ដោយ ទីន ហ្សាការីយ៉ា
2025.01.28
ទិដ្ឋភាពជនជាតិដើមភាគតិចកួយខេត្តព្រះវិហារ ឃាត់គ្រឿងចក្រក្រុមហ៊ុនរបស់អភិបាលរងខេត្ត លោក អ៊ុក គឹម នៅថ្ងៃទី២៨ ខែមករា ឆ្នាំ២០២៥។
ជនជាតិដើមភាគតិចកួយនៅខេត្តព្រះវិហារម្នាក់រងរបួស ដោយសារកម្មករក្រុមហ៊ុនកាប់នឹងដាវក្នុងពេលរូបគាត់ និងអ្នកភូមិប្រមាណ ២០០នាក់ផ្សេងទៀត ចុះឃាត់គ្រឿងចក្ររបស់ក្រុមហ៊ុនឯកជនមិនឱ្យឈូសឆាយដីព្រៃជំនឿ និងបំផ្លាញដីស្រែចម្ការរបស់ពួកគាត់។
ពួកគាត់អះអាងថា អាជ្ញាធរខេត្តព្រះវិហារមិនត្រឹមតែមិនដោះស្រាយការតវ៉ារបស់ពលរដ្ឋនោះទេ តែបែរជាលម្អៀងទៅខាងក្រុមហ៊ុនរបស់អភិបាលរងខេត្តព្រះវិហារ គឺលោក អ៊ុក គឹមសាន។
ជនជាតិដើមកួយប្រមាណ ២០០នាក់ នៅព្រឹកថ្ងៃទី២៨ មករា បានធ្វើពិធីសែនព្រេនដាក់បណ្ដាសាជាថ្មីទៀត ព្រមទាំងបានចុះឃាត់គ្រឿងចក្ររបស់ក្រុមហ៊ុនអភិបាលរងខេត្តព្រះវិហារ លោក អ៊ុក គឹមសាន ដែលបន្តឈូសឆាយព្រៃជំនឿរបស់ពួកគាត់កាន់តែរាលធំឡើងអស់ជិត ៣០០ហិកតារ នៅរយៈពេលជាង ៤សប្តាហ៍ កន្លងទៅនេះ។
អ្នកភូមិថា កម្មកររបស់ក្រុមហ៊ុនបានបើកគ្រឿងចក្រ ដេញបុកពលរដ្ឋ បណ្ដាលឱ្យម៉ូតូរបស់ពួកគាត់ចំនួន ៣គ្រឿង ត្រូវគ្រឿងចក្រកិនកម្ទេចខូចអស់។ ចំណែកឯគោយន្ត ១គ្រឿងខូចខាត ហើយពលរដ្ឋម្នាក់រងរបួសជើង ដោយត្រូវកម្មកររបស់ក្រុមហ៊ុន កាប់នឹងផ្លែដាវ។
ជនជាតិដើមភាគតិចកួយ រស់នៅភូមិដងផ្លិត លោកស្រី ថូង ឆៃ វ័យ ៦៧ឆ្នាំ ប្រាប់វិទ្យុអាស៊ីសេរីថា អាជ្ញាធរខេត្តព្រះវិហារ មិនបានជួយដោះស្រាយបញ្ហាប្រឈមរបស់ពលរដ្ឋនោះទេ តែបែរជា កាងការពារក្រុមហ៊ុនឯកជនទៅវិញ។
លោកស្រីថា ដីដែលក្រុមហ៊ុនឈូសឆាយ ជាដីព្រៃជំនឿ និងស្រែចម្ការកេរឪពុកម្ដាយ ដែលអ្នកភូមិធ្វើកសិកម្មបែបប្រពៃណីកំពុងទទួលរងការបំផ្លាញជាប្រព័ន្ធ។
លោកស្រី ថូង ឆៃ៖ «និយាយទៅអាជ្ញាធរមិនបានជួយដោះស្រាយទេ គឺគាត់ឱ្យចោររួចខ្លួនទុកប្រជាពលរដ្ឋវេទនា ខ្ញុំពិតជាសោកស្ដាយធនធានធម្មជាតិនៅក្នុងឃុំដងផ្លិតទាំងអស់គ្នាឯងដូចជាធនធានធម្មជាតិយើង»។
