ដោយ សុជីវី
2021-05-26 rfa
រូបភាពកម្មកររោងចក្រកាត់ដេរនៅក្នុងខេត្តកំពង់ឆ្នាំង កាលពីថ្ងៃទី១ ខែឧសភា ឆ្នាំ២០២១។
រូប៖ គេផ្ដល់ឱ្យ
កម្មករមួយចំនួនមានអារម្មណ៍តូចចិត្ត និងសោកស្តាយចំពោះរដ្ឋាភិបាលលោក ហ៊ុន សែន ដែលហាក់មិនបានគិតគូរប្រយោជន៍ពួកគាត់ជាសំខាន់ទៀតឡើយ នៅក្រោយការបោះឆ្នោតឆ្នាំ២០១៨ និងអំឡុងការរាតត្បាតជំងឺកូវីដ-១៩។
កម្មករមួយរូបនៅរាជធានីភ្នំពេញលោកស្រី សយ គន្ធា ថ្លែងថា សំឡេងរបស់កម្មករកាត់ដេរលាន់លឺខ្លាំងតែនៅពេលជិតបោះឆ្នោតប៉ុណ្ណោះ ហើយផុតពីនោះទៅ រដ្ឋាភិបាលលែងសូវរវល់នឹងកម្មករទៀតហើយ។ លោកស្រីបន្តថា លោកស្រីនិងកម្មករដទៃទៀតអន់ចិត្តខ្លាំងនឹងរដ្ឋាភិបាល ព្រោះធ្វើការយូរៗទៅ ផលប្រយោជន៍កាន់តែថយចុះ។ ម្យ៉ាងវិញទៀតលោកស្រីថា អំឡុងពេលបិទខ្ទប់ អាជ្ញាធរមិនបានផ្តល់ស្បៀងអាហារគ្រប់គ្រាន់ដល់កម្មករឡើយ ស្របពេលថ្លៃទឹកភ្លើង និងបន្ទប់ជួល កម្មករភាគច្រើននៅតែបង់ពេញថ្លៃដោយគ្មានការលើកលែង ឬបន្ធូរបន្ថយឡើយ៖ «មានអារម្មណ៍ថា អន់ចិត្តណាស់ ព្រោះពេលដែលយើងស្រែកទៅសុំជំនួយម្តងៗ គេឆ្លើយឱ្យយើងចាំរហូត ដល់ពេលអ៊ីចឹងមានអារម្មណ៍ថាអន់ចិត្ត។ ធ្វើការយូរៗលែងសូវមានថ្ងៃបុណ្យអស់តែម្តង លុបចោលអស់ហើយ គិតជាថ្ងៃធម្មតាចង់អស់ទៅហើយ។ គាត់មិនទៅយកចិត្តទុកដាក់អ្វីទេ។ ជិតដល់បោះឆ្នោតទៀតហើយ ក្រែងគាត់យកចិត្តទុកដាក់ តែបើផុតទៀតហើយ ផុតដូចតែគេថាហ្នឹង»។
កម្មករកាត់ដេរមួយរូបទៀតលោកស្រី ហ៊ាង សាំងម៉េង ថ្លែងថា លោកស្រីក៏មានអារម្មណ៍អាក់អន់ចិត្តនឹងរដ្ឋាភិបាលដែរ។ លោកស្រីបញ្ជាក់ថា អំឡុងពេលបិទខ្ទប់ដោយសារការរាតត្បាតជំងឺកូវីដ-១៩ នេះ កម្មករគ្មានប្រាក់ចំណូលនោះទេ ប៉ុន្តែពួកគាត់នៅតែត្រូវបង់ថ្លៃទឹកភ្លើង និងបន្ទប់ជួលពេញថ្លៃ។ លោកស្រីសោកស្តាយដែលប្រមុខរដ្ឋាភិបាលបានតែប្រកាស តែគ្មានការអនុវត្តជាក់ស្តែងចំពោះការបន្ធូរបន្ថយថ្លៃទឹកភ្លើង និងបន្ទប់ជួលនេះ។ ជាងនេះទៅទៀត កម្មករទទួលបានជំនួយជាស្បៀងអាហារតែម្តងគត់ពីអាជ្ញាធរ ខណៈការបិទខ្ទប់អូសបន្លាយពេលយូរថ្ងៃ៖ «ជួនកាលចំណូលប្រចាំខែក្នុងមួយខែបាន ២០០ដុល្លារ តែចំណាយហ្នឹងវាលើសពី ២០០ដុល្លារហ្នឹងទៀត ដោយសារការហូបចុក ការស្នាក់នៅ ឬក៏បញ្ហាអ្វីផ្សេងៗទៀត វាច្រើនជាងចំណូលដែលយើងចូល។ អ៊ីចឹងក៏ស្នើសុំឱ្យគាត់ជួយមើល ជួយយកចិត្តទុកដាក់ទៅលើកម្មករឱ្យបានច្រើនជាងហ្នឹង»។
