ដោយ វ៉ែន សុមេធ
2020-05-02
សមាជិកក្រុមប្រឹក្សានីតិកម្មនៅក្រសួងមហាផ្ទៃ លោក ទី ចំរើនកុសល។
រូបពីហ្វេសប៊ុក លោក ទី ចំរើនកុសល
មន្ត្រីនគរបាលយុត្តិធម៌ម្នាក់នៅក្នុងក្រសួងមហាផ្ទៃ ចេញមុខជួយរកយុត្តិធម៌ជូនគ្រួសារជនរងគ្រោះដែលត្រូវបានរថយន្តទំនើបរបស់មន្ត្រីយោធាជាន់ខ្ពស់ម្នាក់ បុកបណ្ដាលឱ្យស្លាប់ ហើយបើករត់គេចកាលពីសប្ដាហ៍មុន។ ប្រពន្ធរបស់ជនរងគ្រោះ រំពឹងថា នឹងទទួលបានយុត្តិធម៌ឆាប់ៗ។
នគរបាលជាន់ខ្ពស់មួយរូបប្តេជ្ញាចិត្តថា នឹងនាំខ្លួនមន្ត្រីយោធាដែលបើកឡានបុកកម្មកររោងចក្របណ្ដាលឱ្យស្លាប់នោះ យកមកផ្ដន្ទាទោសតាមច្បាប់ ឱ្យខាងតែបាន។
សមាជិកក្រុមប្រឹក្សានីតិកម្មនៅក្រសួងមហាផ្ទៃ លោក ទី ចំរើនកុសល ប្រាប់អាស៊ីសេរីថា ទោះបីលោកមិនមែនអ្នកកាន់សំណុំរឿងគ្រោះថ្នាក់ចរាចរណ៍នេះក្តី ប៉ុន្តែលោកអះអាង ថា ក្នុងនាមជាមន្ត្រីនគរបាលយុត្តិធម៌មួយរូប លោកមិនអាចបិទភ្នែកចំពោះសំណុំរឿងមួយនេះបានទេ។ ឧត្ដមសេនីយ៍ផ្កាយមួយរូបនេះ ចាត់ទុកទង្វើរបស់មន្ត្រីយោធារូបនោះថា មានភាពសាហាវហួសហេតុដោយ បើកបុកមនុស្សឱ្យដេកដួលហើយ ប៉ុន្តែមិនព្រមហៅរថយន្តជួយសង្គ្រោះមកជួយជីវិតជនរងគ្រោះនោះទេ បែរជាបើកឡានចេញយ៉ាងរំភើយទៅវិញ៖ «ខ្ញុំយល់ថា ប្រសិនបើជនបង្កគាត់មានឆន្ទៈក្នុងការទទួលខុសត្រូវ មានសញ្ជាតជាមនុស្ស គឺត្រូវតែហៅរថយន្តសង្គ្រោះមកជួយសង្គ្រោះជីវិតជនរងគ្រោះ ប្រហែលជាអាចស្រោចស្រង់ជីវិតជនរងគ្រោះបាន តែដល់ពេលគាត់បើកហួសទៅទុកឱ្យគាត់ដេកដួលនៅលើថ្នល់ក្រោមដំណក់ទឹកភ្លៀង អាចជនរងគ្រោះគាត់សន្លប់ផង ក៏មិនដឹង ហើយពេលភ្លៀងទៅ អាចទឹកហូរចូលទៅស្ទះច្រមុះស្ទះដង្ហើមគ្នាផងក៏មិនដឹង»។
លោក ទី ចំរើនកុសល បន្តថា ក្រោយកើតហេតុនោះ លោកបានព្យាយាមស្រាវជ្រាវរឿងនេះ ដោយខ្លួនឯងរហូតឈានដល់កំណត់អត្តសញ្ញាណជនបង្កនោះបានពេញលេញ និងបានរាយការណ៍ជូនអគ្គស្នងការនគរបាលជាតិ ដើម្បីចាត់ការបន្តតាមផ្លូវច្បាប់។ លោកអះអាងថា ជនបង្ករូបនោះជាមន្ត្រីយោធាពាក់ស័ក្តិ៥ ឈ្មោះ ឈុន សារ៉េត និងមានមុខរបរកស៊ីក្រៅ ខាងខួងបុកគ្រឹះ ប៉ុន្តែលោកសុំលាក់អង្គភាពធ្វើការ និងទីលំនៅបណ្ដោះអាសន្នរបស់ជនបង្កនោះ។