ជនជាតិដើមភាគតិចកួយប្រមាណ ២០០នាក់នោះ រស់នៅភូមិដងផ្លិត និងភូមិណារុង ស្រុកឆែប។ ពួកគាត់អះអាងថា ពិធីសែនព្រេននេះធ្វើឡើងដើម្បីដាក់បណ្ដាសា លើមន្ត្រីខិលខូចទាំងឡាយណា ដែលជាប់ពាក់ព័ន្ធនឹងការបំផ្លាញតំបន់ព្រៃជំនឿ និងតំបន់ព្រៃអារក្សអ្នកតារបស់ពួកគាត់។
អ្នកភូមិថាកម្មករក្រុមហ៊ុនបានបើកត្រាក់ទ័រដេញបុកពួកគាត់ ក្រោយពីអ្នកភូមិបានឃាត់គ្រឿងចក្ររបស់ក្រុមហ៊ុនមិនឱ្យឈូសឆាយ។ បន្ទាប់មក កម្មកររបស់ក្រុមហ៊ុនរាប់សិបនាក់ប្រដាប់ដោយកាំបិត កាំភ្លើងច្នៃ និង ដាវ ជាដើមគំរាមមិនឱ្យពលរដ្ឋតវ៉ាហាមឃាត់ពួកគេឈូសឆាយ។ រីឯសមត្ថកិច្ចរាប់សិបនាក់ មិនបានចុះអន្តរាគមន៍ជួយការពារជនជាតិដើមភាគតិចនោះទេ។
ជនជាតិដើមភាគតិចម្នាក់ទៀត លោក រាំ សារ៉ន ប្រាប់វិទ្យុអាស៊ីសេរីថា កន្លែងដែលក្រុមហ៊ុនឈូសឆាយ ជាជង្រុកអនុផលព្រៃឈើយ៉ាងសំខាន់របស់ពលរដ្ឋ ទាំង ២ភូមិ ដែលតែងតែឃ្វាលគោក្របី ធ្វើស្រែចម្ការ និងរកអនុផលព្រៃឈើចិញ្ចឹមជីវិតជាច្រើនជំនាន់មកហើយ។
លោកថា ជនជាតិដើមភាគតិចនឹងលំបាកវេទនាមួយកម្រិតទៀត ប្រសិនបើបាត់បង់ដីក្នុងតំបន់នោះ។
លោក រាំ សារ៉ន៖ «ដេញបុក ដេញបុកយកតែមែនទែន បើមនុស្សមិនលោតចេញពីម៉ូតូទេ គឺងាប់មែន មិនមែនលេងៗ ទេ ហើយម៉ូតូខូចខាតបួនដប់គ្រឿង សាហាវជាងអុយទៅទៀត»។
វិទ្យុអាស៊ីសេរីនៅមិនទាន់អាចទាក់ទងសុំការបំភ្លឺ ជុំវិញការចោទប្រកាន់នេះពីអភិបាលរងខេត្តព្រះវិហារ លោក អ៊ុក គឹមសាន បាននៅឡើយទេ នៅថ្ងៃទី២៨ មករា។ រីឯអភិបាលខេត្តព្រះវិហារលោក គីម រិទ្ធី ក៏វិទ្យុអាស៊ីសេរីមិនទាន់អាចទាក់ទងបានដែរ នៅថ្ងៃដដែលនេះ ដោយសារទូរស័ព្ទហៅចូលតែគ្មានអ្នកលើក។
ក៏ប៉ុន្តែអ្នកភូមិថា អភិបាលស្ដីទីស្រុកឆែប លោក អ៊ុំ សុភឿន បានចុះទៅឃ្លាំមើលការឈូសឆាយនោះ តែមិនបានដោះស្រាយការតវ៉ា របស់ពលរដ្ឋនោះទេ តែបែរជាប្រាប់ពួកគាត់ថា ទុកឱ្យក្រុមហ៊ុនឈូសឆាយព្រៃសិនចុះ ហើយចាំដោះស្រាយពេលក្រោយ។
