ដោយ ជាតិ ចំណាន
2021-12-24
ស្លាកគណបក្សភ្លើងទៀន ដែលត្រូវអាជ្ញាធរដកចោល នៅខេត្តសៀមមរាប។
រូបពីហ្វេសប៊ុក Sok Kimseng
មន្ត្រីជាន់ខ្ពស់គណបក្សភ្លើងទៀនចាត់ទុកទង្វើរបស់អាជ្ញាធរក្រុងសៀមរាបដែលកាត់និងគាស់រំលើងស្លាកទីស្នាក់ការគណបក្សខេត្តនេះទាំងយប់ ដោយមិនបានបញ្ជាក់មូលហេតុឱ្យបានច្បាស់លាស់ជាការរំលោភបំពានច្បាប់ និងរើសអើងនិន្នាការនយោបាយ។ ប៉ុន្តែអាជ្ញាធរក្រុងសៀមរាបអះអាងថា ស្លាកដែលលើកនោះគឺខុសច្បាប់ ពីព្រោះពួកគេមិនបានជូនសុំច្បាប់អនុញ្ញាត ឬជូនដំណឹងទៅអាជ្ញាធរមូលដ្ឋាន។
អាជ្ញាធរបានចុះកាត់ផ្ដួលស្លាកទីស្នាក់ការគណបក្សភ្លើងទៀនខេត្តសៀមរាបមួយផ្ទាំងស្ថិតនៅភូមិត្រពាំងសេះ សង្កាត់គោកចក ក្រុងសៀមរាប បន្ទាប់ពីសមាជិកគណបក្សនេះបានលើកស្លាកនោះកាលពីល្ងាចថ្ងៃទី២៣ ខែធ្នូ។
ប្រធានក្រុមការងារខេត្តសៀមរាប និងជាសមាជិកគណៈកម្មាធិការអចិន្ត្រៃយ៍គណបក្សភ្លើងទៀនលោក សុខ គឹមសេង ថ្លែងប្រាប់វិទ្យុអាស៊ីសេរីនៅថ្ងៃទី២៤ ធ្នូ ថា មុនពេលលើកស្លាកគណបក្ស ខាងលោកបានជូនដំណឹងទៅអាជ្ញាធរខេត្តទាក់ទងទៅនឹងការជួបជុំសំណេះសំណាលជាមួយថ្នាក់ដឹកនាំ សមាជិករបស់ខ្លួន និងលើកស្លាកនៅស្នាក់ការបក្សខេត្តនេះ។ ប៉ុន្តែអាជ្ញាធរក្រុងសៀមរាបជាច្រើននាក់បែរជាចុះកាត់ និងគាស់រំលើងស្លាកទីស្នាក់ការគណបក្សខេត្តទាំងយប់ កាលពីថ្ងៃទី ២៣ ធ្នូ ដោយមិនបានបញ្ជាក់មូលហេតុ។ លោកចាត់ទុកទង្វើរបស់អាជ្ញាធរបែបនេះ គឺការរំលោភបំពានច្បាប់ និងបង្កើតបរិយាកាសមិនល្អមុនការបោះឆ្នោតដែលមិនអាចទទួលយកបានឡើយ។ «»
ឆ្លើយតបរឿងនេះ អភិបាលរងក្រុងសៀមរាបលោក ប៊ូ ទ្រីម៉េង លើកឡើងថា តំណាងគណបក្សភ្លើងទៀនពិតជាបានដាក់សំណើទៅខេត្ត ហើយអភិបាលខេត្តបានឯកភាពឱ្យជួបជុំសកម្មជន ប៉ុន្តែមិនអនុញ្ញាតឱ្យលើកស្លាកនោះទេ ដោយតម្រូវឱ្យគណបក្សនេះត្រូវសុំការអនុញ្ញាត ឬជូនដំណឹងពីអាជ្ញាធរមូលដ្ឋានជាមុនសិន។ លោកចោទប្រកាន់ថា ស្លាកដែលលើកនៅមុខទីស្នាក់ការគណបក្សខេត្តនោះធ្វើឡើងដោយខុសច្បាប់ ដូច្នេះអាជ្ញាធរមានសិទ្ធិរុះរើទាំងយប់ បើទោះបីក្រៅម៉ោងរដ្ឋបាលក៏ដោយ។
