Tuesday 26 May 2020
លោក ស៊ុត ឌីណា ត្រូវបានដោះលែង ប៉ុន្តែទឹកប្រាក់ ៧លានដុល្លារនៅតែអាថ៌កំបាំង
ដោយ ហេង រស្មី
2020-05-24
លោក ស៊ុត ឌីណា (រូបកណ្ដាល)ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង ពេលនាំខ្លួនមកសាលាដំបូងរាជធានីភ្នំពេញ នៅថ្ងៃទី៧ ខែមេសា ឆ្នាំ២០១៦។ RFA/Rann Samnang
RFA/Rann Samnang
ថ្វីត្បិតអតីតឯកអគ្គរាជទូតកម្ពុជាប្រចាំប្រទេសកូរ៉េខាងត្បូងត្រូវបានដោះលែងចេញពីពន្ធនាគារ ប៉ុន្តែសំណុំរឿងជាប់ពាក់ព័ន្ធនឹងទឹកប្រាក់ជាង ៧លានដុល្លារបានស្ថិតនៅក្នុងភាពអាថ៌កំបាំងនៅឡើយ។ មិត្តភ័ក្ដិដែលធ្លាប់ស្គាល់ លោក ស៊ុត ឌីណា និយាយថា សំណុំរឿងនេះបានប៉ះពាល់មន្ត្រីរដ្ឋាភិបាល។
អង្គភាពប្រឆាំងអំពើពុករលួយកាលពីជាង ៤ឆ្នាំមុន បានចាប់ខ្លួនលោក ស៊ុត ឌីណា អតីតឯកអគ្គរាជទូតកម្ពុជាប្រចាំប្រទេសកូរ៉េខាងត្បូងដោយចោទប្រកាន់ថា លោកមានលុយសុទ្ធជាង ៧ លានដុល្លារអាមេរិក មានមាសសុទ្ធ ៣៣៩តម្លឹង និងរួមទាំងគ្រឿងអលង្ការមួយចំនួនទៀត ដែលទុកនៅប្រទេសកូរ៉េខាងត្បូង។អង្គភាពប្រឆាំងអំពើពុករលួយបានរកឃើញថា លោក ស៊ុត ឌីណា មានសាច់ប្រាក់ កើនឡើង ៣ លានដុល្លារ ដោយភាពមិនប្រក្រតី ក្នុងរយៈពេលត្រឹម ២៥ខែ អំឡុងពេលលោកកាន់តំណែងជាឯកអគ្គរាជទូត។លោក ស៊ុត ឌីណា បានប្រឈមមុខនឹងការចោទប្រកាន់ចំនួនពីរបទល្មើសធំៗគឺ «ទី១ បទកេងយកប្រយោជន៍ដោយខុសច្បាប់ យោងតាមមាត្រា៥៩៧ និងមាត្រា៥៩៨ នៃក្រមព្រហ្មទណ្ឌ ហើយទី២ បទរំលោភអំណាច យោងតាមមាត្រា៣៥ ច្បាប់ស្ដីពីការប្រឆាំងអំពើពុករលួយ»។
តុលាការក្រុងភ្នំពេញបានកាត់ទោសលោកឱ្យជាប់ពន្ធនាគាររយៈពេល ៥ឆ្នាំ បន្ទាប់ពីតុលាការរកឃើញថា លោកជាប់ពាក់ព័ន្ធនឹងអំពើពុករលួយក្នុងពេលដែលលោកមានតួនាទីជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូង។
លោកត្រូវបានព្រះមហាក្សត្រត្រាស់បង្គាប់ឱ្យដោះលែងចេញពីពន្ធនាគារកាលពីថ្ងៃទី១៥ ខែឧសភាក្រោយពីបានជាប់ក្នុងមន្ទីរឃុំឃាំងព្រៃស អស់រយៈពេលជាង ៤ឆ្នាំ។ ការដោះលែងនេះ ធ្វើឡើងមុនពេលនៃការជាប់ពន្ធនាការ ៥ឆ្នាំ។
