ដោយ សេក បណ្ឌិត
2023.05.19
កម្មកររោងចក្រមួយកន្លែងនៅរាជធានីភ្នំពេញ ចេញពីធ្វើការ កាលពីដើមឆ្នាំ២០២០។
AP
កម្មកររោងចក្រ និងសហជីពព្រួយបារម្ភពីការបាត់បង់ការងារធ្វើ និងមិនមានលទ្ធភាពរកចំណូលក្នុងគ្រួសារ ប្រសិនបើសហភាពអឺរ៉ុបនឹងដកប្រព័ន្ធអនុគ្រោះពន្ធ EBAទាំងស្រុងពីកម្ពុជា ដោយសារតែរដ្ឋាភិបាលលោក ហ៊ុន សែន មិនបើកលំហសេរីភាពនយោបាយ ជាពិសេសការមិនឱ្យគណបក្សភ្លើងទៀតចូលរួមការបោះឆ្នោតនាពេលថ្មីៗនេះ។
ស្របពេលដែលវិស័យកាត់ដេរនៅកម្ពុជា កំពុងរងផលប៉ះពាល់ពីវិបត្តិសកល និងការដកហូតប្រព័ន្ធអនុគ្រោះពន្ធEBA របស់សហភាពអឺរ៉ុប ២០ភាគរយកន្លងមកនោះ ពេលនេះ កម្មកររោងចក្រ កាន់តែព្រួយបារម្ភបន្ថែមទៀតពីការបាត់បង់ការងារ និងមិនមានលទ្ធភាពរកប្រាក់ចំណូលសម្រាប់គ្រួសារ ប្រសិនបើសហភាពអឺរ៉ុបដកហូតប្រព័ន្ធអនុគ្រោះពន្ធ EBAទាំងស្រុង ដោយសារតែរដ្ឋាភិបាល មិនព្រមស្តារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញ ជាពិសេសការបិទផ្លូវមិនឲ្យគណបក្សភ្លើងទៀនចូលរួមការបោះឆ្នោត ចំណែកសហជីពលើកឡើងដែរថាការបាត់បង់ ប្រព័ន្ធអនុគ្រោះពន្ធ EBAនេះនឹងធ្វើឱ្យរោងចក្រមួយចំនួនបិទទ្វារបន្ថែមទៀត ហើយកម្មករត្រូវបានគេរំលោភសិទ្ធិការងារ។
ប្រធានសហជីពស្មារតីកម្មករ លោក គឹម សុភេន បានលើកឡើងថា បន្ទាប់ពីសហភាពអឺរ៉ុបដកនូវប្រព័ន្ធអនុគ្រោះពន្ធត្រឹមតែ ២០ភាគរយប៉ុណ្ណោះក្នុងរយៈពេលប៉ុន្មានឆ្នាំមកនេះ ជីវភាពរបស់កម្មករបានជួបការលំបាកពុំមានការងារធ្វើទៀងទាត់ រោងចក្រដោយសារបិទទ្វារ និងព្យួរការងារកម្មករ ហើយមានកម្មករជាច្រើនបានសម្រេចលក់ដីរបស់ពួកគេក្នុងស្ថានភាពលំបាកនេះ។
លោក គឹម សុភេន៖ «ខ្ញុំជឿជាក់ថា ច្បាស់ណាស់ វាពិតជាប៉ះពាល់ហើយក្នុងវិស័យកាត់ដេរគឺស្ទើរតែទាំងអស់ គឺត្រូវការការអនុគ្រោះពន្ធ ហើយយើងឃើញថា កន្លងមកមានការកាត់តែ២០ភាគរយពិបាក ហើយរោងចក្រមួយចំនួនប៉ះពាល់ហើយ ចុះប្រសិនបើបន្តបន្ទាប់ទៀតរយៈពេលទៅមុខនេះ ប្រសិនបើសហគមន៍អឺរ៉ុបអាចនឹងផ្ដាច់បន្ថែមទៀត ជឿជាក់ហើយថា វាប៉ះពាល់»។