នគរបាលយុត្តិធម៌ជាន់ខ្ពស់រូបនេះ អះអាងទៀតថា បច្ចុប្បន្នជនបង្ករូបនេះ កំពុងបន្តគេចខ្លួន ប៉ុន្តែបានឱ្យកូនស្រីរបស់ខ្លួនចូលទៅជួបការិយាល័យចរាចរណ៍ផ្លូវគោក ដើម្បីសម្របសម្រួលបញ្ចប់ រឿងក្រៅ ប្រព័ន្ធតុលាការដោយផ្ដល់សំណងដល់គ្រួសារជនរងគ្រោះចំនួន ៣ពាន់ដុល្លារ ប៉ុន្តែត្រូវបានសមត្ថកិច្ច និងគ្រួសារជនរងគ្រោះបដិសេធ។ លោកឧត្ដមសេនីយ៍ ទី ចំរើនកុសល ឱ្យដឹងថា ពេលនេះ លោកកំពុងសហការជាមួយសមត្ថកិច្ចជំនាញ រកទីតាំងលាក់ខ្លួនរបស់មន្ត្រីយោធារូបនោះ ដើម្បីនាំខ្លួនមកអនុវត្តទោសតាមច្បាប់ ព្រោះករណីបុកមនុស្សស្លាប់ហើយរត់នេះ មិនអាចដោះស្រាយត្រឹមសំណងបន្តិចបន្តួចហើយបញ្ចប់រឿងបានឡើយ៖ «ខ្ញុំថា បើរឿងនេះ ត្រឹមបញ្ចប់ក្រៅប្រព័ន្ធតុលាការ គឺខ្ញុំនឹងដើរតួនាទីធ្វើជាដើមបណ្ដឹងអាជ្ញាព្រោះខ្ញុំមានតួនាទីមួយជានគរបាលយុត្តិធម៌ជាន់ខ្ពស់មួយរូប ដូច្នេះ ខ្ញុំអាចធ្វើជាដើមបណ្ដឹងអាជ្ញាបាន។ ប៉ុន្តែពិតមែនតែខ្ញុំបានបង្ហោះនៅលើហ្វេសប៊ុកអីចឹងមែន តែខ្ញុំមិនជឿថា សមត្ថកិច្ចបញ្ចប់រឿងនេះ ក្រៅប្រព័ន្ធតុលាការនោះទេ»។
កាលពីយប់ថ្ងៃទី២៥ ខែមេសា រថយន្តម៉ាក់ហ្វត (Ford) មួយគ្រឿងពាក់ស្លាកលេខ ខេមរភូមិន្ទ បានបើកបុកម៉ូតូមួយគ្រឿងបើកបរដោយបុរសម្នាក់ នៅតាមបណ្ដោយផ្លូវ២០០៤ ខណ្ឌពោធិ៍សែនជ័យ បណ្ដាលឱ្យអ្នកបើកម៉ូតូស្លាប់។ វីដេអូឃ្លិបដែលថតបាននៅកន្លែងកើតហេតុ និងត្រូវបានអ្នកប្រើប្រាស់បណ្ដាញសង្គមហ្វេសប៊ុក ចែកចាយនោះ បង្ហាញថា នៅពេលកើតហេតុ ម្ចាស់រថយន្ត បានចុះមកទាញម៉ូតូចេញពីមុខឡាន រួចបើកគេចចេញពីកន្លែងកើតហេតុដោយសុវត្ថិភាព ដោយមិនខ្វល់ពីជនរងគ្រោះ ឬហៅឡានពេទ្យទៅជួយសង្គ្រោះនោះទេ ទុកឱ្យជនរងគ្រោះដេកស្ដូកស្ដឹងក្រោមដំណក់ទឹកភ្លៀងរហូតដល់ស្លាប់។
