Khmer Circle; Would a devil appoint a saint as his deputy? In fact, the devil in charge of the country was himself appointed by a bigger devil...
^^^
ដោយ យ៉ង ចាន់តារា
2023.08.16
លោក កើត រិទ្ធ រដ្ឋមន្ត្រីក្រសួងយុត្តិធម៌
រូប៖ ហ្វេសប៊ុកក្រសួងយុត្តិធម៌
រយៈពេលប៉ុន្មានឆ្នាំចុងក្រោយនេះ រដ្ឋាភិបាលលោក ហ៊ុន សែន បានប្រើប្រាស់ប្រព័ន្ធតុលាការដោយឥតលាក់លៀម ដើម្បីបង្ក្រាបសំឡេងឯករាជ្យ និងសំឡេងប្រឆាំង។ ជាមួយគ្នានេះ ច្បាប់មួយចំនួនត្រូវបានបង្កើតឡើង ឬក៏កែប្រែទៅតាមអំពើចិត្តរបស់មេដឹកនាំបក្សកាន់អំណាច ដើម្បីជាប្រយោជន៍ផ្ទាល់ខ្លួន ជាជាងប្រយោជន៍ជាតិ។ មនុស្សគន្លឹះដែលនៅពីក្រោយរឿងទាំងនេះ គឺរដ្ឋមន្ត្រីក្រសួងយុត្តិធម៌ លោក កើត រិទ្ធ។ តើលោក កើត រិទ្ធ មានប្រវត្តិយ៉ាងណា ហើយលោកបានធ្វើអ្វីខ្លះចំពោះប្រព័ន្ធច្បាប់ និងលទ្ធិប្រជាធិបតេយ្យកម្ពុជា?
លោក កើត រិទ្ធ បានឡើងរាសីយ៉ាងខ្ពស់ត្រដែតនៅក្នុងរដ្ឋាភិបាលអាណត្តិទី៧ នេះ។ លោកបានក្លាយជាឧបនាយករដ្ឋមន្ត្រីមួយរូបក្នុងចំណោម ១០រូប នៃរដ្ឋាភិបាលបន្តត្រកូល ដឹកនាំដោយលោក ហ៊ុន ម៉ាណែត។ ជាមួយគ្នានេះ លោកបន្តកាន់កាប់មុខតំណែងជារដ្ឋមន្ត្រីក្រសួងយុត្តិធម៌ដដែល ខណៈរដ្ឋមន្ត្រីក្នុងក្រសួងភាគច្រើនត្រូវបានផ្លាស់ប្ដូរ។
ប្រវត្តិសង្ខេប
លោក កើត រិទ្ធ មានអាយុ ៤៤ឆ្នាំ។ លោកកើតនៅឆ្នាំ១៩៧៩ នៅស្រុកព្រៃឈរ ខេត្តកំពង់ចាម។ ភរិយារបស់លោក គឺអ្នកស្រី យ៉េត ម៉ូលីន អតីតចៅក្រមសាលាឧទ្ធរណ៍ដែលកាន់សំណុំរឿងជាច្រើនរបស់មន្ត្រីគណបក្សប្រឆាំង និងអ្នកទោសមនសិការ។ លោកជាកូនប្រសារបស់លោក យ៉េត ចរិយា អតីតព្រះរាជអាជ្ញាអមតុលាការក្រុងភ្នំពេញ និងបច្ចុប្បន្នជាអគ្គព្រះរាជអាជ្ញារងអមតុលាការកំពូល។ លោក កើត រិទ្ធ និងអ្នកស្រី យ៉េត ម៉ូលីន មានកូនចំនួន ៣នាក់ ប្រុស ២នាក់ ស្រីម្នាក់។
ការសិក្សា និងការងារ
