2024.08.20
មន្ត្រីបក្សប្រឆាំង និងអ្នកវិភាគថា ក្រោមការដឹកនាំដោយនាយករដ្ឋមន្ត្រីលោក ហ៊ុន ម៉ាណែត រយៈពេលមួយឆ្នាំមកនេះ មិនបានបង្ហាញសមិទ្ធផលដែលអាចកត់សម្គាល់បានទេ ហើយលោក ហ៊ុន ម៉ាណែត ថែមទាំងបង្ក្រាបទៅលើសំឡេងរិះគន់ទៅវិញ។ ការលើកឡើងរបស់មន្ត្រីបក្សប្រឆាំង និងអ្នកវិភាគនេះ ក្រោយពីអ្នកនាំពាក្យរដ្ឋាភិបាលរៀបចំសិន្និសីទកាសែតបង្ហាញពីលទ្ធផលសំខាន់ៗរបស់លោក ហ៊ុន ម៉ាណែត រយៈពេលមួយឆ្នាំ។
មន្ត្រីគណបក្សប្រឆាំង និងអ្នកវិភាគនយោបាយ មើលឃើញថា រយៈពេល១ឆ្នាំ ដែលលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រី ជំនួសឪពុក គឺលោក ហ៊ុន សែន មិនបានធ្វើឱ្យជីវភាពពលរដ្ឋ ប្រសើរឡើងទេ ខណៈអយុត្តិធម៌ ការគំរាមនយោបាយ និងសេដ្ឋកិច្ចកាន់តែធ្លាក់ចុះធ្ងន់ធ្ងរទៅវិញ។
ប្រធានប្រតិបត្តិគណបក្សសង្គ្រោះជាតិប្រចាំប្រទេសអូស្ត្រាលី (Australia) លោក អ៊ិន ហេមរ៉ា ប្រាប់វិទ្យុអាស៊ីសេរីនៅថ្ងៃ១៩ ខែសីហា ថា អ្នកវិនិយោគជាច្រើនមិនបានចាប់អារម្មណ៍នឹងការកៀរគររបស់លោក ហ៊ុន ម៉ាណែត នោះទេ គឺដោយសារពួកគេមិនពេញចិត្តចំពោះការដឹកនាំបែបក្រុមគ្រួសារបក្សពួកនិយម និងអំពើពុករលួយ។ លោកថា ដោយសារតែសេដ្ឋកិច្ចខ្មែរមិនរីកចម្រើននោះហើយ ទើបមានពលរដ្ឋខ្មែររាប់លាននាក់បន្តធ្វើការនៅក្រៅប្រទេសទាំងប្រថុយប្រថាន និងបង្ខំចិត្តបែកពីគ្រួសារ។
លោក អ៊ិន ហេមរ៉ា បន្ថែមថា លោក ហ៊ុន ម៉ាណែត គឺដូចគ្នានឹងឪពុករបស់លោកដែរ ដោយបន្តធ្វើទុកបុកម្នេញទៅលើមន្ត្រីបក្សប្រឆាំង និងសកម្មជនសិទ្ធិមនុស្ស និងលោកបន្តដឹកនាំប្រទេសងាកទៅរកប្រទេសចិន និងវៀតណាមខ្លាំង។
លោក អ៊ិន ហេមរ៉ា ៖«ដើម្បីធ្វើឱ្យប្រទេសរីកចម្រើនមានន័យថា ទីមួយ យើងចង់បានអ្នកវិនិយោគ ហើយយើងធ្វើម៉េចស្ដារលទ្ធិប្រជាធិបតេយ្យ។ ឧទាហរណ៍ប្រសិនជាគាត់មានបំណងចង់ធ្វើឱ្យមានការរីកចម្រើនផ្នែកការងារនៅប្រទេសហ្នឹងធ្វើម៉េចគាត់ត្រូវរក្សាប្រព័ន្ធអនុគ្រោះពន្ធ ហើយដើម្បីរក្សាប្រព័ន្ធអនុគ្រោះពន្ធ គាត់ត្រូវស្ដារលទ្ធិប្រជាធិបតេយ្យ ប៉ុន្តែអ្វីដែលគាត់ធ្វើគឺផ្ទុយ»។
ការលើកឡើងនេះ ស្របពេលខួបមួយឆ្នាំនៃការឡើងកាន់តំណែងរបស់លោក ហ៊ុន ម៉ាណែត ជានាយករដ្ឋមន្ត្រី នឹងឈានចូលមកដល់នៅថ្ងៃទី២២ ខែសីហា ខាងមុខនេះ។
អង្គភាពអ្នកនាំពាក្យរដ្ឋាភិបាល នៅថ្ងៃទី១៩ សីហា បានធ្វើសន្និសីទសារព័ត៌មានលើកឡើងពីសមិទ្ធផលរយៈពេល ១ឆ្នាំ របស់រាជរដ្ឋាភិបាល និងដំណើរឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់។
ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា អួតសរសើរថា កម្ពុជាក្រោមការដឹកនាំរបស់លោក ហ៊ុន ម៉ាណែត មួយឆ្នាំមកនេះ បានសម្រេចជោគជ័យគ្រប់វិស័យ ជាពិសេសការថែរក្សាបាននូវសុខសន្តិភាព និងការអភិវឌ្ឍ រក្សាបាននូវសណ្តាប់ធ្នាប់សាធារណៈ និងសមិទ្ធផលលេចធ្លោជាច្រើនទៀត ដូចជាការការពារនូវអធិបតេយ្យភាពជាដើម។
