Khmer Circle:
CPP officials and generous spendings do belong in the same sentence, but not for the right reasons!
^^^
2024.01.15
អ្នកឃ្លាំមើលស្ថានការណ៍កម្ពុជាលើកឡើងថា ការជំរុញការសាងសង់ស្តូបឈ្នះ-ឈ្នះ របស់រដ្ឋាភិបាល នៅតាមបណ្ដាខេត្តនានា គឺជាការចំណាយថវិកាជាតិខ្ជះខ្ជាយ ស្រប ពេលប្រជាពលរដ្ឋកំពុងប្រឈមជីវភាពខ្វះខាត។ មន្ត្រីជាន់ខ្ពស់គណបក្សប្រឆាំងថាដរាបណាលោក ហ៊ុន ម៉ាណែត នៅតែមិនហ៊ានប្រកួតប្រជែងនយោបាយដោយយុត្តិធម៌ទេ នោះការកសាងស្ដូបឈ្នះ-ឈ្នះ មិនមានតម្លៃអ្វីសោះឡើយ។
អ្នកឃ្លាំមើលស្ថានការណ៍កម្ពុជាលើកឡើងថា ដើម្បីទទួលបានការសាទរពីសំណាក់ប្រជាពលរដ្ឋ រដ្ឋាភិបាលគួរចំណាយថវិកាជាតិ លើកកម្ពស់ជីវភាពប្រជាកសិករ ជាជាងចំណាយលុយដែលបានមកពីការបង់ពន្ធរបស់ប្រជាពលរដ្ឋ កសាងស្ដូបឈ្នះ-ឈ្នះ ឱ្យប្រជាពលរដ្ឋដឹងគុណគណបក្សកាន់អំណាច។
ប្រធានក្រុមប្រឹក្សាឃ្លាំមើលកម្ពុជានៅប្រទេសន័រវែស (Norway) លោក ម៉ែន ណាត យល់ឃើញថា ការចំណាយថវិកាជាតិរាប់សិបម៉ឺនដុល្លារ ដើម្បីកសាងស្តូបឈ្នះ-ឈ្នះ ក្នុងពេលប្រជាពលរដ្ឋកំពុងមានជីវភាពខ្វះខាតនោះ បង្ហាញថាថ្នាក់ដឹកនាំរដ្ឋាភិបាល មិនបានយកចិត្តទុកដាក់អំពីសុខទុក្ខរបស់ប្រជាពលរដ្ឋនោះទេ។ លោកបន្តថា ការចំណាយថវិកាជាតិ សង់ស្តូបឈ្នះ-ឈ្នះ គឺជាការចំណាយលុយខ្ជះខ្ជាយ ដែលបានមកពីញើសឈាមរបស់ប្រជាពលរដ្ឋតាមរយៈការបង់ពន្ធ។
លោក ម៉ែន ណាត៖ «បើយើងមើលបច្ចុប្បន្នទាំងលោក ហ៊ុន សែន ទាំងលោក ហ៊ុន ម៉ាណែត ក្ដីអត់ឃើញមានស្មារតីអីក្នុងការបង្រួបបង្រួមផង មានតែស្មារតីបំផ្លិចបំផ្លាញខ្មែរគ្នាឯង ជាន់ពន្លិចខ្មែរគ្នាឯងហ្នឹង ហើយប្រទូសរ៉ាយឱ្យអ្នកប្រឆាំង អាហ្នឹងវាផ្ទុយទៅហ្នឹងរដ្ឋធម្មនុញ្ញ ហើយកាលណាផ្ទុយទៅហ្នឹងច្បាប់ជាតិអស់ហើយ អ៊ីចឹងរបបដឹកនាំហ្នឹង ជារបបមិនអាចរំពឹង មិនអាចសង្ឃឹមអ្វីទៅដល់ប្រជាពលរដ្ឋបានទេ»។
ប្រតិកម្មរបស់អ្នកឃ្លាំមើលស្ថានការណ៍កម្ពុជារូបនេះ ធ្វើឡើងក្រោយពីទេសរដ្ឋមន្ត្រី លោក គន់ គីម បានសម្របសម្រួលកិច្ចប្រជុំសម្រេច ឆ្លាក់ចម្លាក់បំពាក់ស្តូបឈ្នះ-ឈ្នះអន្លង់វែង កាលពីថ្ងៃទី១៣ ខែមករា។
