2023.10.09
ជនជាតិភាគតិចចារ៉ាយនៅឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរីអះអាងថា ក្រោយពីបោះឆ្នោតរួចមកបញ្ហាគ្រឿងញៀននៅក្នុងឃុំមួយនេះកំពុងកើនឡើងខ្លាំង ធ្វើឲ្យប៉ះពាល់ដល់យុវជននិងប្រជាពលរដ្ឋរស់នៅតំបន់នោះ។ មន្ត្រីសង្គមស៊ីវិលជំរុញឱ្យអាជ្ញាធរពាក់ព័ន្ធបង្កើនការទប់ស្កាត់ក្រុមជួញដូរគ្រឿងញៀននៅតាមជនបទ។
ជនជាតិដើមចារ៉ាយរស់នៅឃុំប៉ក់ញ៉ៃអះអាងថា យុវជនស្ទើរគ្រប់គ្នានៅក្នុងមូលដ្ឋាន កំពុងប្រើប្រាស់គ្រឿងញៀនបណ្ដាឲ្យយុវជនមួយចំនួនបោះបង់ការសិក្សាហើយបាត់បង់ស្មារតីក្លាយជាមនុស្សឆ្កួត លើសពីនោះក៏មានករណីលួចទ្រព្យសម្បត្តិរបស់ប្រជាពលរដ្ឋនៅក្នុងឃុំថែមទៀត។
ជនជាតិដើមភាគតិចចារ៉ាយរស់នៅឃុំប៉ក់ញ៉ៃ លោក រមាស់ ស្វាង ប្រាប់វិទ្យុអាស៊ីសេរីនៅថ្ងៃទី៨ ខែតុលា ថា ប៉ុន្មានខែចុងក្រោយនេះ យុវជនមានវ័យចាប់ពី២០ឆ្នាំឡើងទៅ ប្រើប្រាស់គ្រឿងញៀនបណ្ដាឲ្យពលរដ្ឋមួយចំនួននៅក្នុងឃុំមានការព្រួយបារម្ភពីសុវត្ថិភាព។ ក្រៅពីនោះលោកក៏បារម្ភពីការប្រើប្រាស់អំពើហិង្សា និងមានការបៀតបៀនទៅលើក្មេងស្ត្រីថែមទៀតផង។
លោក រមាស់ ស្វាង៖ «ដូចជាកូនប្រសាខ្ញុំគឺតាមដានឃើញខ្ញុំឃើញផ្ទាល់ៗឃើញវាផ្ទាល់ពេកអ៊ីចឹងអត់យកទេសុខចិត្ត លែងវាចោលទៅ យើងអត់តាមដានគេទេ តាមដានតែផ្ទះខ្លួនឯងបានហើយ»។
ពលរដ្ឋវ័យជាង៦០ឆ្នាំម្នាក់ទៀត គឺលោក សេវ ប្លើក ស្នើឲ្យអាជ្ញាធរពាក់ព័ន្ធចុះទប់ស្កាត់ការជួញដូរ និងប្រើប្រាស់គ្រឿងញៀននៅក្នុងឃុំមួយនេះឲ្យបានឆាប់ ពីព្រោះនៅក្នុងឃុំរបស់លោកមិនមែនតែយុវជននៅលីវប្រើប្រាស់នោះទេ ពលរដ្ឋដែលមានគ្រួសារនិងកូនហើយក្ដី ក៏ប្រើប្រាស់គ្រឿងញៀនដែរ។ លោកបន្ថែមថា ពេលខ្លះមានការប្រើប្រាស់អំពើហិង្សាក្នុងគ្រួសាររីឯយុវជនដែលកំពុងសិក្សាក៏បានបោះបង់ការសិក្សាជាបន្តបន្ទាប់។
លោក សេវ ប្លើក៖ «បារម្ភគឺបារម្ភសំខាន់គឺក្មេងកំពុងរៀនហ្នឹងបារម្ភជាងគេពេលរៀនទៅវាអត់ចប់ទៅតាមគ្នាឯងជក់ហ្នឹងវាខាតការរៀនហើយ នឹងម្យ៉ាងទៀតអ្នកខ្លះមានប្រពន្ធកូនហើយ នៅជក់ទៀតខាតបង់ថវិកាក្នុងគ្រួសារ»។
ពលរដ្ឋបានលើកឡើងទៀតថា នៅក្នុងឆ្នាំ២០២២មានយុវជនប្រើប្រាស់គ្រឿងញៀនចំនួន៣នាក់បានចងកសម្លាប់ខ្លួនក្រោយពេលប្រើប្រាស់គ្រឿងញៀនយូរឆ្នាំធ្វើឲ្យបាត់បង់ស្មារតីរីឯបច្ចុប្បន្នយុវជនចំនួន ៧នាក់បាត់បង់សតិនឹងកំពុងក្លាយជាមនុស្សឆ្កួតដើររវើរវាយពេញផ្លូវ។
វិទ្យុអាស៊ីសេរីមិនអាចទាក់ទងអភិបាលខេត្តរតនគីរីលោក ញ៉ែម សំអឿន និងស្នងការនគរបាលខេត្តរតនគីរីលោក អ៊ុង សុភាព ដើម្បីសុំការបកស្រាយបញ្ហានេះបានទេ នៅថ្ងៃទី៨ ខែតុលាដោយទូរស័ព្ទចូលច្រើនដងគ្មានអ្នកទទួល។ ចំណែកអភិបាលស្រុកអូរយ៉ាដាវ លោក សូយ សំណាង និងអគ្គស្នងការរងនៃអគ្គស្នងការនគរបាលជាតិទទួលបន្ទុកផែនប្រឆាំងគ្រឿងញៀនលោក ម៉ក់ ជីតូ ក៏មិនអាចទាក់ទងបានដែរ។
ជុំវិញរឿងនេះមន្ត្រីស្របស្រួលសមាគមអាដហុក (Adhoc) ប្រចាំខេត្តរតនគីរីលោក ឌិន ខន្នី យល់ឃើញថា បញ្ហាគ្រឿងញៀនជាទុកកង្វល់ដ៏ធំមួយសម្រាប់ពលរដ្ឋនៅក្នុងខេត្តដោយពីមួយឆ្នាំ ទៅមួយឆ្នាំមានការកើនឡើងហូរហែ ធ្វើឲ្យពលរដ្ឋនៅតាមជនបទងាយរងគ្រោះ។ លោកជំរុញទៅអាជ្ញាធរពាក់ព័ន្ធក្នុងខេត្តមួយនេះត្រូវមានវិធានការឲ្យបានតឹងរ៉ឹងទៅលើអ្នកជួញដូរទាំងអស់នោះ ដើម្បីធានាពីសុវត្ថិភាពរបស់ពលរដ្ឋ និងអនាគតយុវជននៅតំបន់នោះ។
លោក ឌិន ខន្នី៖ «ទាក់ទិននឹងបញ្ហាគ្រឿងញៀនវាមានប្រភព បើយើងនិយាយទៅវាមានអ្នកប្រើប្រាស់ ហើយនឹងវាមានអ្នកជួញដូរ អ៊ីចឹងទិសដៅខ្ញុំថា សំខាន់ជាងគេបើសិនជាគ្មានអ្នកលក់ គ្មានអ្នកទិញហើយគ្មានអ្នកប្រើប្រាស់ទេ អ៊ីចឹងវាទាល់តែយើងមានចំណាត់ការផ្លូវច្បាប់តឹងរ៉ឹងចំពោះអ្នកលក់គ្រឿងញៀន»។
កាលពីពេលថ្មីៗនេះ រដ្ឋមន្ត្រីក្រសួងមហាផ្ទៃលោក ស សុខា បានដាក់ចេញវិធានការបង្ក្រាបការចែកចាយនិងការប្រើប្រាស់គ្រឿងញៀននៅតាមពន្ធនាគារទូទាំងប្រទេស ហើយលោកក៏ព្រមានចាត់វិធានការច្បាប់ទៅលើមន្ត្រីរូបណាដែលជាប់ពាក់ព័ន្ធ។
កាលពីខែកញ្ញាអាជ្ញាធរជាតិប្រយុទ្ធប្រឆាំងគ្រឿងញៀនបានបង្ហាញរបាយការណ៍ថា ក្នុងរយៈពេល៨ខែឆ្នាំ២០២៣កម្លាំងសមត្ថកិច្ចបានបង្ក្រាបករណីជួញដូរ និងប្រើប្រាស់គ្រឿងញៀននៅទូទាំងប្រទេសបានជាង ៥ពាន់ករណី (៥.០៦០) និងឃាត់ខ្លួនជនសង្ស័យបានជាង ១ម៉ឺន ២ពាន់នាក់(១២.៣៥៦) ក្នុងនោះសមត្ថកិច្ចបានដកហូតសារធាតុញៀនជាង ២.៦០០គីឡូក្រាម និងកញ្ឆាស្ងួតជិត ៥០គីឡូក្រាម ហើយសារធាតុគីមីជាង ៨០០គីឡូក្រាម៕
No comments:
Post a Comment