នាយករដ្ឋមន្ត្រីកម្ពុជាព្រមានចាត់វិធានការឆ្លើយតប ប្រសិនបើយោធាថៃបំពានលើបន្ទាត់ក្រហម ហ៊ានបិទប្រាសាទតាមាន់ធំ។ លោក ហ៊ុន ម៉ាណែត បានលើកឡើងជាថ្មីថា កម្ពុជាបានត្រៀមគ្រប់មធ្យោបាយទាំងអស់ ដើម្បីប្រឆាំងការរំលោភបំពានពីភាគីថៃ។
លោក ហ៊ុន ម៉ាណែត បានសរសេរលើទំព័រហ្វេសប៊ុកនៅថ្ងៃទី២២ ខែកក្កដានេះថា៖ «កម្ពុជាមិនរំលោភបំពានលើអ្នកណាទេ ប៉ុន្តែកម្ពុជាក៏មិនឱ្យអ្នកណាមួយរំលោភបំពានលើខ្លួននោះដែរ។ កម្ពុជាមានសមត្ថភាពគ្រប់គ្រាន់និងបានត្រៀមខ្លួនជាស្រេច ក្នុងការការពារខ្លួននិងការពារបូរណភាពទឹកដី តាមគ្រប់មធ្យោបាយទាំងអស់ ប្រឆាំងនឹងការរំលោភបំពាន»។
នាយករដ្ឋមន្ត្រីកម្ពុជា ក៏បានប្រាប់ឱ្យភាគីថៃប្រកាន់យកសុចរិតភាព និងឈប់បៀមឈាមព្រួសដាក់កម្ពុជា ប្រសិនបើចង់កសាងទំនុកចិត្តគ្នាឡើងវិញ បន្ទាប់ពីលោកបានអះអាងថា អ្នកដឹកនាំនយោបាយថៃ យោធាថៃ និងបណ្ដាញសារព័ត៌មានថៃ បានចោទប្រកាន់មកលើកម្ពុជាដោយគ្មានមូលដ្ឋាន ថាបានលូកដៃចូលនយោបាយផ្ទៃក្នុងរបស់ថៃ និងបានដាក់គ្រាប់មីនថ្មីបង្កគ្រោះថ្នាក់ដល់ទាហានថៃ។
ការព្រមានពីនាយករដ្ឋមន្ត្រីកម្ពុជានៅពេលនេះ បានធ្វើឡើងបន្ទាប់ពីមេយោធាភូមិភាគ២របស់ថៃលោក ប៊ុនសិន ផាតក្លាង (Boonsin Padklang) និងអនុរដ្ឋមន្ត្រីការពារជាតិថៃបានប្រកាសពីគម្រោង ចង់បិទប្រាសាទតាមាន់ធំរយៈពេល០៧ថ្ងៃ និងការដាក់ពង្រាយកម្លាំងប៉ូលិសព្រំដែន ឱ្យជួយគាំទ្រក្រុមយោធាថៃ ប្រចាំការនៅប្រាសាទតាមាន់ធំ សម្រាប់ត្រៀមបង្ក្រាបលើពលរដ្ឋខ្មែរដែលទៅកម្សាន្តនៅប្រាសាទតាមាន់ធំ ។
លើសពីនេះ ទាហានថៃបានឈូសឆាយព្រៃធ្វើផ្លូវបេតុងនៅក្នុងតំបន់ជម្លោះមុំបី និងដើរល្បាតខុសតម្រាយផ្លូវចូលទឹកដីកម្ពុជាជាញឹកញាប់ រហូតមានទាហានដើរជាន់គ្រាប់មីនផ្ទុះសល់ពីសង្គ្រាមរបួស ០៣នាក់ កាលពីពេលថ្មីៗនេះ ហើយបែរជាចោទទាហានកម្ពុជា ថាបានដាក់បង្កប់គ្រាប់មីនថ្មីរំលោភលើអនុសញ្ញាអន្តរជាតិទីក្រុងអូតាវ៉ា ស្ដីពីការហាមឃាត់ប្រើប្រាស់គ្រាប់មីនទៅវិញ។
ក្រសួងការបរទេសកម្ពុជាកាលពីថ្ងៃទី២១ ខែកក្កដា ក៏បានចេញសេចក្ដីបំភ្លឺថា ទាហានថៃដើរជាន់គ្រាប់មីនផ្ទុះ ដោយសារតែដើរល្បាតខុសពីផ្លូវដែលប្រទេសទាំងពីរសម្របសម្រួលគ្នា ចូលមកទឹកដីកម្ពុជា ដែលជាតំបន់មានហានិភ័យបង្កគ្រោះថ្នាក់ពីគ្រាប់មីនបន្សល់ពីសម័យសង្គ្រាម។
អ្នកសិក្សាបញ្ហានយោបាយលោក ប៉ោ មករា បានយល់ឃើញថា ស្របពេលជម្លោះព្រំដែនកម្ពុជានិងថៃកាន់តែតានតឹង រដ្ឋាភិបាលកម្ពុជាគួរតែពន្លឿនស្វែងរកដំណោះស្រាយតាមរយៈច្បាប់អន្តរជាតិ ដោយប្រើប្រាស់យន្តការកិច្ចព្រមព្រៀងសន្ដិភាពទីក្រុងប៉ារីស យន្តការអាស៊ាន និងយន្តការតុលាការយុត្តិធម៌អន្តរជាតិនៃអង្គការសហប្រជាជាតិជាដើម។
ព្រោះកន្លងមក យើងឃើញហើយថា ភាគីថៃដែលមានការព្រមព្រៀងជាមួយកម្ពុជា ដូចជា MoUឆ្នាំ២០០០ អត់បានគោរពទេ។ អ៊ីចឹង កម្ពុជាត្រូវតែទៅរកយន្តការទាំងបីនេះ ដើម្បីចាប់បង្ខំថៃឱ្យគោរព ឬយកយន្តការទាំង៣នេះ ធ្វើជាសាក្សីដឹងឭ ដើម្បឱ្យស្ថានភាពព្រំដែនថយ ឬបញ្ចប់ជម្លោះតែម្ដង។
— លោក ប៉ោ មករា
លោក ប៉ោ មករា បានបន្តថា ប្រសិនបើកម្ពុជានៅតែយឺតយ៉ាវស្វែងរកដំណោះស្រាយតាមច្បាប់អន្តរជាតិ នោះនឹងផ្ដល់ឱកាសឱ្យប្រទេសថៃ អាចធ្វើសកម្មភាពរំលោភបំពានលើកម្ពុជាតាមអំពើចិត្តបន្ថែមទៀត៕
1 comment:
When will the idiot Hun Se invoke the Paris Peace Accord to solve all border disputes ?
Post a Comment