លោក ស៊ុត ឌីណា មានឈ្មោះមួយទៀត ម៉ៅ មឿងយ៉ាត ធ្លាប់ធ្វើជាមេដឹកនាំរណសិរ្សប្រជាធិបតេយ្យនិស្សិតបញ្ញវន្តខ្មែរ ពីឆ្នាំ២០០០ ដល់ឆ្នាំ២០០២។
លោកកើតនៅថ្ងៃទី១៤ វិច្ឆិកា ១៩៧៦ នៅស្រុកមង្គលបុរី ខេត្តបន្ទាយមានជ័យ។ ឪពុករបស់លោក គឺលោក ស៊ុត ប៉េងគុណ ជាអតីតតំណាងរាស្ត្រគណបក្សហ៊្វុនស៊ិនប៉ិច អាណត្តិទី១ ហើយក្រោយមកបានចូលរួមជាមួយគណបក្សសម រង្ស៊ី នៅអាណត្តិទី២ (១៩៩៨-២០០៣)។ ម្តាយរបស់លោក ឌីណា គឺជាមេផ្ទះ។
លោក ស៊ុត ឌីណា ធ្លាប់បានសិក្សាផ្នែកការទូតជាន់ខ្ពស់នៅសាលាភូមិន្ទរដ្ឋបាលកាលពីឆ្នាំ១៩៩៩។ លោកត្រូវបានតែងតាំងជាអនុប្រធានទី១ នៃចលនានិស្សិតដើម្បីលទ្ធិប្រជាធិបតេយ្យ។ ចលនាដំបូងឡើងធ្វើការតស៊ូមតិក្នុងរឿងការពារបូរណភាពទឹកដីខ្មែរ និងដឹកនាំធ្វើបាតុកម្មដើម្បីការពារយុត្តិធម៌ក្នុងសង្គម។
លោក ស៊ុត ឌីណា តាមរយៈសកម្មភាពនេះត្រូវបានសារព័ត៌មានក្នុងស្រុកជាច្រើនបានចុះផ្សាយជាញឹកញាប់ដោយសារតែលោកលេចធ្លោ ក្នុងការដឹកនាំប្រឆាំងនឹងរបបលោក ហ៊ុន សែន។
ចលនានិស្សិតដើម្បីលទ្ធិប្រជាធិបតេយ្យ ពេលនោះដឹកនាំដោយលោក សារ៉ូ ស៊ីវត្ថា ក្រោយមកបានប្តូរឈ្មោះទៅជា សារ៉ូ សុវិជ័យ ជាប្រធាន។ លោក អ៊ុំ សំអាន ជាអគ្គលេខាធិការរងទី១ លោកស្រី ស៊ុន សុគន្ធមាលា ភរិយាលោក ស៊ុត ឌីណា ជាអគ្គលេខាធិការរងទី២ លោក ម៉ែន ណាត និង លោក ទូច វិបុល។
អតីតអ្នកតំណាងរាស្ត្រគណបក្សសង្គ្រោះជាតិលោក អ៊ុំ សំអាន ដែលកំពុងរស់នៅសហរដ្ឋអាមេរិកមានប្រសាសន៍ថា ចាប់តាំងពីធ្វើជាចលនានិស្សិតកាលពីឆ្នាំ១៩៩៩មក លោក ស៊ុត ឌីណា មានគំនិតជាតិនិយមដែរ តែលោកជាមនុស្សឱកាសនិយម ដោយឃើញថាខ្លួនមានប្រជាប្រិយភាពបានឆក់ឱកាសនោះទៅបង្កើតគណបក្សនយោបាយឈ្មោះថា «គណបក្សរណសិរ្សជនជាតិខ្មែរ» ដើម្បីចូលរួមការបោះឆ្នោតជាតិសម្រាប់អាណត្តិទី៣ នៅឆ្នាំ២០០៣៖ «បង្កើតគណបក្សនយោបាយហ្នឹងប្រកួតប្រជែង អត់បានសម្លេង អត់បានកៅអីក្នុងរដ្ឋសភា។ ចូលជាមួយនឹងគណបក្សហ៊្វុនស៊ិនប៉ិច ក៏បាត់ប្រជាប្រិយភាពលែងបានកៅអីទៀត។ អ៊ីចឹងគាត់អត់ជម្រើសមានតែទៅជាមួយគណបក្សប្រជាជន ដើម្បីយកតំណែង។ អាហ្នឹងយើងឃើញចុងក្រោយហើយ»។
