ដោយ យន់ សាមៀន
2023.07.07
អ្នកតាមដានស្ថានការណ៍នយោបាយកម្ពុជាលើកឡើងថា ជនជាតិចិនដែលមានកាំភ្លើងប្រើប្រាស់នៅកម្ពុជាអាចនឹងជាប់ពាក់ព័ន្ធជាមួយមន្ត្រីរដ្ឋាភិបាល និងអ្នកមានអំណាចមួយចំនួនជួយសម្រួលពួកគេក្នុងការចរាចរអាវុធខុសច្បាប់សម្រាប់ប្រើប្រាស់នៅកម្ពុជា។ ការលើកឡើងនេះ ធ្វើឡើងបន្ទាប់ពីជនជាតិចិនម្នាក់នៅរាជធានីភ្នំពេញ ផឹកស៊ីស្រវឹងដកកាំភ្លើងបាញ់ជាច្រើនគ្រាប់នៅតាមទីសាធារណៈកាលពីពេលថ្មីៗនេះ។
អ្នកវិភាគនយោបាយ លោក គឹម សុខ ប្រាប់វិទ្យុអាស៊ីសេរីនៅថ្ងៃទី០៦ ខែកក្កដាថា អ្នកជំនួញចិនមួយចំនួនដែលមានឈ្មោះជាឧក្រិដ្ឋជនចូលមករកស៊ីនៅកម្ពុជា ត្រូវបានរដ្ឋាភិបាលលោក ហ៊ុន សែន ទទួលស្វាគមន៍រហូតអ្នកខ្លះត្រូវបានតែងតាំងជាជំនួយការផ្ទាល់របស់លោក ហ៊ុន សែន ថែមទៀតផង។ លោកថា ចំណុចនេះអាចជា ភស្តុតាងមួយដែលឆ្លុះបញ្ចាំងថា ជនជាតិចិនដែលមានកាំភ្លើងប្រើប្រាស់កាន់កាប់ក្នុងដៃមិនត្រឹមតែទទួលបានកិច្ចគាំពារពីរដ្ឋាភិបាលនោះទេ ប៉ុន្តែក្រុមជនជាតិចិនមួយចំនួនដែលមករកស៊ីបែបលាងលុយកខ្វក់នៅកម្ពុជាក៏នឹងទទួលបានកិច្ចគាំពារពិសេសពីក្រុមមនុស្សជិតស្និទ្ធនឹងលោក ហ៊ុន សែន និងពីរដ្ឋាភិបាលរបស់លោកផ្ទាល់ផងដែរ។
លោក គឹម សុខ៖ «ហើយអ្នកមានអំណាចនៅភ្នំពេញហ្នឹងសម្រួលឱ្យជនជាតិចិនទាំងនោះមានសញ្ជាតិជាខ្មែរ ហើយថែមទាំងផ្ដល់ឱ្យជនជាតិចិនទាំងឡាយណាមានសក្ដានុពលលុយងងឹតវាល់លានដុល្លារក្លាយទៅជាមន្ត្រីយោធាមានសិទ្ធិកាន់អាវុធបាញ់បោះអនាធិបតេយ្យតាមអំពើចិត្ត។ គេមិនខ្លាចទេ ហើយអ្នកកាន់អំណាចជាខ្នងបង្អែកដ៏រឹងមាំរបស់ពួកគេហ្នឹង ពួកអ្នកជិតស្និទ្ធជាមួយក្រុមគ្រួសារ ហ៊ុន និងសមាជិកក្រុមគ្រួសារ ហ៊ុន តែម្ដង»។
ប្រតិកម្មរបស់អ្នកឃ្លាំមើលបែបនេះ ធ្វើឡើងបន្ទាប់ពីជនជាតិចិនមួយចំនួននៅកម្ពុជានៅតែមានកាំភ្លើងប្រើប្រាស់បាញ់បោះដោយសេរី។ ជាក់ស្តែងកាលពីយប់រំលងអធ្រាត្រចូលថ្ងៃទី៥ ខែកក្កដា ជនជាតិចិនម្នាក់ស្ថិតក្នុងស្ថានភាពស្រវឹងស្រាបានដកកាំភ្លើងបាញ់រះទៅលើមេឃជាច្រើនគ្រាប់ ស្ថិតនៅតាមបណ្ដោយផ្លូវសហព័ន្ធរុស្ស៊ី សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ។ ប៉ុន្តែក្នុងហេតុការណ៍នេះមិនបណ្ដាលឱ្យមានអ្នកណារងគ្រោះឡើយ។
វិទ្យុអាស៊ីសេរីមិនអាចទាក់ទងអធិការនគរបាលខណ្ឌពោធិ៍សែនជ័យ លោក ម៉ន វុធី អ្នកនាំពាក្យនៃអគ្គនាយកដ្ឋានអន្តោប្រវេសន៍ លោក កែវ វណ្ណថន និងអ្នកនាំពាក្យក្រសួងមហាផ្ទៃលោក ខៀវ សុភ័គ ដើម្បីសាកសួរអំពីរឿងនេះបានទេនៅថ្ងៃទី០៦ ខែកក្កដា។
កាលពីខែមិថុនា ឆ្នាំ២០២២ កន្លងទៅសមត្ថកិច្ចខេត្តព្រះសីហនុ បានឃាត់ខ្លួនមេខ្លោងដែលនាំចូលអាវុធមកកម្ពុជាចំនួន ៦នាក់ និងរឹបអូសបានកាំភ្លើងវែងខ្លីសរុបចំនួន ៤២ដើម អាវុធកែច្នៃ ព្រមទាំងគ្រាប់កាំភ្លើងជាច្រើនគ្រាប់ និងឧបករណ៍ជួសជុលកាំភ្លើងមួយចំនួនធំ។ ស្នងការនគរបាលខេត្តព្រះសីហនុ លោក ជួន ណារិន្ទ ធ្លាប់ប្រាប់វិទ្យុអាស៊ីសេរីថា អាវុធមួយចំនួនមានឈ្មួញទុច្ចរិតក្នុងស្រុក កុម្ម៉ង់ទិញពីជនខិលខូចដឹកជញ្ជូនឆ្លងដែនតាមប្រទេសជិតខាងចូលកម្ពុជា ខណៈឈ្មួញខ្លះទៀតកុម្ម៉ង់ទិញពីជនខិលខូចនៅក្នុងស្រុក៕
No comments:
Post a Comment