ដោយ សុជីវី
2021-03-18
(ឆ្វេង) លោក ជិន សុខង៉េង ចៅសង្កាត់សាលាកំរើកក្រុងសៀមរាប និងលោក ឈុន វាន ជំទប់ទីពីរជាប់ឆ្នោតឃុំក្ដីរុន ស្រុកពួក ខេត្តសៀមរាប ដែលកំពុងភៀសខ្លួនទៅក្រៅប្រទេស។
រូប៖ ហ្វេសប៊ុកលោកទាំងពីរ
សាលាដំបូងខេត្តសៀមរាបបានសម្រេចផ្ដន្ទាទោសសកម្មជនគណបក្សសង្គ្រោះជាតិ ៣នាក់ ដាក់ពន្ធនាគារ ៥ឆ្នាំ ពាក់ព័ន្ធនឹងសំណុំរឿងរួមគំនិតក្បត់។ សកម្មជនបក្សប្រឆាំងចាត់ទុករឿងនេះថា ជាការបំភិតបំភ័យផ្នែកនយោបាយ ដើម្បីកុំឱ្យពួកគេចូលរួមសកម្មភាពនយោបាយជាមួយថ្នាក់ដឹកនាំគណបក្សនេះបន្តទៀត។
ជំទប់ទីពីរជាប់ឆ្នោតឃុំក្ដីរុន ស្រុកពួកដែលកំពុងភៀសខ្លួននៅប្រទេសថៃ លោក ឈុន វាន ប្រាប់អាស៊ីសេរីនៅថ្ងៃទី១៨ មីនាថា ពួកលោកមិនបានប្រព្រឹត្តខុសច្បាប់ដូចការចោទប្រកាន់របស់តុលាការនោះទេ។ លោកចាត់ទុកការសម្រេចរបស់តុលាការនេះថា ជារឿងអយុត្តិធម៌ និងធ្វើឱ្យពួកលោកឈឺចាប់កាន់តែខ្លាំង។ ប៉ុន្តែលោក ឈុន វាន អះអាងថា សាលក្រមផ្ដន្ទាទោសនេះនឹងជំរុញឱ្យលោកហ៊ានលះបង់សេចក្ដីសុខផ្ទាល់ខ្លួន ដើម្បីបន្តជីវភាពនយោបាយទាមទារឱ្យរបបឯកបក្សងាកមកដើរតាមកន្លងប្រជាធិបតេយ្យឡើងវិញ៖ «ខ្ញុំគិតថាវាជារឿងមួយគួរឱ្យអស់សំណើចសម្រាប់ប្រព័ន្ធតុលាការនៅកម្ពុជា ជាពិសេសដែលបញ្ជាក់ឱ្យពិភពលោកបានឃើញថា តុលាការហ្នឹង គឺជាឧបករណ៍របស់របបក្រុងភ្នំពេញ ក្នុងការធ្វើបាប និងធ្វើទុក្ខបុកម្នេញដល់រូបខ្ញុំជាសកម្មជនបក្សប្រឆាំង។ មួយវិញទៀត វាជាចេតនាដើម្បីរក្សាអំណាចរបស់ខ្លួនឱ្យបានគង់វង្សនៅជាមួយរបបលោកហ៊ុន សែន តែប៉ុណ្ណឹងទេ»។
ប្រតិកម្មរបស់សកម្មជនបក្សប្រឆាំងនេះធ្វើឡើងបន្ទាប់ពីតុលាការខេត្តសៀមរាប ប្រកាសសាលក្រមកាលពីថ្ងៃទី១៧ មីនា ដោយផ្ដន្ទាទោសរូបលោក និងសកម្មជនបក្សប្រឆាំង ២នាក់ទៀត ដាក់ពន្ធនាគារ ៥ឆ្នាំ ពីបទរួមគំនិតក្បត់ ពាក់ព័ន្ធនឹងការគាំទ្រដំណើរមាតុភូមិនិវត្តន៍របស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។ សកម្មជនពីរនាក់ទៀតនោះ រួមមានចៅសង្កាត់សាលាកំរើកក្រុងសៀមរាប លោក ជិន សុខង៉េង និងសមាជិកក្រុមប្រឹក្សាសង្កាត់ស្វាយដង្គំ ក្រុងសៀមរាប លោក សំ វុទ្ធី។ តុលាការបានចេញដីកាតាមចាប់ខ្លួនលោក ជិន សុខង៉េង និងលោក ឈុន វាន ដែលកំពុងភៀសខ្លួននៅក្រៅប្រទេស យកមកអនុវត្តទោស។ ចំណែកលោក សំ វុទ្ធី ដែលកំពុងស្ថិតនៅក្នុងស្រុកវិញ តុលាការសម្រេចអនុវត្តទោសរយៈពេល ២៥ថ្ងៃ ដែលលោកបានជាប់ឃុំបណ្ដោះអាសន្នកន្លងមក ហើយទោសនៅសល់ត្រូវបានព្យួរ។