ក្រោយពីគណបក្សរណសិរ្សជនជាតិខ្មែររបស់លោក ស៊ុត ឌីណា មិនទទួលបានជោគជ័យ។ លោក ស៊ុត ឌីណា បានផ្ទេរការដឹកនាំទៅឱ្យសម្តេចក្រុមព្រះ នរោត្តម រណឫទ្ធិ ហើយក្រោយមកគណបក្សរបស់លោក បានប្ដូរឈ្មោះទៅជាគណបក្សគណបក្សនរោត្តម រណឫទ្ធិ។
លោក ស៊ុត ឌីណា ត្រូវបានតែងតាំងជាអគ្គលេខាធិការរង និងជាអ្នកនាំពាក្យ គណបក្សនរោត្តម រណប្ញទ្ធិ សម្រាប់ការបោះឆ្នោតជាតិ អាណត្តិទី៤ នៅឆ្នាំ ២០០៨។ គណបក្សនេះទទួលបានសម្លេងគាំទ្រតែ ២ អាសនៈប៉ុណ្ណោះ។
អ្នកវិភាគនយោបាយដែលកំពុងរស់នៅក្នុងប្រទេសហ្វាំងឡង់ លោក គឹម សុខ បានស្គាល់លោក ស៊ុត ឌីណា នៅពេលដែលលោកធ្លាប់ធ្វើយុវជនជាមួយគ្នានៅក្នុងគណបក្សប្រកាន់របបរាជនិយមរបស់សម្ដេចក្រុមព្រះនរោត្តម រណឫទ្ធិ។
លោកមានជំនឿថា សំណុំរឿងនេះបានប៉ះពាល់ដល់កូនប្រុសច្បងលោក ហ៊ុន សែន និងអតីតរដ្ឋមន្ត្រីក្រសួងការបរទេសលោក ហោ ណាំហុង ដែលធ្លាប់រកស៊ីកេងប្រវ័ញ្ច ញើសឈាមពលករខ្មែរនៅក្នុងប្រទេសកូរ៉េខាងត្បូង។
លោកបញ្ជាក់ថា ការប្រើតួនាទីជាឯកអគ្គរាជទូតរបស់លោក ស៊ុត ឌីណា ក៏ធ្វើឱ្យលោក ហ៊ុន សែន មិនសប្បាយចិត្តដែរ ពីព្រោះជាការលេចមុខមាត់ខ្ពស់ពេកលើសលោក ហ៊ុន ម៉ាណែត ជាមនុស្សដែលលោកហ៊ុន សែន រៀបចំបន្តវេនជំនួសលោក ហ៊ុន សែន នោះ បាននាំឱ្យវាសនារបស់លោកដូចសព្វថ្ងៃនេះ៖ «ដូច្នេះករណីឈានរហូតដល់ការចោទ និងចាប់លោក ស៊ុត ឌីណា ដាក់គុក។ មិនមែនរឿងលោក ស៊ុត ឌីណា រំលោភអំណាចនឹងពុករលួយទេ។ គឺដោយសារលោកស៊ុត ឌីណា ក្នុងតួនាទីជាឯកអគ្គរាជទូតខ្មែរនៅកូរ៉េ ហ៊ានប្រើអំណាចតួនាទីតាមច្បាប់ នឹងមិនឃុបឃិតពុករលួយជាមួយកូនចៅរបស់លោក ហ៊ុន ម៉ាណែត និងក្រុមលោក ហោ ណាំហុង»។