លោក គឹម សុភេន បន្តថា ចាប់តាំងពីគណបក្សសង្គ្រោះជាតិត្រូវបានរំលាយមក កម្មករមិនទទួលបានការតម្កើងប្រាក់ខែសមរម្យតាមតម្លៃនៅទីផ្សារនោះទេ។ លោកបញ្ជាក់ថា នៅពេលប្រជុំសម្រេចតម្កើងប្រាក់ខែម្ដងៗថៅកែរោងចក្រព្យាយាមរកហេតុផលផ្សេងៗ ជាពិសេសការដកប្រព័ន្ធអនុគ្រោះពន្ធ EBA ឬមិនមានអ្នកបញ្ជាទិញជាដើម។
កម្មការិនីរោងចក្រមួយកន្លែងក្នុងរាជធានីភ្នំពេញ អ្នកស្រី អ៊ុក សារ៉េត បានឱ្យដឹងថា នៅពេលស្ថានភាពនយោបាយមិនល្អ អ្នកស្រីមានការបារម្ភយ៉ាងខ្លាំងថា ប្រសិនបើមានការដកប្រព័ន្ធអនុគ្រោះពន្ធ EBA បន្ថែមទៀត គ្រួសារអ្នកស្រី និងកម្មករផ្សេងទៀត នឹងកាន់តែលំបាកគ្មានលទ្ធភាពចំណូលចិញ្ចឹមគ្រួសារ និងមិនដឹងកន្លែងណាអាចស្វែងរកការងារក្រៅពីរោងចក្រនោះទេ។
អ្នកស្រី អ៊ុក សារ៉េត៖ «មានគិតម៉េច ពិបាករកការងារថ្មីធ្វើ បើរោងចក្រគាត់ទៅ យើងទៅរកកន្លែងផ្សេងក៏អត់ទៀតដែរ ព្រោះរោងចក្របិទហើយហ្នឹង តែបិទកន្លែងមួយ កន្លែងផ្សេងក៏បិទដែរ អ៊ីចឹងធ្វើឱ្យពួកខ្ញុំពិបាករកការងារថ្មីធ្វើ បើគេនៅបន្តអនុគ្រោះពន្ធកម្មករក៏ស្រួលតាមហ្នឹងអ៊ីចឹងទៅ និយាយទៅបារម្ភខ្លាំងចំពោះការដកប្រព័ន្ធអនុគ្រោះពន្ធ»។
ក្ដីព្រួយបារម្ភរបស់សហជីព និងកម្មករបែបនេះ គឺបន្ទាប់ពីរដ្ឋាភិបាលលោក ហ៊ុន សែន ត្រូវបានគេមើលឃើញថា កំពុងប្រើគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ជាឧបករណ៍ រារាំងមិនឲ្យគណបក្សភ្លើងទៀនដែលមានឥទ្ធិពលប្រកួតប្រជែងជាមួយបក្សកាន់អំណាចនោះ ចូលរួមការបោះឆ្នោតជាតិនៅខែកក្កដាខាងមុខនេះឡើយ ។ ទង្វើរបស់រដ្ឋាភិបាលនេះ គឺផ្គើនទៅនឹងការសម្រេចរបស់សភាសហភាពអឺរ៉ុប ដែលទាមទារឱ្យរដ្ឋាភិបាលក្រុងភ្នំពេញ ដោះលែង លោក កឹម សុខា និង អ្នកទោសនយោបាយផ្សេងទៀត ហើយរៀបចំការបោះឆ្នោតដោយសេរី ត្រឹមត្រូវ និងមានយុត្តិធម៌ដោយមានគណបក្សសង្គ្រោះជាតិ រួមទាំងគណបក្សភ្លើងទៀន ចូលរួមផង និងបើកលំហសេរីភាពដល់ប្រព័ន្ធផ្សព្វផ្សាយឯករាជ្យ មានវីអូឌី (VOD)។ សភាសហភាពអឺរ៉ុបបានព្រមានរួចហើយថា ប្រសិនបើការបោះឆ្នោតលើកនេះមានការរំខានយាយីដល់គណបក្សភ្លើងទៀននោះ នឹងពិនិត្យលទ្ធភាពដកហូតEBA ១០០ភាគរយពីកម្ពុជាតែម្តង។
