ដោយ វ៉ាន វណ្ណដេត
2017-08-02
សាលាដំបូងខេត្តតាកែវ។ រូបថតថ្ងៃទី២៩ ខែមិថុនា ឆ្នាំ២០១៧
RFA/Yang Chandara
ម្ចាស់គណនីហ្វេសប៊ុក (facebook) ឈ្មោះ ឡា ឆាយ៉ា «La chhaya» គឺលោក លី ឆៃយ៉ា ដែលសមត្ថកិច្ចចោទថាបានបង្ហោះវីដេអូឃ្លីបនៅលើគណនីហ្វេសប៊ុករបស់ខ្លួនថា មានជនជាតិវៀតណាម ដើរចាប់ក្មេងនៅខេត្តតាកែវ ត្រូវបានចៅក្រមស៊ើបសួរនៃសាលាដំបូងខេត្ត សម្រេចឃុំខ្លួនបណ្ដោះអាសន្ននៅពន្ធនាគារខេត្ត បន្ទាប់ពីតំណាងអយ្យការ និងចៅក្រមស៊ើបសួរចប់សព្វគ្រប់។
អ្នកនាំពាក្យសាលាដំបូងខេត្តតាកែវ លោក លឹម សុខន ឲ្យដឹងថា តាមរបាយការណ៍សមត្ថកិច្ច ជនសង្ស័យឈ្មោះ លី ឆៃយ៉ា ដែលបង្ហោះព័ត៌មានវៀតណាម ចាប់ក្មេង គឺជាពូរបស់ក្មេងស្រីរងគ្រោះ៖ «បាទ! គេបញ្ជូនទៅចៅក្រមហើយណា! ចៅក្រមបញ្ជូនទៅពន្ធនាគារជាបណ្ដោះអាសន្ន»។
សមត្ថកិច្ចខេត្តតាកែវ បានចោទម្ចាស់គណនីហ្វេសប៊ុកឈ្មោះ ឡា ឆាយ៉ា «La chhaya» ពីបទក្លែងឯកសារ និងញុះញង់។
ម្ចាស់គណនីហ្វេសប៊ុកឈ្មោះ ឡា ឆាយ៉ា «La chhaya» លោក លី ឆៃយ៉ា កាលពីចុងខែកក្កដា បានបង្ហោះវីដេអូឃ្លីបថា មានករណីជនជាតិវៀតណាម ដើរចាប់ក្មេងនៅក្នុងស្រុកសំរោង ខេត្តតាកែវ។ ភ្លាមៗ សមត្ថកិច្ចបានចុះស្រាវជ្រាវដល់លំនៅឋានក្មេងស្រីនៅភូមិស្វាយទង ឃុំខ្វាវ ស្រុកសំរោង តែបញ្ជាក់ថាមិនមែនជារឿងពិត និងជាករណីយល់ច្រឡំ។
សង្គមស៊ីវិលស្នើគួរតែអប់រំ ឬព្រមានឲ្យម្ចាស់គណនីហ្វេសប៊ុកសុំទោសជាសាធារណៈ ជាជាងការប្ដឹងផ្តល់ និងកាត់ទោសដាក់ពន្ធនាគារ៕
No comments:
Post a Comment