ដោយ ហ៊ុំ ចំរើន
2017-04-02
ទឹកស្ទឹងប៉ៃលិន នៅសង្កាត់បរយ៉ាខា ក្រុងប៉ៃលិន ខេត្តប៉ៃលិន នៅថ្ងៃទី២ ខែមេសា ឆ្នាំ២០១៧។ Photo Provided
ប្រជាពលរដ្ឋរាប់រយគ្រួសារនៅខេត្តប៉ៃលិន កំពុងព្រួយបារម្ភបញ្ហាគ្មានទឹកប្រើប្រាស់ប្រចាំថ្ងៃ ដោយសារក្រោយពីភ្លៀងធំជាប់គ្នាពីរថ្ងៃមក ធ្វើឲ្យទឹកស្ទឹងប៉ៃលិនឡើងល្អក់ប្រែពណ៌ក្រហម ដែលមិនអាចយកទៅប្រើការបាន។ ប្រធានមន្ទីរបរិស្ថានខេត្តប៉ៃលិន អះអាងថា បញ្ហានេះមានរយៈពេលខ្លី ប្រសិនបើពុំមានភ្លៀងបន្តទៀត ទឹកស្ទឹងនឹងប្រែពណ៌ទៅជាធម្មតាវិញ។
អស់រយៈពេល ៣ថ្ងៃហើយដែលទឹកស្ទឹងប៉ៃលិននៅមានសភាពល្អក់ពណ៌ក្រហម ដែលពលរដ្ឋមិនអាចយកទៅប្រើប្រាស់បាន។
ប្រជាពលរដ្ឋម្នាក់រស់នៅសង្កាត់បរយ៉ាខា ក្រុងប៉ៃលិន លោក សុខ ស៊ីថា ឲ្យដឹងថា តាំងពីមានភ្លៀងធំនៅថ្ងៃទី៣១ មីនា មក គឺទឹកស្ទឹងប៉ៃលិននៅតែមានពណ៌ក្រហម ហើយពុំទាន់អាចយកទៅប្រើប្រាស់បាននៅឡើយទេ។ លោកអះអាងថា ទឹកពីស្ទឹងប៉ៃលិន ជាប្រភពទឹកសំខាន់ដែលគ្រួសាររបស់លោក និងពលរដ្ឋរាប់រយគ្រួសារផ្សេងទៀតតែងតែដងយកទៅប្រើប្រាស់ជាប្រចាំ៖ «បើយើងយកមកដាំបាយ ដាំមិនកើតទេ វាទៅជាពណ៌ដូចទឹកក្រឡុកភក់ទើបកាយថ្មីៗ ហើយទឹកបែបនេះវាមិនងាយរងទេ។ ខ្ញុំអាងតែទឹកស្ទឹងនេះឯងគ្រាន់ប្រើ មិនបានបូមទឹកស្តុកទុកប្រើទេ»។
ចំណែកពលរដ្ឋម្នាក់ទៀត លោក មុំ រ៉ី មានប្រសាសន៍ថា កាលពីមុនភ្លៀងមួយថ្ងៃ លោកបានបូមទឹកពីស្ទឹងមួយនេះដាក់ពេញពាង និងអាងស្តុកទឹករួចមកហើយ ធ្វើឲ្យលោកពុំមានបញ្ហារឿងខ្វះទឹកប្រើប្រាស់ទេអំឡុងពេលនេះ។ ប៉ុន្តែលោកអះអាងថា ទឹកទាំងអស់នេះអាចប្រើបានប្រមាណ ៥ថ្ងៃទៀត ហើយលោកថានៅពេលដែលអស់ទឹកពីពាងទៅ ពុំដឹងបានទឹកពីណាយកមកប្រើប្រាស់បន្តទៀតទេ ពីព្រោះទឹកនៅក្នុងស្ទឹងល្អក់ពណ៌ក្រហមមិនអាចយកមកប្រើប្រាស់បាននៅឡើយ៖ «បើល្អក់រយៈពេលយូរ គឺអ្នកប្រើប្រាស់ទឹកស្ទឹងអត់មានអីប្រើទេ ទាល់តែទិញទឹកឡានទៀត។ បើព្រឹកមិញខ្ញុំចុះទៅផ្នែកខាងលើរាងរងខ្លះ បើផ្នែកខាងក្រោមនៅតែល្អក់ខាប់ជាតិដីក្រហម។ ខ្ញុំព្រួយបារម្ភខ្លាចបើទឹកនៅតែល្អក់រហូត មានទឹកអីប្រើ ព្រោះដូចផ្ទះខ្ញុំអី អត់បានភ្ជាប់ទឹកស្អាតនឹងគេទេ គឺខ្ញុំប្រើទឹកស្ទឹង»។
អ្នកភូមិបន្ថែមថា កាលពីពេលភ្លៀងធំថ្ងៃដំបូង ទឹកស្ទឹងប៉ៃលិនបានប្រែពណ៌ក្រហមមួយរំពេច ហើយពេលនោះធ្វើឲ្យត្រីក្នុងស្ទឹងមួយចំនួនបានពុលងាប់ ដោយមិនដឹងមូលហេតុ។ ចំណែកអ្នកស្រុកក៏មិនហ៊ានយកទឹកពីស្ទឹងមួយនេះទៅប្រើប្រាស់នោះដែរ។
