2024.05.13
ក្រុមពលករចាញ់បោកមេខ្យល់ទៅបម្រើការងារតាមផ្ទះនៅប្រទេស អារ៉ាប៊ី សាអ៊ូឌីត (Saudi Arabia) ចំនួន ២៤នាក់បន្ថែមទៀតត្រូវបានក្រសួងការងារ និងស្ថានទូតបានបញ្ចូនមកដល់កម្ពុជាវិញហើយនៅព្រឹកថ្ងៃទី១២ ខែឧសភា។ ទោះជាយ៉ាងណា នៅតែមានពលករច្រើននាក់ទៀតកំពុងរងការរំលោភបំពានសិទ្ធការងារ និងបន្តដង្ហោយរកកិច្ចអន្តរាគមន៍ឱ្យភាគីពាក់ព័ន្ធពន្លឿននីតិវិធីជួយជម្លៀសពួកគេចេញពីកន្លែងក្រុមហ៊ុន និងផ្ទះថៅកែក្នុងប្រទេស អារ៉ាប៊ី សាអ៊ូឌីត។
ក្រុមពលករដែលត្រូវបានជួយសង្គ្រោះចេញពីប្រទេស អារ៉ាប៊ី សាអ៊ូឌីត មកដល់កម្ពុជាវិញនិយាយថា ពួកគាត់ប្រៀបបីដូចជាមានជីវិតជាថ្មីទៀត បន្ទាប់ពីចាញ់បោកក្រុមហ៊ុន ហ្វាទីណា មេនផៅវើ (Fatina Manpower Co., Ltd) ដែលបញ្ជូនពួកគាត់ទៅធ្វើការនៅប្រទេស អារ៉ាប៊ី សាអ៊ូឌីត ហើយទទួលរងនូវការឈឺចាប់ទាំងផ្លូវ និងផ្លូវចិត្ត ដោយសារតែក្រុមហ៊ុន និងថៅកែបង្ខំឱ្យធ្វើការច្រើនម៉ោង មិនផ្តល់បាយទឹកឱ្យហូបគ្រប់គ្រាន់ ហើយពលករខ្លះថែមទាំងក្រុមហ៊ុនមិនបើកប្រាក់ខែឱ្យទៀតផង។
ពលករចំនួន ២៤នាក់ដែលត្រូវបានបញ្ជូនមកកម្ពុជាវិញ ស្ថិតក្នុងចំណោមចំនួនពលករចំនួន ៣៩នាក់ ដែលស្ថានទូតកម្ពុជាប្រចាំប្រទេស អារ៉ាប៊ី សាអ៊ូឌីត ជម្លៀសពួកគេចេញពីកន្លែងថៅកែបង្ខាំងកាលពីថ្ងៃទី១៩ ខែមេសា។ ចំណែក ពលករ ១៥នាក់ផ្សេងទៀត បញ្ជាក់ថា ស្ថានទូតនឹងជួយសម្របសម្រួលបញ្ជូនពួកគេមកកម្ពុជាវិញឆាប់ៗខាងមុខនេះ។
ក្រុមពលករមួយចំនួនត្រូវក្រុមហ៊ុន ហ្វាទីណា មេនផៅវើ បង្ខំឱ្យពួកគេសរសេរលិខិតកិច្ចសន្យាមុនឡើងយន្តហោះមកកម្ពុជាវិញ ដោយក្នុងលិខិតកិច្ចសន្យានោះតម្រូវឱ្យក្រុមពលករ មិនត្រូវប្ដឹងផ្ដល់ក្រុមហ៊ុននោះទេ និងត្រូវបញ្ចប់រាល់បញ្ហាទាំងអស់។
ទោះជាបែបនេះក្ដី ក្រុមពលករអះអាងថា ពួកគេមិនអាចទទួលយកទង្វើដែលក្រុមហ៊ុនគ្មានទំនួលខុសត្រូវ និងថៅកែរំលោភបំពានសិទ្ធិកម្មករខ្មែរបែបនេះបានឡើយ ហើយពួកគេគ្រោងជួបជុំគ្នាពិភាក្សា ដើម្បីប្ដឹងក្រុមហ៊ុន ហ្វាទីណា មេនផៅវើ។
ពលករម្នាក់ដែលមកដល់កម្ពុជាវិញថ្លែងក្នុងលក្ខខណ្ឌសុំលាក់អត្តសញ្ញាណព្រោះបារម្ភអំពីបញ្ហាសុវត្ថិភាពបានប្រាប់វិទ្យុអាស៊ីសេរីថា ពលករដែលបានមកដល់កម្ពុជាចំនួន ២៤នាក់ និងក្រុមពលករដែលមកដល់កម្ពុជាកាលពីថ្ងៃទី២៨ ខែមេសាកន្លងទៅ នឹងជួបជុំគ្នា ដើម្បីពិភាក្សាពីការរៀបចំពាក្យបណ្ដឹងប្ដឹងក្រុមហ៊ុន ហ្វាទីណា ឱ្យទទួលខុសត្រូវតាមផ្លូវច្បាប់។ ពលកររូបនេះ បញ្ជាក់ថា ក្រុមពលករជាង ១រយនាក់ (១៣៣នាក់) ដែលត្រូវបានបញ្ចូនឲ្យទៅបម្រើការងារនៅប្រទេសអារ៉ាប៊ី សាអ៊ូឌីត តាមរយៈក្រុមហ៊ុន ហ្វាទីណា ភាគច្រើនសុទ្ធតែជួបបញ្ហាថៅកែ និងក្រុមហ៊ុនរំលោភបំពានសិទ្ធិ និងបំបិទសិទ្ធិសេរីភាពពលករ ហើយនៅពេលក្រុមពលករនាំគ្នាស្រែកតវ៉ានោះ ក្រុមថៅកែតែងគំរាម និងឃុំឃាំងពួកគេក្នុងបន្ទប់។
ពលករម្នាក់សុំលាក់អត្តសញ្ញាណ៖ «ដោយសារខ្ញុំចាំគ្នាខ្ញុំមកឱ្យអស់សិន ខ្ញុំវិញខ្ញុំត្រូវតែប្ដឹង គ្រាន់តែចាំគ្នាមកឱ្យអស់សិន ព្រោះខ្ញុំខាតការងារខ្ញុំនៅជាមួយគាត់ [ក្រុមហ៊ុន ហ្វាទីណា] ច្រើនខែណាស់ នៅខ្មែរក៏ខ្ញុំបម្រើពួកគាត់ បម្រើដូចនៅអារ៉ាប៊ី សាអ៊ូឌីត អ៊ីចឹងគ្មានបានលុយមួយរៀលទេ។ ប្រើយើងដាំបាយ បម្រើពួកសិស្សជប៉ុន បង់លុយឱ្យគាត់ ហើយសិស្សច្រើនប្រើយើង និយាយទៅសិស្សអារ៉ាប់គាត់ប្រើយើងទាំងអស់ហ្នឹងបោកខោអាវគ្រួសារគាត់ មិនត្រឹមសម្អាតក្នុងសាលាទេ សម្អាតដល់ផ្ទះគាត់ផ្សេងៗទៀត»។
មកទល់ពេលនេះ មានពលករសរុបចំនួន ៥១នាក់ហើយដែលត្រូវបានជួយសង្គ្រោះពីប្រទេស អារ៉ាប៊ី សាអ៊ូឌីត បញ្ជូនមកដល់កម្ពុជាវិញ។ ទោះជាយ៉ាងណានៅមានពលករប្រមាណ ៨០នាក់ទៀតកំពុងជាប់ក្នុងប្រទេសអារ៉ាប់ប៊ី សាអ៊ូឌីត ហើយពលករខ្លះនៅតែដង្ហោយរកកិច្ចអន្តរាគមន៍ជួយសង្គ្រោះពួកគេជាបន្ទាន់ ដោយសារតែពួកគេខ្លះត្រូវថៅកែឃុំក្នុងបន្ទប់ និងបង្ខំឱ្យធ្វើការងារទាំងឈឺ។
ក្នុងចំណោមពលករកំពុងជាប់នៅប្រទេសអារ៉ាប៊ី សាអ៊ូឌីតទាំងនោះមានម្នាក់គឺលោកស្រី ចំរើន ស្រីសរ រៀបរាប់ប្រាប់វិទ្យុអាស៊ីសេរីថា លោកស្រីបានឈប់ធ្វើការជាង ២០ថ្ងៃមកហើយ ប៉ុន្តែមកទល់ពេលនេះក្រុមហ៊ុនមិនទាន់បើកប្រាក់ខែជូនលោកស្រីនៅឡើយទេ។ លោកស្រីបញ្ជាក់ថា ស្ថានទូតបានជម្លៀសលោកស្រីចេញពីកន្លែងផ្ទះថៅកែឱ្យមកស្នាក់នៅជាមួយពលករម្នាក់ទៀតក្នុងក្រុមហ៊ុននៅប្រទេស អារ៉ាប៊ី សាអ៊ូឌីត ប៉ុន្តែក្រុមហ៊ុនពុំបានផ្ដល់អាហារឱ្យលោកស្រីបានហូបគ្រប់គ្រាន់នោះទេ។ លោកស្រីចង់ឱ្យស្ថានទូត និងក្រសួងពាក់ព័ន្ធ ពន្លឿននីតិវិធីបញ្ជូនលោកស្រីមកកម្ពុជាឱ្យបានឆាប់។
លោកស្រី ចំរើន ស្រីសរ៖ «ខ្ញុំនិយាយប្រាប់ត្រង់ ថ្ងៃហ្នឹងអីក៏គេអត់ធ្វើម្អូបឱ្យដែរ ខ្ញុំសុំស្នើឱ្យជួយខ្ញុំបានត្រឡប់ទៅខ្មែរឆាប់ៗផង ព្រោះអីម៉ែខ្ញុំមានជំងឺភ្នែក ហើយគ្មានអ្នកណាមើលគាត់ទេ កូនខ្ញុំក៏នៅជាមួយគាត់ដែរនៅជាមួយយាយៗ រ៉ាវពីមពើមឱ្យហូបខ្ញុំលើកម្រាមដៃដប់ជួយខ្ញុំឆាប់ៗផង»។
