លោក អាណាន់ ដាយ៉ាត ទីប្រឹក្សាផ្ទាល់លោកនាយករដ្ឋមន្ត្រី។ រូបថត ហ្វេសប៊ុក
Wed, 12 July 2017
p
មាស សុខជា
ភ្នំពេញៈ ទីប្រឹក្សាមួយរូបរបស់លោកនាយករដ្ឋមន្ត្រី ហ៊ុន សែន បានជំរុញឲ្យចាត់វិធានការតាមផ្លូវច្បាប់ទៅលើស្ត្រីម្នាក់ដែលបានជេរប្រមាថ និងចោទប្រកាន់លោកនាយករដ្ឋមន្ត្រីថាសម្លាប់លោក កែម ឡី ខណៈដែលសម្ទុះនៃការអំពាវនាវឲ្យរកយុត្តិធម៌ពិតប្រាកដក្នុងរឿងនេះនៅតែបន្តមាន ថ្វីបើឃាតករឈ្មោះ អឿត អាង ហៅ ជួប សម្លាប់ ត្រូវបានតុលាការផ្ដន្ទាទោសជាប់គុក ១ ជីវិតក៏ដោយ ។
លោក អាណាន់ ដាយ៉ាត ទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនដែលកំពុងកាន់អំណាចបានសរសេរលើហ្វេសប៊ុករបស់លោកកាលពីម្សិលមិញដោយបង្ហាញគណនីហ្វេសប៊ុកឈ្មោះ Heng Leakhena ដែលពាក់អាវ និងមួកមានឡូហ្គោគណបក្សសង្គ្រោះជាតិ ចោទប្រកាន់លោកនាយករដ្ឋមន្ត្រី ហ៊ុន សែន ថាសម្លាប់អ្នកវិភាគនយោបាយ លោក កែម ឡី។
ទន្ទឹមនេះទីប្រឹក្សារូបនោះបានអះអាងថាការជេរ ការប្រមាថបែបនេះវាចូលក្នុងបទបរិហារកេរ្តិ៍ជាសាធារណៈមកលើនាយករដ្ឋមន្ត្រី មិនអាចលើកលែងទោសបានឡើយ។
លោកបានបន្ថែមថា៖ «មេធាវីរាជរដ្ឋាភិបាលគប្បីចាត់វិធានការតាមផ្លូវច្បាប់ការពារនាយករដ្ឋមន្ត្រី»។
លោកថា៖ «ការជេរ ការប្រមាថបែបនេះវាមិនត្រឹមតែប៉ះពាល់អង្គនីតិប្រតិបត្តិនោះទេ វាថែមទាំងនាំឲ្យប៉ះពាល់ដល់ស្ថាប័នព្រះមហាក្សត្រផងដែរ»។
នៅលើហ្វេសប៊ុករបស់ Heng Leakhena ដែលបង្ហោះក្នុងអំឡុងខួបមួយឆ្នាំនៃការសម្លាប់លោក កែម ឡី កាលពីចុងសប្តាហ៍មុននៅខេត្តតាកែវ និងបង្ហោះដោយលោក អាណាន់ដាយ៉ាត នៅលើហ្វេសប៊ុករបស់លោកកាលពីម្សិលមិញ ស្ត្រីឈ្មោះ Heng Leakhena បានចោទប្រកាន់លោក ហ៊ុន សែន និងកូនចៅរបស់លោកថាសម្លាប់ លោក កែម ឡី។
ហ្វេសប៊ុករបស់ Heng Leakhena បានសរសេរថា៖ «ហ៊ុន សែន [សម្លាប់ កែម ឡី] គ្មាននរណាទៀតទេ។ កូនចៅគាត់ក៏ជាឃាតករប្រឡាក់ឈាមលោកបណ្ឌិត កែម ឡី ដែរ។ អ្នកគួរតែសរសើរអញ្ជែកយល់ថាលោកបណ្ឌិត កែម ឡី ស្លាប់មានមោទនភាព មានខ្មែរទូទាំងប្រទេសគាំទ្រលោក ហើយមកធ្វើបុណ្យឲ្យគាត់ដោយមិនអស់លុយ»។
Heng Leakhena បានបន្តថា៖ «បើហ៊ុន សែន [ស្លាប់ទៅ] គេនឹងអូសគាត់ដាក់ក្នុងរន្ធកណ្តុរ»។
លោក ប៉ុល ហំម អនុប្រធានគណបក្សសង្គ្រោះជាតិបានច្រានចោលការចោទប្រកាន់ដែលថាគណបក្សសង្គ្រោះជាតិពាក់ព័ន្ធនឹងស្ត្រីឈ្មោះ Heng Leakhena ដោយថ្លែងថាអ្នករាល់គ្នាអាចពាក់អាវ និងមួករបស់គណបក្សសង្គ្រោះជាតិបាន ប៉ុន្តែវាមិនមែនមានន័យថាពួកគេជាសមាជិករបស់គណបក្សសង្គ្រោះជាតិនោះទេ ហើយលោក ប៉ុល ហំម បានអះអាងថាគោលការណ៍របស់គណបក្សសង្គ្រោះជាតិមិនគាំទ្រនរណាម្នាក់ឲ្យជេរប្រមាថ ឬប្រើពាក្យឈ្លើយទៅលើបុគ្គលណាមួយទេ ហើយថានរណាដែលប្រព្រឹត្តផ្ទុយនឹងគោលការណ៍របស់បក្ស បុគ្គលនោះត្រូវតែទទួលខុសត្រូវដោយខ្លួនឯង។
លោកបន្តថា៖ «យើងមិនដឹងថាជានរណាទេ។ គ្មាននរណាឲ្យពាក់អាវគណបក្សជេរបញ្ចោរអ៊ីចឹងទេ។ [យើង] មានការណែនាំមិនឲ្យប្រើពាក្យអសុរោះ ប្រសិនបើគាត់ធ្វើអ៊ីចឹង គាត់ជាអ្នកទទួលខុសត្រូវដោយខ្លួនគាត់»។
អ្នកនាំពាក្យរដ្ឋាភិបាល និងក្រសួងមហាផ្ទៃមិនអាចទាក់ទងសុំអត្ថាធិប្បាយបានទេកាលពីម្សិលមិញ៕ PS
No comments:
Post a Comment