វិទ្យុអាស៊ីសេរីមិនអាចសុំការឆ្លើយតបពីអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី១៨ ឧសភា។
ទោះជាយ៉ាងណា កន្លងទៅ លោក ហ៊ុន សែន នៅតែលើកឡើងថា លោកមិនឱនលំទោន ដើម្បីបានជំនួយ ឬការអនុគ្រោះណាមួយនោះឡើយ។
លោក ហ៊ុន សែន៖ «ផលប៉ះពាល់ វាមិនមែនគ្រាន់តែកម្ពុជាទេ អ្នកឯងក៏មានផលប៉ះពាល់ដែរ ប្រជាជននៅអឺរ៉ុប ត្រូវបងថ្លៃច្រើនជាងនៅពេលដែលមានការបង់ពន្ធដូចជាអង្ករអ៊ីចឹង គឺប្រជាជនអឺរ៉ុបដែលស៊ីអង្ករ ក៏ត្រូវស៊ីអង្ករថ្លៃជាងដែរ។ សមិទ្ធផលដែលអ្នកតែងជួយខ្ញុំ ក៏ត្រូវនិរាករណ៍ចោលដែរ ទឹកមាត់អ្នកឯងជាមួយខ្ញុំ ក៏នឹងកាត់បន្ថយដែរ មានន័យថា បានរួមចំណែកសម្លាប់អាពួកប្រឆាំងផ្កាប់មុខហ្មង»។
ទាក់ទងនឹងបញ្ហានេះ ប្រធានសហភាពការងារកម្ពុជាលោក អាត់ ធន់ លើកឡើងថា លោកមិនទាន់អាចប្រាប់ដឹងពីទំហំនៃផលប៉ះពាល់នៅពេលបាត់បង់ប្រព័ន្ធអនុគ្រោះពន្ធ EBA ទាំងស្រុងនៅឡើយទេ ប៉ុន្តែលោកយល់ថា រោងចក្រមួយចំនួននឹងបិទទ្វារបន្ថែមទៀត ហើយការគោរពសិទ្ធិការងារនឹងកាន់តែធ្លាក់ចុះ។
លោក អាត់ ធន់៖ «ពេលបច្ចុប្បន្ននឹងមិនដឹងថា កម្ពុជាបានត្រៀមខ្លួន ក្រុមហ៊ុនដែលនាំចេញបានត្រៀមខ្លួនសម្រាប់បង់ពន្ធ ឬក៏ប្រកួតប្រជែងនៅប្រទេសផ្សេងទៀតប្រហាក់ប្រហែលយើងនៅក្នុងការនាំចេញអីវ៉ាន់ពីកម្ពុជាបានប៉ុណ្ណានោះទេ យើងអត់ទាន់ដឹង ព្រោះរឿងហ្នឹងយើងអត់ទាន់កើត។ ជារួមយើងគិតថា ប៉ះពាល់ហើយ ដូចជាមានការធ្លាក់ចុះនៃការនាំចេញ អាចថាថៅកែមួយចំនួនមិននៅបន្ត ឬថៅកែមួយចំនួនទៀតនៅបន្តតែមិនដឹងនៅកម្រិតណា ហើយស្ថានភាពការងារ ឬលក្ខខណ្ឌការងារអាចនឹងប្រឈម»។
នៅដើមឆ្នាំ២០២៣នេះ មានរោងចក្រចំនួន១០ បានបិទទ្វារ ខណៈរោងចក្រចំនួន៧១ ព្យួរកិច្ចសន្យាការងារ និងរោងចក្រ៦០ផ្សេងទៀតបានកាត់បន្ថយបុគ្គលិក ដែលនាំឱ្យប៉ះពាល់ដល់កម្មករជាង ៣ម៉ឺន ២ពាន់នាក់(៣២.០០០) និងច្រើននាក់ទៀតបានបាត់បង់ការងារធ្វើទាំងស្រុងតែម្ដង៕
No comments:
Post a Comment