ដោយ មួង ណារ៉េត
2022-03-09
RFA
សាច់ញាតិជនរងគ្រោះដែលត្រូវបានក្រុមជនជាតិចិនវាយធ្វើបាបនៅក្រុងប៉ោយប៉ែត រិះគន់អាជ្ញាធរពាក់ព័ន្ធថា យឺតយ៉ាវក្នុងការតាមចាប់ក្រុមជនល្មើសប្រដាប់អាវុធមកផ្ដន្ទាទោសតាមច្បាប់។ សង្គមស៊ីវិលយល់ថា អាជ្ញាធរគួរតែសហការគ្នាជាមួយសមត្ថកិច្ចជំនាញស៊ើបអង្កេតចាប់ក្រុមជនដៃដល់ទាំងនោះឱ្យបានឆាប់ដើម្បីស្វែងយុត្តិធម៌ជូនដល់ជនរងគ្រោះ។
ក្រុមគ្រួសារជនរងគ្រោះដែលត្រូវបានជនជាតិចិនប្រដាប់អារុធមួយក្រុមព្រួតគ្នាវាយធ្វើបាបនៅក្រុងប៉ោយប៉ែតកន្លងទៅថ្មីៗនេះ ជំរុញដល់អាជ្ញាធរពាក់ព័ន្ធពន្លឿនការស៊ើបអង្កេតតាមចាប់ជនដៃដល់មកផ្ដន្ទាទោសឱ្យបានធ្ងន់ធ្ងរតាមច្បាប់។
ម្ដាយរបស់ស្រី្តជនរងគ្រោះ គឺលោកស្រី រ៉ានី ប្រាប់វិទ្យុអាសេរីនៅថ្ងៃទី៨ ខែមីនាថា សមត្ថកិច្ចមិនទាន់ចាប់បានជនល្មើសបានម្នាក់នៅឡើយ បន្ទាប់ពីលោកស្រីបានដាក់ពាក្យប្ដឹងស្ទើរគ្រប់ស្ថាប័នពាក់ព័ន្ធក្នុងក្រុងប៉ោយប៉ែតកាលពីថ្ងៃទី២ ខែមីនា ក្រោយពីជនជាតិចិនមួយក្រុមព្រួតវាយកូនស្រីនិងកូនប្រសារលោកស្រីដែលជាជនជាតិចិនដូចគ្នាកាលពីថ្ងៃទី២ ខែមីនាកន្លងទៅ។
លោកស្រីរៀបរាប់ថា ដើមហេតុកើតរឿងនេះ គឺមានជនជាតិថៃ២នាក់ចូលហាងកាត់សក់កូនលោកស្រីកាលពីថ្ងៃទី២ ខែមីនា បន្ទាប់មកមានជនជាតិចិនមួយក្រុមមានគ្នាជាង១០នាក់ចេញពីរថយន្ត៣គ្រឿង អមដោយស្ត្រីខ្មែរម្នាក់ជាអ្នកបកប្រែ និងក្រុមសន្តិសុខជាង២០នាក់ក្នុងបំណងវាយជនជាតិថៃទាំង២នាក់នោះ។ ពេលនោះកូនស្រីលោកស្រីបានប្រាប់ក្រុមជនល្មើសទាំងនោះថា មិនបានស្គាល់ជនជាតិថៃទាំងនោះទេ ប៉ុន្តែពួកគេមិនស្ដាប់ក៍ព្រួតគ្នាវាយកូនលោកស្រីឱ្យរបួសធ្ងន់និងបំផ្លាញទ្រព្យសម្បត្តិសម្ភារៈក្នុងផ្ទះមួយចំនួនទៀត៖ «ពេលខ្ញុំទៅទាន់ ចិនវាអូសកូនស្រីខ្ញុំញាត់ចូលឡាន មានកាំភ្លើង២ដើម ញញួរ ដែកឆក់ មានស្រីខ្មែរបកប្រែឱ្យចិនបកប្រែមិនដឹងរឿងវាយយកៗ។ ខ្ញុំសួរកូនខ្ញុំថា ស្គាល់គ្នាទេ ថាអត់ដែលស្គាល់សោះ។ កូនស្រីខ្ញុំត្រូវគេវាយគ្រប់កន្លែងទាំងអស់ហ្នឹង»។
លោកស្រី រ៉ានី បន្តថា ក្រុមជនល្មើសទាំងនោះមានកាំភ្លើងខ្លី ដំបងឆក់ ញញួរ និងបំពងដែកបានព្រួតគ្នាវាយធ្វើបាបកូនស្រីរបស់លោកស្រី ឈ្មោះ ធីតា ទាំងកម្រោល និងកូនប្រសារលោកស្រីឈ្មោះ ហ្វាំង ស៊ីន (Fang Zhine) បណ្តាលឱ្យបាក់ថ្គាមរបួសក្បាលធ្ងន់៖ «កូនប្រសារធ្ងន់ជាងគេ វាត្រូវក្បាលចង់ផុសលលាដ៍ហើយព្រោះត្រូវនឹងញញួរ។ ចៅខ្ញុំពេលទៅជួយអោបកូនស្រីខ្ញុំចុងក្រោយហ្នឹង អាចិនក្បាលត្រងោលវាឆក់»។
