2024.07.21
ប្រធានព្រឹទ្ធសភាកម្ពុជា លោក ហ៊ុន សែន កាលពីពេលថ្មីៗ បានស្នើឱ្យចិនជួយគាំទ្រការអភិវឌ្ឍគ្រប់វិស័យនៅកម្ពុជាបន្តទៅទៀត បើទោះបីជាបច្ចុប្បន្នកម្ពុជាបានផ្លាស់ប្ដូរនាយករដ្ឋមន្ត្រីហើយក៏ដោយ។ ក៏ប៉ុន្តែ អ្នកវិភាគសង្គមនិងនយោបាយយល់ថា ការពឹងពាក់និងបង្កើតភាពជិតស្និទ្ធ របស់រដ្ឋាភិបាលត្រកូលហ៊ុន ជាមួយនិងចិនជ្រុលហួសពេក វាអាចនឹងនាំវិបត្តិមកឱ្យកម្ពុជាច្រើនជាងការនាំផលប្រយោជន៍មកឱ្យប្រទេសជាតិ។
អ្នកវិភាគសង្គមនិងនយោបាយបង្ហាញការព្រួយបារម្ភថា កម្ពុជានឹងមានបញ្ហាធ្ងន់ធ្ងរពាក់ព័ន្ធនិងជម្លោះភូមិសាស្ត្រនយោបាយ ជាមួយប្រទេសមហាអំណាច ច្រើនជាងផលប្រយោជន៍នៃការអភិវឌ្ឍ ប្រសិនបើរដ្ឋាភិបាល ដែលដឹកនាំដោយគ្រួសារហ៊ុន នៅតែមានទំនាក់ទំនងជិតស្និទជាមួយចិន លំអៀងហួសហេតុពេក។
អ្នកវិភាគបញ្ហាសង្គមនិងនយោបាយ លោក គឹម សុខ មានប្រសាសន៍ថា ការធ្វើទំនាក់ទងជាមួយប្រទេសចិន លើកិច្ចការនយោបាយ សង្គម សេដ្ឋកិច្ច និងពាណិជ្ជកម្ម មិនមែនសុទ្ធតែអាក្រក់ទាំងអស់ទេ ក៏ប៉ុន្តែភាពជិតស្និទជ្រុលពេករបស់រដ្ឋាភិបាលបច្ចុប្បន្ន អាចនាំមកនូវវិបត្តិដ៏ច្រើន ជាងផលប្រយោជន៍នៃការអភិវឌ្ឍសេដ្ឋកិច្ចនិងសង្គមកម្ពុជា។
លោក គឹម សុខ បន្ថែមទៀតថា កម្ពុជានឹងក្លាយទៅជាទីតាំងជម្លោះភូមិសាស្ត្រនយោបាយ ប្រសិនបើកម្ពុជាលំអៀងទៅរកចិនជ្រុលហួសហេតុពេក។
លោក គឹម សុខ៖ «រដ្ឋធម្មនុញ្ញកម្ពុជា តម្រូវឱ្យកម្ពុជាអព្យាក្រឹត ហើយអព្យាក្រឹតភាពក្នុងន័យនេះ គឺដោយមានការយល់ស្របពីមហាអំណាចទាំងអស់ ដែលជាសមាជិកអចិន្ត្រៃយ៍ របស់ក្រុមប្រឹក្សាសន្តិសុខអង្គការសហប្រជាជាតិ មានទាំងអាមេរិក បារាំង អង់គ្លេស ចិន រុស្ស៊ី ។ ដូច្នេះ កាលណារដ្ឋាភិបាលកម្ពុជា ងាកទៅភាគីណាមួយជ្រុល គឺប្រាកដជាធ្វើឱ្យមានទំនាស់ក្នុងចំណោម ប្រទេសមហាអំណាចទាំងអស់នោះ លើបញ្ហាភូមិសាស្ត្រ របស់ប្រទេសកម្ពុជាហើយ»។
ការលើកឡើងរបស់អ្នកវិភាគដូចនេះ ធ្វើឡើងបន្ទាប់ពីប្រធានព្រឹទ្ធសភាកម្ពុជា លោក ហ៊ុន សែន ស្នើឱ្យចិនជួយគាំទ្រការអភិវឌ្ឍ គ្រប់វិស័យនៅកម្ពុជាបន្តទៅទៀត។
កាលពីថ្ងៃទី១៨ខែកក្កដា លោក ហ៊ុន សែន បានជួបសំណេះសំណាលជាមួយឯកអគ្គរដ្ឋទូតចិនប្រចាំកម្ពុជា លោក វ៉ាង វិនពីន (WANG Wenbin ) ដែលទើបតែចូលកាន់ដំណែងថ្មី។ ក្នុងជំនួបនោះ លោក ហ៊ុន សែន បានស្នើឱ្យប្រទេសចិនជួយគាំទ្រការអភិវឌ្ឍ គ្រប់វិស័យនៅកម្ពុជាបន្តទៅទៀត។
