Thursday, 13 January 2022

កិច្ចប្រជុំ​ជាមួយ​រដ្ឋមន្រ្តី​ការបរទេស​​អាស៊ាន ត្រូវ​លើក​​ពេល​​ដោយ​​គ្មាន​កាល​កំណត់


ដោយ ខែ សុណង
2022-01-12

កិច្ចប្រជុំ​ជាមួយ​រដ្ឋមន្រ្តី​ការបរទេស​​អាស៊ាន ត្រូវ​លើក​​ពេល​​ដោយ​​គ្មាន​កាល​កំណត់ 

លោក ហ៊ុន សែន ពិភាក្សា​តាម​ខ្សែទូរស័ព្ទ​ជាមួយ​ប្រធានាធិបតី​ឥណ្ឌូនេស៊ី​លោក ចូកូ វីដូដូ (Joko Widodo) កាលពី​៤ ខែមករា ឆ្នាំ២០២២ មុនពេល​លោក ហ៊ុន សែន ធ្វើ​ទស្សនកិច្ចនៅ​ប្រទេសមីយ៉ាន់ម៉ានៅថ្ងៃទី៧ ខែមករា ឆ្នាំ២០២២។
រូប៖ ហ្វេសប៊ុក SMP


កម្ពុជា​សម្រេច​លើក​ពេល​នៃ​កិច្ច​ប្រជុំ​ជាមួយ​រដ្ឋមន្រ្តី​ការបរទេស​អាស៊ាន​ ទៅ​ពេល​ក្រោយ ដោយ​គ្មាន​កាល​កំណត់។

សេចក្តី​ជូនដំណឹង​អំពី​ការ​លើក​ពេល​កិច្ច​ប្រជុំ​នេះ ​ត្រូវ​បាន​រដ្ឋមន្រ្តី​ក្រសួង​ព័ត៌មាន​លោក ខៀវ កាញារីទ្ធ ផ្សាយ​លើ​ទំព័រ​ហ្វេសប៊ុក​របស់​លោក នៅថ្ងៃទី១២ ខែមករា ដោយ​សរសេរ​ថា កិច្ច​ប្រជុំ​ចង្អៀត​រដ្ឋមន្ត្រី​ការបរទេស​អាស៊ាន​​ (AMM Retreat)​​ ដែល​គ្រោង​រៀបចំ​ធ្វើនៅ​ថ្ងៃទី១៨-១៩ ខែមករា ឆ្នាំ២០២២ នៅខេត្តសៀមរាប ត្រូវបាន​លើក​ទៅ​ធ្វើ​នា​ពេល​ក្រោយ​វិញ។

លោក​បន្តថា ការលើក​ពេល​នេះ គឺ​ដោយ​មូលហេតុ​ រដ្ឋមន្ត្រី​ការបរទេស​អាស៊ាន​ជា​ច្រើន​រូប មាន​ការ​លំបាក​ក្នុង​ការ​ធ្វើដំណើរ​មក​ចូលរួម​ក្នុង​កិច្ចប្រជុំ​ខាង​លើ។ លោក ខៀវ កាញារីទ្ធ មិន​បាន​ពន្យល់​ពី​ហេតុផល​លម្អិត​លើស​ពី​នេះ​ទេ។


ជុំវិញ​ការ​លើក​ពេល​ប្រជុំ ដោយ​គ្មានកាល​កំណត់ និង​មូលហេតុអ្វី​ដែល​កិច្ចប្រជុំ​ក្នុង​សម័យ​កូវីដ-១៩​បែប​នេះ មិន​អាច​រៀបចំ​តាម​អនឡាញ (Online) បាន វិទ្យុ​អាស៊ី​សេរី​ បាន​ព្យាយាម​សុំការ​បំភ្លឺ​ពី​អ្នក​នាំពាក្យ​ក្រសួង​ការបរទេស​លោក កុយ គួង និង​ប្រធាន​អង្គភាព​អ្នកនាំ​ពាក្យ​រដ្ឋាភិបាល​លោក ផៃ ស៊ីផាន នៅថ្ងៃទី១២ ខែមករា ដែរ ប៉ុន្តែ​មិន​ទាន់​បាន​ការ​ឆ្លើយ​តប​នៅ​ឡើយ។

ទោះជា​យ៉ាង​នេះ​ក្ដី ការលើក​ពេល​កិច្ចប្រជុំ​រដ្ឋមន្រ្តី​ការបរទេស​អាស៊ាន​នេះ ​ដែល​កម្ពុជា​ត្រូវ​រៀបចំ​ជា​លើក​ដំបូង​ក្រោយ​គ្រង​តំណែង​ជា​ប្រធាន​ប្តូរវេន​របស់​អាស៊ាន​ជា​លើក​ទី​បី​នេះ ធ្វើឡើង​ស្រប​ពេល​ដែល​លោកនាយក​រដ្ឋមន្រ្តី ហ៊ុន សែន កំពុង​ដើរ​បញ្ច្រាស​ទិស​ពី​សមាជិក​អាស៊ាន​ជាច្រើន​ទៀត ជុំវិញ​ការ​ចាប់​ដៃ​មេរដ្ឋប្រហារ​យោធា​ភូមា​លោក មីន អ៊ុងលាំង (Min Aung Hlaing) និង ចង់​នាំ​មេដឹក​នាំ​រដ្ឋ​ប្រហារ​យោធា​ភូមា​ និង​មន្រ្តី​នៃ​របបសឹក​ ឱ្យអាច​ចូល​រួម​កិច្ច​ប្រជុំ​អាស៊ាន​ឡើង​វិញ​បាន​ ក្រោយ​ប្រទេស​អាស៊ាន​ជាច្រើន​ទៀត មិន​ឲ្យ​ពួកគេ​ចូលរួម។

អ្នកវិភាគ​គោល​នយោបាយ និង​អ្នកឃ្លាំមើល​សង្គម ធ្លាប់ព្រមាន​ថា បំណង​របស់​លោក ហ៊ុន សែន ដែល​ផ្ទុយ​ពី​ស្មារតី​នៃ​ប្រទេស​អាស៊ាន​ជាច្រើន​ទៀត​នោះ នឹង​មិន​បាន​សម្រេច​នោះ​ឡើយ ហើយ​ប្រទេស​អាស៊ាន​ដែលជំទាស់​វត្តមាន​មេដឹកនាំ​រដ្ឋប្រហារ​យោធា អាច​នឹង​ធ្វើពហិការ​មិន​ចូលរួម​កិច្ចប្រជុំ ដែល​ដឹកនាំ​ដោយ​លោក ហ៊ុន សែន ប្រសិន​បើ​លោក ហ៊ុន សែន អញ្ជើញ​តំណាង​របបរដ្ឋប្រហារ​យោធា​ភូមា​ចូល​ប្រជុំ​អាស៊ាន​ណា​មួយ៕

No comments: