ដោយ ហេង រស្មី
2020-05-02
rfa
ពលរដ្ឋខ្មែរអូស្ត្រាលីជួបជុំគ្នានៅទីក្រុងស៊ីដនី (Sydney) នៅថ្ងៃទី១៦ ខែមីនា ឆ្នាំ២០១៨ ដើម្បីតវ៉ាប្រឆាំងនឹងវត្តមានរបស់លោកនាយករដ្ឋមន្ត្រី ដែលកំពុងចូលរួមកិច្ចប្រជុំអាស៊ាន-អូស្ត្រាលី នៅទីក្រុងស៊ីដនី ប្រទេសអូស្ត្រាលី។
RFA/Chun Chanboth
សហគមន៍ខ្មែរនៅអូស្ត្រាលីរួមមាន៖ តំណាងរាស្ត្រ អ្នកច្បាប់ ប្រធានសមាគម សកម្មជនគណបក្សសង្គ្រោះជាតិ និងបុគ្គលសំខាន់ៗក្នុងប្រទេសនេះរួមគ្នាលើកសំណើរទៅរដ្ឋាភិបាលរបស់ពួកគេធ្វើច្បាប់ដាក់ទណ្ឌកម្មលើក្រុមដឹកនាំរបបក្រុងភ្នំពេញ ដែលរំលោភសិទ្ធិមនុស្ស។ ចំពោះសំណើនេះ អ្នកនាំពាក្យគណបក្សប្រជាជនកម្ពុជាថា ការទាមទារបើនេះ មិនមែនជារឿងថ្មីទេ ហើយមិនដែលឃើញរដ្ឋាភិបាលអូស្ត្រាលីធ្វើច្បាប់ណាមួយដាក់ទណ្ឌលើមន្ត្រីកម្ពុជានៅឡើយទេ។
សហគមន៍ខ្មែរនៅអូស្ត្រាលីថា អូស្ត្រាលី មិនអាចនៅស្ងៀមទុកក្រុមដឹកនាំរបបក្រុងភ្នំពេញធ្វើបាបពលរដ្ឋនិងរំលោភសិទ្ធិមនុស្សតាមទំនើងចិត្តនោះទេ។ ពួកគេរំពឹងថា រដ្ឋាភិបាលនិងរដ្ឋសភា ប្រទេសអូស្ត្រាលីនឹងយកគំរូតាមសម្ព័ន្ធមិត្តរបស់ខ្លួនសហរដ្ឋអាមេរិកដែលបានធ្វើច្បាប់ដាក់ទណ្ឌកម្មលើមន្ត្រីបាតដៃប្រឡាក់ឈាមទាំងនោះ។
អតីតចៅហ្វាយក្រុងដែនឌឺណុង (Dandenong) នៃប្រទេសអូស្ត្រាលី លោក ជា យូហ៊ន ឱ្យដឹងថា មន្ត្រីជាន់ខ្ពស់របបក្រុងភ្នំពេញមួយចំនួនបាននាំគ្នាចេញចូលប្រទេសអូស្ត្រាលីនិងបានយកលុយពុករលួយឬលុយកខ្វក់របស់ពួកគេទិញដីទិញផ្ទះនៅប្រទេសអូស្ត្រាលី។ លោកបន្តថា ក្នុងសំណើរបស់សហគមន៍ខ្មែរនៅអូស្ត្រាលីក្នុងការទាមទារធ្វើច្បាប់ដាក់ទណ្ឌកម្មមានពីរចំណុចធំៗគឺបង្កកទ្រព្យសម្បត្តិនិងហាមឃាត់មិនឱ្យមន្ត្រីទាំងនោះចូលមកប្រទេសអូស្ត្រាលី៖ «គំនិតខ្ញុំ ខ្ញុំថា ធ្វើយ៉ាងម៉េចដើម្បីសិទ្ធិសេរីភាពដល់ប្រទេសកម្ពុជា យើងត្រូវតែធ្វើច្បាប់ហ្នឹងដើម្បីឱ្យមន្ត្រីខ្មែរយើងដទៃទៀតឃើញ របៀបរបបថា បើកាលណាអញធ្វើរបៀបហ្នឹងដែរគឺចូលអូស្ត្រាលីលែងបានហើយ»។
សកម្មជនគណបក្សសង្គ្រោះជាតិនៅប្រទេស អូស្ត្រាលី លោក អ៊ិន ហេមរា (អ៊ិន ហេមរ៉ា) ប្រាប់ថា ពេលនេះរដ្ឋាភិបាលកំពុងពិនិត្យលើសំណើរបស់សហគមន៍ខ្មែរនៅអូស្ត្រាលី។ លោកបន្តថា កាលពីចុងខែមីនាអនុគណៈកម្មការសិទ្ធិមនុស្សនៃរដ្ឋាភិបាលអូស្ត្រាលីបានកោះហៅតំណាងពលរដ្ឋខ្មែរបង្ហាញពីការចង់បាននៃការទាមទារធ្វើច្បាប់ដាក់ទណ្ឌកម្មលើក្រុមដឹក នាំរបបក្រុងភ្នំពេញដែលរំលោភសិទ្ធិមនុស្ស។ លោក អ៊ិន ហេមរា ដែលត្រូវបានទទួលបានការអញ្ជើញរបស់អនុគណៈកម្មការផ្នែកសិទ្ធិមនុស្សនៃរដ្ឋាភិបាលអូស្ត្រាលីក្នុងការផ្តល់សក្ខីកម្មនៃការទាមទារធ្វើច្បាប់ដាក់ទណ្ឌកម្មនេះឱ្យដឹងថា សេចក្ដាំព្រាងនៃច្បាប់នេះគឺមិនមែនផ្តោតលើការដាក់ទណ្ឌតែលើក្រុមមន្ត្រីនៃរបបក្រុងភ្នំពេញនោះទេ គឺដាក់ទណ្ឌជនជាតិផ្សេងទៀតដែលរំលោភសិទ្ធិមនុស្សធ្ងន់ធ្ងរ៖ «ច្បាប់នេះទំលំទូលាយមិនមែនសម្រាប់តែខ្មែរទេ គឺសម្រាប់ការពារ ឬក៏ជួយទប់ស្កាត់នូវការរំលោភសិទ្ធិមនុស្សធ្ងន់ធ្ងរដោយបុគ្គលណាមួយដោយដាក់ទណ្ឌកម្មលើបុគ្គលនោះផ្ទាល់តែម្ដង»។
ការលើកឡើងរបស់ពលរដ្ឋបែបនេះ ដោយសារតែកាលពីពេលថ្មីៗនេះ សហព័ន្ធអន្តរជាតិការពារសិទ្ធិមនុស្សហៅកាត់ថា FIDH(International Federation For Human Rights) ជំរុញទៅអូស្ត្រាលីឱ្យអនុម័តច្បាប់ដាក់ទណ្ឌកម្មបុគ្គលដែលពាក់ព័ន្ធការរំលោភសិទ្ធិមនុស្សនៅកម្ពុជា។
ការជំរុញនេះគឺតាមរយៈសំណើរបស់អង្គការសិទ្ធិមនុស្សអន្តរជាតិដែលមានមូលដ្ឋាននៅទីក្រុងប៉ារីស(PARIS) ជូនទៅគណៈកម្មាធិការអចិន្ត្រៃយ៍របស់សភាអូស្ត្រាលីស្តីពីកិច្ចការបរទេស ការពារជាតិនិងពាណិជ្ជកម្ម កាលពីថ្ងៃទី៣០ ខែមេសា។
អគ្គលេខាធិការរបស់ IFDI លោក Adilur Rahman Khan លើកឡើងថា មន្ត្រីជាន់ខ្ពស់ជាច្រើននាក់នៃគណបក្សកាន់អំណាចនៅកម្ពុជាគឺជាអ្នកជាប់ពាក់ព័ន្ធជាយូរមកហើយ ដែលត្រូវទទួលខុសត្រូវចំពោះអំពើពុករលួយនិងការរំលោភសិទ្ធិមនុស្សនៅក្នុងប្រទេស ហើយអ្នកទាំងនោះក៏ត្រូវគេដឹងថា បានវិនិយោគទ្រព្យសម្បត្តិរបស់ខ្លួនដែលបានមកពីទង្វើខុសច្បាប់នោះនៅក្នុងប្រទេសអូស្ត្រាលី។
អតីតតំណាងរាស្ត្ររដ្ឋវិកតូរីយ៉ា (Victoria) ដើមកំណើតខ្មែរ លោក ហុង លីម ដែលបានចូលរួមក្នុងការស្នើទៅរដ្ឋាភិបាលអូស្ត្រាលីក្នុងការធ្វើច្បាប់ដាក់ទណ្ឌកម្មឱ្យដឹងថា ក្រុមលោកមានឯកសារ និងភស្តុតាងជាច្រើនដែលក្រុមមន្ត្រីនៃរបបក្រុងភ្នំពេញបានរំលោភសិទ្ធិមនុស្សនៅកម្ពុជា ។ លោករំពឹងថា រដ្ឋាភិបាលប្រទេសនេះនឹងធ្វើច្បាប់តាមតាមសំណើរបស់សហគមន៍ខ្មែរនៅអូស្ត្រាលី។ លោកបន្តថា នៅពេលសហរដ្ឋអាមេរិកចាប់ផ្តើមធ្វើច្បាប់ដាក់ទណ្ឌកម្មបុគ្គលដែល ពាក់ព័ន្ធការរំលោភសិទ្ធិមនុស្សនៅកម្ពុជា មានប្រទេសជាសម្ពន្ធមិត្តរបស់ប្រទេសមហាអំណាចមួយនេះបានស្វះស្វែងធ្វើច្បាប់ដាក់ទណ្ឌនេះដែរ៖ «យើងខ្ញុំនៅនេះសង្ឃឹមថា ប្រទេសអូស្ត្រាលីនឹងយកចិត្តទុកហើយនឹងរៀបចំធ្វើបានសម្ពន្ធមិត្តគេទាំងប្រទេសដែលនិយាយភាសាអង់គ្លេសគឺនឹងធ្វើច្បាប់គឺជាច្បាប់អន្តរជាតិដើម្បីនឹងធ្វើការគាប់សង្កត់ចំពោះរបបផ្ដាច់ការ រំលោភសិទ្ធិមនុស្ស របបពុករលួយហួសហេតុពេកនឹងបាទ»។
