អង្គការ​​សង្គម​​ស៊ីវិល​​ជិត​​ ២០០ ​​ថ្កោលទោស​លោក ហ៊ុន សែន ទៅ​ជូប​​មេដឹកនាំ​​យោធា​​ភូមា

ដោយ ទីន ហ្សាការីយ៉ា
2022-01-04
 

លោក ហ៊ុន សែន ទទួលជួបរដ្ឋមន្ត្រីការបរទេសភូមាមុនពេលទៅទស្សនកិច្ចនៅប្រទេសភូមានៅថ្ងៃទី៨ និងទី៩ ខែមករា ឆ្នាំ២០២២។
រូប៖ ហ្វេសប៊ុក SMP

 

ក្រុម​អង្គការ​សង្គមស៊ីវិល​ជិត ​២០០ ​ស្ថាប័ន បាន​ចេញ​​សេចក្ដីថ្លែងការណ៍​រួម​គ្នា​កាល​ពី​ថ្ងៃទី៤ ខែមករា ម្សិល​មិញ ថ្កោលទោស​លោក​នាយករដ្ឋមន្រ្តី ហ៊ុន សែន ដែល​​គាំទ្រ​មេដឹកនាំ​រដ្ឋប្រហារយោធា​ភូមា ឬ​មីយ៉ានម៉ា (Myanmar)​។

ក្រុមអង្គការ​សង្គមស៊ីវិល​ទំាង​នេះ បាន​លើក​ឡើង​ថា លោក ហ៊ុន សែន គាំទ្រ​របប​សឹក​មីយ៉ាន់ម៉ា ឬ​ភូមា គឺ​ជាការ​គំាទ្រ​អំពើ​ឧក្រិដ្ឋកម្ម​ប្រឆាំង​មនុស្ស​ជាតិ ឧក្រិដ្ឋកម្ម​សង្រ្គាម និង​អំពើ​ប្រល័យ​ពូជសាសន៍​ផងដែរ។ សេចក្ដីថ្លេងការណ៍​បញ្ជាក់​ថា របប​សឹក​ភូមា ដែល​ដឹកនាំ​ដោយ​លោក ម៊ីន អុងលាំង (Min Ungliang) ​បាន​ធ្វើ​រដ្ឋប្រហារ​រដ្ឋាភិបាល​ស៊ីវិល​របស់​អ្នកស្រី អ៊ុង សានសូជី ​(Aung Sansukyi)​ វាមិន​ត្រឹមតែ​បង្ក​ឲ្យមានការ​ឈឺចាប់​ដល់​ប្រជាពលរដ្ឋ​ភូមា​ប៉ុណ្ណោះ​ទេ​ តែថែម​ទាំង​បាន​បង្កការ​គំរាម​កំហែង​ដល់​សន្តិភាព និង​ស្ថេរភាព​នៅក្នុង​តំបន់​ទាំង​មូល។

ក្រុម​អង្គការ​សង្គម​ស៊ីវិល​ជិត​២០០ស្ថាប័ននោះ រួមមមាន អង្គការ​សហជីពស្រ្តីភូមា​ (Burmese Women’s Union)​ សមាគម​​មិត្តភាព​​មីយ៉ាន់ម៉ា​ (Burmese Friendship Association)​​ អង្គការ​ខារ៉ាត​កម្ពុជា​ (CAHRAD)​ អង្គការ Zomi Community South Australia និងអង្គការ Burmese Rohingya Association in Japan ជាដើម។

សេចក្ដីថ្លែងការណ៍​រួម​ថ្កោលទោស នាយករដ្ឋមន្ត្រី​កម្ពុជានេះ ធ្វើឡើង​បន្ទាប់ពី​លោកហ៊ុន សែន បាន​ប្រកាស​ជា​ថ្មីថា លោកនឹង​ទៅ​ធ្វើទស្សនកិច្ច​នៅ​ប្រទេស​ម៊ីយ៉ាន់ម៉ា នៅថ្ងៃទី៨ ដល់ថ្ងៃទី៩ ខែមករានេះ​ដដែល បើ​ទោះ​បី​មាន​​ការ​​បំផ្ទុះ​គ្រាប់​បែក​​នៅ​ក្បែរ​ស្ថានទូត​ខ្មែរ​នៅ​ប្រទេស​ភូមា​ក៏​ដោយ។

សេចក្ដីថ្លែងការណ៍​បញ្ជាក់​ថា ការគាំទ្រ​របប​យោធា​គឺបង្ក​គ្រោះថ្នាក់​ដល់​ប្រជាពលរដ្ឋ​កាន់​តែ​ច្រើន​ និង​ ជាការ​ប្រមាថ​ដល់​ប្រជាជន​មីយ៉ាន់ម៉ា និង​កម្ពុជា ​ហើយ​ថែមទាំង​ធ្វើឱ្យ​ប៉ះពាល់​ដល់​ភាព​ជឿជាក់​លើ​អាស៊ាន​ក្នុង​អំឡុង​ពេល​លោក ហ៊ុន សែន ធ្វើជា​ប្រធាន​ប្ដូរវេន​អាស៊ាន​នៅ​ឆ្នាំ២០២២នេះ។ លើស​ពី​នេះ​ទៀត ការ​រំលោភ​សិទ្ធិមនុស្ស និង​ឧក្រិដ្ឋកម្ម​ដ៏ឃោរឃៅ​ដែល​ប្រព្រឹត្ត​ដោយ​លោក ហ៊ុន សែន​ និង លោក ម៊ីន អុងលាំង Min Aung Hlaing ត្រូវ​តែ​បញ្ចាប់។ អាស៊ាន​ត្រូវ​តែ​ស្ដារ​លទ្ធិប្រជាធិបតេយ្យ និង​ការគោរព​សិទ្ធិមនុស្ស​ឡើង​វិញ ទាំងនៅ​កម្ពុជា និង​មីយ៉ាន់ម៉ា។

គិត​មកទល់​ពេល​នេះ របប​សឹក​មីយ៉ាន់ម៉ា បាន​សម្លាប់​មនុស្ស​ចំនួន១៣៩៨នាក់​ហើយ​ រួម​ទាំង​កុមារ​ផង និង​ មនុស្សជិត​១២០០​នាក់​ផ្សេង​ទៀត​ កំពុង​ជាប់​ឃុំឃាំង។ របបសឹក​ បាន​ធ្វើទារុណកម្ម​អ្នក​ជាប់​ឃុំ​ទាំង​នោះ រួមមាន ការ​បង្អត់​អាហារ ទឹក ការធ្វើឃាត ការចាប់រំលោភស្រ្តី រំលោភ​បូក​ទាំង​ក្នុង​និង​ក្រៅ​ពន្ធនាគារ​ជា​ដើម៕ការធ្វើឃាត ការចាប់រំលោភស្រ្តី រំលោភ​បូក​ទាំង​ក្នុង​និង​ក្រៅ​ពន្ធនាគារ​ជា​ដើម៕