លោក កើត រិទ្ធ បានបញ្ចប់ការសិក្សាថ្នាក់បរិញ្ញាបត្រផ្នែកច្បាប់ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដែលគេនិយមហៅថា សាលារូល (RULE) ក្នុងឆ្នាំ១៩៩៩។ លោកទទួលបានអាហារូបករណ៍ទៅសិក្សាបន្តនៅសាកលវិទ្យាល័យលីយ៉ុង (Lyon) ប្រទេសបារាំង។ ទោះជាយ៉ាងណា ការបានទៅបន្តការសិក្សានៅប្រទេសបារាំងរបស់លោក កើត រិទ្ធ នេះ មិនបានឆ្លងកាត់ការប្រឡងប្រកួតប្រជែងតាមស្តង់ដារពិតប្រាកដរបស់សាលាទេ ប៉ុន្តែជាប្រភេទអាហារូបករណ៍បែបកិច្ចសហប្រតិបត្តិការរវាងសាលា និងសាលា ដើម្បីជាការផ្ដល់លទ្ធភាពឱ្យនិស្សិតពីប្រទេសកំពុងអភិវឌ្ឍដូចកម្ពុជា ជាដើម អាចទៅសិក្សាដកស្រង់បទពិសោធន៍ពីប្រទេសជឿនលឿនបាន។ នៅទីនោះ លោកទទួលបានសញ្ញាប័ត្រថ្នាក់បរិញ្ញាបត្រនីតិឯកជន ព្រមទាំងបរិញ្ញាបត្រជាន់ខ្ពស់ផ្នែកច្បាប់ព្រហ្មទណ្ឌ និងវិទ្យាសាស្ត្រនៃបទឧក្រិដ្ឋ។
លោក កើត រិទ្ធ បានវិលត្រឡប់មកប្រទេសកម្ពុជាវិញនៅអំឡុងឆ្នាំ២០០២ និងបានចាប់ផ្ដើមអាជីពជាសាស្ត្រាចារ្យនៅសាលារូល (RULE) រហូតដល់ឆ្នាំ២០១៦។ លោកធ្លាប់បានបម្រើការនៅក្រសួងចំនួន៣ រួមមាន ក្រសួងអប់រំ នៅចន្លោះពីឆ្នាំ២០០៣ ដល់ឆ្នាំ២០០៥ មន្ត្រីក្រសួងសេដ្ឋកិច្ចពីឆ្នាំ២០០៥ ដល់ឆ្នាំ២០១២ និងលេចមុខជាមន្ត្រីជាន់ខ្ពស់ក្រសួងយុត្តិធម៌ចាប់ពីឆ្នាំ២០០៧ រហូតក្លាយជារដ្ឋមន្ត្រីក្រសួងយុត្តិធម៌នៅចុងខែមីនា ឆ្នាំ២០២០។
ក្បត់សន្យា និងការបង្ក្រាបទ្រង់ទ្រាយធំ
នៅពេលចូលកាន់តំណែង លោក កើត រិទ្ធ បានសន្យាជាឱឡារិកថា លោកនឹងប្រឹងប្រែងលើកកម្ពស់គុណភាពយុត្តិធម៌នៅកម្ពុជា និងស្មោះត្រង់ចំពោះជាតិ៖ «ខ្ញុំសូមធ្វើការប្ដេជ្ញាចិត្តដូចតទៅ ស្មោះត្រង់ជានិច្ចចំពោះជាតិ សាសនា ព្រះមហាក្សត្រ លើកកម្ពស់គុណភាពការផ្តល់សេវាយុត្តិធម៌ឱ្យបានត្រឹមត្រូវ ពង្រឹងប្រព័ន្ធអភិបាលកិច្ចល្អដើម្បីធ្វើជាស្នូលក្នុងការដឹកនាំវិស័យយុត្តិធម៌ ពង្រឹងសុចរិតភាព និងភាពត្រឹមត្រូវនៃការអនុវត្តការងាររបស់មន្ត្រីតុលាការ តាមរយៈការពង្រឹងវិន័យ និងសីលធម៌វិជ្ជាជីវៈក្នុងវិស័យនេះ សំដៅលើកកម្ពស់កិត្តិយស និងសេចក្ដីថ្លៃថ្នូរនៃអង្គតុលាការបន្ថែមទៀត»។