កម្មករមួយចំនួនទៀតឱ្យដឹងថា ពួកគាត់មិនហ៊ាននិយាយរឿងនេះជាសាធារណៈតាមប្រព័ន្ធផ្សព្វផ្សាយនោះទេ ព្រោះបារម្ភពីបញ្ហាសុវត្ថិភាព និងខ្លាចប៉ះពាល់ដល់ការងារ។ ប៉ុន្តែពួកគាត់ប្រាប់ថា ពួកគាត់ដឹងច្បាស់អំពីស្ថានភាពបច្ចុប្បន្ន ដែលរដ្ឋាភិបាលហាក់មិនសូវបានគិតគូរពីប្រយោជន៍ និងសុខទុក្ខរបស់កម្មករនោះទេ។ ក្រុមកម្មករនាំគ្នាបញ្ចេញមតិបែបនេះ បន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលរបស់លោកនៅតែយកចិត្តទុកដាក់ខ្លាំងចំពោះការបង្កើតការងារ ការលើកកម្ពស់សុវត្ថិភាព និងសុខភាពការងារ ការអភិវឌ្ឍរបបសន្តិសុខសង្គម និងការឧបត្ថម្ភដល់កម្មករ ជាដើម។
លោក ហ៊ុន សែន មានប្រសាសន៍ក្នុងលិខិតអបអរទិវាពលកម្មអន្តរជាតិ ១ឧសភាថា លោកបានចុះជួបកម្មករចំនួន ៧៧លើក ដោយមានកម្មករចូលរួមសរុបជិត ១លាននាក់ ចាប់តាំងពីឆ្នាំ២០១៧ ដល់ឆ្នាំ២០១៩។ លោកបញ្ជាក់ថា តាមរយៈជំនួបទាំងនេះ លោកបានយល់ដឹងអំពីបញ្ហារបស់កម្មករ និងដាក់ចេញនូវគោលនយោបាយនានា ដើម្បីលើកកម្ពស់ជីវភាព និងសុខុមាលភាពរបស់កម្មករ។ លោក ហ៊ុន សែន អះអាងថា លោកនឹងបន្តចុះជួបកម្មករបែបនេះជាបន្តទៀតនៅក្នុងតំណែងជានាយករដ្ឋមន្ត្រី។ ប៉ុន្តែនៅក្នុងឆ្នាំ២០២១ នេះ លោកបានសុំការយោគយល់ពីកម្មករ ករណីដែលការជួបជុំគ្នាមិនអាចរៀបចំទៅបាន ដោយសារការរាតត្បាតជំងឺកូវីដ-១៩។
ឆ្លើយតបនឹងការលើកឡើងរបស់កម្មករ អ្នកនាំពាក្យគណបក្សកាន់អំណាចលោក សុខ ឥសាន អះអាងថា រដ្ឋាភិបាលមិនមែនគិតគូរពីសុខទុក្ខរបស់កម្មករតែនៅពេលជិតបោះឆ្នោតនោះទេ។ លោកថា ប្រមុខដឹកនាំរដ្ឋាភិបាលផ្អាកចុះជួបកម្មករ ដោយសារការរីករាលដាលនៃជំងឺកូវីដ-១៩ ។ មន្ត្រីជាន់ខ្ពស់បក្សកាន់អំណាចរូបនេះបញ្ជាក់ថា ថ្វីបើមិនបានចុះជួបកម្មករក៏ដោយ ក៏ថ្នាក់ដឹកនាំរដ្ឋាភិបាលបន្តគិតគូរពីសុខទុក្ខរបស់កម្មករ តាមរយៈការចាត់ចែងស្បៀងអាហារដល់កម្មករនៅតំបន់បិទខ្ទប់ និងវិធានការដទៃទៀតដែលផ្តល់ប្រយោជន៍ដល់កម្មករដែរ៖ «សម្តេចតេជោ រាល់ថ្ងៃនេះ គាត់នៅជាអគ្គមេបញ្ជាការកំពូលរបស់ជាតិហ្នឹង ដើម្បីដោះស្រាយបញ្ហាទាំងអស់ជូនប្រជាពលរដ្ឋ និងកម្មករនិយោជិតរបស់យើងហ្នឹង។ ឃើញទេ បងប្អូនទទួលបានអំណោយ ទទួលបានការជួយសង្គ្រោះជាស្បៀង ជាស្អី។ល។ ដោយសារសម្តេចតេជោ ហ៊ុន សែន លោកចាត់ចែងហ្នឹងតើ។ មិនមែនថាមិនយកចិត្តទុកដាក់ទេ ទោះបីថាមិនបានទៅជួប ក៏នៅតែយកចិត្តទុកដាក់ចំពោះបងប្អូនកម្មករនិយោជិតរបស់យើង»។
ទោះជាយ៉ាងណាក៏ដោយ ការអះអាងរបស់លោក ហ៊ុន សែន និងអ្នកនាំពាក្យបក្សកាន់អំណាចនេះ ហាក់មិនឆ្លុះបញ្ចាំងការពិតទាំងស្រុងនោះទេ។ ផ្ទុយទៅវិញ ចំណុចទាំងនេះ មានលាយឡំដោយធាតុ និងប្រយោជន៍នយោបាយច្រើនជាង។
ការដែលលោក ហ៊ុន សែន ចុះជួបកម្មករស្ទើររាល់ថ្ងៃដោយផ្តល់លុយឱ្យពួកគាត់ម្នាក់ពីរម៉ឺនរៀលនៅពេលនោះ គឺទំនងជាដើម្បីយកចិត្តកម្មករ កុំឱ្យផ្ទុះការតវ៉ានៅពេលរបបរបស់លោករំលាយគណបក្សសង្គ្រោះជាតិ ហើយនិងលួងលោមឱ្យកម្មករចេញទៅបោះឆ្នោតគាំទ្ររបបឯកបក្សរបស់លោក។ នៅពេលក្រសោបយកអំណាចផ្តាច់មុខនៅខែ កក្កដា ឆ្នាំ២០១៨ ហើយនោះ លោក ហ៊ុន សែន ចុះជួបកម្មករកាន់តែរង្វើល ហើយចាប់ពីខែឧសភា ឆ្នាំ២០១៩ មក លោកឈប់ចុះជួបកម្មករតែម្តង ទោះបីជាពេលនោះ មិនទាន់មានជំងឺកូវីដ-១៩ ក្តី ។
នៅពេលចុះជួបកម្មករនោះទៀតសោត លោក ហ៊ុន សែន តែងចំណាយពេលច្រើននិយាយអួតអាងពីសមិទ្ធផលក្រោមការដឹកនាំរបស់លោកជាង ៣០ឆ្នាំ និងវាយប្រហារគណបក្សប្រឆាំងជាដើម ដើម្បីកេងចំណេញផលប្រយោជន៍នយោបាយ។ ក្រៅពីនោះ លោក ហ៊ុន សែន តែងចំណាយពេលតិចបំផុតនិយាយដល់ផលប្រយោជន៍របស់កម្មករ ដូចជា ការសន្យាបញ្ចុះតម្លៃទឹកភ្លើង សន្យាដំឡើងប្រាក់ខែជូនកម្មករជាទៀងទាត់ និងស្នើឱ្យម្ចាស់ផ្ទះ ឬបន្ទប់ជួលកុំដំឡើងថ្លៃឈ្នួល ជាដើម។ ចំណុចទាំងនោះ លោកបានលើកយកមកនិយាយដដែលៗអំឡុងវិបត្តិជំងឺកូវីដ-១៩ ជាពិសេសក្នុងពេលបិទខ្ទប់រាជធានីភ្នំពេញ ប៉ុន្តែកម្មករជាច្រើននៅតែអះអាងថា ពួកគាត់ត្រូវបង់ពេញថ្លៃ ទាំងថ្លៃទឹកភ្លើង និងបន្ទប់ជួល។ ពួកគាត់ថា