ភរិយាលោក ស៊ុត ឌីណា គឺអ្នកស្រី ស៊ុន សុគន្ធមាលា មិនបានឆ្លើយចំពោះការចោទប្រកាន់នេះទេ។ អ្នកស្រីបានលើយកហេតុផលសុខភាពស្វាមីនៅមានកម្រិតទាបនៅឡើយ ដែលធ្វើឱ្យលោក ឌីណា មិនមានពាក្យអ្វីឆ្លើយតបទៅនឹងការចោទប្រកាន់នោះបានឡើយ៖ «ការពិតគាត់ស្គមខ្លាំង គាត់ឈឺបង។ គាត់ឈឺរាងធ្ងន់ធ្ងរដែរហ្នឹង ដើរពិបាកមិនចង់រួចផង។ឈឺទាំងជើង ទាំងសរសៃឈឺជាប់ខ្លាំងហើយឱ្យពេទ្យពិនិត្យមើលវាមានជាតិស្ករឡើងខ្លាំងអាចចូលលក្ខណៈទឹកនោមផ្អែម»។
លោក ស៊ុត ឌីណា និងភរិយារបស់លោកគឺអ្នកស្រី ស៊ុន សុគន្ធមាលា កាលពីខែមិថុនា ២០០៩ បានចុះចូលជាមួយគណបក្សប្រជាជនកម្ពុជា ដែលលោកធ្លាប់បានរិះគន់ប្រឆាំងកន្លងមក។ លោកត្រូវបានរដ្ឋាភិបាល តែងតាំងជាអនុរដ្ឋលេខាធិការ នៃក្រសួងការបរទេស និងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន។ ចំណែកឯភរិយារបស់លោក ត្រូវបានតែងតាំងជាសមាជិកក្រុមការងារសេដ្ឋកិច្ច និងវប្បធម៌ មានឋានៈស្មើអនុរដ្ឋលេខាធិការទីស្តីការគណៈរដ្ឋមន្ត្រី។
លោក ស៊ុត ឌីណា ត្រូវបានតែងតាំងជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូង នៅថ្ងៃទី១១ វិច្ឆិកា ឆ្នាំ២០១៣ ហើយក្រោយពីកាន់តួនាទី បានត្រឹមជាង២៥ខែប៉ុណ្ណោះ។ លោកត្រូវបានអង្គភាពប្រឆាំងអំពើពុករលួយចាប់ខ្លួនពាកព័ន្ធនឹងទឹកប្រាក់ជាង ៧លានដុល្លារ។ តែការចោទប្រកាន់ពីអង្គភាពប្រឆាំងអំពើពុករលួយនៅចំនួនទឹកប្រាក់ដ៏ច្រើនបែបនេះបានស្ថិតនៅក្នុងភាពអាថ៌កំបាំងនៅឡើយ។ក្រសួងការបរទេសក្រោយពីលោក ស៊ុត ឌីណា ត្រូវបានចាប់ខ្លួន បានសម្រេចតែងតាំងលោក ឡុង ឌីម៉ង់ អតីតអ្នកនាំពាក្យសាលារាជធានីភ្នំពេញ ជាឯកអគ្គរាជទូតថ្មី ប្រចាំនៅប្រទេសកូរ៉េខាងត្បូង ជំនួសលោក ស៊ុត ឌីណា។ លោក ឡុង ឌីម៉ង់ គឺជាកូនប្រុសរបស់ លោក ឡុង វិសាលោ អតីតរដ្ឋលេខាធិការក្រសួងការបរទេស ហើយបច្ចុប្បន្នជា រដ្ឋមន្ត្រីប្រតិភូអមនាយករដ្ឋមន្ត្រី៕
Subscribe to:
Post Comments (Atom)
1 comment:
Suth Dina = Porng Dyna = Dumbass
Post a Comment