លោក មាន ឫទ្ធិ
2019-07-01
rfa
រដ្ឋមន្ដ្រីក្រសួងការពារជាតិកម្ពុជា លោក ទៀ បាញ់ (ហ្វេសប៊ុក)។ មន្ដ្រីកងទ័ពជើងទឹកកម្ពុជា ចូលរួមពិធីក្រោយពេលធ្វើសមយុទ្ធយោធារួច កាលពីថ្ងៃទី២៦ ខែកុម្ភៈឆ្នាំ២០១៦ (Reuters)។
ហ្វេសប៊ុក/Reuters
រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ បដិសេធព័ត៌មានដែលថា ក្រសួងការពារជាតិ មិនអនុញ្ញាតឲ្យសហរដ្ឋអាមេរិក ជួយជួសជុលអាគារបណ្តុះបណ្តាល និងឃ្លាំងផ្ទុកនាវា នៅមូលដ្ឋានកងទ័ពជើងទឹករាម។ ថ្លែងប្រាប់អាស៊ីសេរី នៅមុនម៉ោងផ្សាយនេះបន្តិច លោក ទៀ បាញ់ ថា ក្រសួងការពារជាតិបានជូនដំណឹងច្បាស់លាស់រួចហើយទៅភាគីអាមេរិកជុំវិញករណីនេះ។
TeaBanh_Small
លោកថា កម្ពុជា មិនដែលធ្លាប់បដិសេធម្តងណាឡើយជុំវិញបញ្ហានេះ ហើយថា កម្ពុជានៅតែរីករាយ និងចាំទទួលស្វាគមន៍ចំពោះជំនួយនានា។ ក៏ប៉ុន្តែ លោក ទៀ បាញ់ គូសបញ្ជាក់ថា ទីតាំងដែលបម្រុងនឹងជួសជុលនោះ ត្រូវដូរទៅទីកន្លែងផ្សេងទៀត ដើម្បីអភិវឌ្ឍន៍តំបន់រាមនេះ ដោយលោកបដិសេធផ្តល់ព័ត៌មានលម្អិតអំពីទីតាំងថ្មីនោះ។
«គ្មានរឿងអីដែលយើងត្រូវបដិសេធអីទាំងអស់។ ដូច្នេះរឿងនេះ កុំនិយាយហួសពីនេះ វាអត់មានអីលើសពីនេះទេ។ យើងត្រូវការអភិវឌ្ឍន៍នៅតំបន់រាមហ្នឹង។ ដូច្នេះទីតាំងហ្នឹងគឺយើងរៀបចំ ទៅធ្វើនៅកន្លែងផ្សេង គឺឲ្យវាបានសមស្របហ្នឹង និងតាមតម្រូវការចាំបាច់របស់ខាងសន្តិសុខលំហរសមុទ្ររបស់យើងដែលមានមួយផ្នែក កាលមុននេះគឺសហរដ្ឋអាមេរិក អូស្ត្រាលី និងជប៉ុន បានជួយរៀបចំទីបញ្ជាការមុខនៅទីនោះ។ ដូច្នេះ គឺយើងនៅរក្សាកន្លែងនោះ ហើយយើងក៏នៅតែស្វាគមន៍ដែរ។ យើងក៏អរគុណណាស់ចំពោះការរៀបចំហ្នឹង។ តែឥឡូវយើងត្រូវរៀបចំកន្ឡែងមួយថ្មី ឲ្យមានការសមស្របមានការសមស្របជាង មានការរីកចម្រើនជាង ធ្វើឲ្យវាកាន់តែល្អឡើង។»
ការពន្យល់របស់លោក ទៀ បាញ់ នេះ កើតមានឡើងក្រោយពេលក្រសួងការពារជាតិសហរដ្ឋអាមេរិក បានស្នើភាគីកម្ពុជា ឲ្យពន្យល់ជុំវិញមូលហេតុដែលកម្ពុជា មិនព្រមទទួលយកសំណើរបស់ភាគីអាមេរិក ក្នុងការជួយជួសជុលអាគារបណ្តុះបណ្តាលនៅឯមូលដ្ឋានកងទ័ពជើងទឹករាម។ ទីភ្នាក់ងារសារព័ត៌មានអង់គ្លេស រ៉យទ័រ រាយការណ៍ នៅថ្ងៃទី ០១ កក្កដា ថា ការបដិសេធនេះ បណ្តាលឲ្យកាន់តែមានការសង្ស័យអំពីលទ្ធភាពនៃផែនការ ដែលកម្ពុជាអាចអនុញ្ញាតឲ្យចិនកសាងមូលដ្ឋានយោធារបស់ខ្លួន ក្នុងខេត្តកោះកុង។
ជុំវិញការសង្ស័យនេះ លោក ទៀ បាញ់ ជាថ្មីម្តងទៀតបដិសេធថា ជាព័ត៌មានមិនពិត និងថ្លែងការពារថា រដ្ឋាភិបាល គ្រាន់តែអនុញ្ញាតឲ្យចិនធ្វើការវិនិយោគ និងអភវិឌ្ឍន៍តំបន់នោះ ទៅជាតំបន់ទេសចរណ៍ប៉ុណ្ណោះ ក្រោមរូបភាពជាការផ្តល់សម្បទាន។
«ហើយរឿងថាមូលដ្ឋាននេះ មូលដ្ឋាននោះ រឿងកោះកុង រឿងនោះគឺជារឿងផ្សេង ខុសពីរឿងការអភិវឌ្ឍន៍កងយោធពលខេមរភូមិន្ទស្រឡះ។ គេធ្វើកិច្ចការវិនិយោគ កិច្ចការទេសចរណ៍ ដែលទទួលការសម្បទានពីរដ្ឋាភិបាលដើម្បីកសាងតំបន់ផ្សេងៗ ទៅជានាំគ្នាបកស្រាយទ្រហឹងអឺងកងថា ចុះថាចេះ។ អាហ្នុងគឺទៅតាមឆន្ទៈរបស់អ្នកដែលចង់ឲ្យវាទៅអញ្ចឹង។»
ជារឿយៗ រដ្ឋាភិបាលរបបក្រុងភ្នំពេញ តែងបដិសេធព័ត៌មានដែលថា ខ្លួនអាចនឹងមានផែនការអនុញ្ញាតឲ្យចិនសាងសង់មូលដ្ឋានកងទ័ពនៅខេត្តកោះកុងនេះ ដោយចាត់ទុកថា ជាព័តមានមិនពិត។ របបក្រុងភ្នំពេញតែងបញ្ជាក់ថា រដ្ឋធម្មនុញ្ញកម្ពុជា មិនអនុញ្ញាតឲ្យមានមូលដ្ឋានកងទ័ពបរទេសនៅលើទឹកដីរបស់ខ្លួនឡើយ។ ក៏ប៉ុន្តែ របបនេះ នៅមិនទាន់បានបង្ហាញជំហរឲ្យបានច្បាស់លាស់នៅឡើយទេ ជុំវិញការអនុញ្ញាតឲ្យភាគីអន្តរជាតិ ចុះទៅធ្វើការត្រួតពិនិត្យនៅ ខេត្តកោះកុងដែលមានការសង្ស័យនោះឡើយ៕
No comments:
Post a Comment