Khmer Circle: "Ten thousand years of friendship", eh? Keep on plundering and raping the country while you still can...
ដោយ អាស៊ីសេរី
2017-10-10
សកម្មភាពដឹកជញ្ជូនឈើពីក្នុងឧទ្យានជាតិវីរជ័យ ក្នុងខេត្តរតនគិរី ប្រទេសកម្ពុជា ទៅប្រទេសវៀតណាម កាលពីខែកុម្ភៈ ឆ្នាំ២០១៧។ Photo courtesy of EIA
Photo courtesy of EIA
កម្មករធ្វើការនៅក្រុមហ៊ុនវារីអគ្គិសនីសេសានក្រោមពីរ នៅខែត្រស្ទឹងត្រែងអះអាងថា សន្ទុះនៃការដឹកជញ្ជូនឈើមូលចូលបាតអាង នៃទំនប់វារីអគ្គិសនីសេសានក្រោមពីរ នៅតែបន្តកើនឡើងទាំងយប់ថ្ងៃ បើទោះបីជាទំនប់នេះ ស្ថាបនារួចហើយក្ដី។ ពួកគាត់ចាត់ទុកអាជីវកម្មឈើនៅតំបន់នោះថា ជាឧក្រិដ្ឋកម្មព្រៃឈើបំផ្លាញធនធានធម្មជាតិជាប្រព័ន្ធនៅកម្ពុជា។
កម្មករដែលធ្វើការនៅទំនប់វារីអគ្គិសនីសេសានក្រោមពីរ នៃខែត្រស្ទឹងត្រែងរកឃើញថា ចលនាកាប់បំផ្លាញព្រៃឈើនៅតំបន់ឆ្ងាយនៃស្រុកសេសាន និងស្រុកសៀមប៉ាង រួចដឹកបន្លំចូលក្រុមហ៊ុនបាតអាង នៃទំនប់វារីអគ្គិសនីសេសានក្រោមពីរនៅតែជាប្រធានបទក្ដៅ ដែលមន្ត្រីសង្គមស៊ីវិល និងពលរដ្ឋបារម្ភថា ទំហំព្រៃឈើទាំងមូល នឹងត្រូវរលាយទាំងស្រុងនៅពេលដ៏ខ្លីខាងមុខនេះ បើរដ្ឋាភិបាល នៅតែបណ្ដោយឲ្យបទល្មើសព្រៃឈើបន្តកើតមានឡើង ពុំមានការបង្ក្រាប។
កម្មករដែលថ្លែងសុំមិនបញ្ចេញឈ្មោះ ព្រោះបារម្ភពីសុវត្ថិភាព ឲ្យដឹងនៅថ្ងៃទី១០ តុលា ថា មានមនុស្សជាច្រើនក្រុមនាំគ្នាកាប់ឈើនៅតំបន់ឆ្ងាយ នៃស្រុកសេសាន និងស្រុកសៀមប៉ាង ដោយប្រើគោយន្ត និងរថយន្តប៉ាកុង ជាមធ្យោបាយដឹកជញ្ជូន រួចមកទុកនៅបាតអាងទំនប់វារីអគ្គិសនីសេសានក្រោមពីរ។ លើសពីនេះ នៅក្បែរការដ្ឋានសាងសង់ទំនប់ មានម៉ាស៊ីនអារច្រៀកឈើពីរទីតាំងធំៗ មានកម្មកររាប់រយនាក់ អារច្រៀកឈើមូលជាបន្ទះ រួចដឹកចេញក្រៅតាមរថយន្តយីឌុប ក្នុងមួយយប់ៗចាប់ពី ៨គ្រឿង ដល់ជាង ២០គ្រឿង។ ការបន្លំឈើចូលបាតអាងនេះ ត្រូវបានក្រុមហ៊ុនឃុបឃិតជាមួយស្ថាប័នពាក់ព័ន្ធ ដោយសម្គាល់ថា ជាឈើស្របច្បាប់ ឬហៅថា ប៉េ.សេ (PC) រួច ទើបគេដឹកចេញទៅក្រៅប្រទេស និងខែត្រនានា៖ «បន្ទាប់ពីមកសម្ពោធបិទទ្វារទឹក របស់សម្ដេចនាយកនេះហើយ រយៈពេលប្រហែល ៤ទៅ ៥ថ្ងៃ ពីថ្ងៃដែលសម្ពោធហើយមក ការចរាចរឈើទាំងយប់ ទាំងថ្ងៃ ជាឈើច្រៀក មានគោយន្តកន្ត្រៃ មានរថយន្តរ៉េវ មានរថយន្តយីឌុបដឹកឈើយ៉ាងគគ្រឹកគគ្រេង»។
