថ្ងៃទី២៧ មករា។ គាត់មានស្ថានភាពជំងឺសញ្ញាផ្ដាសាយធម្មតា។
អាជ្ញាធរសុខាភិបាលកំពុងចាត់វិធានការដាក់អ្នកជំងឺក្នុងបន្ទប់ដាច់ដោយឡែកនៅមន្ទីរពេទ្យ ហើយតាមដានសុខភាពអ្នកប៉ះពាល់ទាំងអស់ និងបាញ់សម្លាប់មេរោគនៅកន្លែងគាត់ស្នាក់នៅ។ តាមរកអ្នកប៉ះពាល់ទាំងអស់ក្នុងកំឡុងពេលគាត់ស្នាក់នៅក្នុងប្រទេសកម្ពុជា។
ប្រសិនបើលោកអ្នកចង់ផ្ដល់ ឬសួរព័ត៌មានទាក់ទងនឹងជំងឺនេះ សូមទាក់ទងទៅលេខ ១១៥។
No comments:
Post a Comment