មេធាវីការពារក្ដីឱ្យសកម្មជនបក្សប្រឆាំងទាំងបីរូប គឺលោក សំ សុគង់ ប្រាប់អាស៊ីសេរីថា សេចក្ដីសម្រេចរបស់តុលាការនេះមិនបានផ្ដល់យុត្តិធម៌ដល់កូនក្ដីរបស់លោកនោះទេ ពីព្រោះពួកគេមិនបានប្រព្រឹត្តខុសច្បាប់អ្វីឡើយ។ លោកបញ្ជាក់ថា ពួកគេបានប្រើប្រាស់សិទ្ធិកន្លងមកក្នុងនាមប្រជាពលរដ្ឋខ្មែរ ដើម្បីចូលរួមក្នុងជីវភាពនយោបាយ និងសិទ្ធិសម្ដែងមតិដោយស្របតាមរដ្ឋធម្មនុញ្ញ។ លោក មេធាវី សំ សុគង់ គ្រោងប្ដឹងឧទ្ធរណ៍ ចំពោះសេចក្ដីសម្រេចនេះក្នុងពេលឆាប់ៗ ខាងមុខ។
Sam_Sokong_051116_TV_RFA.jpg
លោក សំ សុគង់ មេធាវីការពារក្ដីឱ្យសកម្មជនបក្សប្រឆាំងទាំងបីរូបគឺ លោក ជិន សុខង៉េង លោក ឈុន វាន និងលោក សំ វុទ្ធី
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ថា រឿងនេះជាការធ្វើទុក្ខបុកម្នេញផ្នែកនយោបាយ ដើម្បីកម្ទេចក្រុមអ្នកមាននិន្នាការផ្ទុយពីរដ្ឋាភិបាល។ មន្ត្រីសង្គមស៊ីវិលរូបនេះជឿថា វិធានការនេះនឹងមិនផ្ដល់ប្រយោជន៍ដល់សង្គមជាតិនោះទេ ប៉ុន្តែធ្វើឱ្យសង្គមកាន់តែបែកបាក់សាមគ្គី៖ «ការប្រើប្រាស់ប្រព័ន្ធការអនុវត្តច្បាប់លាយឡំបញ្ហាវិវាទនយោបាយនេះគួរតែបញ្ឈប់ ដោយនាំគ្នារកដំណោះស្រាយពីវិវាទនយោបាយហ្នឹង ឱ្យបានប្រសើរឡើងវិញទាំងការគោរពសិទ្ធិទៅលើអ្នកនយោបាយបាយរបស់គួរប្រកួតប្រជែងហ្នឹង ដោយបើកលំហសេរីភាពទាំងអស់ហ្នឹង ដោយមិនមានការផាត់ចេញនូវភាគីណាមួយទេ ពីព្រោះយើងដឹងហើយ ការបោះឆ្នោតឃុំសង្កាត់នៅពេលខាងមុខ ក៏ជិតមកដល់ការបោះឆ្នោតថ្នាក់ជាតិក៏ជិតមកដល់ដែរ»។
តុលាការរបបលោក ហ៊ុន សែន បានដំណើរការក្តី និងផ្ដន្ទាទោសថ្នាក់ដឹកនាំ និងសកម្មជនគណបក្សសង្គ្រោះជាតិជាបន្តបន្ទាប់ ចាប់តាំងពីឆ្នាំ២០២០ មក។
ក្នុងបទចោទរួមគំនិតក្បត់នេះ តុលាការបានផ្ដន្ទាទោសសកម្មជនបក្សប្រឆាំងចំនួន ១១នាក់ហើយ ក្នុងនោះ ៧នាក់នៅខេត្តត្បូងឃ្មុំ ៣នាក់នៅខេត្តសៀមរាប និងម្នាក់ទៀតនៅខេត្តកំពត។ តុលាការបានផ្ដន្ទាទោសពួកគេឱ្យជាប់ពន្ធនាគារពី ៥ឆ្នាំដល់ ៧ឆ្នាំ។ ចំណែកសំណុំរឿងឧបឃាតវិញ តុលាការបានផ្ដន្ទាទោសថ្នាក់ដឹកនាំបក្សប្រឆាំង ៩រូប ក្នុងនោះរួមទាំងលោក សម រង្ស៊ី ផង ឱ្យជាប់ពន្ធនាគារពី ២០ ដល់ ២៥ឆ្នាំ។
សហគមន៍ជាតិ និងអន្តរជាតិ បានថ្កោលទោសដំណើរការក្ដី និងការផ្ដន្ទាទោសទាំងនេះ ហើយបានទាមទារឱ្យរបបលោក ហ៊ុន សែន ទម្លាក់ចោលរាល់បទចោទលើថ្នាក់ដឹកនាំ និងសកម្មជនបក្សសង្គ្រោះជាតិវិញ។ ជាពិសេស សភាអឺរ៉ុបបានជំរុញឲ្យក្រុមប្រឹក្សាអឺរ៉ុប អនុម័តវិធានការរឹតត្បិតនានា ប្រឆាំងនឹងក្រុមមេដឹកនាំនយោបាយ និងមន្ត្រីយោធានៅកម្ពុជា ដែលទទួលខុសត្រូវ ចំពោះអំពើរំលោភសិទ្ធិមនុស្សធ្ងន់ធ្ងរ និងការបំផ្លាញប្រជាធិបតេយ្យនៅកម្ពុជា រួមទាំងការកាត់ទោសបែបមិនត្រឹមត្រូវទាំងនេះផងដែរ ដោយប្រើច្បាប់ដាក់ទណ្ឌកម្មជាសាកលរបស់សហភាពអឺរ៉ុបប្រឆាំងនឹងអំពើរំលោភសិទ្ធិមនុស្ស៕
No comments:
Post a Comment