ក្រុមអ្នកប្រើប្រាស់បណ្ដាញសង្គមហ្វេសប៊ុក (Facebook) បានបញ្ចេញមតិហួសចិត្តចំពោះទង្វើឃោរឃៅគ្មានគុណធម៌របស់មន្ត្រីយោធារូបនោះ និងទាមទារឱ្យសមត្ថកិច្ចជួយរកយុត្តិធម៌ជូនជនរងគ្រោះ ព្រមទាំងបញ្ចប់វប្បធម៌បុកហើយរត់ផងដែរ។
ជនរងគ្រោះ ដែលស្លាប់នោះមានឈ្មោះ វង រដ្ឋា អាយុ ៣០ឆ្នាំ ជាកម្មកររោងចក្រ នៅសង្កាត់ចោមចៅក្រុងភ្នំពេញ ប៉ុន្តែមានស្រុកកំណើតនៅភូមិថ្មី ឃុំពោធិ៍ម្រាល ស្រុកបរសេដ្ឋ ខេត្តកំពង់ស្ពឺ។
ប្រពន្ធរបស់ជនរងគ្រោះ គឺលោកស្រី សិន ថា ប្រាប់អាស៊ីសេរីថា ប្តីលោកស្រី អាចមានសង្ឃឹមរស់ ប្រសិនបើជនបង្កនោះ មានចិត្តមេត្តាចុះជួយសង្គ្រោះ ឬហៅឡានពេទ្យទៅសង្គ្រោះភ្លាមៗ ព្រោះ គ្រូពេទ្យបានប្រាប់លោកស្រីថា គាត់នៅមានដង្ហើមនៅឡើយ ក្នុងពេលបញ្ជូនទៅដល់មន្ទីរពេទ្យមួយ ប៉ុន្តែដោយសារស្ថានភាពរបួសធ្ងន់ធ្ងរ និងយឺតយូរក្នុងការបញ្ជូនទៅសង្គ្រោះ ទើបធ្វើគាត់បាត់បង់ជីវិត៖ «បើនិយាយទៅ ទោះបីជាគាត់ស្លាប់ឬមិនស្លាប់ បើគាត់មានចិត្តអាណិតអាសូរជួយលើកជួយលើកជួយហៅគេយកប្តីបងមកទៅ ក៏យើងអាចមានមនោសញ្ចេតនាដែរ តែនេះដូចថា គាត់ដូចជាឃោរឃៅពេក»។
ភរិយាជនរងគ្រោះរូបនេះ សង្ឃឹមថា នឹងទទួលបានយុត្តិធម៌ឆាប់ៗដោយទទួលបានសំណងសមរម្យ ដើម្បីចិញ្ចឹមកូនតូចៗចំនួនពីរនាក់ បន្ទាប់ពីមានការជួយជ្រោមជ្រែងរបស់មន្ត្រីជាន់ខ្ពស់ក្រសួងមហាផ្ទៃ និងសមត្ថកិច្ចជំនាញដទៃទៀត៖ «ចង់ឱ្យតែជួយរកយុត្តិធម៌ និងចង់បានសំណងសមរម្យយកមកចិញ្ចឹមកូនតូចៗទាំងពីរនាក់។ពេលអត់ពីប្តីបងទៅ តើបងគិតយ៉ាងម៉េច? កូនរបស់បងនៅតូចៗ ណាស់ ដូចឃើញស្រាប់ហើយ គឺកូនបងអាយុ៥ឆ្នាំចំណែកកូនប្អូនអាយុ៣ឆ្នាំ។ ខ្ញុំមិនដឹងថា ធ្វើអីយកមកចិញ្ចឹមកូន និងដោះបំណុលគេនោះទេ»។