ទោះបីយ៉ាងណាបក្សគណបក្សកាន់អំណាចហាក់មិនចាប់អារម្មណ៍នឹងសំណើដាក់ទណ្ឌកម្មមន្ត្រីរដ្ឋាភិបាលភ្នំពេញនោះទេ។ អ្នកនាំពាក្យគណបក្សប្រជាជនកម្ពុជា លោក សុខ ឥសាន និយាយថា ការសម្រេចចិត្តដាក់ទណ្ឌនរណាម្នាក់គឺជាសិទ្ធិរបស់រដ្ឋាភិបាលអូស្ត្រាលី។ ប៉ុន្តែលោកយល់ថា ការទាមទាររបស់សហគមន៍ខ្មែរនៅអូស្ត្រាលីនឹងមិនទទួលបានលទ្ធផលទេ ដោយលោកកត់សម្គាល់ថា កន្លងមកខ្មែរនៅអូស្ត្រាលីតែងធ្វើការទាមទារបែបនេះ ប៉ុន្តែមិនឃើញរដ្ឋាភិបាលអូស្ត្រាលីធ្វើតាមសំណើរបស់ពួកគេនោះទេ៖ «ការស្នើរបស់គាត់មិនមែនទើបតែរឿងថ្មីទេ គឺរឿងយូរហើយតាំងពីជំនាន់តា ហុង លីម ធ្វើជាតំណាងរាស្ត្រម្ល៉េះ អ៊ីចឹងទេ ខ្ញុំយល់ថា ជាកាកសំណល់តាំងពីតា ហុង លីម មក ប៉ុន្តែទោះជាស្នើយ៉ាងម៉េចក៏ដោយសភាការពិតនៅកម្ពុជាមិនដូចគាត់និយាយនិយាយទេ»។
សហរដ្ឋអាមេរិកបានឈានមុខគេក្នុងការអនុម័តច្បាប់ គ្លូបល មែគនីតស្គី (Global Magnitsky Human Rights Accountability Act) ដាក់ទណ្ឌកម្មមន្ត្រីជំនិតរបស់លោក ហ៊ុន សែន រួមមានមេកងអង្គរក្សរបស់លោក ហ៊ុន សែន នាយឧត្ដមសេនីយ៍ ហ៊ីង ប៊ុនហៀង នាយឧត្ដមសេនីយ៍ គន់ គីម ដែលជាទេសរដ្ឋមន្ត្រី និងលោក ទ្រី ភាព ជាឈ្មួញឈើនៅកម្ពុជាកាលពីខែធ្នូ ឆ្នាំ២០១៩ ពាក់ព័ន្ធនឹងការប្រព្រឹត្តិអំពើពុករលួយនិងការរំលោភសិទ្ធិមនុស្ស ធ្ងន់ធ្ងរនៅកម្ពុជា៕
1 comment:
Khmer Times reported unemployment rate in Cambodia at 0.3 percent. Wow! Almost perfect employment - no wonder Hun Sen is so proud of himself. Then why is Cambodia so poor? More than 40 years after the war, Cambodia is still relying on foreign aids for survival in comparison to Germany and Japan which were almost completely destroyed in World War II and about 20 years later, they were able to not only fully recovered from the war but were able to provide foreign aids to poorer countries.
One other thing, when a Cambodia becomes unemployed, where does he/she apply for unemployment insurance? This may explain why Cambodia's unemployment rate is almost zero percent and that's probably because you can't apply for unemployment benefit! There's no such thing in Cambodia, is there?
Khmer Times only reports Hun Sen's propaganda but this one has gone a bit too far.
Post a Comment