ឆ្លើយតបនឹងបញ្ហានេះ ប្រធានមន្ទីរបរិស្ថាន ខេត្តប៉ៃលិន លោក គឹម សុខា មានប្រសាសន៍ថា ទឹកស្ទឹងឡើងពណ៌ក្រហមដោយសារទាហានកងវិស្វកម្មកំពុងធ្វើផ្លូវក្រវាត់ព្រំដែន ដែលនៅតំបន់ខ្លះជាដីក្រហម ហើយចំពេលដែលមានភ្លៀងធំធ្វើឲ្យទឹកភ្លៀងហូរធ្លាក់ស្ទឹងប៉ៃលិន ទើបបណ្ដាលឲ្យទឹកប្រែពណ៌ក្រហម។ លោកអះអាងថា បើទោះជាទឹកស្ទឹងប្រែពណ៌ក្រហមក្ដី ប៉ុន្តែមិនទាន់មានសញ្ញាណាមួយដែលប៉ះពាល់ដល់សុខភាពពលរដ្ឋនៅឡើយទេ៖ «ធម្មតាគាត់មិនប្រើដោយផ្ទាល់ទេ ភាគច្រើនគាត់ជីកធ្វើជាអណ្ដូងយកច្រោះយកទឹកប្រើ ព្រោះដីនៅប៉ៃលិន ជាប្រភេទដីថ្មលាយខ្សាច់ ហើយពេលយើងជីកអណ្ដូង វាទៅអាចច្រោះបានទឹកប្រើប្រាស់ហើយ»។
លោកបន្ថែមថា ប្រសិនបើពុំមានភ្លៀងធំនៅតាមព្រំដែនខេត្តប៉ៃលិន បន្តទៀត គឺប្រមាណ ៣ថ្ងៃខាងមុខ ទឹកស្ទឹងមួយនេះនឹងប្រែពណ៌ទៅជាថ្លា ហើយប្រជាពលរដ្ឋអាចយកប្រើប្រាស់បានដូចធម្មតាឡើងវិញ៖ «យើងអត់បានយកទឹកទៅសិក្សាទេ ប៉ុន្តែតាមទម្លាប់អ្នកភ្នំយើងមើលទៅ ដោយសារដីមិនមានជាតិពុលទេ ដូច្នេះវាគ្រាន់តែមានសភាពល្អក់ប៉ុណ្ណឹងទេ។ បើដីមានជាតិពុល ទឹកមានជាតិពុលតាំងពីដើមមកហើយ។ ដោយសារយើងមើលទៅវាជាល្បាប់ដីភក់នៅលើ ដូច្នេះយើងសន្និដ្ឋានថាដីនោះវាមិនមានជាតិពុលសំខាន់ទេ»។
ទោះជាយ៉ាងនេះក្ដី អតីតមន្ត្រីសម្របសម្រួលអង្គការបណ្ដាញការពារទន្លេបី និងជាអ្នកឃ្លាំមើលបរិស្ថាន លោក មៀច មាន ពន្យល់ថា មានករណីមួយចំនួនដែលបណ្ដាលឲ្យទឹកស្ទឹងប្រែពណ៌ល្អក់ក្រហមខុសប្រក្រតី គឺបណ្ដាលមកពីការជីកដីទ្រង់ទ្រាយធំនៅប៉ែកខាងលើស្ទឹង ដែលស្ថានដីនៅតំបន់នោះមានពណ៌ក្រហម ហើយនៅពេលមានភ្លៀងធំ ក៏នាំដីក្រហមហូរចូលមកស្ទឹងតែម្ដង។
លោកសង្កត់ធ្ងន់ថា បញ្ហាគ្រោះធម្មជាតិមិនបណ្ដាលឲ្យទឹកពណ៌ក្រហមឆាប់រហ័សនោះឡើយ៖ «ព្រោះអីវាធ្វើឲ្យល្អក់នាំឲ្យពិបាកប្រើប្រាស់ទឹក ប៉ុន្តែវានឹងបាត់ទៅវិញនៅពេលដែលរាំងភ្លៀង។ ភ្លៀងអស់ទៅ វាហូរតែម៉ាឆាវវាអស់ហើយ។ តែបើសិនណាសកម្មភាពនឹងប្រព្រឹត្តដោយមនុស្ស វាអាចបន្តរហូតរាប់អាទិត្យរាប់ខែឯណោះ ជួនកាលរឿងនេះអាជ្ញាធរអាចជួយបិទបាំងដែរ»។
ចំណែកផលប៉ះពាល់ដោយសារបញ្ហានេះ លោកអះអាងថា ប្រសិនបើទឹកហូរនាំដីក្រហមធម្មជាតិដែលពុំមានជាតិគីមីនៅក្នុងដីនោះ គឺពុំបណ្ដាលឲ្យគ្រោះថ្នាក់ដល់អាយុជីវិតនោះទេ។ ប៉ុន្តែលោកលើកឡើងថា ប្រសិនមានការប្រើប្រាស់ថ្នាំគីមីក្នុងការធ្វើកសិកម្មផ្សេងៗច្រើននៅតំបន់នោះ ការប្រើប្រាស់ទឹកស្ទឹងវានឹងប៉ះពាល់ដល់សុខភាពរបស់មនុស្ស៖ «ដូចករណីស្ទឹងសែន ដែលហូរចេញពីព្រះវិហារ អី ហើយការសង្ស័យរបស់សហគមន៍វាអាចត្រូវ ព្រោះអីធ្វើឲ្យត្រីវាងាប់ច្រើន។ តែចំពោះស្ទឹងនៅប៉ៃលិន ខ្ញុំថាជាករណីដែលត្រីនៅក្នុងទឹកល្អក់ធ្វើឲ្យត្រីខ្វះអុកស៊ីហ្សែន»។