ទោះជាយ៉ាងណា អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ថ្លែងថា លោកមិនទាន់បានដឹងអំពីដំណើរស្រាវជ្រាវរកមន្ត្រីយោធាដែលបើកបុកហើយរត់គេចខ្លួននេះនៅឡើយទេ ដោយលោកអះអាងថា កំពុងជាប់រវល់តាមដានការរឹតបន្តឹងការអនុវត្តច្បាប់ចរាចរណ៍ថ្មី ដែលចាប់ផ្ដើមនៅថ្ងៃទី១ ខែឧសភា។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត មានប្រសាសន៍ថា ករណីគ្រោះថ្នាក់ចរាចរណ៍បុកហើយរត់នេះកំពុងក្លាយជាវប្បធម៌អាក្រក់មួយនៅកម្ពុជា ហើយលោក ជំរុញឱ្យអាជ្ញាធរមានសមត្ថកិច្ចពង្រឹងការអនុវត្តច្បាប់ឱ្យមានប្រសិទ្ធភាព ដើម្បីបញ្ចប់ករណីបែបនេះ។ លោក អំ សំអាត បន្តថា ការចូលរួមស្រាវជ្រាវរកជនសង្ស័យដោយឧត្តមសេនីយ៍ ទី ចំរើនកុសល គឺជាគំរូល្អ ហើយលោកសង្ឃឹមថា នឹងមានយុត្តិធម៌សម្រាប់គ្រួសារជនរងគ្រោះឆាប់ៗ។ មន្ត្រីសិទ្ធិមនុស្សរូបនេះ ពន្យល់ថា តាមផ្លូវច្បាប់ចំពោះករណីគ្រោះថ្នាក់ចរាចរណ៍បុក ហើយរត់នេះ គឺជនបង្កត្រូវទទួលខុសត្រូវផ្ដល់សំណងឱ្យបានសមរម្យដល់គ្រួសារជនរងគ្រោះ និងត្រូវទទួលខុសត្រូវចំពោះមុខច្បាប់៖ «បើសិនជាអ្នកនោះប្រព្រឹត្តបទល្មើសប្រឈមនឹងការជាប់ពន្ធនាគារគឺមន្ត្រីនគរបាលយុត្តិធម៌ និងព្រះរាជអាជ្ញាត្រូវតែចាត់វិធានការដើម្បីអនុវត្តផ្លូវច្បាប់ ហើយទី២ យើងមិននិយាយទៅដល់រឿងមិនទទួលខុសត្រូវនោះផង ដូចដែលយើងបានមើលរូបភាពនោះទៅ គឺបង្ហាញថា ក្នុងចេតនាមួយបុកហើយមិនបានជួយទៅដល់ជនរងគ្រោះទៀត ដោយគាត់មានលទ្ធភាពក្នុងការហៅរថយន្តសង្គ្រោះជនរងគ្រោះនោះទៀត តែផ្ទុយទៅវិញយើងឃើញថា គាត់ទាញម៉ូតូចេញហើយបើករថយន្តគេចខ្លួន ដែលនេះគឺជាបទល្មើសមួយទៀត»។
មាត្រា៨៥ នៃច្បាប់ចរាចរណ៍ថ្មីចែងថា ជនណាបើកបរដោយធ្វេសប្រហែលខ្ជីខ្ជា មិនប្រុងប្រយ័ត្នបណ្ដាលឱ្យអ្នកដទៃស្លាប់ ត្រូវផ្ដន្ទាទោសពី១ឆ្នាំទៅ ៣ឆ្នាំនិងពិន័យជាប្រាក់ ៤លានរៀលទៅ ១០លានរៀល។ ករណីជនបង្កបើកបរដោយគ្មានប័ណ្ណបើកបរនិងបើកបរក្នុងស្ថានភាពស្រវឹងហើយបណ្ដាលឱ្យស្លាប់ច្រើននាក់ ឬបើករត់គេចពីកន្លែងកើតហេតុដើម្បីគេចពីការទទួលខុសត្រូវ គឺត្រូវផ្ដន្ទាទោសពី ២ឆ្នាំទៅ ៥ឆ្នាំនិងពិន័យជាប្រាក់ពី ១០លានរៀលទៅ ២៥លានរៀល ព្រមទាំងហាមបើកបររយៈពេល ៥ឆ្នាំ៕
No comments:
Post a Comment