លោក ហ៊ុន សែន ថ្លែងថា បើទោះបីជាបច្ចុប្បន្ន កម្ពុជាបានផ្លាស់ប្ដូរនាយករដ្ឋមន្ត្រីក៏ដោយ ក៏ជំហររបស់រដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា ពុំមានការផ្លាស់ប្ដូរទំនាក់ទំនងជិតស្និទជាមួយមិត្តចិនទេ។
រយៈពេលជាង១០ឆ្នាំមកនេះ ដោយសារតែរដ្ឋាភិបាលកម្ពុជា ពឹងផ្អែកជំនួយនិងកម្ចីស្ទើរទាំងស្រុង ពីប្រទេសចិន យកមកអភិវឌ្ឍហេដ្ឋារចនាសម្ព័ន្ធនិងសេដ្ឋកិច្ច ធ្វើឱ្យរដ្ឋាភិបាលកម្ពុជា ត្រូវដឹងគុណចិន យ៉ាងជ្រាលជ្រៅ រហូតដាក់ផ្លូវ១ខ្សែថ្មី នៅក្រវ៉ាត់ក្រុងទី៣ របស់រាជធានីភ្នំពេញ ទៅជាឈ្មោះ លោក ស៊ី ជិនពីង (Xi jinping) ប្រធានាធិបតីចិនទៀតផង។
ឧបនាយករដ្ឋមន្ត្រីនិងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល ដែលជាអធិបតីក្នុងពិធីសម្ពោធដាក់ស្លាកឈ្មោះមហាវិថី ស៊ី ជីនពីង បានថ្លែងកាលពីថ្ងៃទី១៩ខែកក្កដាថា នេះគឺជាការដឹងគុណដ៏ជ្រាលជ្រៅចំពោះប្រជាជន និងរដ្ឋាភិបាលចិន។
លោក ស៊ុន ចាន់ថុល៖ «ដើម្បីប្រសិទ្ធីនាមមហាវិថីឈ្មោះ ស៊ី ជីនពីង (Xi JinPiing)នេះ បង្ហាញនូវការយកចិត្តទុកដាក់ខ្ពស់បំផុតនិងកតញ្ញូតាធម៌ ព្រមទាំងការដឹងគុណ របស់រដ្ឋាភិបាលនិងប្រជាជនកម្ពុជា ចំពោះមិត្តចិនដែលបានផ្ដល់ហិរញ្ញប្បទាន និងជំនួយផ្សេងៗដល់កម្ពុជា ជាពិសេសកិច្ចសហប្រតិបត្តិការនៃគំនិតផ្ដួចផ្ដើមខ្សែក្រវាត់និងផ្លូវ ដែលបានដាក់ចេញដោយប្រធានាធិបតី ស៊ី ជីនពីង»។
លោក ស៊ុន ចាន់ថុល ឱ្យដឹងទៀតថា បច្ចុប្បន្នជំនួយចិនបានធ្វើឱ្យគម្រោងធំៗជាច្រើនលេចចេញជារូបរាងឡើងនៅកម្ពុជា ដូចជា៖ តំបន់សេដ្ឋកិច្ចពិសេសខេត្តព្រះសីហនុ ផ្លូវល្បឿនលឿនភ្នំពេញ-ក្រុងព្រះសីហនុ អាកាសយានដ្ឋានអន្តរជាតិសៀមរាប-អង្គរ ព្រលានយន្តហោះអន្តរជាតិតេជោក្រុងតាខ្មៅ និងផ្លូវល្បឿនលឿនភ្នំពេញ-ក្រុងបាវិត ដែលកំពុងសាងសង់ មន្ទីរពេទ្យនិងស្ពានឆ្លងទន្លេជាច្រើនទៀត។
លោក ស៊ុន ចាន់ថុល អះអាងថា ចិនបានឈរជាប្រទេសលំដាប់ទី១ ក្នុងការផ្តល់កម្ចីសម្បទាននិងជំនួយសរុបជាទឹកប្រាក់ជាង៣ពាន់លានដុល្លារអាមេរិក សម្រាប់សាងសង់ផ្លូវជាច្រើនខ្សែ ប្រវែងសរុបជិត៤ពាន់គីឡូម៉ែត្រ រួមទាំងស្ពានធំៗសរុបចំនួន១៦ស្ពាន។
ថ្វីបើរដ្ឋាភិបាលកម្ពុជាអះអាងពីគុណសម្បត្តិ កម្ចីនិងជំនួយរបស់ចិន ជួយដល់ការអភិវឌ្ឍក្តី ក៏ប៉ុន្តែបច្ចុប្បន្ន កម្ពុជាបានជំពាក់បំណុលចិនចំនួនជាង៤ពាន់លានដុល្លារហើយ ក្នុងចំណោមបំណុលសរុបជាង១ម៉ឺនប្រាំមួយរយ(១០.៦៦៧.២៥0.000)លានដុល្លារ ដែលកម្ពុជាជំពាក់បរទេស។
