ដោយ ខែ សុណង
2021-05-23 rfa
លោក សម រង្ស៊ី (រូបកណ្ដាលលើកដៃសំពះ) ជាមួយថ្នាក់ដឹកនាំគណបក្សសង្គ្រោះជាតិ នាពេលកន្លងទៅ។
RFA
ចំនួនអ្នកជាវប័ណ្ណនាឡិកាលោក សម រង្ស៊ី បានកើនដល់ ៣ ម៉ឺនសន្លឹក (៣០.១៤២) ហើយ ក្នុងរយៈពេល ជិត ១សប្ដាហ៍មកនេះ។
អគ្គលេខាធិការនៃគណបក្សសង្គ្រោះជាតិនៅក្រៅប្រទេស និងជាគណៈកម្មាការរៀបចំជាវនាឡិការបស់លោក សម រង្ស៊ី គឺលោក ជា គឹមលី ឲ្យដឹងថា ក្នុងរយៈពេលជិតមួយសប្ដាហ៍នេះ ពោលគឺគិតពីថ្ងៃទី១៦ ដល់ថ្ងៃទី២២ ឧសភា ចំនួនអ្នកជាវប័ណ្ណមានសន្ទុះកើនឡើងខ្លាំង។ លោកសង្ឃឹមថា ក្រុមការងារនឹងចាប់ផ្ដើមរៀបចំជំនួយឲ្យបានដល់ដៃអ្នកត្រូវការ និងខ្វះខាតពិតប្រាកដ ដែលកំពុងរងផលប៉ះពាល់ពីវិបត្តិជំងឺកូវីដ-១៩ ឆាប់ៗនេះ៖ «ចំណែកឯជំនួយគណៈកម្មាការយើងកំពុងតែគិតគូរ ជួយប្រជាពលរដ្ឋទៅតាមតំបន់ដែលគាត់ជាប់ឃុំឃាំង ហើយខ្វះស្បៀងអាហារ។ យើងកំពុងតែរៀបចំកញ្ចប់ម្ហូបអាហារទាំងនោះជួយគាត់បណ្ដើរៗ ក្នុងអាទិត្យក្រោយយើងនឹងចាប់ផ្ដើម ព្រោះឥឡូវនេះខ្ញុំកំពុងតែជួយជាមួយហ្នឹងអ្នកអាជីវករឲ្យគេវេចខ្ចប់ជំនួយទាំងអស់នេះ»។
លោក ជា គឹមលី បន្តថា គណបក្សសង្គ្រោះជាតិបានកំណត់យកថ្ងៃទី៦ ខែមិថុនា ដែលជាថ្ងៃចុងក្រោយ នៃការដាក់ឲ្យជាវប័ណ្ណ។ អ្នកជាវប័ណ្ណសម្គាល់នៅលើប័ណ្ណរៀងៗខ្លួន ដើម្បីផ្ទៀងផ្ទាត់នៅពេលលោកសម រង្ស៊ី ចាប់យកប័ណ្ណតែមួយសន្លឹកប៉ុណ្ណោះ ក្នុងចំណោមប័ណ្ណទាំងអស់ ដើម្បីប្រគល់នាឡិកាដល់ម្ចាស់ប័ណ្ណតែម្នាក់គត់។
លោក សម រង្ស៊ី បានធ្វើយុទ្ធនាការលក់នាឡិកាដែលមានតម្លៃប្រមាណជាង ១០ដុល្លារនេះ ក្រោយពេលលោកជំរុញឲ្យលោកនាយករដ្ឋមន្ត្រី ហ៊ុន សែន លក់នាឡិកាដៃទំនើបៗ របស់លោករាប់សិបគ្រឿងដែលមានតម្លៃរហូតដល់រាប់លានដុល្លារ ដើម្បីយកលុយទាំងនោះ មកជួយពលរដ្ឋក្រីក្រនៅតំបន់បិទខ្ទប់៕
No comments:
Post a Comment