លោក ប៉ែន បូណា ៖«យើងធ្លាប់លឺសម្ដេចតេជោ ក៏ដូចជាសម្ដេចធិបតីបាននិយាយម្ដងហើយម្ដងទៀតថា កម្ពុជាមិនយកអធិបតេយ្យជាតិទៅដោះដូរជាមួយជំនួយបរទេស ឬប្រព័ន្ធអនុគ្រោះពន្ធជាដាច់ខាក កម្ពុជាដែលដឹកនាំដោយគណបក្សប្រជាជនកម្ពុជាមិនអនុញ្ញាតឱ្យបាត់ដីសូម្បីមួយមីលីម៉ែត្រ នេះជាការអះអាងជាឱឡារិក»។
ផ្ទុយពីការលើកឡើងនេះ មន្ត្រីបក្សប្រឆាំង អ្នកឃ្លាំមើល និងពលរដ្ឋមួយចំនួន វាយតម្លៃប្រហាក់ប្រហែលគ្នាថា តាំងពីលោក ហ៊ុន ម៉ាណែត ឡើងមកកាន់តំណែង អយុត្តិធម៌សង្គមកាន់តែធ្ងន់ធ្ងរ ហើយជីវភាពពលរដ្ឋតូចតាច កាន់តែពិបាក និងជំពាក់បំណុលធនាគារវ័ណ្ឌកស្ទើរគ្រប់គ្រួសារ។ ចំពោះវិស័យនយោបាយវិញ មន្ត្រីបក្សប្រឆាំងអះអាងថា ពុំមានភាពល្អប្រសើរឡើយ ដោយសារថា មានអ្នកទោសនយោបាយ កាន់តែច្រើនឡើង ហើយការគំរាមកំហែង និងការរំលោភសិទ្ធិមនុស្សកាន់តែខ្លាំងដែរ។ ចំពោះវិស័យសេដ្ឋកិច្ច និងសង្គមកិច្ចវិញ ពួកគាត់ មើលឃើញថាការកាប់ព្រៃឈើ ការលក់ទ្រព្យសម្បត្តិជាតិ និងទ្រព្យសម្បត្តិរាស្រ្ត ឲ្យទៅក្រុមហ៊ុន និងជនបរទេស មានកាន់តែច្រើនឡើង ខណៈជនអន្តោប្រវេសន៍ខុសច្បាប់ និងគ្រឿងញៀន នៅតែកើនឥតឈប់។ ជាពិសេសថ្មីៗនេះ រដ្ឋាភិបាលរបស់លោក ហ៊ុន ម៉ាណែត រងការរិះគន់កាន់តែខ្លាំងថែមទៀតចំពោះរឿងបង្ក្រាបពលរដ្ឋដែលឈឺឆ្អាលបញ្ហាទឹកដី។
អ្នកអត្ថាធិប្បាយនយោបាយ លោក គឹម សុខ លើកឡើងថា លោក ហ៊ុន ម៉ាណែត មិនបានបង្ហាញការដឹកនាំខុសពីឪពុកលោកនោះទេ ជាក់ស្ដែងលោក ហ៊ុន ម៉ាណែត មិនទទួលយកមតិរបស់ពលរដ្ឋដែលបានរិះគន់ ឬស្នើសុំនោះឡើយ។ ម៉្យាងទៀត លោក ហ៊ុន ម៉ាណែត ដូចគ្នានឹងឪពុករបស់លោក គឺការបង្ក្រាបទៅលើអ្នករិះគន់ និងមន្ត្រីបក្សប្រឆាំង។
អ្នកឃ្លាំមើលសង្គម និងពលរដ្ឋសោកស្ដាយដែលនាយករដ្ឋមន្ត្រីលោក ហ៊ុន ម៉ាណែត បន្តដឹកនាំផ្ដាច់ការដូចឪពុករបស់លោក ដែលសកម្មជនបក្សប្រឆាំង និងសកម្មជនសិទ្ធិមនុស្សប្រមាណ ៦០នាក់បន្តជាប់ពន្ធនាគារ ខណៈយុវជន និងពលរដ្ឋប្រមាណ២០នាក់ផ្សេងទៀតត្រូវបានចាប់ខ្លួនជាបន្តបន្ទាប់ ក្រោយរិះគន់លើបណ្ដាញសង្គម ថារដ្ឋាភិបាលអាចធ្វើឱ្យបាត់ទឹកដីទៅប្រទេសវៀតណាម ជុំវិញការបង្កើតកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV)៕លោក គឹម សុខ៖ «វិស័យសាធារណៈរបស់ក្រុមលោក ហ៊ុន ម៉ាណែត មិនបានបម្រើសេចក្ដីត្រូវការរបស់ប្រជាពលរដ្ឋឱ្យបានត្រឹមត្រូវទេ ក៏ប៉ុន្តែវិធានការរបស់រដ្ឋបាលរបស់លោក ហ៊ុន ម៉ាណែត ចាំខ្ទប់មាត់ និងសិទ្ធិសេរីភាពចំពោះពលរដ្ឋខ្មែរទាំងឡាយណាដែលប្រតិកម្មពីអសមត្ថភាពរបស់រដ្ឋាភិបាលទៅវិញ»។
No comments:
Post a Comment