សេចក្ដីជូនដំណឹងរបស់មន្ទីរបរិស្ថានខេត្តប៉ៃលិន នៅថ្ងៃទី៣១ ខែមីនា បានបកស្រាយថា ខណៈភ្លៀងធ្លាក់ចំតំបន់ប្រើប្រាស់ច្រើនយ៉ាងសំឡូតក្នុងចន្លោះបង្គោលឡាក់៦៨ ឡាក់៦៩ និងឡាក់៧០ ក្នុងភូមិសាស្ត្រចំណុចអូរតាផៃ ធូរេនពីរដើម អូរត្រាវ អូរដូង វាលស្បូវ និងអន្លង់ខៀវ បង្កឲ្យបាក់ច្រោះដី និងទាញយកសំណឹកពីការកកាយដីផ្លូវ បានហូរចូលទៅក្នុងប្រព័ន្ធអូរ ស្ទឹង កាលពីយប់ថ្ងៃទី៣០ មីនា។ ទឹកល្អក់នេះអាចនឹងហូរឆ្លងកាត់ស្ទឹងក្រុងប៉ៃលិន ស្រុកសាលាក្រៅ និងអាចចាក់ចូលទៅដល់ស្ទឹងក្នុងស្រុកបវេល ខេត្តបាត់ដំបង។
លោក គឹម សុខា ឲ្យដឹងទៀតថា ទឹកល្អក់ដែលអាចប៉ះពាល់ដល់ការប្រើប្រាស់របស់ប្រជាពលរដ្ឋមានចំនួន ៧ភូមិ នឹងមានពលរដ្ឋប្រមាណ ៥០០គ្រួសារ។ ប៉ុន្តែពលរដ្ឋអះអាងថា អ្នកប្រើប្រាស់ទឹកស្ទឹងប៉ៃលិន មានរាប់ពាន់គ្រួសារ ហើយប្រសិនបើទឹកស្ទឹងមួយនេះនៅតែមិនអាចប្រើការបានទៀត ពួកគាត់រាប់ពាន់គ្រួសារ នឹងត្រូវចំណាយថវិកាច្រើន ដើម្បីទិញទឹកពីគេដឹកតាមឡានយកមកប្រើប្រាស់ជំនួស ហើយបញ្ហានេះនឹងប៉ះពាល់បន្ថែមទៀតដល់ជីវភាពគ្រួសារប្រចាំថ្ងៃរបស់ពួកគាត់៕
3 comments:
It would be nice if George Soros and all of those others who rather fund riots and chaos would consider cast few of their pennies to fix this [world peace bridge] so those who are less fortunate rather not get their feet wet having a workable crossing.
And why was I-85 bridge in Atlanta Georgia went ka-boom? Yes, Donald Trump was behind it again! And I wonder how many more bridges the "secret" societies are going to blow up in America? And put the blame on pot smokers who discard left-overs onto communication cables in due time ignited the explosion that brought the bridge down. Truth I will buy without a discount for sure.
3:41 am
You're high again ?
5:06 AM Yes, Vietnam is my friend!!! Want Vietnam as your friend too?
Post a Comment