តំណាងសហគមន៍ជនជាតិដើមភាគតិចកួយ ភូមិដងផ្លិត លោក សោម ណៃ ស្ដាយស្រណោះព្រៃឈើកេរមរតកដូនតា ដែលពួកគាត់ចាត់ទុកថា ជាអាយុជីវិតកំពុងទទួលរងការហិនហោចអស់នៅសម័យនេះ។
លោក សោម ណៃ៖ «ហើយគាត់ដាក់បណ្ដាសាឱ្យរលត់រលាយរាល់មន្ត្រីណាដែរយកដីនោះ ព្រោះកន្លែងនោះជាកន្លែងគោរពបូជាលោកតាលានតាដេវរាប់រយឆ្នាំមកហើយ ដែលគេជំនឿ។ តែឥឡូវឆេះ គេអំបុកយកអស់ហើយ នៅតែថ្មទេ»។
ជុំវិញរឿងនេះ នាយកប្រតិបត្តិអង្គការពន្លកខ្មែរ លោក ប៉ឹក សោភ័ណ យល់ថា ក្រុមហ៊ុននេះបានរំលោភលើសិទ្ធិអំណាចពលរដ្ឋ និងដីសហគមន៍ ក្នុងតំបន់ការពារ ដែលលោកសង្ស័យថា ទំនងជាគ្មានច្បាប់អនុញ្ញាតត្រឹមត្រូវ។
លោក ប៉ឹក សោភ័ណ៖ «អាជ្ញាធរនិងមន្ត្រីគឺមានការគាំទ្រខ្លាំងក្លាណាស់ទៅលើក្រុមហ៊ុនប្រតិបត្តិការមួយនេះ គឺវាមានទ្រង់ទ្រាយធំមែនទែនដែលសម្ដេចបវរធិបតីជាថ្នាក់ដឹកនាំគួរតែពិនិត្យ ពិសេសអាជ្ញាធរខេត្តដែលមានតួនាទីនាពេលបច្ចុប្បន្នត្រូវតែពិនិត្យឱ្យមែនទែនថា យ៉ាងម៉េចហើយការបំផ្លាញធនធានធម្មជាតិ»។
តំបន់ព្រៃជំនឿ ព្រៃអារក្ស និងតំបន់ព្រៃអាស្រ័យផល ដែលកំពុងឈូសឆាយនោះ មានផ្ទៃដីជាង ១ពាន់ ៥០ហិកតារ (១.០៥៥)ដែលជនជាតិដើមភាគតិចកួយចំនួន ២ភូមិ អាស្រ័យផល ធ្វើកសិកម្មដាំដុះ និងរកអនុផលព្រៃឈើច្រើនជំនាន់មកហើយ។
ព្រៃនៅតំបន់នោះ ក៏ជាជម្រកសត្វត្មាតព្រៃដ៏កម្រព្រៃកប់សព វាលស្មៅឃ្វាលគោក្របី និងអូរធម្មជាតិជាច្រើនកន្លែង។
អ្នកភូមិថា មកទល់ពេលនេះសកម្មភាពឈូសឆាយនៅតែបន្ត ធ្វើឱ្យដើមឈើតូចធំរាប់ម៉ឺនដើម ដែលជាជម្រកសត្វត្មាតព្រៃ និងតំបន់ខ្លះទៀត ជាដីស្រែចម្ការរបស់ជនជាតិដើមភាគតិចកួយជាច្រើនហិកតារ ក៏ក្រុមហ៊ុនឈូសឆាយអស់ដែរ៕
1 comment:
Development Kanduoy Meh Vear, Khmer people are still very poor. They just confiscate Khmer people's land at will.
Post a Comment