ដោយ សុ ជីវី
2016-10-11
លោក ធន សារាយ (ស្ដាំ) ប្រធានសមាគមការពារសិទ្ធិមនុស្សអាដហុក (ADHOC) ពេលទៅឃ្លាំមើលនៅមុខអង្គភាពប្រឆាំងអំពើពុករលួយ នៅថ្ងៃទី២៩ ខែមេសា ឆ្នាំ២០១៦។ RFA/Cheu Sideth
RFA/Cheu Sideth
សាលាដំបូងរាជធានីភ្នំពេញ កោះហៅប្រធានសមាគមអាដហុក (ADHOC) លោក ធន សារាយ ឲ្យចូលបំភ្លឺក្នុងនាមសាក្សីក្នុងសំណុំរឿងសូកប៉ាន់សាក្សី ពាក់ព័ន្ធនឹងការចោទប្រកាន់រឿងអាស្រូវស្នេហារវាងប្រធានស្ដីទីគណបក្សសង្គ្រោះជាតិ លោក កឹម សុខា និងនាង ខុម ចាន់តារាទី ហៅ ស្រីមុំ។
មន្ត្រីសមាគមអាដហុក បញ្ជាក់ថា លោក ធន សារាយ កំពុងជាប់បេសកកម្មនៅក្រៅប្រទេស ដែលមិនទាន់ច្បាស់ថា អាចនឹងវិលមកវិញទាន់ពេលវេលាដែលតុលាការកោះហៅនោះ ឬយ៉ាងណាទេ?
ចៅក្រមស៊ើបសួរនៃសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ កោះហៅលោក ធន សារាយ ឲ្យចូលបំភ្លឺនៅថ្ងៃទី២៤ ខែតុលា ឆ្នាំ២០១៦។
ដីកាដែលចុះនៅថ្ងៃទី៧ ខែតុលា បញ្ជាក់ថា លោក ធន សារាយ ត្រូវចូលទៅបំភ្លឺនៅម៉ោង ៩ព្រឹក នៅបន្ទប់ «ស» ជាន់ទី៥ ដោយត្រូវនាំយកលិខិតផ្សេងៗដែលជាប់ទាក់ទងនឹងសំណុំរឿងទៅជាមួយ ប្រសិនបើមាន។
មន្ត្រីផ្នែករដ្ឋបាលនៃសមាគមអាដហុក នៅថ្ងៃទី១១ ខែតុលា បានសរសេរតបទៅវិញនៅលើដីកានោះថា ប្រធានសមាគម គឺលោក ធន សារាយ កំពុងជាប់បេសកកម្មនៅក្រៅប្រទេស។
មន្ត្រីអង្កេតផ្នែកសិទ្ធិមនុស្សនៃសមាគមអាដហុក លោក សឹង សែនករុណា មានប្រសាសន៍ថា លោកពុំមានព័ត៌មានជាក់លាក់ចំពោះការវិលត្រឡប់មកពីបរទេសរបស់លោក ធន សារាយ នៅឡើយទេ។ លោក ករុណា មានចម្ងល់ចំពោះដីកានេះ ដ្បិតកន្លងទៅ មន្ត្រីសមាគមអាដហុក មានសិទ្ធិពេញលេញក្នុងការបំពេញការងាររបស់ខ្លួន។ លោកថា សំណុំរឿងចោទប្រកាន់សូកប៉ាន់សាក្សី ក៏មិនជាប់ទាក់ទងនឹងលោក ធន សារាយ ដែរ៖ «កិច្ចការហ្នឹងដូចមិនទាក់ទងអីដល់គាត់ទេ ព្រោះធម្មតាអាដហុកទុកសិទ្ធិឲ្យបុគ្គលិករបស់ខ្លួនមានសិទ្ធិក្នុងការធ្វើកិច្ចការផ្ទាល់ៗខ្លួនដោយឯករាជ្យរបស់ខ្លួន ក្នុងការសម្រេចចិត្តធ្វើកិច្ចការផ្សេងៗទៅតាមករណីនីមួយៗ»។