បុរសដដែលបន្តថា កាលពីចុងខែកញ្ញា មានរថយន្តយីឌុបដឹកឈើចេញពីតំបន់នោះ ១៤គ្រឿង ហើយនៅយប់ថ្ងៃទី១០ តុលាការ រថយន្តយីឌុប ៩គ្រឿង និងរថយន្តប៉ាកុង ៥គ្រឿងបានដឹកឈើចេញ លើខ្នងទំនប់ទាំងយប់ ដែលទំនងជាយកទៅប្រទេសវៀតណាម។ លោកបញ្ជាក់ថា ទំហំផ្ទៃអាងទំនប់មានទំហំជាង ៣ម៉ឺនហិកតារ គឺក្រុមហ៊ុនកាប់ឈើសំអាតអស់ហើយ ហើយឈើដែលគេដឹកជញ្ជូនចេញក្រៅ មានមុខកាត់ចាប់ពី ៤តឹកឡើងដែលទើបអារថ្មីៗ គឺគេដឹកពីតំបន់ផ្សេងៗ ដើម្បីបន្លែងជាឈើស្របច្បាប់។ បញ្ហានេះគឺជាភស្តុតាងបញ្ជាក់ថា អាជីវកម្មឈើខុសច្បាប់នេះ ជាឧក្រិដ្ឋកម្មព្រៃឈើទ្រង់ទ្រាយធំ ដែលបំផ្លាញធនធានធម្មជាតិ និងជីវចម្រុះជាប្រព័ន្ធនៅកម្ពុជា៖ «ការចរាចរឈើលើខ្នងទំនប់ ដឹកឈើចេញរាល់យប់ រាល់ថ្ងៃ មិនមានការទប់ស្កាត់ហ្នឹង លោកមេត្តាចាត់វិធានការឲ្យបានក្ដៅ ដូចចាប់ដូចបក្សប្រឆាំងដែលមើល។ ឧក្រិដ្ឋកម្មព្រៃឈើនេះ គឺជាជនក្បត់ជាតិមួយ ដែលបំផ្លាញធនធានធម្មជាតិយ៉ាងច្បាស់ មានភស្តុតាងពិតប្រាកដណាស់ ពុំមែនចេះតែចោទនោះទេ»។
ផ្ទៃអាងទំនប់វារីអគ្គិសនីសេសានក្រោមពីរ មានផ្ទៃដី ៣៦.០០០ហិកតារ ឋិតក្នុងស្រុកសេសាន ខែត្រស្ទឹងត្រែង ដែលមានក្រុមហ៊ុនឈ្មោះ អាំង អែន អាសូស៊ីអែត ឡយ័រ (Ang & Associate Lawyer Co., Ltd) របស់ឧកញ៉ា គិត ម៉េង ទទួលសិទ្ធិសម្អាតបាតអាងតាំងពីឆ្នាំ២០១២។
មេឃុំស្រែគរមកពីគណបក្សសង្គ្រោះជាតិ លោក សៀក មេគង្គ ចាត់ទុកការលើកឡើងរបស់ពលរដ្ឋថា ជារឿងត្រឹមត្រូវ ក៏ប៉ុន្តែឋានៈត្រឹមជាមេឃុំ ពុំមានអំណាចគ្រប់គ្រាន់ក្នុងការទប់ស្កាត់បទល្មើសព្រៃឈើនេះបានទេ បានត្រឹមតែរាយការណ៍ទៅថ្នាក់លើ ហើយថ្នាក់លើឆ្លើយថា សំអាតបាតអាង និងហួសពីសមត្ថភាពអាជ្ញាធរស្រុក។ លោកថា កន្លងទៅលោកធ្លាប់រិះគន់ពីភាពមិនប្រក្រតីនៃអាជីវកម្មឈើនៅតំបន់នោះដែរ ក៏ប៉ុន្តែអាជ្ញាធរខែត្រចោទប្រកាន់លោកថា រិះគន់ដើម្បីកេងចំណេញនយោបាយទៅវិញ៖ «អំណាចវិមជ្ឈការរាល់ថ្ងៃនេះ គ្រាន់តែចែងថា អាជ្ញាធរមានសិទ្ធិគឺក្នុងដែនដីសមត្ថកិច្ចរបស់ខ្លួនមានសិទ្ធិការពារធនធានធម្មជាតិ តែផ្ទុយទៅវិញបើការពារវា មានបញ្ហាប្រឈមដល់យើង។ ព្រោះអំណាចវិមជ្ឈការមានតែក្នុងក្រដាសទេ តែការអនុវត្តមិនបានទូលំទូលាយ ឲ្យតែធ្វើទៅមានបញ្ហា»។
មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខែត្រស្ទឹងត្រែង លោក ហូ សំអុល អង្កេតឃើញថា ចលនាកាប់បំផ្លាញព្រៃឈើ និងដឹកជញ្ជូនឈើខុសច្បាប់នៅតំបន់ឆ្ងាយ រួចបន្លំចូលបាតអាង នៅតែកើតឡើងជាប្រព័ន្ធច្រើនឆ្នាំមកហើយ នៅពុំទាន់មានស្ថាប័នរដ្ឋាភិបាលណាមួយបង្ហាញជំហរច្បាស់លាស់ស៊ើបអង្កេត និងទប់ស្កាត់ឲ្យមានប្រសិទ្ធភាពទេ។ លោកអង្កេតឃើញថា លោកនាយករដ្ឋមន្ត្រី បានទៅសម្ពោធបិទទ្វារទឹកជាស្ថាពរនៅទំនប់វារីអគ្គិសនីសេសានក្រោមពីររួចហើយកាលពីចុងខែកញ្ញា ហេតុនេះការដឹកឈើចេញពីតំបន់នោះដោយយកលេសថា សំអាតបាតអាងលែងមានន័យហើយ ព្រោះផ្ទៃអាងបច្ចុប្បន្នក្រុមហ៊ុនសំអាតអស់ហើយ ដើម្បីផ្ទុកទឹកបំពេញតួប៊ីន៖ «ការសំអាតបាតអាងវាអស់ហើយ អស់មួយឆ្នាំពីឆ្នាំមុនហើយ។ គេលេសសំអាតបាតអាង គឺជាឈើខាងក្រៅមកដាក់ក្នុងផ្ទៃអាងហ្នឹង និយាយទៅចង់បន្លំ និងយកលេស តែឥឡូវអស់លេសហើយ គឺពោលពេញដោយទឹកហើយ តើមានព្រៃឈើណាទៀត»។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង ធ្លាប់ជំរុញឲ្យក្រសួងពាក់ព័ន្ធស៊ើបអង្កេតរឿងនេះដែរ ខណៈដែលលោករកឃើញថា សកម្មភាពកាប់ឈើក្រៅផ្ទៃអាងកើតមានច្រើនឆ្នាំណាស់មកហើយ និងមានឈ្មួញកណ្ដាលដឹកឈើពីតំបន់ព្រៃការពារនៃស្រុកសៀមប៉ាង ដើម្បីបម្លែងជាឈើស្របច្បាប់ រួចដឹកចេញក្រៅ។
ទីភ្នាក់ងារស៊ើបអង្កេតបរិស្ថាន (EIA) បានរកឃើញថា ចន្លោះពីខែវិច្ឆិកា ឆ្នាំ២០១៦ ដល់ខែមីនា ឆ្នាំ២០១៧ ដែលស្ថិតក្នុងរយៈពេលនៃបម្រាមរបស់រដ្ឋាភិបាលកម្ពុជា ឈើខុសច្បាប់ចំនួនប្រមាណ ៣០ម៉ឺនម៉ែត្រគូប ត្រូវបានកាប់ ជាពិសេសពីតំបន់ព្រៃការពារក្នុងឧទ្យានជាតិ រួចដឹកយកទៅប្រទេសវៀតណាម។ របាយការណ៍របស់ អ៊ី.អាយ.អេ ចេញផ្សាយនៅថ្ងៃទី៨ ឧសភា ស្ដីពីវិនាសកម្មព្រៃឈើនៅកម្ពុជា ដែលមានចំណងជើងថា "ជនល្មើសមុខដដែល៖ អាជីវកម្មជួញដូរឈើខុសច្បាប់របស់វៀតណាម គ្មានទីបញ្ចប់" ស្រាវជ្រាវឃើញថា មន្ត្រីកម្ពុជា ឃុបឃិតជាមួយយោធាអាជ្ញាធរវៀតណាម ដែលពុករលួយ បានប្រែរូបឈើខុសច្បាប់ពីកម្ពុជា ទៅជាឈើស្របច្បាប់វិញ ដើម្បីនាំចេញទៅលក់នៅទីផ្សារអន្តរជាតិ។ ក្រោយពីរបាយការណ៍របស់ អ៊ី.អាយ.អេ ចេញផ្សាយជាសាធារណៈ ក្រសួងកសិកម្ម រុក្ខាប្រមាញ់ និងនេសាទ ទទួលស្គាល់ថា ការកាប់ឈើខុសច្បាប់ក្នុងទឹកដីកម្ពុជា កំពុងកក្រើកឡើងវិញ ហើយអះអាងថា ខ្លួនកំពុងស៊ើបអង្កេតរឿងនេះ៕
No comments:
Post a Comment