អ្នកវិភាគសង្គមយល់ថា មូលហេតុដែលកម្ពុជាពឹងតែលើជំនួយចិន ដោយសារតែរដ្ឋាភិបាលកម្ពុជាបច្ចុប្បន្ន មានឱកាសតិចណាស់ក្នុងការពឹងពាក់និងសុំជំនួយពីបស្ចឹមប្រទេស។
អ្នកវិភាគបញ្ហាសង្គម លោកបណ្ឌិត មាស នី យល់ថា នៅពេលដែលរដ្ឋាភិបាលកម្ពុជា បង្ហាញពីការពឹងផ្អែកខ្លាំងលើប្រទេសចិនតែមួយ គឺវាអាចនឹងធ្វើឱ្យមានការព្រួយបារម្ភចំពោះស្ថិរភាពសេដ្ឋកិច្ច នៅពេលណាដែលចិនមានវិបត្តិ។
លោកបណ្ឌិត មាស នី បន្ថែមទៀតថា ដោយសារតែភាពស្និទ្ធស្នាលជាមួយប្រទេសចិនហួសហេតុពេក គឺរដ្ឋាភិបាលកម្ពុជា កំពុងទទួលរងការរិះគន់ ចំពោះរបបដឹកនាំដែលគ្មានការគោរពសិទ្ធិមនុស្សនិងគ្មានលទ្ធិប្រជាធិបតេយ្យ។
លោកបណ្ឌិត មាស នី៖ « ដោយសារកម្ពុជាត្រូវបានគេរិះគន់បញ្ហាមិនគោរពសិទ្ធិមនុស្សហើយនិងប្រជាធិបតេយ្យ បើទោះបីជាចង់មិនចង់ទាំងកម្ពុជាទាំងបស្ចឹមប្រទេសហាក់ដូចជាមានការឃ្លាតឆ្ងាយពីគ្នា លើការនិយាយអំពីប្រាក់ផ្ដល់ជំនួយធំៗផ្សេងៗនោះ។ បើទោះបីជាយ៉ាងណាបស្ចឹមប្រទេសនៅតែជួយកម្ពុជា ប៉ុន្តែគ្រាន់តែមិនមានចំនួនច្រើន ដូចជំនួយចិនទេ»។
ស្រដៀងគ្នានេះ អ្នកជំនាញផ្នែកភូមិសាស្ត្រនយោបាយ លោក រ៉ូ វណ្ណៈ យល់ថាការណ៍ដែលកម្ពុជា មានទំនាក់ទំនងស្អិតល្មួតជាមួយប្រទេសចិន កំពុងធ្វើឱ្យព្រួយបារម្ភទៅដល់បញ្ហាសន្តិសុខក្នុងតំបន់ ពាក់ព័ន្ធនិងជម្លោះភូមិសាស្ត្រនយោបាយរវាងមហាអំណាចចិននិងសហរដ្ឋអាមេរិក។
លោក រ៉ូ វណ្ណៈ បញ្ជាក់ទៀតថា បច្ចុប្បន្ន ក្រុមបណ្ដាប្រទេសជាច្រើននៅក្នុងតំបន់និងពិភពលោក កំពុងតាមឃ្លាំមើលយ៉ាងយកចិត្តទុកដាក់ចំពោះសកម្មភាពទំនាក់ទំនងកម្ពុជានិងចិននេះ។
អ្នកវិភាគជាច្រើនយល់ឃើញប្រហាក់ប្រហែលគ្នាថា មូលហេតុដែលរដ្ឋាភិបាលកម្ពុជា កំពុងដឹកនាំដោយគណបក្សប្រជាជនកម្ពុជា បង្កើនទំនាក់ទំនងស្អិតល្មួតជាមួយប្រទេសចិន ដោយសារតែរដ្ឋាភិបាលនេះ ត្រូវការចិនឱ្យជួយអភិវឌ្ឍដើម្បីចំណេញផ្នែកសេដ្ឋកិច្ចផងនិងជួយខាងយុទ្ធសាស្រ្តនយោបាយផង ដើម្បីការពារអំណាចរបស់គ្រួសារត្រកូល ហ៊ុន ឱ្យនៅគង់វង្សបានយូរអង្វែង៕លោក រ៉ូ វណ្ណៈ៖ «ប្រទេសដែលឃ្លាំមើលយ៉ាងយកចិត្តទុកដាក់គឺសហរដ្ឋអាមេរិក បន្ទាប់មកគឺវៀតណាម តែងឃ្លាំមើលការវិវត្តន៍ទៅលើដៃគូជាយុទ្ធសាស្ត្រគ្រប់ជ្រុងជ្រោយរវាងកម្ពុជានិងចិន ថាតើយុគទំនាក់ទំនងរវាងកម្ពុជានិងចិន វាអាចគំរាមកំហែងទៅដល់សន្តិសុខឬក៏ផលប្រយោជន៍របស់វៀតណាម ក្នុងកម្រឹតណា?»។
No comments:
Post a Comment