នៅពេលនោះ មតិមួយចំនួនមានក្ដីរំពឹងទុកថា លោក កើត រិទ្ធ អាចនឹងជួយស្រោចស្រង់ប្រព័ន្ធយុត្តិធម៌ដែលកំពុងចុះទន់ខ្សោយនោះ ឱ្យមករឹងមាំវិញ តាមរយៈការរៀនសូត្រផ្នែកច្បាប់បានជ្រៅជ្រះរបស់លោក ប៉ុន្តែលទ្ធផលហាក់បានដើរបញ្ច្រាសពីនេះ។ លោក កើត រិទ្ធ បានប្រែក្លាយប្រព័ន្ធយុត្តិធម៌របស់ជាតិទៅជាអាវុធដ៏មុតស្រួចសម្រាប់លោកនាយករដ្ឋមន្ត្រី ហ៊ុន សែន ដើម្បីកម្ចាត់សំឡេងប្រឆាំង និងសំឡេងឯករាជ្យ។
តុលាការបានដំណើរការរឿងក្ដីជាច្រើនដែលមានចរិតនយោបាយប្រឆាំងនឹងសកម្មជននយោបាយ សមាជិកសង្គមស៊ីវិល យុវជន និងអ្នកបញ្ចេញមតិរិះគន់រដ្ឋាភិបាល។ ករណីខ្លះ គេមិនធ្លាប់ឃើញមានទេក្នុងប្រវត្តិនៃប្រព័ន្ធយុត្តិធម៌កម្ពុជា គឺតុលាការបានបើកសវនាការទ្រង់ទ្រាយធំដែលមានជនជាប់ចោទរាប់សិបនាក់ ដល់រាប់រយនាក់។ សវនាការទាំងនោះ ទោះជាគ្មានភស្តុតាងដាក់បន្ទុកគ្រប់គ្រាន់ក៏ដោយ ក៏អាចឱ្យតុលាការផ្ដន្ទាទោសសកម្មជននយោបាយ សមាជិកសង្គមស៊ីវិល និងអ្នករិះគន់រដ្ឋាភិបាលជាបន្តបន្ទាប់ពីបទរួមគំនិតក្បត់ និងបទញុះញង់។
ជាការពិតថា លោក កើត រិទ្ធ មិនមែនជាចៅក្រមកាត់សេចក្ដីរឿងទាំងនេះទេ ប៉ុន្តែក្នុងតួនាទីជារដ្ឋមន្ត្រីក្រសួងយុត្តិធម៌ លោកមានសិទ្ធិបញ្ជាព្រះរាជអាជ្ញាទូទាំងប្រទេស គឺព្រះរាជអាជ្ញា ឬតំណាងអយ្យការនេះឯងដែលជាអ្នកចោទប្រកាន់ និងបញ្ជាឱ្យចាប់ខ្លួនសកម្មជននយោបាយ សមាជិកសង្គមស៊ីវិល និងអ្នករិះគន់រដ្ឋាភិបាលយកទៅដាក់ពន្ធនាគារជាបន្តបន្ទាប់។ ក្នុងសំណុំរឿងដែលមានចរិតនយោបាយបែបនេះ ព្រះរាជអាជ្ញាចោទប្រកាន់បែបណា ចៅក្រមច្រើនតែសម្រេចក្ដីទៅតាមបទចោទនោះ។
នាយករងទទួលបន្ទុកកិច្ចការតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃតស៍ វ៉ច្ឆ (Human Rights Watch) លោក ហ្វីល រ៉ូបឺតសុន (Phil Robertson) មានប្រសាសន៍ថា ប្រព័ន្ធយុត្តិធម៌នៅកម្ពុជាមិនមានអ្វីប្រសើរឡើងនោះទេក្នុងអាណត្តិរបស់លោក កើត រិទ្ធ ព្រោះតុលាការស្ថិតក្រោមការបង្គាប់បញ្ជាផ្នែកនយោបាយរបស់គណបក្សប្រជាជនកម្ពុជារួចទៅហើយ៖ «មតិដែលថានឹងមានកំណែទម្រង់ប្រព័ន្ធយុត្តិធម៌នៅកម្ពុជានោះ គឺគ្រាន់តែជាការស្រមើស្រមៃខុសពីការពិត។ ការអះអាងទាំងឡាយអំពីកំណែទម្រង់ប្រព័ន្ធយុត្តិធម៌ ប្រៀបបានទៅនឹងផ្សែងដែលរសាត់តាមខ្យល់។ រដ្ឋាភិបាលកម្ពុជានិយាយបែបនេះ គឺដើម្បីព្យាយាមធ្វើយ៉ាងណាឱ្យសហគមន៍អន្តរជាតិនៅរាប់រក ឬក៏ដើម្បីឱ្យម្ចាស់ជំនួយបន្តផ្ដល់លុយកាក់ដល់ពួកគេ ប៉ុន្តែធាតុពិតនោះ គឺពួកគេគ្មានចេតនាពិតប្រាកដក្នុងការលើកស្ទួយប្រព័ន្ធយុត្តិធម៌ឡើយ។ រដ្ឋាភិបាលកម្ពុជា និងគណបក្សកាន់អំណាចគ្មានការប្ដេជ្ញាចិត្តផ្នែកនយោបាយណាមួយ ដើម្បីផ្លាស់ប្ដូរប្រព័ន្ធសព្វថ្ងៃនេះទេ ពីព្រោះពួកគេទទួលបានប្រយោជន៍ពីប្រព័ន្ធយុត្តិធម៌បែបចំណាប់ខ្មាំង និងតុលាការដែលគ្រប់គ្រងដោយអ្នកនយោបាយដូចសព្វថ្ងៃនេះ»។
ស្នាដៃរបស់លោក កើត រិទ្ធ
លោក កើត រិទ្ធ គឺជាមនុស្សគន្លឹះក្នុងការរៀបចំ និងកែប្រែច្បាប់ជាច្រើន ដែលមានចរិតគាបសង្កត់សិទ្ធិសេរីភាព និងប្រាសចាករដ្ឋធម្មនុញ្ញ ហើយដែលមានទិសដៅតែមួយគត់ គឺបម្រើប្រយោជន៍នយោបាយឱ្យលោក ហ៊ុន សែន។
ច្បាប់សំខាន់ៗ ដែលលោក កើត រិទ្ធ បានចូលរួមតាក់តែង និងកែប្រែនោះ រួមមាន ក្រមព្រហ្មទណ្ឌ ក្រមនីតិវិធីព្រហ្មទណ្ឌ ច្បាប់ ៣ ទាក់ទងនឹងការគ្រប់គ្រងតុលាការ ច្បាប់បោះឆ្នោត ច្បាប់អង្គការ-សមាគម ច្បាប់សហជីព ច្បាប់គ្រប់គ្រងប្រទេសក្នុងភាពអាសន្ន និងវិសោធនកម្មច្បាប់គណបក្សនយោបាយ ជាដើម។ ច្បាប់ស្ដីពីវិសោធនកម្មច្បាប់គណបក្សនយោបាយនេះ ត្រូវបានក្រុមអ្នកច្បាប់វាយតម្លៃថា ជាច្បាប់ដ៏អាក្រក់ ដែលបំពានរដ្ឋធម្មនុញ្ញ និងផ្ទុយពីច្បាប់សិទ្ធិមនុស្សអន្តរជាតិ ពីព្រោះច្បាប់នេះធ្វើឡើងតម្រូវតាមចិត្តមេបក្សកាន់អំណាចលោក ហ៊ុន សែន ដើម្បីរំលាយគណបក្សសង្គ្រោះជាតិ និងបំបិទសិទ្ធិនយោបាយរបស់ក្រុមមេដឹកនាំបក្សប្រឆាំង។
រឿងមួយទៀតដែលប្រហែលជាគ្មានអ្នកច្បាប់ណាហ៊ានធ្វើដូចលោក កើត រិទ្ធ នោះ គឺការរៀបចំកែប្រែរដ្ឋធម្មនុញ្ញជាច្រើនលើកច្រើនសារឱ្យលោក ហ៊ុន សែន ដែលធ្វើឱ្យច្បាប់កំពូលមួយនេះបាត់បង់អានុភាពរបស់ខ្លួន ជាពិសេសវិសោធនកម្មរដ្ឋធម្មនុញ្ញលើកទី១០ កាលពីឆ្នាំ២០២២។ វិសោធនកម្មរដ្ឋធម្មនុញ្ញលើកទី១០ នេះ គឺជាការច្បាមយកពីអំណាចពីរដ្ឋសភាដោយស្រស់ៗ ពីព្រោះគណបក្សឈ្នះឆ្នោតអាចបញ្ជូនឈ្មោះបេក្ខជននាយករដ្ឋមន្ត្រីទៅព្រះមហាក្សត្រដោយផ្ទាល់ ដោយមិនចាំបាច់ឆ្លងថ្នាក់ដឹកនាំរដ្ឋសភា គឺប្រធាន និងអនុប្រធានរដ្ឋសភាទាំងពីរនោះទេ។
លោក កើត រិទ្ធ ថ្លែងថា លោកមានមោទនភាពដែលបានចូលរួមចំណែកកែច្បាប់កំពូលមួយនេះ៖ «សូម្បីតែអ្នកចូលរួមក្នុងការកែ [រដ្ឋធម្មនុញ្ញ] អ៊ីចឹង វាក៏ជាផ្នែកមួយនៃពាក្យដែលថា ឧត្ដមគតិជាតិ។ ធ្វើឱ្យខ្មែរយើងមោទនភាព មានអ្វីខុស ជាតិខ្មែរយើង។ ឥឡូវយើងទាំងអស់គ្នាគាំទ្រជាតិខ្មែរយើង មានមោទនភាពដែរ ឬអត់?»។
ទោះបីជាការកែរដ្ឋធម្មនុញ្ញបន្ថយអំណាចរដ្ឋសភានេះ ខុសគោលការណ៍ច្បាប់ និងប្រជាធិបតេយ្យយ៉ាងណាក្ដី នេះជាគុណសម្បត្តិមួយដ៏ធំរបស់លោក កើត រិទ្ធ ធ្វើសម្រាប់លោក ហ៊ុន សែន។ លោក ហ៊ុន សែន ពិតជាបានធ្វើបែបនេះមែន គឺបញ្ជូនឈ្មោះកូនប្រុសរបស់លោកទៅឱ្យស្ដេចចាត់តាំងជានាយករដ្ឋមន្ត្រីហើយ ទើបរុញមកឱ្យរដ្ឋសភាបោះឆ្នោតផ្ដល់សេចក្ដីទុកចិត្តវិញ ដើម្បីបង្គ្រប់កិច្ចបង្កើតរដ្ឋាភិបាលថ្មីនៅថ្ងៃទី២២ សីហា។
ក្រៅពីការបង្កើត និងកែប្រែច្បាប់បម្រើប្រយោជន៍នយោបាយឱ្យលោក ហ៊ុន សែន នោះ គេនៅមិនទាន់ឃើញលោក កើត រិទ្ធ បានសាងស្នាដៃអ្វីជាដុំកំភួននៅឡើយទេ ទាក់ទងនឹងការពង្រឹងប្រព័ន្ធយុត្តិធម៌របស់ជាតិ។ លោកបានបង្កើតយុទ្ធនាការដោះស្រាយការកកស្ទះសំណុំរឿងនៅតាមតុលាការខេត្ត-ក្រុង ដើម្បីឈានទៅបន្ធូរបន្ថយភាពចង្អៀតណែននៃអ្នកជាប់ឃុំ ប៉ុន្តែយុទ្ធនាការនេះមិនអាចដោះស្រាយបញ្ហាចង្អៀតណែនក្នុងពន្ធនាគារបាននៅឡើយទេ។
វិទ្យុអាស៊ីសេរីបានព្យាយាមទាក់ទងលោក កើត រិទ្ធ ជាច្រើនដង ដើម្បីសាកសួររឿងនេះ តែមិនទទួលបានការឆ្លើយតបទេ ខណៈអ្នកនាំពាក្យក្រសួងយុត្តិធម៌លោក ជិន ម៉ាលីន បដិសេធមិនផ្ដល់បទសម្ភាសន៍រឿងឡើយ។
