ក្មេងប្រុសម្នាក់សម្រាកព្យាបាលនៅមន្ទីរខេត្តក្រចេះ ក្រោយពុលនំបុ័ងកាលពីចុងសប្តាហ៍មុន។ រូបថត សហការី
អ្នកពុលនំបុ័ង ៥ នាក់ចេញពីពេទ្យខណៈភាគច្រើនកំពុងព្យាបាល
Mon, 7 March 2016 ppp
ប៊ុន សេងគង់
ក្រចេះ: មនុស្ស ៥ នាក់ក្នុងចំណោម ៤២ នាក់ជាសិស្ស និងឪពុកម្ដាយដែលសង្ស័យពុលនំបុ័ងត្រូវបានអនុញ្ញាតឲ្យចេញពីមន្ទីរពេទ្យពីម្សិលមិញខណៈដែលអ្នកខ្លះនៅសម្រាកក្នុងមន្ទីរពេទ្យបន្ទាប់ពីបានបរិភោគនំប៉័ងក្នុងកម្មវិធីមួយនៅស្រុកឆ្លូងខេត្តក្រចេះពីថ្ងៃសៅរ៍។
លោក ឌួង សុទ្ធី អធិការស្រុកឆ្លូងបានឲ្យដឹងពីម្សិលមិញថាជនរងគ្រោះទាំងនោះមានសិស្សចំនួន ៣៥ នាក់រៀនចាប់ថ្នាក់ទី ៤ ដល់ទី ៦ និងឪពុកម្តាយ ៧ នាក់ដែលបានបរិភោគនំប៉័ងនៅសាលាបឋមសិក្សាឆ្លូងក្នុងអំឡុងពេលប្រកួតអំណាន។
លោកបានថ្លែងថាមនុស្សប្រហែល ២៧០ នាក់បានចូលរួមក្នុងកម្មវិធីនោះហើយមាននំប៉័ងត្រូវបានចែកដោយអង្គការមូលនិធិកុមារកម្ពុជា។ លោកថាជនរងគ្រោះមានអាការរាករូស និងឈឺក្បាល ។
ទោះបីយ៉ាងណាមន្ត្រីអង្គការម្នាក់ដែលសុំមិនបញ្ចេញឈ្មោះបានបដិសេធពីម្សិលមិញថាអង្គការគ្រាន់តែជួយឧបត្ថម្ភជាថវិកាឲ្យសាលាជាអ្នកចាត់ចែងប៉ុណ្ណោះ។
លោក លី សុវណ្ណ អ្នកនាំពាក្យក្រសួងសុខាភិបាលកាលពីម្សិលមិញបានថ្លែងថាក្រសួង និងមន្ទីរសុខាភិបាលខេត្តកំពុងសិក្សាសំណាកនំប៉័ងនោះតែមិនទាន់ដឹងលទ្ធផលទេ។
លោកបានកត់សម្គាល់ថា ការពុលអាហារភាគច្រើនពាក់ព័ន្ធនឹងអនាម័យមិនល្អក្នុងពេលរៀបចំចម្អិនអាហារ និងការរក្សាទុកមិនត្រឹមត្រូវ។
លោកថា៖ «អនាម័យគឺជាបញ្ហាធំបំផុតក្នុងការចម្អិន ការវេចខ្ចប់ និងការរក្សាអាហារដែលចាំបាច់ត្រូវអប់រំចុងភៅ»។
កាលពីឆ្នាំមុនក្រសួងសុខាភិបាល និងអង្គការសុខភាពពិភពលោកបានបណ្តុះបណ្តាលមន្ត្រីពាក់ព័ន្ធឲ្យចេះពីរបៀបត្រួតពិនិត្យអនាម័យរបស់អាជីវកម្មលក់ម្ហូបអាហារផងដែរ៕ TK
Igor Kossov
No comments:
Post a Comment