ទាក់ទងនឹងបញ្ហានេះ ស្នងការរងនគរបាលខេត្តបន្ទាយមានជ័យទទួលបន្ទុកជនអន្តោប្រវេសន្តលោក អេង លីហួ ប្រាប់វិទ្យុអាស៊ីសេរីថា មកដល់ពេលនេះសមត្ថកិច្ចមិនទាន់ចាប់បានជនល្មើសម្នាក់ឡើយ។ លោកអះអាងថា អាជ្ញាធរបានសហការគ្នាជាមួយអាជ្ញាធរជំនាញក្នុងមូលដ្ឋានបន្តការស្រាវជ្រាវជនល្មើសទាំងនោះជាបន្តបន្ទាប់ និងមានការស្នើឱ្យមានការជួយអន្តរាគមន៍ពីអាជ្ញាធរថ្នាក់ជាតិបន្ថែមទៀត៖ «សមត្ថកិច្ចកំពុងស៊ើបអង្កេតមានតម្រុយមួយចំនួនហើយ។ ការកាន់អាវុធទៅរំខានការធ្វើអាជីវកម្មអ្នកដដៃយើងត្រូវតែបង្ក្រាប មិនថាតែចិន ឬខ្មែរទេឱ្យតែមានអំពើខុសច្បាប់យើងត្រូវតែបង្រ្កាប»។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា ជំរុញឱ្យអាជ្ញាធរនិងក្រសួងជំនាញស៊ើបអង្កេតស្វែងរកក្រុមឧក្រិដ្ឋជនទាំងអស់ឱ្យខានតែបាននិងដាក់ទោសឱ្យបានធ្ងន់ធ្ងរទៅតាមច្បាប់។ លោកមើលឃើញថា ករណីប្រើអំពើហិង្សាឃោរឃៅបែបនេះបានកើតមានឡើងជាបន្តបន្ទាប់ ដោយសារតែការអនុវត្តច្បាប់ធូររលុង ទើបធ្វើឱ្យក្រុមឧក្រិដ្ឋមិនខ្លាចសំណាញ់ច្បាប់ ហើយបន្តប្រព្រឹត្តបទល្មើសបង្កអសន្តិសុខធ្វើឱ្យប្រជាពលរដ្ឋទូទៅរស់នៅទាំងភាពភ័យខ្លាច៖ «ជនជាតិចិនកន្លងមកមានកាប់គ្នា បាញ់គ្នា វាយគ្នា វាអត់ថ្មីសោះសម្រាប់ក្រុងប៉ោយប៉ែត។ ប៉ុន្តែអ្វីដែលថ្មីទាក់ទងការរឹតបន្តឹងការការពារដល់ប្រជាពលរដ្ឋហាក់ដូចជាតួនាទីរបស់អាជ្ញាធរធូរលុងនៅឡើយ។ ត្រូវពិនិត្យថាជនជាតិចិនទាំងអស់ហ្នឹងមានកាំភ្លើងកាំបិតការប្រព្រឹត្តរបស់វាយ៉ាងម៉េច?»។
មន្ត្រីសង្គមស៊ីវិលរូបនេះ ស្នើដល់អាជ្ញាធរបើកការស៊ើបអង្កេតឱ្យមានប្រសិទ្ធភាពអ្នកដែលបានលក់អាវុធឱ្យជនជាតិចិនកន្លងមក និងជំរុញឱ្យអាជ្ញាធររឹតបន្តឹងច្បាប់លើជនជាតិចិនណាដែលមានចរិតកោងកាចបង្កហានិភ័យដល់ប្រទេសកម្ពុជា។
បច្ចុប្បន្នជនរងគ្រោះមិនទាន់ធូរស្រាលនៅឡើយទេដោយសារតែមានដុំឈាមកកក្នុងខួរក្បាល។ លោកស្រី ស្រី រ៉ានី សង្ឃឹមថាអាជ្ញាធរនឹងអនុវត្តច្បាប់ប្រកបដោយតម្លាភាព ស្មោះត្រង់ យុត្តិធម៌ នឹងតាមចាប់ក្រុមឧក្រិដ្ឋជនទាំងអស់នោះដែលធ្វើសកម្មភាពព្រៃផ្សៃលើគ្រួសារលោកស្រី៕
No comments:
Post a Comment