2025.02.14
អ្នកអត្ថាធិប្បាយនយោបាយ លោក ស៊ន តារា រិះគន់ប្រធានព្រឹទ្ធសភា លោក ហ៊ុន សែន ដែលចាប់ឪពុកដាក់ពន្ធនាគាររយៈពេល៣ខែហើយទាំងគ្មានកំហុស។ លោកបន្តថាលោក ហ៊ុន សែន ចេះខឹងច្រឡោត និងគំរាមកម្ទេចអ្នក ដែលប៉ះពារលើគ្រួសារខ្លួន ដោយមិនខ្វល់ពីយុត្តិធម៌ជនស្លូតត្រង់ឡើយ។ ប៉ុន្តែ មន្រ្តីបក្សកាន់អំណាចបដិសេធការលើកឡើងនេះ។
លោក ស៊ន តារា បង្ហោះសារនៅលើហ្វេសប៊ុករបស់លោកថា គិតត្រឹមថ្ងៃទី១៣ ខែកុម្ភៈ ឪពុករបស់លោក គឺលោក សុខ ស៊ុនណារ៉េត ត្រូវអាជ្ញាធររដ្ឋាភិបាលត្រកូល ហ៊ុន ចាប់ខ្លួនធ្វើជាចំណាប់ខ្មាំងអស់រយៈពេល ៣ខែមកហើយ។
លោក ស៊ន តារា ទំនងចោទសួរសំដៅលើលោក ហ៊ុន សែន ថា នៅពេលដែលគេប៉ះគ្រួសារខ្លួនខឹងច្រឡោត និងបង្ហាញការឈឺចាប់តាមកម្ទេចគេ ប៉ុន្តែ លោក ហ៊ុន សែន ធ្វើបាបឪពុករបស់លោកជាជនស្លូតត្រង់ តើមានគិតដែរទេ? ដូច្នេះ លោកថា អ្នកកុំធ្វើអំពើណា ដែលមិនចង់ឱ្យអ្នកដទៃធ្វើអំពើនោះដាក់អ្នកវិញ។
សាររិះគន់នេះ ធ្វើឡើងបន្ទាប់ពី លោក ហ៊ុន សែន ខឹងសម្បាររឿង ដែលលោកអះអាងថា គេមានគម្រោងផ្ដាច់ជីវិតលោក និងគ្រួសារ ដោយយន្តហោះគ្មានមនុស្សបើក ឬហៅថាដ្រូន (Drone) នៅភូមិគ្រឹះរបស់លោកនៅក្រុងតាខ្មៅ ហើយលោកដាក់កំហិតឱ្យស្ថានរដ្ឋមន្ត្រីហែហម រួមទាំងគណបក្សនយោបាយចេញលិខិតថ្កោលទោសតាមការចង់បានរបស់លោក។
បន្ថែមពីនេះ លោក ស៊ន តារា បានចែករំលែកសារ ភរិយារបស់លោកនាយករដ្ឋមន្ត្រី ហ៊ុន ម៉ាណែត គឺអ្នកស្រី ពេជ ចន្ទមុន្នី ដែលសរសេរថា ទោះជាមនុស្សរៀនចប់ដល់ណាក៏ដោយ មានចំណេះដឹងខ្ពស់យ៉ាងណាក៏ដោយ បើមនុស្សគ្មានសុជីវធម៌ គ្មានគុណធម៌ហើយ គឺមនុស្សគ្មានមេត្តាធម៌នៅក្នុងខ្លួនទេ គ្មានអ្នកណាគោរពនោះទេ។ ការលើកឡើងដូច្នេះ លោក ស៊ន តារា ថាបើតាមទ្រឹស្ដីគុណធម៌ ដែលអ្នកស្រី ពេជ ចន្ទមុន្នី ប្រាប់ប្រជាពលរដ្ឋនេះ ឪពុករបស់លោកជាមនុស្សស្លូតត្រង់នឹងមិនត្រូវជាប់គុកឡើយ។ ជាមួយគ្នានេះដែរ លោកជូនពរឪពុករបស់លោកឱ្យមានសុខភាពល្អ ហើយលោកសង្ឃឹមថាថ្ងៃណាមួយនឹងមានការផ្លាស់ប្ដូរ។
ឆ្លើយតបរឿងនេះ អ្នកនាំពាក្យគណបក្សកាន់អំណាច លោក សុខ ឥសាន ប្រាប់វិទ្យុអាស៊ីសេរីដោយអះអាងថា ចំណាត់ការសមត្ថកិច្ចលើលោក សុខ ស៊ុនណារ៉េត កន្លងមកជាការអនុវត្តច្បាប់ ដោយមិនជាប់ពាក់ព័ន្ធសកម្មភាពនយោបាយលោក ស៊ន តារា ដែលមាននិន្នការផ្ទុយគណបក្សប្រជាជនកម្ពុជាទេ។ លោក សុខ ឥសាន បដិសេធសាររបស់លោក ស៊ន តារា ដែលថា រឿងបង្ហោះត្រូនប៉ុនប៉ងធ្វើឃាតកើតចេញពីទង្វើរបស់លោក ហ៊ុន សែន ធ្វើបាបជនស្លូតត្រង់កន្លងទៅ។
