ដោយ មាន ឫទ្ធិ
2022-03-17
កូដករណាហ្គាវើលដ៍ (Naga World) ៣នាក់ចុងក្រោយ (បុរសពីរនាក់នៅខាងក្រោយ និងស្ត្រីអាវសឈរខាងមុខ) ត្រូវបានអាជ្ញាធរដោះលែង នៅល្ងាចថ្ងៃទី១៧ ខែមីនា ឆ្នាំ២០២២។
រូប៖ ពលរដ្ឋផ្ដល់ឲ្យ
អាជ្ញាធរពន្ធនាគាររាជធានីភ្នំពេញបានសម្រេចដោះលែងកូដករណាហ្គាវើលដ៍ ៣នាក់ឱ្យនៅក្រៅឃុំបណ្ដោះអាសន្ននៅល្ងាចថ្ងៃទី១៧ ខែមីនា បន្ទាប់ពីពួកគាត់បានដាក់លិខិតស្នើសុំអន្តរាគមន៍ទៅកាន់ក្រសួងពាក់ព័ន្ធ។ ក្រុមកូដករ និងប្រធានសហជីពក្រុមហ៊ុនណាហ្គាវើលដ៍ បញ្ជាក់ជំហរថា នឹងនៅតែបន្តទាមទាររកដំណោះស្រាយ និងគ្មានការចូលរួមចរចាដរាបណាមិនមានការទម្លាក់ចោលបទចោទពីតុលាការ។
កូដករទាំង៣នាក់ ដែលត្រូវបានដោះលែងឱ្យក្រៅឃុំបណ្ដោះអាសន្ននៅល្ងាចថ្ងៃទី១៧ ខែមីនា ឱ្យវិទ្យុអាស៊ីសេរីដឹងថា ពួកគាត់រំភើបចិត្តដែលបានជួបជុំប្រពន្ធកូនរបស់ពួកគេវិញ។
កូដករម្នាក់លោក សេង សុវណ្ណារឹទ្ធ ប្រាប់វិទ្យុអាស៊ីសេរីភ្លាមៗក្រោយពីមានការដោះលែងថា លោកមានសេចក្ដីឈឺចាប់នៅពេលអាជ្ញាធរចាប់ឃុំលោកទាំងអយុត្តិធម៌កន្លងមកនេះ។ លោកបន្តថា ក្រោយដោះលែង អាជ្ញាធរបានឱ្យពួកលោកបំពេញលិខិតកិច្ចសន្យាបញ្ឃប់ការជួបជុំប្រមូលផ្តុំតទៅទៀត។ លោកបន្តថា ក្នុងលិខិតនោះក៍បានបញ្ជាក់ឱ្យកូដករយល់ព្រមទទួលយកប្រាក់បំណាច់ឆ្នាំរបស់ក្រុមហ៊ុនប៉ុន្តែលោកថា ទុកឱ្យតំណាងចរចាជាអ្នកសម្រេចត្រង់ចំណុចនេះ៖ «ចំពោះកូនប្រពន្ធខ្ញុំលាក់ប្រាប់ថា ខ្ញុំទៅធ្វើការនៅខេត្តមិនអាចទាក់ទងបាន។ កូនគាត់មានការឆ្ងល់នៅពេលកូនយំប្រពន្ធព្យាយាមថា នៅខេត្ត។ ពេលគេដោះលែងឱ្យនៅក្រៅឃុំ គេឱ្យធ្វើកិច្ចសន្យាឈប់ប្រមូលផ្ដុំធ្វើកូដកម្ម»។
ទោះបីជាមានការដោះលែងក្រុមកូដករទាំង៣នាក់ក្ដី កម្លាំងអាជ្ញាធររាប់រយនាក់ និងក្រុមស្លៀកពាក់ស៊ីវិលនៅតែបន្តប្រើអំពើហិង្សារុញច្រានក្រុមកូដករជិត២០នាក់ដឹកទម្លាក់ក្នុងមណ្ឌលចត្តាឡីស័កក្នុងខណ្ឌព្រែកព្នៅ ដើម្បីបង្ខាំងក្រុមកូដករកុំឱ្យចេញទាមទារស្រែកតវ៉ានៅក្បែរអគារក្រុមហ៊ុននៅថ្ងៃទី១៧ ខែមីនា។
កូដករ និងជាបុគ្គលិកក្រុមហ៊ុនណាហ្គាវើលដ៍លោកស្រី សុខា ឱ្យវិទ្យុអាស៊ីសេរីដឹងថា កម្លាំងអាជ្ញាធរដែលបានព្យាយាមមកបង្រ្កាបកូដករដែលគ្រាន់តែទាមទារឆ្នាំងបាយកន្លងមកនេះហាក់អនុវត្តតួនាទីផ្ទុយពីច្បាប់និងគ្មានវិជ្ជាជីវៈជាមន្ត្រីក្នុងក្របខណ្ឌរដ្ឋឡើយ។ លោកស្រី រិះគន់និងចាត់ទុកការង្ក្រាបទាំងប្រើហិង្សារបស់អាជ្ញាធរមកលើកូដករដែលភាគជាស្រី្តនោះថា ជាទង្វើអមនុស្សធម៌ និងជាអ្នកដើរតួនាទីកាងអំណាចឱ្យក្រុមហ៊ុនធ្វើបាបពលរដ្ឋស្លូតត្រង់៖ «ខ្មាសគេណាស់សូម្បីតែសំលៀកបំពាក់ក៍ប្រជាជនកាត់ពន្ធឱ្យដែរ។ ស៊ីប្រាក់ខែរាស្ដ្របម្រើបរទេស។ ស្អែកស្លៀកសារ៉ុងទៅមិនបាច់ស្លៀកខោទេ។ ខ្មាសប្រជាជនអ៊ុយក្រែនផងគេជួយប្រជាជន មិនមែនដូចពួកលោកឯងស៊ីប្រាក់ខែរាស្ត្របម្រើបរទេសទេ»។
