ដោយ សន ចាន់រដ្ឋា
2021-06-05 rfa
ទំព័រហ្វេសប៊ុក ទូរទស្សន៍ព្រះអាទិត្យកម្ពុជា
Photo: RFA
អ្នកគ្រប់គ្រងកម្មវិធីទូរទស្សន៍ព្រះអាទិត្យ របស់គណបក្សសង្គ្រោះជាតិ ព្រះតេជព្រះគុណ ប៊ុត ប៊ុនតិញ បានដាក់ស្នើទៅកាន់ក្រុមហ៊ុនហ្វេសប៊ុក (Facebook) ដើម្បី ទាមទារសិទ្ធិគ្រប់គ្រងទំព័រហ្វេសប៊ុកទូរទស្សន៍ព្រះអាទិត្យមកវិញ បន្ទាប់ពីក្រុមចោរបច្ចេកវិទ្យាបានលួចទំព័រនេះទៅគ្រប់គ្រង កាលពីថ្ងៃទី ០៤ ខែមិថុនា និងបានដកអ្នកគ្រប់គ្រងផេក (Page) នេះទាំងអស់ចេញពី ទំព័រហ្វេសប៊ុក ទូរទស្សន៍ព្រះអាទិត្យ។ ព្រះតេជព្រះគុណ ប៊ុត ប៊ុនតិញ បានបញ្ជាក់នៅលើទំព័រហ្វេសប៊ុករបស់ព្រះអង្គថា ខាងក្រុមហ៊ុនហ្វេសប៊ុកនៅមិនទាន់ឆ្លើយតបយ៉ាងណានៅឡើយទេ។
ស្របពេលដែលទាមទារសិទ្ធិគ្រប់គ្រងមកវិញ ព្រះតេជព្រះគុណ ប៊ុត ប៊ុនតិញ ក៏បានប្រកាស នៅលើទំព័រហ្វេសប៊ុកកាលពីថ្ងៃទី ០៤ ខែមិថុនា ដោយបដិសេធជាមុន ប្រសិនបើក្រុមចោរបច្ចេកវិទ្យាចាប់ផ្តើមប្រើប្រាស់ឈ្មោះព្រះតេជព្រះគុណ ឬឈ្មោះទូរទស្សន៍ព្រះអាទិត្យ ទៅធ្វើសកម្មភាពទាំងឡាយណាទុច្ចរិត ឬផ្ទុយពីបេសកកម្មរបស់ទូរទស្សន៍ព្រះអាទិត្យ។
"បើសិនជាមានបញ្ហាយកឈ្មោះទូរទស្សន៍ព្រះអាទិត្យកម្ពុជា ឬឈ្មោះអាត្មាទៅប្រើក្នុងគោលបំណង រកលុយរកកាក់ គោលបំណងគំរាមកំហែង គោលបំណងបំបែកឆន្ទៈនយោបាយ សូមញាតិញោមមេត្តាកុំទទួល រួចចូលរួមបដិសេធជាមួយក្រុមការងារទូរទស្សន៍ព្រះអាទិត្យ។ ហើយអាត្មាបដិសេធពីម៉ោង ០៩ និង១៥នាទីព្រឹក ថ្ងៃទី០៤ ខែមិថុនា រហូតដល់ថ្ងៃណាមួយដែលយើងមានសិទ្ធិគ្រប់គ្រង។ យើងបដិសេធក្នុងអន្តរកាលនោះទាំងសារ ទាំងអត្ថបទ ទាំងសំឡេង ទាំងវីដេអូ។ ហើយខ្លឹមសារដែលឆ្លុះបញ្ចាំងផ្ទុយពីខ្លឹមសារ និងគោលដៅរបស់អ្នកគ្រប់គ្រងទូរទស្សន៍ព្រះអាទិត្យ យើងបដិសេធទាំងស្រុង"
ទោះយ៉ាងណាព្រះតេជព្រះគុណ ប៊ុត ប៊ុនតិញ ប្ដេជ្ញាថានឹងព្យាយាមទាមទារសិទ្ធិគ្រប់គ្រង ផេកហ្វេសប៊ុកទូរទស្សន៍ព្រះអាទិត្យត្រឡប់មកវិញ។ ព្រះតេជព្រះគុណមានដីកាបន្ថែមថាប្រសិនបើ មិនអាចទាមទារមកវិញបានទេ ព្រះតេជព្រះគុណ នឹងពិភាក្សាជាមួយក្រុមការងាររបស់ទូរទស្សន៍ព្រះអាទិត្យ ឱ្យងាកទៅប្រើផេករបស់បណ្ដាញព្រះសង្ឃឯករាជ្យដើម្បីយុត្តិធម៌ជំនួសវិញ ដើម្បីអាចបន្តបេសកកម្ម និងបម្រើឆន្ទៈអ្នកនយោបាយ ដែលព្រះតេជព្រះគុណចាត់ទុកថា ជាអ្នកប្រជាធិបតេយ្យពិតប្រាកដ។