ស្តូបឈ្នះ-ឈ្នះ អន្លង់វែង បានចាប់ផ្ដើមសាងសង់កាលពីខែមីនា ឆ្នាំ២០២៣ នៅចំណុចតំបន់ប្រវត្តិសាស្ត្រយោធាភ្នំ២០០ ក្នុងស្រុកអន្លង់វែង។ បើទោះបីជាស្តូបឈ្នះ-ឈ្នះ អន្លង់វែងមិនទាន់សាងសង់រួចរាល់ក្ដី ក៏ទំហំរបស់ស្ដូបនេះ មិនចាញ់ទំហំស្តូបនៅរាជធានីភ្នំពេញ ដែលចំណាយប្រាក់អស់រាប់លានដុល្លារនោះទេ។ លោក គន់ គីម បានលើកឡើងថា ការសង់ស្តូបឈ្នះ-ឈ្នះ ត្រូវរំលេចឱ្យឃើញនូវគុណតម្លៃនយោបាយឈ្នះ-ឈ្នះ និងវឌ្ឍនភាពសង្គមកម្ពុជាបច្ចុប្បន្ន ដើម្បីឱ្យប្រជាពលរដ្ឋយល់អំពីកិច្ចខិតខំរបស់ស្ថាបនិកនយោបាយឈ្នះ-ឈ្នះ គឺលោក ហ៊ុន សែន។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសាកសួរជុំវិញរឿងនេះបាននៅឡើយទេ នៅថ្ងៃទី១៤ ខែមករា។
ជុំវិញរឿងនេះ មន្ត្រីជាន់ខ្ពស់គណបក្សសង្គ្រោះជាតិលោក ម៉ែន សុថាវរិន្ទ្រ មានប្រសាសន៍ថា ការសង់ស្ដូបឈ្នះ-ឈ្នះ ដើម្បីឱ្យប្រជាពលរដ្ឋដឹងគុណលោក ហ៊ុន សែន គឺជាការលើកតម្កើងអតីតនាយករដ្ឋមន្ត្រីរូបនេះហួសហេតុ។ លោកបន្តថា លោក ហ៊ុន សែន មិនបានអនុវត្តគោលនយោបាយឈ្នះ-ឈ្នះ ដើម្បីគិតគូរពីសុខទុក្ខរបស់ប្រជាពលរដ្ឋនោះទេ ក៏ប៉ុន្តែគឺដើម្បីតែរក្សាអំណាចផ្ដាច់ការរបស់គ្រួសាររបស់ត្រកូលហ៊ុន និងបក្ខពួកតែប៉ុណ្ណោះ។
លោក ម៉ែន សុថាវរិន្ទ្រ៖ «ធ្វើបាបគេ ចាប់គេដាក់គុកហើយ តែគាត់ទៅសង់ស្ដូប សង់អីឯណាថាជាវីរបុរស រួចយកថវិការដ្ឋទៅធ្វើស្រេចតែចិត្ត អ៊ីចឹងយកថវិកាហ្នឹងទៅជួយពលករ ជួយកម្មករ ជួយដោះស្រាយបញ្ហាប្រជាពលរដ្ឋទាំងអស់តាមស្រែចម្ការខ្វះទឹកអីហ្នឹង អាហ្នឹងល្អជាង»។
ក្រៅពីការសង់ស្តូបឈ្នះ-ឈ្នះ នៅអន្លង់វែង ក្រសួងការពារជាតិក៏កំពុងសាងសង់ស្តូបឈ្នះ-ឈ្នះ នៅតាមបណ្ដាខេត្តមួយចំនួនទៀត រួមមានខេត្តកោះកុង ខេត្តបន្ទាយមានជ័យ និងខេត្តកំពង់ស្ពឺផងដែរ។ កន្លងទៅ អ្នកវិភាគនយោបាយលើកឡើងថា ការកសាងស្ដូបឈ្នះ-ឈ្នះ ដើម្បីរម្លឹកគោលនយោបាយឈ្នះ-ឈ្នះ របស់លោក ហ៊ុន សែន ដែលដឹកនាំប្រទេសតាមបែបផ្ដាច់ការបែបនេះ នឹងមិនមានតម្លៃជាប្រវត្តិសាស្ត្រនោះឡើយ៕
1 comment:
Just look at their stomachs, that is really Win-Win.
Post a Comment