ដោយ មាន ឫទ្ធិ
2020-04-21
លោក ភូ លីវុឌ្ឍ (ស្ដាំ) ទីប្រឹក្សា និងជាអតីតអគ្គលេខាធិការអាជ្ញាធរជាតិ ទទួលបន្ទុកអភិវឌ្ឍន៍វិស័យបច្ចេកវិទ្យាគមនាគមន៍ព័ត៌មានវិទ្យា ហៅកាត់ថា NiDA ថតជាមួយលោកប្រធានាធិបតី ដូណាល់ ត្រាំ (Donald Trump)។
រូប៖ ហ្វេសប៊ុកលោក ភូ លីវុឌ្ឍ ថ្ងៃទី២២ ខែមករា ឆ្នាំ២០១៩
លោក ភូ លីវុធ ដែលគេស្គាល់ថា ជាអតីតអគ្គលេខាធិការអាជ្ញាធរជាតិ ទទួលបន្ទុកអភិវឌ្ឍន៍វិស័យបច្ចេកវិទ្យាគមនាគមន៍ព័ត៌មានវិទ្យា ហៅកាត់ថា NiDA កាលពីសម័យលោក សុខ អាន បានបរិច្ចាគលុយជិត ២សែនដុល្លារ ឲ្យទៅគណបក្សសាធារណរដ្ឋ ដែលជាគណបក្សកាន់អំណាចរបស់លោកប្រធានាធិបតី ដូណាល់ ត្រាំ (Donald Trump)។ ការបរិច្ចាគសាច់ប្រាក់ដ៏សម្បើមរបស់ មន្ត្រីស្និទ្ធនឹងរបបក្រុងភ្នំពេញនេះ ធ្វើឡើងក្នុងចន្លោះឆ្នាំ២០១៧ និង ២០១៩ ទៅឲ្យគណៈកម្មាធិការនយោបាយ និងយុទ្ធនាការឃោសនាបោះឆ្នោត របស់គណបក្សសាធារណរដ្ឋ នៅសហរដ្ឋអាមេរិក។
យោងតាមការផ្សាយរបស់ស្ថាប័ន «ពលរដ្ឋដើម្បីការទទួលខុសត្រូវ និងសីលធម៌ប្រចាំរដ្ឋធានីវ៉ាស៊ីនតុន» ហៅជាភាសាអង់គ្លេសថា Citizens for Responsibility and Ethics in Washington (CREW) លោក ភូ លីវុធ ដែលបច្ចុប្បន្នកំពុងរស់នៅក្នុងរដ្ឋមីនីសូតា (Minnesota) បានបរិច្ចាគលុយចំនួនពីរលើក កាលពីខែកញ្ញា ឆ្នាំ២០១៧ ជួយដល់យុទ្ធនាការឃោសនាបោះឆ្នោតរបស់តំណាងរាស្ត្រក្នុងរដ្ឋរបស់លោក មកពីគណបក្សសាធារណរដ្ឋ គឺលោក ថម អែមម័រ (Tom Emmer)។ នៅមុនពេលបោះឆ្នោតពាក់កណ្តាលអាណត្តិនៅសហរដ្ឋអាមេរិក កាលពីឆ្នាំ២០១៨ លោក ភូ លីវុធ បានបរិច្ចាគលុយចំនួនជិត ១សែន ៤ម៉ឺនដុល្លារ បន្ថែមទៀត ដើម្បីជួយយុទ្ធនាការឃោសនាបោះឆ្នោត និងគណៈកម្មាធិការនយោបាយរបស់គណបក្សសាធារណរដ្ឋ នៅក្នុងរដ្ឋរបស់លោករស់នៅ។ នៅឆ្នាំ២០១៩ លោក ភូ លីវុធ បានបរិច្ចាគលុយចំនួន ៥ម៉ឺនដុល្លារផ្សេងទៀត ទៅឲ្យគណៈកម្មាធិការរដ្ឋសភា នៃគណបក្សសាធារណរដ្ឋ ហៅកាត់ថា NRCC។ សរុបការបរិច្ចាគសាច់ប្រាក់របស់លោក តាំងពីឆ្នាំ២០១៧ រហូតមកទល់ពេលនេះ គឺមានចំនួនស្មើនឹងជិត ២សែនដុល្លារ។
អាស៊ីសេរី នៅមិនទាន់អាចទាក់ទងលោក ភូ លីវុធ បាននៅឡើយទេ គិតត្រឹមម៉ោងផ្សាយនេះ ដើម្បីសាកសួរលោកពីគោលបំណងពិតប្រាកដនៃការបរិច្ចាគសាច់ប្រាក់ដ៏ច្រើនសន្ធឹកសន្ធាប់បែបនេះ នៅក្នុងនយោបាយសហរដ្ឋអាមេរិក និងថា តើលោកបានលុយទាំងនេះមកពីណា។
យ៉ាងណាក៏ដោយ ស្ថាប័ន Citizens for Responsibility and Ethics in Washington បញ្ជាក់ថា ការបរិច្ចាគលុយទាំងនេះ បានអនុញ្ញាតឲ្យមន្ត្រីស្និទ្ធនឹងរបបក្រុងភ្នំពេញរូបនេះ មានវត្តមានចូលរួមក្នុងកិច្ចប្រជុំ និងព្រឹត្តិការណ៍ឯកជននានា ដែលអាចឲ្យលោកជួបជាមួយអ្នកនយោបាយជាន់ខ្ពស់របស់អាមេរិក រួមមានទាំងលោកប្រធានាធិបតី ដូណាល់ ត្រាំ អនុប្រធានាធិបតី លោក ម៉ៃឃ៍ ផេនស៍ (Mike Pence) និងប្រធានក្រុមតំណាងរាស្ត្រ មតិភាគតិចរបស់គណបក្សសាធារណរដ្ឋក្នុងរដ្ឋសភាសហព័ន្ធអាមេរិក គឺលោក ខេវិន ម៉ាកខាតធី (Kevin McCarthy) ជាដើម។ ស្ថាប័នដដែលនេះថា និន្នាការ ដែលមន្ត្រីរបបក្រុងភ្នំពេញ បរិច្ចាគលុយដ៏សម្បើម នៅក្នុងនយោបាយអាមេរិកបែបនេះ អាចបញ្ជាក់ថា ពួកគេកំពុងស្វះស្វែងរកឱកាស ដើម្បីពង្រីកឥទ្ធិពលរបស់បក្សកាន់អំណាច នៅក្នុងរដ្ឋបាលរបស់លោកប្រធានាធិបតី ដូណាល់ ត្រាំ និងកេងយកផលប្រយោជន៍ ដើម្បីបម្រើឲ្យនយោបាយរបស់គណបក្សប្រជាជនកម្ពុជា៕
No comments:
Post a Comment