រីឯអ្នកនាំពាក្យគណបក្សប្រជាជនកម្ពុជា លោក សុខ ឥសាន វិញ លោកថ្លែងថា លោក កើត រិទ្ធ ជាមនុស្សដែលគណបក្សទុកចិត្ត និងជាអ្នកបន្តវេនមួយរូប៖ «គោលការណ៍របស់គណបក្សប្រជាជនកម្ពុជា គឺផ្ដល់អាទិភាពទៅលើមន្ត្រីវ័យក្មេង ដែលបន្តវេន ជាទំពាំងស្នងឫស្សី អាហ្នឹងមិនមែនចំពោះតែឯកឧត្ដម កើត រិទ្ធ ទេ។ ក៏ប៉ុន្តែដែលគាត់ចេញមុខមាត់ខ្លាំងនោះ គឺដោយសារវាពាក់ព័ន្ធនឹងវិស័យច្បាប់ដែលពាក់ព័ន្ធនឹងជំនាញរបស់ឯកឧត្ដម កើត រិទ្ធ»។
ក្រៅពីឡើងតួនាទីធំហើយនោះ អំណាចរបស់លោក កើត រិទ្ធ ក៏បានកើនឡើងដល់កម្រិតកំពូលដែរ។ ថ្មីៗនេះ លោកបានចូលរួមអារកាត់រឿងជាច្រើនជាមួយលោក ហ៊ុន សែន មានជាអាទិ ការរក្សាទុកមន្ត្រីមុខងារនយោបាយរាប់ពាន់នាក់ឱ្យបន្តកាន់តួនាទីក្នុងអាណត្តិទី៧ ដែលជារឿងខ្ជះខ្ជាយថវិកាជាតិ និងការបង្គាប់ឱ្យលោក ជីវ កេង ដែលមានស្នាដៃជួយរំលាយគណបក្សសង្គ្រោះជាតិនោះ បានកាន់តំណែងជាប្រធានស្ដីទីតុលាការកំពូល ជាដើម។ ក្រៅពីនេះ លោកជាមនុស្សគន្លឹះក្នុងការតែងតាំង និងផ្ទេរមុខតំណែងចៅក្រម និងព្រះរាជអាជ្ញាទូទាំងប្រទេស ទាំងតុលាការជាន់ទាប និងជាន់ខ្ពស់។ ដោយសារលោក កើត រិទ្ធ ជាមន្ត្រីជាន់ខ្ពស់នៅក្នុងគណបក្សប្រជាជនកម្ពុជា ក្រោមអាណត្តិគ្រប់គ្រងរបស់លោកទាំងនៅក្រសួងយុត្តិធម៌ និងឧត្ដមក្រុមប្រឹក្សានៃអង្គចៅក្រម ពួកចៅក្រម និងព្រះរាជអាជ្ញាជាច្រើននាក់ នាំគ្នាបង្ហាញដោយឥតលាក់លៀមអំពីសមាសភាពរបស់ខ្លួនជាសមាជិកគណបក្សប្រជាជនកម្ពុជា ដូចលោក កើត រិទ្ធ ដែរ។
យោងតាមគោលការណ៍បែងចែកអំណាចរវាងនីតិប្រតិបត្តិ នីតិប្បញ្ញត្តិ និងអង្គតុលាការ ដែលកំណត់ក្នុងរដ្ឋធម្មនុញ្ញ ឧត្ដមក្រុមប្រឹក្សានៃអង្គចៅក្រម គឺជាផ្នែកមួយនៃអង្គតុលាការដែលត្រូវឯករាជ្យពីក្រសួងយុត្តិធម៌ ពីព្រោះក្រសួងយុត្តិធម៌គឺជាសេនាធិការរបស់រដ្ឋាភិបាល។
អ្នកកែទម្រង់ ឬអ្នកបំផ្លាញប្រជាធិបតេយ្យ?
