2025.02.21
សង្គមស៊ីវិល និងអ្នកធ្វើការផ្នែកដោះមីនសប្បាយចិត្ត ដែលអាមេរិកផ្ដល់ជំនួយឥតសំណងឡើងវិញ ក្រោយពីផ្អាកជិត ១ខែ តាមរយៈទីភ្នាក់ងារ សហរដ្ឋអាមេរិកសម្រាប់ការអភិវឌ្ឍអន្តរជាតិ ហៅកាត់ថា USAID ក្រោមរដ្ឋបាលថ្មី នៃប្រធានាធិបតីអាមេរិកលោក ដូណាល់ ត្រាំ។ អ្នកឃ្លាំមើលថា រដ្ឋាភិបាល ត្រូវតែរៀបចំកញ្ចប់ថវិកាជាតិខ្លះ សម្រាប់បេសកកម្មសម្អាតមីនដោយខ្លួនឯង ដើម្បីទប់ស្កាត់បញ្ហាជាប់គាំងមួយចំនួន ដោយសារតែការផ្ដាច់ជំនួយម្ដងទៀត។
ស្របពេលដែលមន្ត្រីសង្គមស៊ីវិល និងអាជ្ញាធរមីនកម្ពុជាព្រួយបារម្ភពីផលប៉ះពាល់បុគ្គលិកដោះមីន កម្ពុជា ជាង ១ពាន់នាក់ ដោយសារតែបាត់បង់ការងារ គ្មានប្រាក់ចំណូល ក្រោយពីសហរដ្ឋអាមេរិកបានផ្អាកផ្ដល់ជំនួយនោះ ប៉ុន្តែ នៅថ្ងៃទី២០ ខែកុម្ភៈនេះ អាមេរិកបានផ្ដល់ជំនួយឥតសំណង់ឡើងវិញ ដើម្បីបន្តកិច្ចសហប្រតិបត្តិការបោសសម្អាតមីន និងសំណល់យុទ្ធភណ្ឌ មិនទាន់ផ្ទុះនៅកម្ពុជា ទៅតាមកិច្ចសន្យា ដែលមានស្រាប់។
ប្រតិភូរាជរដ្ឋាភិបាលទទួលបន្ទុកអគ្គនាយកនៃមជ្ឈមណ្ឌលសកម្មភាពកម្ចាត់មីន (CMAC) លោក ហេង រតនា បង្ហោះសារនៅលើទំព័រហ្វេសប៊ុក (Facebook) របស់លោក នៅថ្ងៃទី២០ កុម្ភៈថា អង្គភាពស៊ីម៉ាក់ បានទទួលព័ត៌មានថា អាមេរិកបានទទួលការលើកលែងឱ្យបើក និងបន្តកិច្ចសហប្រតិបត្តិការបោសសម្អាតគ្រាប់មីន និងសំណល់យុទ្ធភណ្ឌសង្គ្រាម ដែលមិនទាន់ផ្ទុះឡើងវិញ ទៅតាមកិច្ចសន្យា ដែលមានស្រាប ដើម្បីបន្តបេសកកម្មឡើងវិញ បានធម្មតា។
ការផ្ដល់ជំនួយឥតសំណង់ឡើងវិញនេះ ធ្វើឡើងក្រោយពីសហរដ្ឋអាមេរិក បានប្រកាសផ្អាកផ្ដល់ជំនួយដល់កម្ពុជា រយៈពេល ៣ខែតាមរយៈទីភ្នាក់ងារ សហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ក្រោមរដ្ឋបាលថ្មីនៃប្រធានាធិបតីអាមេរិក លោក ដូណាល់ ត្រាំ (Donald Trump)។
ក្រោយមក មជ្ឈមណ្ឌលសកម្មភាពកម្ចាត់មីន ហៅកាត់ថា CMAC បានចេញសេចក្ដីប្រកាសព័ត៌មាន កាលពីថ្ងៃទី១៣ ខែកុម្ភៈថា ក្រោយផ្ដាច់ជំនួយភ្លាមៗ របស់រដ្ឋាភិបាលអាមេរិក នៅថ្ងៃទី២៥ ខែមករា បានធ្វើឱ្យប៉ះពាល់ដល់កម្លាំងជំនាញបច្ចេកទេសអង្គភាព CMAC ចំនួន ២១០នាក់ ត្រូវផ្អាកការងារ ខណៈដែលបេសកកម្មបោសសម្អាតមីន កំពុងតែធ្វើសកម្មភាពស្ថិតក្នុងខេត្តកំពង់ចាម ក្រចេះ ស្ទឹងត្រែង មណ្ឌលគីរី រតនគីរី ត្បូងឃ្មុំ ស្វាយរៀង និងខេត្តព្រៃវែង ក្រោមការគាំទ្ររបស់អាមេរិក។ ទោះយ៉ាងណាក្ដី លោក ហេង រតនាបានប្រាប់អ្នកសារព័ត៌មាន នៅក្នុងស្រុកថា នៅពេលនេះ បុគ្គលិកចំនួន ២១០នាក់ បន្តភារកិច្ចក្នុងអង្គភាពស៊ីម៉ាក់ បានធម្មតាឡើងវិញ។