ទោះជាយ៉ាងណា លោក សុខ គឹមសេង អះអាងថា លោកបានជូនដំណឹងទៅអាជ្ញាធរខេត្តរួចហើយ ហើយគ្មានច្បាប់ណាតម្រូវឱ្យបក្សនយោបាយលើកស្លាកនៅទីតាំងឯកជនរបស់ខ្លួន ហើយត្រូវជូនដំណឹង ឬសុំច្បាប់ពីអាជ្ញាធរមូលដ្ឋាននោះទេ។ លោកថា បើសិនអាជ្ញាធរយល់ថាការលើកស្លាកទីស្នាក់ការបក្សនេះខុសច្បាប់ អាជ្ញាធរគួរចេញលិខិតជូនដំណឹងដោយបញ្ជាក់អំពីមូលហេតុផ្លូវច្បាប់ឱ្យបានច្បាស់លាស់ ដោយមិនត្រូវធ្វើទង្វើបែបនេះទេ។
ក្រៅពីអាជ្ញាធរខេត្តសៀមរាបចុះរុះរើសស្លាកសញ្ញាគណបក្សភ្លើងទៀន ខេត្តសៀមរា កាលពីថ្មីៗនេះ សមត្ថកិច្ចខេត្តឧត្តរមានជ័យ ក៏ចាប់ខ្លួនសមាជិកបក្សសង្គ្រោះជាតិលោក សុខ វិល ដែលត្រៀមចូលរួមជាមួយគណបក្សភ្លើងទៀនដែរ។
ទាក់ទិនរឿងនេះ មន្ត្រីសម្របសម្រួលផ្នែកអង្កេតរបស់អង្គការឃ្លាំមើលការបោះឆ្នោត ខុមហ្វ្រែល (COMFREL) លោក កន សាវាង្ស យល់ថា ការប្រកួតប្រជែងដែលទទួលយកបានទាំងអស់គ្នា គឺអាស្រ័យលើបរិយាកាសនយោបាយ ដោយគ្មានការរើសអើងមុនពេលបោះឆ្នោត ពេលឃាសនាបោះឆ្នោត ថ្ងៃបោះឆ្នោត និងផ្ទេរអំណាចដោយសន្តិវិធី។ លោកថា បើការលើស្លាកនៅទីស្នាក់ការគណបក្សនយោបាយ និងមិនប៉ះពាល់ដល់តាំងសាធារណៈ គឺមិនខុសច្បាប់នោះទេ ហើយពួកគេអាចដាក់ពាក្យប្តឹងអាជ្ញាធរមានសមត្ថកិច្ច ដើម្បីឆ្លើយតប និងបកស្រាយជុំវិញរឿងនេះ។ លោកមើលឃើញថា ស្ថានភាពនយោបាយបច្ចុប្បន្នអាជ្ញាធរមួយចំនួននៅតែរើសអើង ធ្វើទុក្ខបុកម្នេញផ្នែកនយោបាយ ដោយអាជ្ញាធរហាក់បែងចែកតួនាទីភារកិច្ចមិនទាន់ច្បាស់លាស់អំពីអព្យាក្រិតរបស់ខ្លួន។ «»
មន្ត្រីគណបក្សភ្លើងទៀនខេត្តសៀមរាបបញ្ជាក់ថា ពួកគេសម្រេចមិនប្តឹងផ្តល់អាជ្ញាធរដែលកាត់ស្លាកនោះទេ ប៉ុន្តែគណបក្សនេះទុកឱ្យប្រជាពលរដ្ឋជាអ្នកវិនិច្ឆ័យលើទង្វើរបស់អាជ្ញាធរទាំងនោះវិញ។
មុននឹងមានឈ្មោះថា ជាគណបក្សភ្លើងទៀន គណបក្សនេះបានប្ដូរឈ្មោះពីរលើករួចមកហើយ ដោយពីដំបូងមានឈ្មោះថា គណបក្សជាតិខ្មែរ និងក្រោយមកជាគណបក្ស សម រង្ស៊ី។ ការប្ដូរឈ្មោះពីរលើកមកនេះ គឺដោយសាររដ្ឋាភិបាល ហ៊ុន សែន បានកែប្រែច្បាប់ចាប់បង្ខំឲ្យបក្សនេះប្ដូរឈ្មោះ ដែលទំនងជាការប៉ុនប៉ងលុបឈ្មោះ និងមរតកលោក សម រង្ស៊ី ចេញពីគណបក្សនេះ ត្បិតបក្សនេះត្រូវបានបង្កើតឡើងដោយលោក សម រង្ស៊ី កាលពីឆ្នាំ១៩៩៥៕
No comments:
Post a Comment