អតីតតំណាងរាស្ត្រគណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថា លោក កើត រិទ្ធ មិនមែនជាអ្នកកែទម្រង់ប្រព័ន្ធយុត្តិធម៌ឱ្យល្អប្រសើរនោះទេ ផ្ទុយទៅវិញរដ្ឋមន្ត្រីក្រសួងយុត្តិធម៌រូបនេះគ្រាន់តែជាបុគ្គលម្នាក់ដែលលោក ហ៊ុន សែន យកមកប្រើដើម្បីឱ្យកែប្រែ ឬបង្កើតច្បាប់ណាដែលបម្រើផលប្រយោជន៍ត្រកូលហ៊ុនប៉ុណ្ណោះ៖ «លោក ហ៊ុន សែន គាត់ត្រូវជ្រើសរើសសេនាធិការរបស់គាត់ ដែលជាអ្នកវៃឆ្លាត ហើយសុខចិត្តធ្វើអ្វីតាមបង្គាប់បញ្ជារបស់គាត់ ទោះបីខុសក៏ដោយ។ ដូចយើងឃើញច្បាប់ចុងក្រោយទាំងអស់ហ្នឹង គឺបម្រើប្រយោជន៍ឱ្យលោក ហ៊ុន សែន ក្រុមគ្រួសារលោក ហ៊ុន សែន និងបក្ខពួកលោក ហ៊ុន សែន តែប៉ុណ្ណឹងទេ មិនមែនសម្រាប់ប្រយោជន៍សាធារណៈប្រយោជន៍សង្គមទេ ហើយចំពោះលោក កើត រិទ្ធ ជាង ២ឆ្នាំកន្លងមកនេះ គាត់ជាឧបករណ៍ដ៏ល្អ ដ៏មុតស្រួចសម្រាប់ការពារត្រកូល ហ៊ុន»។
លោក កើត រិទ្ធ បានជាប់ឈ្មោះថា «ជាអ្នកចូលរួមបំផ្លាញប្រជាធិបតេយ្យ និងរំលោភសិទ្ធិមនុស្សធ្ងន់ធ្ងរ» ហើយអតីតសមាជិកសភាសហរដ្ឋអាមេរិកបានស្នើឈ្មោះលោកក្នុងបញ្ជីមន្ត្រីកម្ពុជា ដែលត្រូវដាក់ទណ្ឌកម្ម ក្រោមសេចក្ដីស្នើច្បាប់ប្រជាធិបតេយ្យកម្ពុជា អនុម័តកាលពីខែកក្កដា ឆ្នាំ២០១៨។ ទោះបីជាសេចក្ដីស្នើច្បាប់នេះមិនបានចូលជាធរមាននៅពេលនោះក៏ដោយ ក៏កំណត់ត្រានេះបានជួយបង្ហាញមុខមាត់ពិតនៃជនល្មោភអំណាច និងផលប្រយោជន៍ផ្ទាល់ខ្លួនមួយរូប ដែលសុខចិត្តបំផ្លាញលទ្ធិប្រជាធិបតេយ្យដែលជាបំណងប្រាថ្នារបស់ពលរដ្ឋខ្មែរ ដើម្បីតែជួយប្រែក្លាយកម្ពុជាទៅជាកម្មសិទ្ធិរបស់ក្រុមគ្រួសារលោក ហ៊ុន សែន និងបក្ខពួករបស់លោក៕
2 comments:
Ah Keut Rith has transformed himself into Ah Keut Ruok
Puok Ah Bamplanh Chiat.
Post a Comment