Khmer Circle: Ever heard of 'leading by example'?
🔺🔺🔺
ដោយ ខែ សុណង
2020-05-26
លោក នេត សាវឿន អគ្គស្នងការនគរបាលជាតិ
រូប៖ ហ្វេសប៊ុក លោក នេត សាវឿន
អគ្គស្នងការនគរបាលជាតិ លោក នេត សាវឿន បានព្រមានដាក់វិន័យស្នងការរាជធានីខេត្តទាំងអស់ បើបន្តអនុវត្តច្បាប់ចរាចរណ៍ លើសគោលការណ៍ តទៅទៀត ដូចជាករណីដាក់បារ៉ាស់ ឃាត់ម្ចាស់យានយន្ត សួរនាំឯកសារយានយន្ត ជាដើម។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់អាស៊ីសេរីថា បទបញ្ជារបស់លោក នេត សាវឿន គឺជាការកែទម្រង់ ព្រោះគោលការណ៍រឹតបន្តឹងច្បាប់ចរាចរណ៍ គឺនគរបាលមិនយកច្បាប់ទាំងអស់នៃអនុក្រឹត្យថ្មី (លេខ៣៩) មកអនុវត្តភ្លាមទេ ដោយច្បិចយកចំណុចខ្លះមកអនុវត្តសិន។
លោក ឆាយ គឹមខឿន ប្រាប់ថា ប្រហែលកងកម្លាំងខ្លះ ស្ដាប់គោលការណ៍មិនទាន់ច្បាស់ ទើបមានករណី ប៉ូលិសចរាចរណ៍ឃាត់ម្ចាស់យានយន្ត មិនបានប្រព្រឹត្តិបទល្មើសមកសួរនាំ ឬអាចមានករណីដាក់បារ៉ាស់កាត់ផ្លូវ ដើម្បីឃាត់យានយន្ត។ ករណីបែបនេះ បណ្ដាលឲ្យមានការថ្នាំងថ្នាក់ជាមួយពលរដ្ឋ។ អគ្គស្នងការរងរូបនេះបញ្ជាក់ថា បើមានករណីប៉ូលិសដាក់បារ៉ាស់ ឬឃាត់យានយន្តដែលមិនប្រព្រឹត្តិបទល្មើសចរាចរណ៍ជាក់ស្ដែងមកសួរនាំ ពលរដ្ឋអាចប្ដឹង ឬរាយការណ៍ទៅលេខទូរស័ព្ទ១១៧៖ «បានន័យថា យើងអត់ដាក់បារ៉ាស់ត្រួតពិនិត្យបែបរដ្ឋបាលទេ។ ត្រួតពិនិត្យបែបរដ្ឋបាល បានន័យថា គ្រប់យានយន្តហៅទាំងអស់។ តែនេះ យើងកែសម្រួលគោលការណ៍ថ្មីបន្ថែមទៀត ដើម្បីបង្កលក្ខណៈងាយស្រួលដល់ពលរដ្ឋ ធ្វើដំណើរតាមដងផ្លូវ»។
នៅក្នុងសារសំឡេងបែកធ្លាយមួយដែលគេស្គាល់ថា ជាសំឡេងរបស់អគ្គស្នងការនគរបាលជាតិ លោក នេត សាវឿន និយាយថា ប្រជាពលរដ្ឋ និងអ្នកធ្វើដំណើរខ្លះ ថ្នាំងថ្នាក់ចំពោះនគរបាលចរាចរណ៍មួយចំនួន ដែលបានដាក់បារ៉ាស់ ឃាត់រថយន្តធ្វើដំណើរតាមផ្លូវ ក្រោមហេតុផលរឹតបន្តឹងការអនុវត្តច្បាប់ចរាចរណ៍ផ្លូវគោក បើទោះបីជាម្ចាស់រថយន្តនោះ បើកបរធម្មតា ដោយអនុវត្តតាមច្បាប់ត្រឹមត្រូវក៏ដោយ។ លោក នេត សាវឿន ថា នេះជាការព្រមានលើកចុងក្រោយ ក្នុងករណីនៅតែមានកើតឡើងបែបនេះទៀត ស្នងការរាជធានីខេត្តផ្ទាល់ នឹងត្រូវរងពិន័យតាមច្បាប់។
បទល្មើសចរាចរណ៍ចំនួន ១៦ប៉ុណ្ណោះ នៃអនុក្រឹត្យថ្មី ដែលត្រូវបាននគរបាលយកមកអនុវត្តការផាកពិន័យ។ ក្នុងនោះ សម្រាប់ម៉ូតូ មាន៧បទល្មើស ឯរថយន្ត ៩បទល្មើស។ បទល្មើសម៉ូតូ គឺមិនពាក់មួកសុវត្ថិភាព ស្រវឹង មិនគោរពភ្លើង និងស្លាកសញ្ញា ល្មើសការបត់ ការវ៉ាជែង ដឹកលើសចំណុះ គ្មានស្លាកលេខ និងប្រើប្រាស់ទូរស័ព្ទដោយគ្មានកាស។
ចំណែកបទល្មើសរថយន្ត ទាំង ៩បទល្មើស រួមមាន បទល្មើសល្បឿន ស្រវឹង គ្មានប័ណ្ណបើកបរ មិនគោរពភ្លើងសញ្ញា ល្មើសក្នុងការបទ និងវ៉ាជែង មិនពាក់ខ្សែក្រវាត់ការពារសុវត្ថិភាព ដឹកលើសចំណុះគ្មានស្លាកលេខ និងនិយាយទូរស័ព្ទដោយគ្មានឧករណ៍ភ្ជាប់សំឡេង។