វិទ្យុអាស៊ីសេរីពុំអាចទាក់ទងប្រតិភូរាជរដ្ឋាភិបាលទទួលបន្ទុកអគ្គនាយកនៃមជ្ឈមណ្ឌលសកម្មភាពកម្ចាត់មីន (CMAC) លោក ហេង រតនា និងអ្នកនាំពាក្យនាយករដ្ឋមន្ត្រី ហ៊ុន ម៉ាណែត គឺ លោក មាស សុភ័ណ្ឌ ដើម្បីឆ្លើយតបជុំវិញរឿងនេះបានទេ នៅថ្ងៃទី២១ កុម្ភៈ ដោយហៅទូរស័ព្ទចូលតែគ្មានអ្នកទទួល។
ទាក់ទិនរឿងនេះ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ សេក សុជាតិ លើកឡើងថា ការផ្ដល់ជំនួយឥតសំណង់ សម្រាប់បោសសម្អាតមីនឡើងវិញ របស់សហរដ្ឋអាមេរិក គឺជារឿងដ៏ល្អ ព្រោះថា នៅកម្ពុជាបច្ចុប្បន្ន មានតំបន់មានគ្រាប់មីនមិនទាន់ផ្ទុះ មានជាច្រើនកន្លែង ដែលបង្កជាក្ដីបារម្ភដល់ពលរដ្ឋ និងសត្វព្រៃជាដើម។ ទន្ទឹមនឹងនោះ លោកបន្តថា រដ្ឋាភិបាលគួរតែ រៀបចំកញ្ចប់ថវិកាជាតិខ្លះ ដើម្បីទុកចំណាយលើការបោសស្អាតមីន ដោយខ្លួនឯង ក្នុងករណីដាច់ជំនួយម្ដងទៀត។
សេក សុជាតិ៖ «រដ្ឋាភិបាលខ្លួនឯង ក៏គួរតែគិតគូរ និងពិចារណាទៅដល់កញ្ចប់ថវិកាប្រចាំឆ្នាំ ដែលជាចំណាយបន្ទុករបស់រដ្ឋ ហើយដាក់ទៅស្នើសុំសភា រៀងរាល់ឆ្នាំដើម្បី ជាកញ្ចប់មួយដែលអាចធានានូវនិរន្តរភាពថវិកា ប្រាក់បៀវត្សរ៍សម្រាប់មន្ត្រីទាំងអស់ ដើម្បីកុំឱ្យពេលពេលដែលជួបវិបត្តិណាមួយ ពេលដែលដាច់ជំនួយ ធ្វើឱ្យពួកគាត់អត់ការងារ»។
ជាមួយគ្នានេះ ភ្លាមៗ ក្រោយពីអាមេរិកផ្អាកជំនួយរដ្ឋាភិបាលចិន កាលពីថ្ងៃទី៥ ខែកុម្ភៈ បានផ្ដល់ជំនួយឥតសំណងចំនួន ៤លាន ៤សែនដុល្លារ មកឱ្យកម្ពុជា សម្រាប់ការងារបោសសម្អាតគ្រាប់មីន។ គម្រោងនេះ មានរយៈពេល ១២ខែ ដើម្បីប្រតិបត្តិការនៅលើភូមិសាស្ត្រខេត្តកំពង់ធំ សៀមរាប ឧត្តរមានជ័យ ព្រះវិហារ ស្ទឹងត្រែង និងខេត្តក្រចេះ ព្រមទាំងមណ្ឌលសុនខ នៅខេត្តកំពង់ឆ្នាំង។ ទន្ទឹមនឹងនោះជំនួយនេះ នឹងគាំទ្រអ្នកជំនាញបច្ចេកទេសជាង ៤០០នាក់របស់អង្គភាព CMAC និង ត្រូវអនុវត្តកិច្ចប្រតិបត្តិការសកម្មភាពសំខាន់ៗ មួយចំនួនដូចជា ការបោសសម្អាតផ្ទៃដី ដែលមានបញ្ហាគ្រាប់មីន និងសំណល់យុទ្ធភណ្ឌមិនទាន់ផ្ទុះ ចំនួនជាង ៣ពាន់ ៤រយ (៣.៤០០ហិកតា)
បច្ចុប្បន្ន កម្ពុជានៅមានផ្ទៃដីមានគ្រាប់មីនជាង ១ពាន់ ៦រយ( ១.៦០០) គីឡូម៉ែត្រក្រឡា ខណៈប្រជាជនប្រមាណ ១លាននាក់ រស់នៅតំបន់នោះ ដែលប្រឈមនឹងគ្រោះថ្នាក់។ របាយការណ៍របស់អាជ្ញាធរមីន ឲ្យដឹងថា គិតចាប់ពីឆ្នាំ១៩៧៩ ដល់ឆ្នាំ២០២៤ ជនរងគ្រោះ ដែលបានស្លាប់ដោយសារគ្រាប់មីននិងគ្រាប់មិនទាន់ផ្ទុះក្នុងប្រទេសកម្ពុជា មានចំនួនប្រមាណ២ម៉ឺន ( ២០.០០០) នាក់ និងអ្នករបួសមានចំនួនជាង ៤ម៉ឺន ៥ពាន់ ( ៤៥.០០០) នាក់៕
No comments:
Post a Comment