បើមានការបន្ធូរបន្ថយមែន នោះគឺជាទឹកចិត្តសន្ដោសរបស់ម្ចាស់ផ្ទះទៅវិញទេ មិនមែនចេញមកពីវិធានការរបស់រដ្ឋាភិបាលឡើយ។ រីឯប្រាក់ខែគោលរបស់កម្មករវិញ កើនឡើងបន្តិចបន្តួច មិនសមាមាត្រទៅនឹងតម្លៃទំនិញលើទីផ្សារនោះទេ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ម្យ៉ាងវិញទៀត អំឡុងវិបត្តិកូវីដ-១៩ នេះ រដ្ឋាភិបាលលោក ហ៊ុន សែន បានដាក់ចេញវិធានការជាច្រើនដែលធ្វើឱ្យខាតប្រយោជន៍កម្មករ។ ក្នុងនោះ មានជាអាទិ៍ ការលុបចោលថ្ងៃឈប់សម្រាក៦ ថ្ងៃចេញពីប្រតិទិនឈប់សម្រាកប្រចាំឆ្នាំ ការអនុញ្ញាតឱ្យម្ចាស់រោងចក្រពន្យារពេលបើកប្រាក់បំណាច់អតីតភាពការងារ និងការអនុញ្ញាតឱ្យថៅកែមិនបាច់ទូទាត់ប្រាក់សំណងជំងឺចិត្ត និងប្រាក់ជូនដំណឹងជាមុននៅពេលបិទរោងចក្រ ព្រមទាំងការពន្យារបើកប្រាក់ឈ្នួលឱ្យកម្មករក្រោមលេសជំងឺកូវីដ-១៩ ជាដើម។ លើសពីនេះ ក្រសួងការងារកំពុងរៀបចំកែប្រែច្បាប់ការងារ ដើម្បីបន្ថយប្រាក់ឈ្នួលធ្វើការវេនយប់ឱ្យស្មើនឹងវេនថ្ងៃ និងលុបចោលថ្ងៃឈប់សម្រាកចំថ្ងៃអាទិត្យផងដែរ។
ការមិនគិតគូរពីប្រយោជន៍កម្មករនេះ ហាក់ស្តែងឡើងកាន់តែច្បាស់តាមរយៈសេចក្តីសម្រេចចិត្តផ្ទាល់របស់លោក ហ៊ុន សែន។ លោកបានប្រកាសជាឱឡារិកថា លោកមិនទាមទារយកឋានៈអនុគ្រោះពន្ធ២០% ដែលសហភាពអឺរ៉ុបបានដកហូតពីកម្ពុជា ដោយសារតែករណីរំលោភសិទ្ធិមនុស្សធ្ងន់ធ្ងរប្រព័ន្ធនោះទេ។ លោកថែមទាំងធ្លាប់ផ្គើនឱ្យសហភាពអឺរ៉ុបដកហូតប្រព័ន្ធអនុគ្រោះពន្ធនេះពីកម្ពុជាទៀតផង បើទោះជាពលរដ្ឋខ្មែររាប់លាននាក់បានទទួលផលប្រយោជន៍ដោយផ្ទាល់ និងដោយប្រយោលពីប្រព័ន្ធអនុគ្រោះពន្ធនេះយ៉ាងណាក្តី។
ជុំវិញរឿងនេះ ប្រធានសហព័ន្ធសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍ថា ទោះបីជារដ្ឋាភិបាលប្រកាសថាគិតគូរពីសុខទុក្ខ និងផលប្រយោជន៍កម្មករយ៉ាងណាក្តី ក៏វិធានការជាបន្តបន្ទាប់របស់រដ្ឋាភិបាលក្នុងរយៈពេលចុងក្រោយនេះ បានធ្វើឱ្យផលប្រយោជន៍ដែលកម្មករធ្លាប់តែទទួលបាននោះ កាន់តែរួមតូចទៅៗ។ អ្នកស្រីជំរុញឱ្យរដ្ឋាភិបាលយកចិត្តទុកដាក់ និងគិតគូរពីប្រយោជន៍កម្មករឱ្យបានច្រើន ដូចការប្រកាសរបស់ប្រមុខរដ្ឋាភិបាលយ៉ាងដូច្នេះដែរ។