នាយកវិទ្យាស្ថានសុវត្ថិភាពចរាចរណ៍ផ្លូវគោក លោក គង់ រតនៈ យល់ថា ការផាកពិន័យ ដែលមិនបានគិតគូរដល់ការធ្វើដំណើររបស់អ្នកបើកបរ បណ្ដាលឲ្យផ្លូវកកស្ទះ ដោយសារ ការផាកពិន័យនោះ។ លោក សង្កេតឃើញថា រយៈពេល២សប្ដាហ៍ដំបូង នគរបាលចរាចរណ៍ហាក់បានតាំងចិត្តខ្លាំង ក្នុងរឹតបន្តឹងច្បាប់ ប៉ុន្តែមួយសប្ដាហ៍ចុងក្រោយនេះ ពិសេសនៅក្រុងភ្នំពេញការរឹតបន្តឹងច្បាប់ចរាចរណ៍បានថយចុះវិញ ដោយនៅតាមកន្លែងគោលដៅខ្លះ ដាក់តែសាជី នៅលើផ្លូវចោល គ្មាននគរបាលប្រចាំការ។ លោក បន្តថា ចំណែក ការចូលរួមគោរពច្បាប់របស់ពលរដ្ឋវិញ ក៏ដូចគ្នា ដោយ២សប្ដាហ៍ដំបូង មានការកែប្រែខ្លះ។ តែ១សប្ដាហ៍ចុងក្រោយ ការអនុវត្តនៅតែឆ្គាំឆ្គង។ តាមផ្លូវ ដែលគ្មានសមត្ថកិច្ចឈរជើងប្រចាំការ ពលរដ្ឋនៅតែមិនចូលរួមអនុវត្តច្បាប់។
អ្នកជំនាញសុវត្ថិភាពចរាចរណ៍ផ្លូវគោករូបនេះ ឲ្យដឹងថា ពលរដ្ឋនៅតែរអ៊ូរទាំ ចំពោះការផាកពិន័យធ្ងន់ធ្ងរ ប៉ុន្តែពួកគេមិនហ៊ានបញ្ចេញមតិជាសាធារណៈឡើង ព្រោះឃើញអ្នកបញ្ចេញមតិច្រើននាក់ ត្រូវប៉ូលិសចាប់ យកទៅព្រមាន៖ «យើងត្រូវជំរុញឲ្យមានការអប់រំផ្សព្វផ្សាយហ្នឹងឲ្យបានពេញលេញ ហើយសមត្ថកិច្ចហ្នឹង ជំរុញឲ្យពួកគាត់ដាក់ប៉ុស្តិ៍ត្រួតពិនិត្យឲ្យបានទៀតទាត់ ព្រោះថា ជួនកាល គាត់ដាក់មួយថ្ងៃអ៊ីចឹងទៅ គាត់រើទៅដាក់កន្លែងផ្សេង ឬក៏រើទៅកន្លែងផ្សេងមួយទៀត អានេះ ហាក់ដូចជាវិធានការនៃការវែកចកទេ យើងអត់អាចធ្វើបាន(ជោគជ័យ)ទេ។ បើសម្រាប់ខ្ញុំ ខ្ញុំយល់ថា បើសិនជាយើងចង់កែប្រែឥរិយាបថរបស់អ្នកបើកបរមួយចំនួន ដែលលោក អត់ទាន់គោរពច្បាប់ហ្នឹង យើងយ៉ាងហោចណាស់ គឺយើងដាក់ឲ្យជាប់ យើងពិសោធន៍មើលដំណាក់កាលរយៈពេល៣ខែដំបូង យើងដាក់ (ប៉ុស្តិ៍) រាល់ថ្ងៃ យើងឲ្យសមត្ថកិច្ច គាត់ត្រួតពិនិត្យរាល់ថ្ងៃអ៊ីចឹងទៅ»។
រយៈពេល ២៥ថ្ងៃដំបូង នៃការរឹតបន្តឹងច្បាប់ចរាចរណ៍ផ្លូវគោក គឺនគរបាលផាកពិន័យយានយន្ត បានជាង ៣ម៉ឺន ៦ពាន់ (៣៦.៧៩៩)គ្រឿង ក្នុងនោះម៉ូតូ ជាង២ម៉ឺន ៦ពាន់ (២៦.៧៨២)គ្រឿង និងរថយន្ត ជាង១ម៉ឺន (១០.០១៧)គ្រឿង។ របាយការណ៍ប៉ូលិសបង្ហាញថា ភាគច្រើននៃបទល្មើសចរាចរណ៍ គឺគ្មានមួកសុវត្ថិភាព ល្មើសល្បឿន មិនពាក់ខ្សែក្រវាត់ការពារសុវត្ថិភាព និងស្រវឹង ជាដើម។
ប៉ូលិស ក៏អះអាងថា គ្រោះថ្នាក់ចរាចរណ៍ ចំនួនអ្នកស្លាប់ និងអ្នករងរបួស ត្រូវបានកាត់បន្ថយច្រើនដែរ ក្នុងរយៈពេលអនុវត្តការរឹតបន្តឹងការផាកពិន័យធ្ងន់ធ្ងរនេះ។ ប៉ុន្តែ ពលរដ្ឋ និងអ្នករត់រ៉ឺម៉កខ្លះ ប្រាប់ថា ពួកគាត់ភ័យព្រួយ គ្មានប្រាក់សម្រាប់បង់ពិន័យ ដល់ថ្នាក់លែងសូវហ៊ានចេញទៅប្រកបមុខរបរទៅហើយ៕
1 comment:
How much does a star cost in Cambodia ?
Post a Comment