ពាក់ព័ន្ធនឹងរឿងអាស្រូវស្នេហារវាងប្រធានស្ដីទីគណបក្សសង្គ្រោះជាតិ និងនាង ខុម ចាន់តារាទី នេះ មន្ត្រីសមាគមអាដហុក ចំនួន ៤នាក់កំពុងជាប់ឃុំ ដោយត្រូវចោទប្រកាន់ថាបានសូកប៉ាន់សាក្សី។ អ្នកទាំងនោះរួមមាន លោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុន្នី។ ចំណែកអគ្គលេខាធិការរង គ.ជ.ប និងជាអតីតមន្ត្រីសមាគមអាដហុកដែរនោះ គឺលោក នី ចរិយា ក៏កំពុងជាប់ឃុំដែរ។ ក្រៅពីនេះ ក៏មានមន្ត្រីសមាគមនេះមួយចំនួនទៀត និងប្រធានមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ក៏ត្រូវកោះហៅឲ្យចូលបំភ្លឺក្នុងនាមសាក្សីដែរ។
ទាក់ទងនឹងករណីលោក ធន សារាយ នេះ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ធ្លាប់ថ្លែងប្រាប់ទូរទស្សន៍ក្នុងស្រុកថា លោកធ្លាប់ជជែកជាមួយនឹងលោក ធន សារាយ ថាព្យាយាមទប់ស្កាត់មិនឲ្យរឿងនេះរាលដាលដល់រូបលោក៖ «ដូចខ្ញុំបានបញ្ជាក់ប្រាប់ទៅលោក ធន សារាយ ដែលជាប្រធានអាដហុកដែរ យើងខ្ញុំខិតខំគ្រប់គ្រងរឿងហ្នឹង ធ្វើម៉េចកុំឲ្យវារាល ជាពិសេសកុំឲ្យវារាលដល់លោក ធន សារាយ ខ្លួនឯងទេ ទោះបីជាអ្នកណាឆ្លើយដាក់ថាយ៉ាងម៉េចក៏ដោយ។ យើងខ្ញុំខំប្រឹងកាត់វាកុំឲ្យវារាលដល់លើបញ្ហាហ្នឹង»។
បើទោះបីជាយ៉ាងណា ករណីនេះ មន្ត្រីអង្កេតផ្នែកសិទ្ធិមនុស្សនៃសមាគមអាដហុក លោក សឹង សែនករុណា មានសុទិដ្ឋិនិយមចំពោះការកោះហៅប្រធានសមាគមរបស់លោកនៅពេលនេះ៖ «យើងមានជំនឿចិត្តថាអាដហុកយើងពុំបានប្រព្រឹត្តអ្វីដូចការចោទប្រកាន់នេះ។ ការហៅហ្នឹង យើងគិតថាអាចជាការដើម្បីដោះបន្ទុកវិញក៏ថាបាន។ យើងអត់គិតថាការកោះហៅហ្នឹងជាការគំរាម ឬយ៉ាងណាចំពោះអាដហុកទេ»។
រហូតមកដល់ពេលនេះ សំណុំរឿងដែលនាំឲ្យមន្ត្រីអាដហុក និងអគ្គលេខាធិការរង គ.ជ.ប ត្រូវចាប់ឃុំខ្លួន និងមានមនុស្សមួយចំនួនទៀតត្រូវកោះហៅចូលទៅតុលាការនេះ ត្រូវអ្នកវិភាគនយោបាយចាត់ទុកថា ជាសំណុំរឿងដែលជាប់ពាក់ព័ន្ធនឹងរឿងនយោបាយ។ បញ្ហានេះអាចធូរស្រាលទៅវិញ នៅក្រោយស្ថានភាពតានតឹងផ្នែកនយោបាយបានបញ្ចប់៕
No comments:
Post a Comment