កាលពីថ្ងៃទី ០៤ ខែមិថុនា អ្នកដែលបានលួចទំព័រហ្វេសប៊ុកទូរទស្សន៍ព្រះអាទិត្យទៅ បានចាប់ផ្តើមផុសរូបនារីក្នុងសម្លៀកបំពាក់មិនសមរម្យ និងភ្ជាប់ជាមួយនឹងអាសយដ្ឋានទៅកាន់ វែបសាយ (Website) បរទេសមួយដែលមានឈ្មោះថា Da Million។
ទាក់ទងនឹងបញ្ហានេះ អ្នកសិក្សាផ្នែកបច្ចេកវិទ្យា លោក ង៉ែត ម៉ូសេ សង្កេតឃើញថាការបាត់បង់ផេកហ្វេសប៊ុកនេះ កើតចេញពីការខ្វះចន្លោះរបស់អ្នកគ្រប់គ្រងផេក ដែលផ្តល់ឱកាសឱ្យក្រុមចោរបច្ចេកវិទ្យាអាចឆ្លៀតឱកាសដណ្ដើមយកផេកហ្វេសប៊ុកទៅគ្រប់គ្រងបាន។ ទោះយ៉ាងណា លោក ង៉ែត ម៉ូសេ មានសង្ឃឹមថាក្រុមហ៊ុនហ្វេសប៊ុកនឹងអាចលូកដៃចូលដោះស្រាយបញ្ហានេះជូនដល់ម្ចាស់ផេក ប្រសិនបើម្ចាស់ផេកដែលបានបាត់បង់សិទ្ធិនោះ មានឯកសារគ្រប់គ្រាន់ដើម្បីបញ្ជាក់អំពីទំនាក់ទំនងជាមួយនឹងផេកហ្វេសប៊ុកដែលបានបាត់បង់នេះ។
“ជាបទពិសោធន៍របស់ខ្ញុំគឺថា ប្រសិនបើជាយើងមានឯកសារគ្រប់គ្រាន់ តឹកតាងគ្រប់គ្រាន់ផ្តល់ទៅកាន់ហ្វេសប៊ុក ហើយយើងឆ្លើយសំនួររបស់គេបានល្អ ប្រគល់ឯកសារដើម្បីឱ្យគេធ្វើការ Investigate (ស៊ើបអង្កេត) ទៅលើរឿងហ្នឹង ប្រហែលជាគេអាចទាញយកផេកហ្នឹងមកអោយយើងគ្រប់គ្រងវិញ។ អីចឹងសំខាន់លើការរៀបរាប់ សំខាន់លើឯកសារដែលយើង Provide (ផ្តល់) ឱ្យគេ នៅពេលដែលគេស្នើសុំហ្នឹង យើងផ្តល់ឱ្យគេហ្នឹងគ្រប់សាច់រឿងដែលគេចង់បានដែរ ឬទេ? ដើម្បីឱ្យគេមើលឃើញពីចេតនារបស់យើង ថាយើងពិតជាជនរងគ្រោះនៅក្នុងការវាយប្រហារ ដោយការថ្លោះធ្លោយក្នុងការគ្រប់គ្រងរបស់យើង”
បន្ថែមពីលើនេះលោក ង៉ែត ម៉ូសេ ផ្តល់យោបល់ដល់អ្នកគ្រប់គ្រងផេកទាំងអស់ ឱ្យប្រុងប្រយ័ត្នខ្ពស់ចំពោះការបន្ថែមសុវត្ថិភាពសម្រាប់ គណនីហ្វេសប៊ុកផ្ទាល់ខ្លួន របស់អ្នកគ្រប់គ្រងផេកស្ថាប័នឱ្យបានល្អប្រសើរដូចជាការ ជ្រើសរើសពាក្យសម្ងាត់ដែលល្អ និងបន្ថែមសោសុវត្ថិភាពពីរជាន់ (Two-Factor Authentication)។ ក្រៅពីនេះលោកក៏ស្នើដល់អ្នកគ្រប់គ្រងផេកទាំងអស់ ត្រូវប្រុងប្រយ័ត្នចំពោះការចុចលើតំណភ្ជាប់ ឬ Link ដែលមានការសង្ស័យ បើទោះបីជាតំណភ្ជាប់នោះ ផ្ញើមកពីអ្នកដែលយើងស្គាល់ក៏ដោយ៕
No comments:
Post a Comment