H052521PR-A4៖ «វាអត់អ្វីជាជាងការយល់ឃើញរបស់បងប្អូនកម្មករ ប្រជាពលរដ្ឋជាទូទៅវិញទេ លោកគិតទៅថា លោកជាម្ចាស់ឆ្នោត លោកមានសិទ្ធិក្នុងការសម្រេចចិត្តគ្រប់គ្រាន់។ ធម្មតា បើរដ្ឋមួយជួយគាំទ្រទៅដល់ប្រជាពលរដ្ឋ ឬក៏មិនទុកឱ្យប្រជាពលរដ្ឋស្លាប់ទេ ដរាបណាយើងមានគោលនយោបាយក្នុងការគាំទ្រដល់ពួកគាត់ ឬក៏ជួយគាត់នៅក្នុងដំណាក់កាលដែលគាត់ពិបាកទាំងអស់ហ្នឹង ដោយមិនចាំបាច់មានលក្ខខណ្ឌភ្ជាប់មកជាមួយដើម្បីតែល្អមើល ដើម្បីថាធ្វើទៅឱ្យដឹងថាធ្វើ»។
តួលេខរបស់អគ្គនាយកដ្ឋានគយ និងរដ្ឋាករកម្ពុជាបង្ហាញថា ក្នុងត្រីមាសទីមួយនៃឆ្នាំ២០២១ នេះ កម្ពុជានាំចេញផលិតផលសម្លៀកបំពាក់ ស្បែកជើង និងរបស់របរធ្វើដំណើរទៅក្រៅប្រទេស គិតជាទឹកប្រាក់ជាង ២ពាន់ ៤រយលានដុល្លារអាមេរិក (២.៤១០ ប៊ីលាន)។ តួលេខនេះថយចុះជាង៦% បើប្រៀបធៀបនឹងរយៈពេលដូចគ្នានៃឆ្នាំ២០២០ ដែលកម្ពុជានាំចេញផលិតផលទាំងនោះ គិតជាទឹកប្រាក់ជាង ២ពាន់ ៥រយលានដុល្លារ (២.៥៧៧ ប៊ីលាន)។
ដោយឡែកនៅឆ្នាំ២០១៩ វិញ កម្ពុជានាំចេញទំនិញទៅទីផ្សារអន្តរជាតិ គិតជាទឹកប្រាក់ជាង ១ ម៉ឺន ៧ពាន់លានដុល្លារ (១៧.២១៥ ប៊ីលាន) ក្នុងនោះជិត ១ ម៉ឺនលានដុល្លារ គឺជាផលិតផលសម្លៀកបំពាក់ ស្បែកជើង និងរបស់របរធ្វើដំណើរ។ ទិន្នន័យទាំងនេះ បង្ហាញថា វិស័យកាត់ដេរនៅតែជាក្បាលម៉ាស៊ីនសេដ្ឋកិច្ចដ៏សំខាន់របស់កម្ពុជា ទោះស្ថិតក្នុងវិបត្តិជំងឺកូវីដ-១៩ ក៏ដោយ។
សហជីព និងកម្មករនៅតែជំរុញឱ្យរដ្ឋាភិបាលកម្ពុជា រកដំណោះស្រាយយ៉ាងណាឱ្យកម្ពុជាទទួលបានឋានៈអនុគ្រោះពន្ធពីទីផ្សារសហភាពអឺរ៉ុប និងសហរដ្ឋអាមេរិកបន្តទៀត ពីព្រោះកម្ពុជាត្រូវការស្ដារសេដ្ឋកិច្ចឡើងវិញ នៅក្រោយវិបត្តិជំងឺកូវីដ-១៩។ ជាពិសេស ករណីនេះនឹងអាចវាស់វែងបានថា តើរដ្ឋាភិបាលលោក ហ៊ុន សែន ពិតជាគិតគូរដល់ប្រយោជន៍កម្មករមែន ឬក៏គ្រាន់តែផ្ញើរសារនយោបាយបែបប្រជាភិថុតិទៅកាន់កម្មករនៅពេលជិតបោះឆ្នោត៕ PR
1 comment:
Why don't they know that Ah Kwack Hun Sen is a liar ?
Post a Comment