លោក សុខ ឥសាន៖ «ឪពុកលោក ស៊ន តារា ដែលត្រូវបានចាប់ខ្លួនដោយសមត្ថកិច្ចកម្ពុជា ដោយមិនមែនពាក់ព័ន្ធជាមួយឪពុកលោក ស៊ន តារា ទេ ដោយសារគាត់ជាប់ពាក់ព័ន្ធប្រើប្រាស់គ្រឿងញៀន ដែលសមត្ថកិច្ចមានភស្តុតាងច្បាស់លាស់ ក្នុងការចាប់ខ្លួន ដូច្នេះហើយជាការអនុវត្តផ្លូវច្បាប់»។
កាលពីថ្ងៃទី១៣ ខែវិច្ឆិកា កងរាជអាវុធហត្ថខេត្តកំពង់ស្ពឺ បានចាប់ខ្លួនលោក សុខ ស៊ុនណារ៉េត អំឡុងពេលមេបញ្ជាការភូមិភាគ៣ បានហៅលោកឱ្យទៅជួប។ តុលាការខេត្តកំពង់ស្ពឺ បានចោទប្រកាន់លោក ពាក់ព័ន្ធការរក្សាទុកដោយខុសច្បាប់នូវសារធាតុញៀន និងបញ្ជូនទៅឃុំបណ្ដោះអាសន្ននៅពន្ធនាគារខេត្តនេះ។ ប៉ុន្តែ លោក សុខ ស៊ុណារ៉េត បានបដិសេធការចោទប្រកាន់ ដោយអះអាងថា លោកមិនបានដឹងរឿងនេះទេ តាំងពីដំបូងរហូតដល់ចាប់ខ្លួន និងមិនពាក់ព័ន្ធអង្គហេតុ ចោទប្រកាន់នោះឡើយ។
ជុំវិញរឿងនេះ អ្នកនាំពាក្យសមាគមអាដហុក (Adhoc) លោក យិន ម៉េងលី មានប្រសាសន៍ថា ការបន្តឃុំខ្លួនលោក សុខ ស៊ុនណារ៉េត នឹងមិនចំណេញអ្វីដល់រដ្ឋាភិបាល ឬស្ថានភាពប្រជាធិបតេយ្យនៅកម្ពុជាទេ ខណៈមជ្ឈដ្ឋានទូទៅចាត់ទុកជារឿងនយោបាយ។ លោកថា បើសិនក្ដីក្ដាំនេះជារឿងនយោបាយ ភាគីពាក់ព័ន្ធគួរតែដោះស្រាយតាមយន្តការសម្របសម្រួល ដូចអ្វី ដែលអ្នកនយោបាយសន្ទនាគ្នាកន្លងទៅ ដើម្បីលើកកម្ពស់ប្រជាធិបតេយ្យ និងតម្កល់ផលប្រយោជន៍ជាតិរួម។
លោក យិន ម៉េងលី៖ «នៅក្នុងរឿងហ្នឹងវាក៏អត់ល្អមើលដែរ ពីព្រោះគេកំពុងមើល និងតាមដានទៅលើករណីរបស់លោក សុខ ស៊ុនណារ៉េត ដែរ តើករណីនេះនឹងដំណើរការទៅយ៉ាងដូចម្តេច ដូច្នេះតុលាការគួរឱ្យគាត់បាននៅក្រៅឃុំទៅ ដើម្បីបន្ធូរបន្ថយស្ថានភាពនយោបាយផង លើកមុខមាត់របស់យើងផង ហើយវាអត់ចំណេញអ្វីទេគ្រាន់តែឃុំខ្លួនបុគ្គលម្នាក់ហ្នឹង»។
ក្នុងពេលកន្លងទៅ នៅពេលអ្នកតស៊ូនៅក្រៅប្រទេសរិះគន់លោក ហ៊ុន សែន ម្ដងៗ លោក ហ៊ុន សែន បាននិយាយទាំងកំហឹងថា បើទោះជាអ្នករិះគន់ទាំងនោះរស់នៅក្រៅប្រទេស ដែលលោកមិនអាចតាមចាប់ដាក់គុក ឬតាមធ្វើបាបដូចអ្នកក្នុងស្រុកក្ដី លោកបញ្ជាបានឱ្យសមត្ថកិច្ចស្វែងរកសាច់ញាតិ ឬឪពុកម្ដាយរបស់អ្នកទាំងនោះ ដើម្បីគំរាមកំហែងតាមការចង់បានរបស់លោក ហ៊ុន សែន ឬចាប់ដាក់គុកតែម្ដង ដូចករណីឪពុកលោក ស៊ន តារា និងប្អូនលោកប្រុសរបស់លោក ហៃ វណ្ណា ជាដើម។
គណបក្សប្រឆាំង អ្នកឃ្លាំមើលចាត់ទុកសំណុំរឿងនេះថា ជាការគាបសង្កត់ឆ្លងដែន ដោយរដ្ឋាភិបាលត្រកូល ហ៊ុន ប្រើលេសចាប់លោក សុខ ស៊ុនណារ៉េត ធ្វើជាចំណាប់ខ្មាំងក្នុងគោលដៅដាក់សម្ពាធលើលោក ស៊ន តារា ពីព្រោះកន្លងមកលោក ហ៊ុន សែន អូសទាញលោក ស៊ន តារា ឱ្យផ្ដាច់ខ្លួនចេញពីគណបក្សប្រឆាំងមិនបានដូចបំណង។ ពួកគាត់ទាមទារឱ្យរដ្ឋាភិបាលដោះលែងលោក សុខ ស៊ុនណារ៉េត ឱ្យមានសេរីភាព ដោយឥតលក្ខខណ្ឌ៕
No comments:
Post a Comment