វិទ្យុអាស៊ីសេរីមិនទាន់អាចទាក់ទង ឯកអគ្គរាជទូតកម្ពុជាប្រចាំប្រទេស អារ៉ាប៊ី សាអូឌីត លោក អ៊ុក សារុន និងអ្នកនាំពាក្យក្រសួងការងារ លោក កត្តា អ៊ន ដើម្បីសាកសួរបន្ថែមជុំវិញរឿងនេះបានទេនៅថ្ងៃទី១២ ខែឧសភា។
ជុំវិញរឿងនេះ ប្រធានគ្រប់គ្រងកម្មវិធីការងារ នៃអង្គការសង់ត្រាល់ (CENTRAL) លោក ឃុន ថារ៉ូ មានប្រសាសន៍ថា ក្រសួងស្ថានប័នពាក់ព័ន្ធចាត់វិធានការជួយសង្គ្រោះក្រុមពលករខ្មែរបញ្ជូនមកកម្ពុជាវិញគឺជារឿងមួយ ប៉ុន្តែរដ្ឋាភិបាលចាំបាច់ត្រូវស៊ើបអង្កេតលើភ្នាក់ងារក្រុមហ៊ុនដែលបញ្ជូនក្រុមពលករធ្វើការនៅប្រទេសអារ៉ាប៊ី សាអ៊ូឌីត ដើម្បីឱ្យទទួលខុសត្រូវតាមផ្លូវច្បាប់។
ចាប់តាំងពីក្រុមពលករស្វែងរកកិច្ចអន្តរាគមន៍តាំងពីអំឡុងខែមីនា មក ម្ចាស់ក្រុមហ៊ុន ហ្វាទីណា មេនផៅវើ (Fatina Manpower Co., Ltd) គឺលោក ម៉ាន តើរ៉មីហ្សី (Man Teramizy) និងជាមន្ត្រីជាន់ខ្ពស់ក្នុងក្រសួងការងារផងនោះ ក៏បានចេញមុខអន្តរាគមន៍ និងបានទៅជួបក្រុមពលករដល់ប្រទេស អារ៉ាប៊ី សាអ៊ូឌីត។ ក្រុមពលករឱ្យដឹងថា លោក ម៉ាន តើរ៉មីហ្សី ទៅជួបក្រុមពលករនេះ គឺដើម្បីរៀបចំនីតិវិធី និងបង់លុយសំណងជំងឺចិត្តឱ្យក្រុមហ៊ុនដៃគូសហការរបស់ខ្លួនក្នុងប្រទេស អារ៉ាប៊ី សាអ៊ូឌីត ដើម្បីអាចបញ្ជូនពលករដែលក្រុមហ៊ុនរបស់លោកលក់ឱ្យក្រុមហ៊ុនក្នុងប្រទេស អារ៉ាប៊ី សាអ៊ូឌីត ម្នាក់ចន្លោះពី ១ពាន់ដុល្លារ (១.០០០) ដែលមិនទាន់ចប់កិច្ចសន្យាការងារអាចត្រឡប់មកកម្ពុជាវិញ។ ក្រៅពីនេះ ក្រុមពលករបញ្ជាក់ថា ម្ចាស់ក្រុមហ៊ុន ហ្វាទីណា ក៏តែងព្រមានដល់ក្រុមពលករថា បើពួកគនៅតែនិយាយរឿងឃុំឃាំង និងបញ្ហាគ្មានអាហារហូបចុកគ្រប់គ្រាន់នោះ នោះក្រុមហ៊ុន និងស្ថានទូត នឹងមិនដោះស្រាយបញ្ហា និងទុកឱ្យក្រុមពលករបន្តជាប់ក្នុងប្រទេស អារ៉ាប៊ី សាអ៊ូឌីត តទៅទៀត៕លោក ឃុន ថារ៉ូ៖ «បញ្ហាផ្ដល់ការងារទាំងអស់នៅវាស្ថិតក្រោមទម្រង់នៃការរំលោភសិទ្ធិការងារធ្ងន់ធ្ងរ ប្រសិនជាមិនមានវិធានការក្នុងការរកមុខអ្នកទទួលខុសត្រូវចំពោះមុខច្បាប់ទេ បញ្ហានេះ នឹងអាចមានការកើនឡើងជាបន្តបន្ទាប់ ហើយករណីនេះ ប្រសិនជាមិនរកមុខ អ្នកដែលទទួលខុសត្រូវបញ្ហាទាំងអស់នេះដែលកើតឡើងទេ យើងអាចនិយាយបានថា មានពលករខ្មែរជាច្រើននាក់ ដែលគាត់កំពុងស្ថិតក្រោមនៃលក្ខខណ្ឌការងារ ការកែងប្រវ័ញ្ច ការរំលោភ សិទ្ធិការងារធ្ងន់ធ្ងរ»។
No comments:
Post a Comment