វិទ្យុអាស៊ីសេរីមិនអាចទាក់ទង អ្នកនាំពាក្យក្រសួងការងារលោក ហេង សួរ អភិបាលក្រុងភ្នំពេញលោក ឃួង ស្រេង និងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ដើម្បីបំភ្លឺបញ្ហានេះបានទេនៅថ្ងៃទី១៧ ខែមីនា។
កាលពីថ្ងៃទី១៦ ខែមីនា កម្លាំងអាជ្ញាធរ និងក្រុមជនស្លៀកពាក់ស៊ីវិលគ្មានអត្តសញ្ញាណច្បាស់លាស់បានស្រែកសម្លុតឆក់ទូរស័ព្ទ និងប្រើអំពើហិង្សារុញច្រានកូដករ ២រយនាក់ (២០០) ដែលភាគជាស្រី្តបោកខ្ទប់នឹងរថយន្តនិងដឹកទម្លាក់នៅមណ្ឌលចត្តាឡីស័កក្នុងខណ្ឌព្រែកព្នៅនិងបង្ខាំងខ្លួនពួកគាត់ឱ្យសម្រាកទីនោះពេញមួយយប់។
ទាក់ទងនឹងវិវាទការងារនេះ ប្រធាន និងសមាជិកសហជីពណាហ្គាវើលដ៍ បានធ្វើសន្និសីទសារព័ត៌មាននៅថ្ងៃទី១៧ ខែមីនា ដើម្បីបញ្ជាក់ពីគោលជំហរ និងឆន្ទៈរបស់សហជីពក្នុងការស្វែងរកដំណោះស្រាយ។
ប្រធានសហជីពកាស៊ីណូណាហ្គាវើលដ៍ដែលទើបចេញពីពន្ធនាគារកញ្ញា ឈឹម ស៊ីថរ ប្រកាសជំហរជាថ្មីទៀតថា នឹងគ្មានការចូលតុចរចាឡើយ ប្រសិនបើគ្មានការទម្លាក់ចោលនូវបទចោទប្រកាន់ទាំងស្រុងពីស្ថាប័នតុលាការ។
ជុំវិញនឹងបញ្ហានេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ(LICADO) លោក អំ សំអាត មានប្រសាសន៍ថា ប្រសិនបើគ្មានការទម្លាក់បទចោទលើតំណាងសហជីពពីស្ថាប័នតុលាការទេ វិវាទការងារនេះអាចនៅបន្តភាពតានតឹងបន្ថែមទៀត។ លោកបន្តថា បើតំណាងសហជីពវិលចូលតុចរចាជាមួយភាគីក្រុមហ៊ុនទាំងស្ថិតនៅក្រោមការចោទប្រកាន់បែបនេះ ពួកគេនឹងទទួលរងសម្ពាធហើយការចរចានោះមិនមានតម្លាភាពនិងយុត្តិធម៌ឡើយ៖ «តំណាងសហជីពដែលត្រូវចរចាហ្នឹង ទើបតែដោះលែងឱ្យនៅក្រៅឃុំបណ្ដោះអាសន្នទេ។ អញ្ចឹងពួកគាត់ស្ថិតក្រោមនីតិវិធីរបស់តុលាការ ពួកគាត់នឹងអាចរងសម្ពាធតាមផ្លូវច្បាប់។ យើងមើលឃើញថា ពួកគាត់មិនទាន់មានសេរីភាពពេញលេញ ប្រសិនបើទម្លាក់បទចោទមានការចរចាដោយមានសេរីភាពពេញលេញ»។
កូដករជាង២រយនាក់ (២១៩) ដែលអាជ្ញាធរដឹកយកទៅមណ្ឌលចត្តាឡីស័កក្នុងខណ្ឌព្រែកព្នៅនោះ មកដល់ល្ងាចថ្ងៃទី១៧ ខែមីនានេះ អាជ្ញាធរដោះលែងពួកគាត់ឱ្យត្រឡប់ទៅផ្ទះវិញអស់ហើយ៕
No comments:
Post a Comment